Autasi i le Ala Sili i le Ola

PLAY

Autasi i le Ala Sili i le Ola

Afai o le a faaauau pea ona tuputupu aʻe le faitau aofai o tagata i le lalolagi, e lē o toe umi ae oo atu le aofai o tagata i le ono piliona. E ui ina tasi le tupuaga o tagata uma, ae e foliga mai e lē o talia e le toatele le avea o i latou ma tagata o se auaiga aoao e tali atu i Lē na Foafoaina Mea e atamai ma alofa. O le lē autasi ma le feainaʻi i le va o atunuu, lanu, ma aganuu ua aumaia ai ni faamaoniga lē lelei o tulaga o mea o iai.

I LE matauina o le tulaga ua iai le lalolagi i le taimi nei, e foliga mai ai e lē mafai ona maua se autasi mo le lalolagi aoao. Na taʻua e le Columbia History of the World e faapea: “E tusa ai o le fesili tāua e faatatau i le pe faapefea ona nonofo faatasi, e lē o mafai e le lalolagi o loo iai i le taimi nei ona aumaia se auala fou e foia ai, e matuā lipi lava.”

Ae peitai, o le aumaia o le autasi i tagata o loo aināina le lalolagi e lē manaomia ai se auala fou. O loo faataatia mai i le Tusi Paia le ala i le autasi. O loo faaautū i le tapuaia o Lē na foafoaina le lalolagi ma ola uma o loo iai. O le autasi moni i mafaufauga, fuafuaga, ma i le ala e ola ai ua leva ona iai i tagata o le Atua. Ua silia i le lima ma le ʻafa miliona lo latou faitau aofai i atunuu e 233, o loo autasia i lo latou talitonuga e faapea o le ala a le Atua i le ola o le ala sili lea. Ua latou tatalo pei o le faisalamo: “Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi loʻu loto e mataʻu i lou suafa.”—Salamo 86:11.

O lenei autasia o tagata i le tapuaiga mamā ua leva ona valoia mai e le perofeta o Isaia. Na ia tusi: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai. E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aʻoaʻo mai foi o ia ia te i tatou i ona ala, ona tatou savavali ai lea i ona ala.”—Isaia 2:2, 3.

E tumatilatila le autasi o Molimau a Ieova. E tutusa lelei meaʻai faaleagaga latou te taumafaina i lea vaiaso ma lea vaiaso i a latou sauniga i faapotopotoga e silia i le 87,000. (Mataio 24:45-47) Peitai, mai le ogatotonu o le 1998 seia oo atu i le amataga o le 1999, na faaalia ai e Molimau lo latou autasi i se isi auala—e ala i le auaufaatasi i Tauaofiaga i le lalolagi aoao e tolu aso, “Le Ala a le Atua i le Ola.” I atunuu e 13, sa iai i nei faatasitasiga se vaega tele o sui usufono mai atunuu eseese, ma sa taʻua o tauaofiaga faava-o-atunuu. O isi sa faatulagaina o ni tauaofiaga itumalo. Ae i nei tauaofiaga uma, sa tutusa lelei le polokalame o mea lelei faaleagaga sa tolaulauina ai.

Maeu le matagofie o le vaaia o le fiafia o sui usufono i laei matagofie o loo lolofi atu i falefono ma malae taalo ina ia aʻoaʻoina e Ieova! O se tasi lenei o faaupuga ua taʻua soo e pei ona faamatalaina ai e se tasi sui usufono i le tauaofiaga faava-o-atunuu lea sa faia i Michigan i le Iunaite Setete. Sa ia faapea mai: “O se fiafiaga tele le vaai atu i o tatou uso mai isi vaega o le lalolagi—e pei o Czech Republic, Barbados, Nigeria, Hagakeri, Egelani, Holani, Aitiope, Kenya, ma isi atunuu—o faafeiloai atu i isi! Sa matuā matagofie le vaai atu i le nonofo faatasi o uso i le autasi, ma le taufaimaligi mai o loimata o le olioli ona o le alofa o le tasi i le isi ma mo lo latou Atua lelei, o Ieova.” I le mataupu o loo sosoo mai, o loo faamatala mai ai le polokalame o le tauaofiaga lea sa olioli ai le faitau miliona i le lalolagi aoao.

[Ē Ana le Ata i le itulau 3]