Ia Sisii A‘e Lima Faamaoni i le Tatalo
Ia Sisii Aʻe Lima Faamaoni i le Tatalo
“O loʻu manao ia tatalo o tane i mea uma lava, o loo sisii i luga o lima faamaoni, ma ia lē ita, ma ia lē femisai.”—1 TIMOTEO 2:8, NW.
1, 2. (a) E faapefea ona faatatau atu le 1 Timoteo 2:8 i tatalo o loo aofia ai tagata o Ieova? (e) O le ā o le a tatou talanoaina nei?
E FAATALITALIA e Ieova ona tagata ina ia faamaoni atu ia te ia ma ia fefaamaoniai le tasi i le isi. Sa soofaatasi e le aposetolo o Paulo le faamaoni ma le tatalo ina ua ia tusi: “O loʻu manao ia tatalo o tane i mea uma lava, o loo sisii i luga o lima faamaoni, ma ia lē ita, ma ia lē femisai.” (1 Timoteo 2:8, NW) E foliga mai, sa uiga manatu o Paulo i tatalo na faia mo le lautele “i mea uma lava” sa potopoto faatasi ai Kerisiano. O ai sa tatau ona fai ma sui o tagata o le Atua e faia atu tatalo i sauniga a le faapotopotoga? E na o tane e paia, e amiotonu, ma faaaloalogia, o ē sa latou faatinoina ma le faaeteete tiute uma faale-Tusi Paia agaʻi i le Atua. (Failauga 12:13, 14) Sa tatau ona mamā faaleagaga ma mamā tau amio i latou, ma ia lē fesiligia lo latou tuutoina atu ia Ieova le Atua.
2 Ae maise lava, e tatau i toeaina o le faapotopotoga ona ‘sisii i luga lima faamaoni i le tatalo.’ O a latou tatalo mai le loto e ala atu ia Iesu Keriso ua faaalia ai lo latou faamaoni i le Atua ma fesoasoani ia i latou e alofia le ita ma le pasae aʻe o le lotoa. O le mea moni, so o se tane ua faaeaina e fai ma sui o le faapotopotoga Kerisiano e faia atu se tatalo mo le lautele, e tatau ona lē ia te ia le ita, loto leaga, ma le lē faamaoni ia Ieova ma lana faalapotopotoga. (Iakopo 1:19, 20) O ā ma isi taiala faale-Tusi Paia o loo iai mo ē ua maua faaeaga e fai ai ma sui o isi e faia se tatalo mo le lautele? Ma o ā nisi mataupu silisili faale-Tusi Paia e tatau ona tatou faatatauina i a tatou tatalo totino ma a tatou tatalo faaleaiga?
Ia Muai Mafaufau i le Tatalo
3, 4. (a) Aisea e aogā ai ona muai manatunatu i se tatalo o le a faia mo le lautele? (e) O ā fa a le Tusi Paia e faatatau i le uumi o tatalo?
3 Pe afai e talosagaina i tatou e faia se tatalo mo le lautele, e lē taumate o le a tatou muai manatunatu i ai i lena tatalo. O le faia faapea e ono mafai ai ona tatou faaaofia ni mataupu tāua ma talafeagai e aunoa ma le faia ai o se tatalo faaumiumi, ma feosoosofai solo. O le mea moni, e mafai ona faaleo atu a tatou lava tatalo totino. E mafai ona tuufaitalia le uumi o na tatalo. Na faaaluina e Iesu le po atoa e tatalo ai a o ia lei filifilia ona aposetolo e toʻa 12. Peitai, ina ua ia faavaeina le Faamanatuga o lona maliu, e foliga mai sa pupuu ana tatalo mo le areto ma le uaina. (Mareko 14:22-24; Luka 6:12-16) Ma tatou te iloa e oo lava i tatalo pupuu a Iesu sa talia atoatoa e le Atua.
