“Ia Faatumauina o Outou Loto”
“Ia Faatumauina o Outou Loto”
“Ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua.”—EPERU 10:36.
1, 2. (a) O le ā na tupu i nisi Kerisiano i le uluai senituri? (e) Aisea e faigofie ai ona vaivai le faatuatua?
I TUSITALA uma lava o le Tusi Paia, e leai se tasi e sili atu ona ia taʻua soo le faatuatua na i lo le aposetolo o Paulo. Ma e masani pea ona ia taʻua i latou o ē na vaivai pe na mou atu lo latou faatuatua. Mo se faaaoaoga, o Umenaio ma Alesana na “faavaatuʻia i [laua] i la le faatuatua.” (1 Timoteo 1:19, 20) O Tema na ia lafoaia Paulo talu ai sa “manao [o] ia i lenei olaga.” (2 Timoteo 4:10) O nisi, e ala i a latou gaoioiga lē faakerisiano, ma lē faamoemoeina, na latou ‘faafitia ai le faatuatua.’ O isi na faaseseina i latou e le poto sese ma “ua sese ai i latou i le faatuatua.”—1 Timoteo 5:8; 6:20, 21.
2 Aisea na lē taulau ai na Kerisiano faauuina i nei auala? Manatua foi, “o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.” (Eperu 11:1) Tatou te faaalia le faatuatua i mea e lē o mafai ona tatou vaai atu i ai. Tatou te lē manaomia le faatuatua mo mea o loo tatou vaai i ai. E faigofie atu ona galue ia maua le tamaoaiga o loo vaaia na i lo oa faaleagaga e lē o vaaia. (Mataio 19:21, 22) E tele mea e vaaia—e pei “o le tuʻinanau o le tino, ma le tuʻinanau o mata”—e matuā faatosina mai i o tatou tino augavale ma mafai ai ona faavaivaia lo tatou faatuatua.—1 Ioane 2:16.
3. O le ā le ituaiga o faatuatua e ao i se Kerisiano ona ati ae?
3 Ae ua faapea mai Paulo, “e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.” Sa faapena le faatuatua o Mose. Sa “faanaunau o ia i le taui” ma “faamalosi o ia pei o sē iloa atu i le le o vaaia.” (Eperu 11:6, 24, 26, 27) O le ituaiga faatuatua lenei e manaomia e se Kerisiano. E pei ona taʻua i le mataupu na muamua atu, sa avea Aperaamo ma faaaoaoga lelei o lenei vala.
Le Faaaoaoga a Aperaamo i le Faatuatua
4. Na faapefea ona aafia le gasologa o le olaga o Aperaamo i lona faatuatua?
4 Sa nofo Aperaamo i Uro ina ua ia maua le folafolaga a le Atua faapea o le a avea o ia ma tamā o le fanau lea o le a manuia ai tagata o nuu uma. (Kenese 12:1-3; Galuega 7:2, 3) E faavae aʻe i lena folafolaga, sa usiusitai ai Aperaamo ia Ieova, i le alu atu muamua i Karana ona toe alu atu lea i Kanana. O iina, na folafola ai e Ieova o le a ia avatua le laueleele i le fanau a Aperaamo. (Kenese 12:7; Neemia 9:7, 8) Peitai, o le tele o mea na folafola e Ieova sa faatoʻā faataunuu ina ua mavae ona maliu Aperaamo. Mo se faataitaiga, e lei maua e Aperaamo lava ia se vaega o le laueleele o Kanana—seʻi vaganā le ana o Makapelu, lea na ia faatauina e avea ma fanuatanu. (Kenese 23:1-20) Peitai, sa ia faatuatua pea i fetalaiga a Ieova. Ae sili ai, sa ia faatuatua atu “i se aai ua faavaeina, o lona mataisau ma le tufuga o le Atua lea.” (Eperu 11:10) O le faatuatua lena na faatumauina o ia i lona olaga atoa.
5, 6. I le ā le auala na tofotofoina ai le faatuatua o Aperaamo e tusa o le folafolaga a Ieova?