4 Seʻi faapea ua tatou maua se faaeaga e fai ai ma sui o le aiga e tatalo a o lei faia le taumafataga. O sea tatalo e mafai ona faapuupuu—ae po o le ā lava e taʻua, e ao ona aofia ai se faailoaga o le loto faafetai mo meaʻai. Pe afai tatou te tatalo i luma o tagata a o lei amataina se sauniga faa-Kerisiano pe ina ua faaiu foi, e lē manaomia ona tatou faia se tatalo umī e aofai ai ni manatu se tele. Sa faitioina e Iesu le au tusiupu o ē ‘na faia ni tatalo faalevaleva e fai ma ufiufi.’ (Luka 20:46, 47) E lē tāitai ona manao se tagata amioatua e faia lena mea. Peitai e iai taimi, e ono talafeagai ai le faia o se tatalo umi mo le lautele. Mo se faataitaiga, o se toeaina ua tofia e faia le tatalo faaiu i se fonotaga e tatau ona ia muai manatunatu i ai, ma atonu e manao e taʻua nisi o manatu tāua. Ae, e oo lava foi i lena tatalo e lē tatau ona matuā faaumiumi naʻuā.
Ia Faalatalata Atu ma le Migao i le Atua
5. (a) O le ā e tatau ona tatou manatua pe a tatou tatalo mo le lautele? (e) Aisea e tatalo ai i se uiga āva ma le faaaloalo?
5 Pe a faia se tatalo mo le lautele e tatau ona tatou manatua e tatou te lē o talanoa atu i ni tagata. Na i lo lea, o i tatou o ni foafoaga agasala o loo aioi atu i le Alii Pule Silisili Ese o Ieova. (Salamo 8:3-5, 9; 73:28) O lea e tatau ai ona tatou faaalia le mataʻu ma le migao ia lē faia se mea e lē fiafia ai o ia, e ala i ni faaupuga tatou te fai atu ma le auala tatou te faaleo atu ai. (Faataoto 1:7) Na pese le faisalamo o Tavita: “A e peitai aʻu nei, o le tele o lou alofa ou te alu atu ai i lou fale, ou te ifo i lou malumalu paia ma le mataʻu ia te oe.” (Salamo 5:7) Pe a ia i tatou lena uiga, o le a faapefea ona tatou faaupu atu o tatou lagona pe a talosagaina e faia se tatalo mo le lautele i se sauniga a Molimau a Ieova? O le mea moni, pe a tatou tautala atu i se tupu faaletagata, o le a tatou tautala atu i le āva ma le faaaloalo. Pe ua lē tatau la i a tatou tatalo ona sili ai ona āva ma faaaloalo, talu ai o lea o loo tatou tatalo atu ia Ieova, le “Tupu o le vavau”? (Faaaliga 15:3, NW) O lea pe a tatou tatalo, o le a tatou alofia ai ituaiga o faamatalaga e pei o le, “Talofa Ieova,” “O loo momoli atu o matou alofa,” po o le, “Ia manuia le aso.” Ua faaalia e le Tusi Paia faapea o le Alo pele e toatasi o le Atua, o Iesu Keriso, sa lē tāitai ona ia talanoa atu i lona Tamā faalelagi i se auala faapena.
6. O le ā e ao ona tatou manatua a o ‘faalatalata atu i le nofoālii o le alofa tunoa’?
6 Na taʻu mai e Paulo faapea: “Ia tatou faalatalata atu . . . ma le loto tele [“saolotoga e tautala ai,” NW] i le nofoālii o le alofa tunoa.” (Eperu 4:16) E ui lava i lo tatou tulaga agasala, ae mafai ona tatou faalatalata atu ia Ieova ma le “saolotoga e tautala ai,” auā tatou te faatuatua i le taulaga togiola a Iesu Keriso. (Galuega 10:42, 43; 20:20, 21) Peitai, o lena “saolotoga e tautala ai” e lē uiga faapea o loo na ona tatou talatalanoa ma le Atua; e lē tatau foi ona tatou fai atu ni faamatalaga lē faaaloalo ia te ia. Pe afai e fia faamalieina Ieova i a tatou tatalo e faia mo le lautele, e ao la ona ofoina atu i le āva ma le faaaloalo tatau, ma o le a lē talafeagai le faaaogā o na tatalo e fai mai ai ni faasilasilaga, e fautuaina mai ai ni tagata, pe aoai mai ai le aofia.
Ia Tatalo i le Agaga Maulalo
7. Na faaalia faapefea e Solomona le lotomaulalo ina ua tatalo i le taimi na faapaia ai le malumalu o Ieova?
7 Pe tatou te faia se tatalo mo le lautele po o ni a tatou lava tatalo totino, o le mataupu silisili tāua faale-Tusi Paia e ao ona teu i mafaufau e faapea, e tatau ona tatou faaalia se uiga lotomaulalo i a tatou tatalo. (2 Nofoaiga a Tupu 7:13, 14) Sa faaalia e le tupu o Solomona le lotomaulalo i lana tatalo e faia mo le lautele i le taimi na faapaia ai le malumalu o Ieova i Ierusalema. Sa faatoʻā uma lava ona fausia e Solomona se tasi o fale sili ona ofoofogia ua fausiaina i le lalolagi. E ui i lea, fai mai lana tatalo lotomaulalo: “Pe moni ea, e afio le Atua i le lalolagi? Faauta, o le lagi ma le lagi o lagi, e le ofi ai oe, e le atili ai ea ona ē le ofi i lenei fale ua ou faia?”—1 Tupu 8:27.
8. O ā nisi o auala e faaalia ai le lotomaulalo i se tatalo e faia mo le lautele?
8 I le pei o Solomona, e tatau ona tatou lotomaulalo pe a fai i tatou ma sui o isi i le ofoina atu o se tatalo mo le lautele. E ui e tatau ona tatou alofia le fai atu o o tatou leo fia mamalu, ae mafai e o tatou leo ona aliali atu ai le lotomaulalo. O tatalo lotomaulalo e lē feei pe faia i ni leo mafatia faatagafai. E tatau ona tataʻi ai manatu, e lē i le tagata o loo tatalo, ae i Lē o loo avatu i ai le tatalo. (Mataio 6:5) E faaalia foi le lotomaulalo i mea o loo tatou taʻua i le tatalo. Pe afai tatou te tatalo ma le lotomaulalo, o le a lē pei ai la o tatou leo e peiseai o loo tatou faatonu atu le Atua ia fai mai nisi o mea i la tatou auala. Na i lo lea, o le a tatou ole atu ia Ieova ina ia gaoioi i se auala e ogatusa ma lona finagalo paia. Sa faaaʻoaʻo mai e le faisalamo le uiga e tatau ona iai ina ua ia faatoga atu: “Ieova e, ou te aioi atu ia e faaola mai lava; ou te aioi atu, Ieova e, ia e faamanuia mai lava.”—Salamo 118:25; Luka 18:9-14.
Ia Tatalo Mai le Loto
9. O le ā le fautuaga matagofie na tuuina mai e Iesu lea o loo maua i le Mataio 6:7, ma e mafai faapefea ona faatatauina?
9 Pe afai e fia faamalieina Ieova i a tatou tatalo mo le lautele po o a tatou lava tatalo totino, e ao la ona sau mai le loto. O lea, o le a lē na ona tatou toe fai ai pea lava pea o se tatalo e tasi e aunoa ma le manatunatu i mea o loo tatou taʻua. I lana Lauga i luga o le Mauga, na fautua mai ai Iesu: “A outou tatalo, aua neʻi tāutu i a outou upu, e pei o nuu ese; auā fa te i latou [i o latou mafaufauga sese], o le tele o a latou upu e talia ai i latou.” I se isi faaupuga, na faapea mai Iesu: “Aua le faateteleina upu; auā le taʻu soo upu e leai se aogā.”—Mataio 6:7; faamatalaga i le pito i lalo o le mau i le NW.
10. Aisea o le a talafeagai ai ona tatalo soo mo se mataupu e tasi?
10 O le mea moni, atonu e manaomia ona tatou tatalo soo mo se mataupu e tasi. O le a lē sese lena mea auā na faalaeiau mai Iesu: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina ai lea ia te outou.” (Mataio 7:7) Atonu o loo iai se manaoga mo se Maota fou o le Malo talu ai o loo faamanuia e Ieova le galuega talaʻi a le faapotopotoga. (Isaia 60:22) O le a talafeagai le taʻua pea lava pea o lenei manaoga pe a tatalo le tagata lava ia pe ofoina foi ni tatalo mo le lautele i taimi o sauniga a tagata o Ieova. O le faia faapena e lē uiga ai faapea o loo tatou ‘taʻu soo atu upu e leai se aogā.’