5 Ua matauina faapitoa lenei mea e tusa ai o le folafolaga faapea o le a avea le fanau a Aperaamo o se nuu tele. Ina ia tupu lenei mea, sa manaomia ai e Aperaamo se atalii, ma na umi se taimi na ia faatalitali ai faatoʻā faamanuiaina o ia i se atalii. Tatou te lē o iloa po o le ā lona matua i le taimi na ia uluai faalogo ai i le folafolaga a le Atua, peitai ina ua ia alu atu i le malaga umi i Karana, o le taimi lena e lei avatua e Ieova se atalii ia te ia. (Kenese 11:30) Sa lava le taimi na nofo ai o ia i Karana e na te ono ‘faaputu ai ni oloa ma maua ni tagata,’ ma ina ua alu atu o ia i Kanana, sa 75 tausaga lona matua, ae o Sara ua 65. Peitai, e lei iai lava so la atalii. (Kenese 12:4, 5) Ina ua 70 ma ona tupu tausaga o Sara, sa ia manatu ai faapea ua loomatua tele o ia ua lē mafai ai ona ia fanauina mo Aperaamo se tama. O lea, i le mulimuli atu i tu masani i na taimi, sa ia avatu ai lana auauna fafine o Akara ia Aperaamo, ona maua ai lea e Aperaamo se atalii mai ia te ia. Peitai e lē o le atalii lena na folafolaina. Mulimuli ane, ona tutuli ese ai lea o Akara ma lana tama, o Isamaeli. Peitai, ina ua faatoga atu Aperaamo mo i laua, ona folafola mai lea e Ieova le faamanuiaina o Isamaeli.—Kenese 16:1-4, 10; 17:15, 16, 18-20; 21:8-21.
6 I le taimi atofaina a le Atua lava ia—o se taimi matuā umi lava talu ona mavae lo la faalogoina o le folafolaga—na maua ai loa e Aperaamo ua 100 ona tausaga ma Sara ua 90 ona tausaga se pepe tama, o Isaako. Maeu se ofoofogia atonu na iai! Mo lenei ulugalii matutua, sa toetoe lava pei o se toetu ina ua mafai e o la tino sa “oti” ona toe aumaia ai se ola fou. (Roma 4:19-21) Sa umi tele ona faatalitali, ae ina ua iu ina faataunuu le folafolaga, sa faafiafiaina i le tama na faatalitali i ai.
7. E faapefea ona fesootai atu le faatuatua i le onosai?
7 O le faaaoaoga a Aperaamo ua faamanatu mai ai ia i tatou faapea, e lē tatau ona iai le faatuatua mo na o sina taimi puupuu. Sa faafesootai e Paulo le faatuatua i le onosai ina ua ia tusi: “Ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua. . . . O i tatou e le o ni e tuumuli i le malaia, a o ni e faatuatua e ola ai le agaga.” (Eperu 10:36-39) E toatele ua umi le taimi o faatalitali mo le faataunuuga o le folafolaga. O nisi sa faatalitali i o latou olaga atoa. O le malosi o lo latou faatuatua ua faatumauina ai i latou. Ma, i le pei o Aperaamo, o le a latou maua ai le taui i le taimi atofaina a Ieova.—Sapakuka 2:3.
Faalogo Atu i le Atua
8. E faapefea ona tatou faalogo atu i le Atua i aso nei, ma aisea o le a faamalosia ai lo tatou faatuatua i lena mea?
8 Pe ā ma le fa ni mea sa faamalosia ai le faatuatua o Aperaamo, ma o mea foi na e mafai ona fesoasoani ia i tatou. Muamua, sa ia faaalia lona ‘talitonu i le Atua’ e ala i lona gauai atu pe a fetalai Ieova. O lea, sa ese ai o ia mai tagata Iutaia i aso o Ieremia, o ē na talitonu ia Ieova ae sa lē faatuatua i ana fetalaiga. (Ieremia 44:15-19) I aso nei, o loo fetalai mai Ieova ia i tatou e ala mai i le Tusi Paia, lana Afioga faagaeeina, lea na taʻua e Peteru ua pei o “se molī e mumū i le mea pogisa . . . i o outou loto.” (2 Peteru 1:19) Pe a tatou faitauina ma le naunautai le Tusi Paia, ona ‘tausia ai lea o i [tatou] i upu o le faatuatua.’ (1 Timoteo 4:6; Roma 10:17) E lē gata i lea, i nei aso e gata ai, o loo saunia mai ai e “le auauna faamaoni ma le mafaufau . . . mea e ʻai [faaleagaga] i ona itu aso,” o taiala i le faatatauina o mataupu silisili o le Tusi Paia ma le malamalamaga i valoaga o le Tusi Paia. (Mataio 24:45-47) O le faalogo atu ia Ieova e ala i nei sauniuniga e matuā manaomia lava mo le iai o se faatuatua malosi.