Ia Manatua le Faafetai ma le Viiga
11. E faapefea ona faatatau atu le Filipi 4:6, 7 e lē gata i a tatou lava tatalo totino, ae faapea foi tatalo e faia mo le lautele?
11 E toatele tagata e faatoʻā tatalo lava pe a talosaga atu mo se mea, peitai o lo tatou alofa mo Ieova le Atua e tatau ona uunaia ai i tatou e avatu ia te ia le faafetai ma le viiga e lē gata i a tatou lava tatalo totino, ae faapea foi tatalo e faia mo le lautele. Na tusi mai Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6, 7) Ioe, e lē gata i olega ma faatoga, ae tatau foi ona tatou faafetai atu ia Ieova mo faamanuiaga faaleagaga ma faaletino. (Faataoto 10:22) Na pese le faisalamo e faapea: “O le viiga, ia e faia lea ma taulaga i le Atua; ia e avatu foi i lē Silisili ese mea na e tauto ai.” (Salamo 50:14) Ma o tatalo o viiga a Tavita sa aofia ai nei upu faagaeeloto: “Ou te vivii atu i le suafa o le Atua i le pese; ou te faaneenee atu foi ia te ia i le viiga.” (Salamo 69:30) Pe lē tatau ea ona tatou faia le mea lava lea e tasi i lau lava tatalo totino ma tatalo e faia mo le lautele?
12. Ua faapefea ona faatatauina le Salamo 100:4, 5 i aso nei, ma o le ā e mafai ai ona tatou faafetai ma vivii atu i le Atua?
12 Na pese le faisalamo e faatatau i le Atua: “Ia outou ulu atu i ona faitotoa ma le viiga, ma ona lotoā ma le pese; ia outou vivii atu ia te ia, ia outou faamanu atu i lona suafa. Auā e lelei Ieova; e faavavau lava lona alofa; e oo atu lava lona faamaoni i lea tupulaga ma lea tupulaga.” (Salamo 100:4, 5) I aso nei, o loo ulu atu tagata o atunuu uma i lotoā o le malumalu o Ieova, ma e mafai ona tatou viia ma faafetai o ia ona o lenei mea. Po o e faaupu atu le faafetai i le Atua mo lo outou Maota o le Malo ma faaalia lou talisapaia e ala i le faapotopoto atu iina e lē aunoa ma i latou o ē alolofa ia te ia? A o e iai iina, po o sii aʻe mai le loto lou leo i pese o viiga ma le faafetai i lo tatou Tamā alofa faalelagi?
Aua Lava Neʻi Masiasi e Tatalo
13. O le ā le faaaoaoga faale-Tusi Paia e faaalia ai e ao ona tatou ole atu ia Ieova pe a lagona lo tatou lē aogā ona o ni lagona nofosala?
13 E tusa lava pe tatou te lagona lo tatou lē toe aogā ona o ni lagona nofosala, ae tatau ona tatou liliu atu i le Atua i olega naunautai. Ina ua agasala sa Iutā i lo latou faiavā i fafine o nuu ese, sa tootuli ifo Esera, fofola atu ona lima faamaoni i le Atua, ma tatalo ma le lotomaulalo: “Loʻu Atua e, ua ou mā, ma ou masiasi i tepa ae oʻu mata ia te oe, loʻu Atua e; auā ua tele lo matou leaga ua oo i luga o matou ulu, ma ua tupu tele la matou agasala ua oo lava i le lagi. Talu ona po o matou tamā ua ia i matou le agasala tele ua oo i le aso nei . . . Ua uma ona oo mai o nei mea uma ia te i matou ona o a matou amio leaga, ma la matou agasala tele, auā o oe lo matou Atua e, ua e laveai mai, ua le faia e tusa ma lo matou leaga, ma ua e faasaoina i matou faapenei; a toe solia e i matou au poloaiga, ma feavāgai ma tagata e fai ia mea e inosia, e te le toasa mai ai ea ia te i matou seia faaumatia i matou, ina ia leai ni e totoe pe faasaoina? Ieova e, le Atua o Isaraelu, o oe o le amiotonu; auā ua faatotoeina i matou, ua faasaoina, e pei ona fai i le aso nei; faauta, o i ou luma i matou ma a matou agasala; auā e le mafai ona tutū i matou i ou luma ona o lenei mea.”—Esera 9:1-15; Teuteronome 7:3, 4.