9. O le ā e iu i ai pe afai tatou te talitonu moni i le faamoemoe faa-Kerisiano?
9 Sa fesootai vavalalata atu le faatuatua o Aperaamo i lona faamoemoe. “Na ia faatuatua ma le faamoemoe . . . ina ia avea o ia ma tamā o nuu e tele.” (Roma 4:18) O le mea lona lua lenei e mafai ona fesoasoani ia i tatou. E lē tatau lava ona tatou faagaloina o Ieova “na te tauia mai o e matuā saili ia te ia.” Na taʻua e le aposetolo o Paulo faapea: “Tatou te galulue ma finafinau ai, auā tatou te faamoemoe i le Atua soifua.” (1 Timoteo 4:10) Afai tatou te talitonu moni i le faamoemoe faa-Kerisiano, o le a avea ai le faagasologa atoa o lo tatou olaga o se faailoga o lo tatou faatuatua, e pei ona sa iai Aperaamo.
Talanoa Atu i le Atua
10. O le ā le ituaiga tatalo o le a faamalosia ai lo tatou faatuatua?
10 Sa talanoa atu Aperaamo i le Atua, ma o le mea lona tolu lenei na faamalosia ai lona faatuatua. I aso nei, e mafai foi ona tatou talanoa atu ia Ieova, i le faaaogaina o le meaalofa o le tatalo e ala atu ia Iesu Keriso. (Ioane 14:6; Efeso 6:18) Ina ua uma ona faamatala se faataoto na faamamafa ai le manaoga mo tatalo faifai pea, ona fesili lea o Iesu: “A sau le Atalii o le tagata, pe maua ea e ia le faatuatua i le lalolagi?” (Luka 18:8) O se tatalo e faatupu faatuatua e lē teitei lava ua fai e aunoa ma se mafaufauina lelei pe otometi ona fai. E matuā uigā lava. Mo se faaaoaoga, o se tatalo e sau mai le loto e matuā tāua pe a faia ni a tatou filifiliga tāua, pe i le taimi tatou te iai i ni mafatiaga ogaoga.—Luka 6:12, 13; 22:41-44.
11. (a) Na faapefea ona faamalosia Aperaamo ina ua tatala uma atu lona loto i le Atua? (e) O le ā e mafai ona tatou aʻoaʻoina mai le mea na tupu ia Aperaamo?
11 Ina ua faasolo ina toeaina Aperaamo ae lei avatua lava e Ieova ia te ia le fanau folafolaina, sa ia talanoa atu i le Atua i lona atugaluga. Sa faalaeiau ane Ieova ia te ia. O le ā le iuga? Sa “faatuatua foi [Aperaamo] ia Ieova, ona ia taʻuamiotonuina mai ai lea ia te ia.” Ona saunia lea e Ieova se faailoga e faamautinoa atili ai ana fetalaiga faalaeiau. (Kenese 15:1-18) Afai e tatala uma atu o tatou loto ia Ieova i le tatalo, talia faamautinoaga a Ieova o loo i lana Afioga, le Tusi Paia, ma usiusitai ia te ia ma le faatuatua atoatoa, o le a faamalosia ai lea e Ieova lo tatou faatuatua.—Mataio 21:22; Iuta 20, 21.
12, 13. (a) Na faapefea ona faamanuiaina Aperaamo ina ua ia usiusitai atu i le taitaiga a Ieova? (e) O ā ituaiga o mea tutupu o le a faamalosia ai lo tatou faatuatua?
12 O le mea lona fa na faamalosia ai le faatuatua o Aperaamo o le lagolagosua lea na avatu e Ieova ia te ia ina ua ia usiusitai i le taitaiga a le Atua. Ina ua alu atu Aperaamo e laveai Lota mai tupu na osofai ane, sa avatu ia te ia e Ieova le manumalo. (Kenese 14:16, 20) A o nofo Aperaamo e pei o se tagata aumau i le laueleele o le a fai ma tofi o lana fanau, sa faamanuiaina o ia e Ieova i meafaitino. (Faatusatusa i le Kenese 14:21-23.) Sa taitaia e Ieova taumafaiga a lana auauna ina ia suʻe mai se avā talafeagai mo Isaako. (Kenese 24:10-27) Ioe, na “faamanuia foi Ieova ia Aperaamo i mea uma.” (Kenese 24:1) O le iuga, sa matuā malosi lona faatuatua ma sa matuā vavalalata le la faiā ma Ieova le Atua, lea na māfua ai ona taʻua o ia e Ieova o “laʻu uo.”—Isaia 41:8; Iakopo 2:23.
13 Pe mafai ona ia i tatou se faatuatua malosi faapena i aso nei? Ioe. Pe afai e pei i tatou o Aperaamo, i le tofotofoina o Ieova e ala i le usitai atu i ana poloaiga, o le a ia faamanuia mai foi i tatou, ma o le mea lena o le a faamalosia ai lo tatou faatuatua. Mo se faaaoaoga, pe a tagai atu i le Lipoti o le Tausaga Faaleauaunaga o le 1998 ua faaalia ai e toatele sa faamanuiaina i se auala ofoofogia ina ua latou usiusitai i lana poloaiga e talaʻi le tala lelei.—Mareko 13:10.
Se Faamaumauga o le Faatuatua i Aso Nei
14. Na faapefea ona faamanuiaina e Ieova le tauiviga mo le Tala o le Malo Nu. 35?
14 I tuā ia Oketopa 1997, sa mataina ai le taulau manuia o le tauiviga i le lalolagi aoao mo le Tala o le Malo Nu. 35, e faafetai ai ona o le maelega ma le aasa o le faitau miliona o Molimau taitoatasi. O se mea lenei e masani ona tupu, e pei o le tala mai Ghana. E toetoe lava atoa le 2.5 miliona kopi na tufatufa atu i gagana e fa, ma e latalata i le 2,000 suesuega faale-Tusi Paia na faatalosagaina mai ona o lea tulaga. I Kuperu a o tufatufa atu e ni uso Molimau se toalua Tala o le Malo, sa la matauina ai se faifeau o loo mulimuli mai ia i laua. Ina ua mavae sina taimi, ona la ofo atu lea ia te ia se kopi o le Tala o le Malo. Ua uma ona iai sana kopi, ma na fai mai: “Sa ou matuā maofa lava i le feau o loo iai o lea na ou manao ai ou te fia faamālō atu i tagata na latou sauniunia.” I Tenemaka, e 1.5 miliona kopi o Tala o le Malo na tufatufaina atu ma maua ai iuga lelei. O se tamaitai e faigaluega mo le vafealoai ma le lautele iina na ia faapea mai: “O loo iai i le sāvali se feau mo tagata uma lava. E faigofie ona malamalama i ai, ma e uunaia ai oe, ma e avatu ai se faanaunauga o lou fia iloa atili. E faga tonu le malama!”