14. E pei ona faataitaia mai i aso o Esera, o le ā e manaomia ina ia maua ai le faamagaloga a le Atua?
14 Ina ia maua le faamagaloga a le Atua, o le tautino atu o agasala ia te ia e ao ona ō faatasi ma le salamō ma “fua e tatau ma le salamo.” (Luka 3:8; Iopu 42:1-6; Isaia 66:2) I aso o Esera, sa faaalia le uiga salamō faatasi ma se taumafaiga ina ia faasaʻo le mea sese e ala i le toe faafoi o avā mai nuu ese. (Esera 10:44; faatusatusa i le 2 Korinito 7:8-13.) Pe afai o loo tatou sailia le faamagaloga a le Atua mo ni sese matuia, seʻi o tatou faia la se taʻutinoga i se tatalo lotomaulalo ma fuaina mai fua e tatau ma le salamō. O se uiga salamō ma se faanaunauga e faasaʻo le mea sese, o le a uunaia ai foi i tatou e sailia le fesoasoani faaleagaga a toeaina Kerisiano.—Iakopo 5:13-15.
Ia Maua Faamafanafanaga Mai le Tatalo
15. E faapefea i le mea na tupu ia Hana ona faaalia ai e mafai ona tatou maua faamafanafanaga i le tatalo?
15 Pe a tiga o tatou loto i se mea, e mafai ona tatou maua faamafanafanaga i le tatalo. (Salamo 51:17; Faataoto 15:13) Sa faia faapena e le fafine faamaoni o Hana. Sa ola o ia i le vaitaimi na avea ai ma tu masani i Isaraelu le toatele o aiga, ae o ia sa leai sana fanau. Sa iai atalii ma afafine o lana tane o Elekana mai le isi ana avā o Penina, o lē na taufaalili ia Hana ona o le lē fanau. Sa tatalo faatauanau Hana ma folafola atu faapea, pe afai e faamanuiaina o ia i se tama, ‘o le a ia avatuina lena tama ia Ieova i aso uma o lona olaga.’ I le faamafanafanaina o ia i lana tatalo ma upu a le faitaulaga sili o Eli, ‘ona lē toe mata faanoanoa ai lea’ o Hana. Sa ia fanauina mai se tama o lē na ia faaigoa o Samuelu. Mulimuli ane, ona ia avatu lea o le tama mo le auaunaga i le malumalu o Ieova. (1 Samuelu 1:9-28) I lona lotofaafetai i le agalelei o le Atua ia te ia, sa ia ofoina ai se tatalo o le faafetai—lea na viiviia ai Ieova o lē e lē mafaatusalia. (1 Samuelu 2:1-10) I le pei o Hana, e mafai ona tatou maua faamafanafanaga mai tatalo, i le mautinoa faapea e taliina e le Atua talosaga uma e ogatusa ma lona finagalo. Pe a sasaa atu o tatou loto ia te ia, seʻi aua loa ‘neʻi o tatou toe mata faanoanoa’ pe popole, auā o le a ia aveesea a tatou avega mamafa pe fesoasoani mai foi ina ia mafai ona tatou tatalia.—Salamo 55:22.
16. E pei ona faataitaia mai i le tulaga o Iakopo, aisea e tatau ai ona tatou tatalo pe a tatou matataʻu pe popole?
16 Pe afai o se tulaga e faapogaia ai le mataʻu, le tiga o le loto, po o le popole, seʻi aua lava neʻi o tatou lē liliu atu i le Atua i le tatalo mo faamafanafanaga. (Salamo 55:1-4) Sa mataʻu Iakopo a o latalata atu e faafeiloai lona uso sa la masesei, o Esau. Peitai, na tatalo Iakopo: “Ieova e, le Atua o loʻu tamā o Aperaamo, o le Atua foi o loʻu tamā o Isaako, o le na faapea mai ia te au, Ina e toe foi atu i lou nuu, ma lou aiga, ou te agalelei atu foi ia te oe; ou te le aoga lava i mea alofa uma ma le faamaoni uma ua e faia i lau auauna; auā na ou laasia mai i Ioritana nei, na o aʻu ma loʻu tootoo; a o lenei, ua ou sau ma vaega e lua. Ou te aioi atu, ia e laveai mai ia te au ai le lima o loʻu uso, o le lima lava o Esau; auā ou te fefe ia te ia, ina neʻi sau ia ma fasia aʻu, ma tinā, atoa ma fanau. Na e faapea mai foi, Ou te agalelei atu lava ia te oe, ou te faia foi lau fanau ia pei o le oneone i le sami, e le mafaitaulia ina ua tele.” (Kenese 32:9-12) Sa lei osofaia e Esau, Iakopo ma ē na latou ō atu faatasi. O lea sa “agalelei” Ieova ia Iakopo i lena taimi.