15. O ā mea na tutupu e faaalia ai sa faamanuia e Ieova taumafaiga ina ia oo atu i tagata i so o se vaipanoa?
15 I le 1998 na faia ai se taumafaiga e talaʻi atu i tagata e lē gata i o latou fale, ae i so o se vaipanoa lava. I Côte d’Ivoire na asiasi atu ai se ulugalii misionare i vaa e 322 sa taula i uafu. Na la ofoina ai tusi e 247, mekasini e 2,284, polosiua e 500, ma le faitau selau o sāvali, faapea foi vitiō mo seila e matamata ai a o iai i le vasa. I Kanata, na alu atu ai se Molimau i se fale e faia ai tino o taavale. Sa fiafia lē ona le faleinisinia, ona nofo ai lava lea o le uso iina mo le fā ma le ʻafa itula, e ui o le taimi atoa na alu i lana molimau atu pe ā ma le tasi se itula, e vāvā i taimi e leai ai ni tagata e ō ane e fai a latou taavale. Mulimuli ane, na fuafuaina se suesuega e fai i le 10:00 i le po. Peitai, i nisi taimi, e faatoʻā amata le suesuega i le vaeluapo seia oo i le lua i le vaveao. Sa avea o se luʻi le faasologa, ae na maua ai ni iuga lelei. Sa filifili le tamaloa e tapuni lona faleinisinia i Aso Sa ina ia auai atu ai i sauniga. Ma na vave ona faia e ia ma lona aiga se agaigai lelei i luma.
16. O ā mea na tutupu e faaalia ai o le polosiua o le Manaomia ma le tusi o Le Poto o ni meafaigaluega uigā i le galuega talaʻi ma le aʻoaʻo atu?
16 O loo avea pea le polosiua O le ā e Manaomia e le Atua Mai ia i Tatou? ma le tusi o Le Poto e Taʻitaʻia ai i le Ola e Faavavau o ni meafaigaluega uigā i le galuega talaʻi ma le aʻoaʻo atu. I Italia a o faatali pasi se taupousa, na ia talia ai se kopi o le Tala o le Malo. I le aso na sosoo ai, na ofo atu ai ia te ia le polosiua o le Manaomia ma sa ia taliaina foi. I aso uma lava la na sosoo ai, sa fai ai sana suesuega faale-Tusi Paia mo le 10 i le 15 minute i le fale faatali pasi. Ina ua mavae le masina ma le ʻafa, ae filifili loa o ia e alu ese mai le fale o taupousa ae alu atu i lona aiga i Kuatemala e faaauau ai lana suesuega. I Malawi sa matuā lē fiafia ai se fafine e igoa ia Lobina sa toaga i le lotu, ina ua amata ona suesue e lana fanau teine le Tusi Paia ma Molimau a Ieova. Peitai, sa faailoa atu pea e teine upu moni o le Tusi Paia i lo la tinā i avanoa la te mafai ai. Ia Iuni o le 1997, na vaai ai Lobina i le tusi o Le Poto, ma sa faaosofia lona naunau i le faaupuga “Le Poto e Taʻitaʻia ai.” Ia Iulai, sa malie ai o ia e fai sana suesuega faale-Tusi Paia. Ia Aokuso na auai atu ai i le tauaofiaga itumalo ma faalogologo ma le faaeteete i le polokalame atoa. E iu ane lena masina, ua ia tuua lana lotu ma ua agavaa e avea o se tagata talaʻi e lei papatisoina. Ia Novema o le 1997, na papatiso ai loa o ia.
17, 18. Ua faapefea ona faamaonia le aogā o vitiō a le Sosaiete e fesoasoani ai i tagata taitoatasi ia latou “vaai” i mea faaleagaga?
17 Ua fesoasoani vitiō a le Sosaiete i le toatele o tagata latou te “vaai” ai i mea faaleagaga. I Mauritius na alu ese ai se tamaloa mai lana lotu ona o le leai o se autasi o iai. Sa faaali atu i ai e se uso misionare ia te ia le autasi o Molimau a Ieova, e ala i le faaaogā o le vitiō United by Divine Teaching. I le maofa tele o le tamaloa, na ia faapea mai ai: “O outou Molimau a Ieova, o lena ua tou iai i le Parataiso!” Sa malie o ia e faia sana suesuega faale-Tusi Paia. I Iapani, na faaali atu ai e se tuafafine i lana tane lē talitonu le vitiō Jehovah’s Witnesses—The Organization Behind the Name, ma sa uunaia le tane e faia e lē aunoa sana suesuega faale-Tusi Paia. Ina ua uma ona matamata i le vitiō United by Divine Teaching, sa manao loa le tane e avea o se tasi o Molimau a Ieova. O le vitiō e tolu ona vaega faasolo ua faamatuaina The Bible—A Book of Fact and Prophecy na fesoasoani ia te ia e faatatauina ai mataupu silisili o le Tusi Paia i lona olaga. Ma le vitiō mulimuli o le Jehovah’s Witnesses Stand Firm Against Nazi Assault na faaali atu ai ia te ia faapea o loo foai mai e Ieova le malosi i Ona tagata e tetee atu ai i osofaiga a Satani. Ia Oketopa o le 1997, na papatisoina ai le tamaloa.
18 Ua na o ni nai tala na mai le tele anoanoai o mea na tutupu sa olioli ai a o faagasolo le tausaga faaleauaunaga na faatoʻā mavae atu. Ua faaalia ai o loo i Molimau a Ieova se faatuatua ola ma o loo faamalosia e Ieova lena faatuatua e ala i le faamanuia mai i a latou galuega.—Iakopo 2:17.
Ia Ati ae le Faatuatua i Aso Nei
19. (a) Ua faapefea ona sili atu le lelei o le tulaga o loo tatou iai na i lo Aperaamo? (e) E toafia na faapotopoto i le tausaga ua mavae e faamanatu le maliu faataulaga o Iesu? (i) O ā atunuu na mataina a latou aofia o le Faamanatuga i le tausaga ua mavae? (Tagai i le faasologa i le itulau e 12 e oo i le 15.)
19 E tele vala ua sili atu ai ona lelei le tulaga o loo tatou iai i aso nei na i lo le tulaga sa iai Aperaamo. Ua tatou iloa ua faataunuu e Ieova ana folafolaga uma sa fai atu ia Aperaamo. Na fai ma tofi o le fanau a Aperaamo le nuu o Kanana, ma na avea foi i latou ma nuu tele. (1 Tupu 4:20; Eperu 11:12) E lē gata i lea, pe ā ma le 1,971 tausaga talu ona tuua e Aperaamo Karana, sa papatiso ai i le vai lē na tupuga mai ia te ia, o Iesu lea, e Ioane le Papatiso, ma faauuina ai e Ieova lava ia i lona agaga paia ina ia avea ma Mesia, o le Fanau a Aperaamo, i se uiga atoatoa faaleagaga. (Mataio 3:16, 17; Kalatia 3:16) Ia Nisani 14, 33 T.A., na ofo atu ai e Iesu lona soifua e fai ma togiola mo i latou o le a faaalia le faatuatua ia te ia. (Mataio 20:28; Ioane 3:16) E faitau miliona ua mafai nei ona latou faamanuiaina i latou lava e ala mai ia te ia. I le tausaga ua mavae, e toʻa 13,896,312 na faapotopoto ia Nisani 14 ina ia faamanatuina lenei gaoioiga ofoofogia o le alofa. Maeu se faaeaina o Ieova, o Lē Sili e Tausi folafolaga!
20, 21. (a) Na faapefea i tagata mai atunuu uma ona latou faamanuiaina i latou lava i le uluai senituri e ala i le Fanau a Aperaamo, ma o loo faapefea ona latou faamanuiaina i latou lava i aso nei?
20 I le uluai senituri, e toatele i latou mai atunuu uma—e amata mai ia Isaraelu faaletino—sa latou faaalia le faatuatua i lenei Fanau a Aperaamo ma avea ai ma atalii faauuina o le Atua, o ni ē o se ‘Isaraelu fou faaleagaga a le Atua.’ (Kalatia 3:26-29; 6:16; Galuega 3:25, 26) Sa ia i latou se faamoemoe mautinoa o le ola i ni tino agaga e lē mafai ona oti i le lagi o ni pule lagolago i le Malo o le Atua. E na o le 144,000 o le a faamanuiaina i lenei auala, ma ua lē o toe toatele nisi o i latou o totoe. (Faaaliga 5:9, 10; 7:4) I le tausaga ua mavae, e toʻa 8,756 na tautino mai lo latou talitonuga e faapea o i latou o nisi o lenei aofai e ala i lo latou taumafaina o le areto ma le uaina i le faamanatuina o le Faamanatuga.