17. E tusa ai o le Salamo 119:52, e ono aumaia faapefea e le tatalo ia i tatou faamafanafanaga a o tatou fesagai ma tofotofoga matuitui?
17 A o faia a tatou olega, atonu e faamafanafanaina i tatou e ala i le manatua o mea o loo taʻua i le Afioga a le Atua. I le salamo pito umī—o se tatalo matagofie o loo lagi faapese—atonu o le aloalii o Esekia lea na pese ai faapea: “Ieova e, ua ou manatu i au faamasinoga talu anamua, ona faamafanafanaina ai lea o aʻu.” (Salamo 119:52) I se tatalo lotomaulalo a o tatou fesagai ma tofotofoga matuitui, tatou te ono manatua ai se mataupu silisili po o se tulafono a le Tusi Paia lea e mafai ona fesoasoani ia i tatou e uia se ala e iu ai i faamautinoaga faamafanafana loto faapea o loo tatou faafiafiaina lo tatou Tamā faalelagi.
E Finafinau Ē Faamaoni i le Tatalo
18. E mafai faapefea ona fai atu ‘e tatalo i le Atua o ē faamaoni uma lava’?
18 O i latou uma e faamaoni atu ia Ieova le Atua o le a “finafinau i le tatalo.” (Roma 12:12) I le Salamo 32, atonu na fatuina e Tavita ina ua uma le la agasala ma Patesepa, sa ia faamatalaina ai lona tiga i le lē taulau ona ia sailia le faamagaloga, ma le mapusaga na maua mai le Atua ina ua ia salamō ma tautino lana agasala. Ona pese lea o Tavita: “O le mea lea [talu ai e faamagalo e Ieova ē salamō moni] e tatalo atu ai ia te oe o e amio Atua uma lava, i ona po e maua ai oe.”—Salamo 32:6.
19. Aisea e ao ai ona sisii aʻe o tatou lima faamaoni i le tatalo?
19 Pe afai tatou te faapelepele i la tatou faiā ma Ieova le Atua, o le a tatou tatalo ai mo lona alofa mutimutivale e faavae aʻe i le taulaga togiola a Iesu. I le faatuatua, e mafai ai ona tatou faalatalata atu i le nofoalii o le alofa tunoa ma le saolotoga e tautala ai, ina ia tatou maua le alofa mutimutivale ma fesoasoani talafeagai. (Eperu 4:16) Peitai e tele naua mafuaaga e tatalo ai! O lea, seʻi o tatou “tatalo e le aunoa”—ia faaaogā soo ai upu o viiga ma le faafetai i le Atua e sau mai le loto. (1 Tesalonia 5:17) I le ao ma le po, seʻi o tatou sisii aʻe o tatou lima faamaoni i le tatalo.
O le a Faapefea Ona E Tali?
□ O le ā le aogā o le muai manatunatu i se tatalo o le a faia mo le lautele?
□ Aisea e tatau ai ona tatou tatalo i se uiga āva ma le faaaloalo?
□ O le ā le uiga e tatau ona tatou faaalia a o tatalo?
□ A o tatalo, aisea e tatau ai ona tatou manatua le faafetai ma le viiga?
□ Ua faaalia faapefea e le Tusi Paia e mafai ona tatou maua faamafanafanaga mai tatalo?
[Fesili mo le Suʻesuʻega]
[Ata i le itulau 17]
Sa faaalia e le tupu o Solomona le lotomaulalo i lana tatalo na faia mo le lautele i le taimi na faapaia ai le malumalu o Ieova
[Ata i le itulau 18]
I le pei o Hana, e mafai ona e maua faamafanafanaga mai le tatalo