21 E toetoe lava o Molimau uma a Ieova i aso nei e iai i le “motu o tagata e toatele” lea na valoia mai i le Faaaliga 7:9-17. Talu ai ua latou faamanuiaina i latou lava e ala mai ia Iesu, ua latou maua ai le faamoemoe o le ola e faavavau i luga o le lalolagi parataiso. (Faaaliga 21:3-5) O le toʻa 5,888,650 o ē na auai i le galuega talaʻi i le 1998 o se faamaoniga o le matuā “toatele” o lenei motu. Sa sili ona mataina le vaai atu ua lipotia mai mo se uluai taimi e Rusia ma Ukraine le silia i le taʻi 100,000 tagata talaʻi. O loo mataina foi, le lipoti mai le Iunaite Setete—1,040,283 tagata talaʻi ia Aokuso! Ua na o ni atunuu nei se tolu mai atunuu e 19 na lipotia maia le silia i le taʻi 100,000 a latou tagata talaʻi i le tausaga ua mavae.
Se Faamoemoe ua Lē o Toe Umi Ona Faataunuu Lea
22, 23. (a) Aisea e tatau ai ona tatou faamautuina o tatou loto i aso nei? (e) E mafai faapefea ona tatou faamaonia atu lo tatou pei o Aperaamo, ae lē pei o ē lē faatuatua sa taʻua e Paulo?
22 Sa faamanatu atu ia i latou na auai i le Faamanatuga le mamao ua tatou iai nei e tusa ai ma faataunuuga o folafolaga a Ieova. I le 1914, na nofoia ai e Iesu le nofoalii e avea ma Tupu o le Malo faalelagi o le Atua, ma amata ai lona faatasi mai i le mana o le Malo. (Mataio 24:3; Faaaliga 11:15) Ioe, ua nofo tupu nei le Fanau a Aperaamo i le lagi! Na faapea atu Iakopo i Kerisiano i ona aso: “Ia onosai foi outou, ia faatumauina o outou loto, auā ua latalata le afio [“faatasi,” NW] mai o le Alii.” (Iakopo 5:8) Ua iai moni nei lena faatasi mai! Maeu le tele o mafuaaga e faamautuina ai o tatou loto!
23 Tau ina ia faafouina pea lo tatou mautinoa i folafolaga a le Atua, e ala i le suesueina e lē aunoa o le Tusi Paia ma faia tatalo uigā. Tau ina ia tatou lē faavaivai e tofo i faamanuiaga a Ieova a o tatou usitaia lana Afioga. Ona tatou pei ai lea o Aperaamo, ae lē pei o i latou sa vaivai lo latou faatuatua ma mou atu, e pei ona taʻua e Paulo. E leai se mea e aveesea i tatou mai lo tatou faatuatua e sili ona paia. (Iuta 20) Tatou te tatalo ina ia moni lenei mea i auauna uma a Ieova a o faagasolo le tausaga faaleauaunaga o le 1999, ma faasolo atu ai i le lumanai e faavavau.
E te Iloa?
□ E mafai faapefea ona tatou faalogo atu i le Atua i aso nei?
□ O ā aogā e maua mai tatalo uigā e faia i le Atua?
□ Afai tatou te mulimuli atu ma le usiusitai i le taitaiga a Ieova, o le a faapefea ona faamalosia ai lo tatou faatuatua?
□ O ā vala o le lipoti faaletausaga (itulau e 12 e oo i le 15) sa sili ona e fiafia i ai?
[Fesili mo le Suʻesuʻega]
[Siata i le itulau 12-15]
LIPOTI O LE TAUSAGA FAALEAUAUNAGA O LE 1998 A MOLIMAU A IEOVA I LE LALOLAGI AOAO
(Tagaʻi i le lomiga mo le ata atoa)
[Ata i le itulau 16]
Afai tatou te faalogo atu i le Afioga a Ieova, o le a faafouina ai lo tatou mautinoa i ana folafolaga
[Ata i le itulau 18]
E faamalosia lo tatou faatuatua pe a faia so tatou sao i le faiva