Maumauai e Mulimuli i le Ala a le Atua i le Ola

E anoanoai aogā na aumaia e Tauaofiaga o “Le Ala a le Atua i le Ola” mo ē fia auauna i le Atua! Na faamatala e se tasi sui usufono le tauaofiaga e faapea o “se taimi matagofie o aʻoaʻoga, faalaeiauga, ma faamalamalamaga.”

NA TAʻUA e se tasi sui usufono faapea sa “tele mea na olioli ai, mafaufau i ai, ma ave i fale.” Seʻi o tatou tilofaia la le polokalame.

Iesu Keriso—Le Ala, le Upu Moni, ma le Ola

O le matua lenei o le aso muamua o le tauaofiaga. (Ioane 14:6) Na faamatalaina e le lauga muamua le fuafuaga ua ala ai ona tatou faapotopoto faatasi i le tauaofiaga: ina ia saga aʻoaʻoina e faatatau i le ala sili o le ola, le ala lea a le Atua i le ola. Ua aʻoaʻoina e Ieova ona tagata i le auala e savavali ai i ona ala. Ua ia faia faapea e ala mai i le Tusi Paia, “le auauna faamaoni ma le mafaufau,” ma le agaga paia. (Mataio 24:45-47; Luka 4:1; 2 Timoteo 3:16) Maeu se faaeaga o le aʻoaʻoina e le Silisili Ese o le vateatea aoao!

Ina ia ogatasi ma le matua o le aso, sa avea ai ma lauga autū le mataupu, “Le Togiola a Keriso—Le Ala a le Atua i le Faaolataga.” Ina ia ogatusa ma le ala a le Atua i le ola, e tāua ai le iloaina o le matafaioi a Iesu Keriso i fuafuaga a Ieova. Na taʻua e le failauga e faapea: “Ana lē seanoa le taulaga togiola a Iesu Keriso, semanu e leai se tagata na te mauaina le ola e faavavau mai le Atua e tusa lava po o ā ona talitonuga po o galuega.” Ona ia sii mai lea o le Ioane 3:16, lea o loo faapea mai: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.” O le faaalia o le faatuatua i le taulaga togiola a Keriso e manaomia ai le maua o le poto saʻo i le upu moni. E aofia ai foi le tuuina atu o lo tatou ola ia Ieova, faailoa atu e ala i le papatisoga i le vai, ma ola aʻe e tusa ai o le faaaoaoga na saunia e Iesu Keriso.—1 Peteru 2:21.

Na amataina le polokalame o le aoauli i le lauga o lona matua, “O le Ala o le Alofa e Lē Uma.” Sa aofia ai le talanoaina auauaʻi o fuaiupu taitasi o upu faagaee loto a Paulo e faatatau i le alofa, o loo faamauina i le 1 Korinito 13:4-8. Sa toe faamanatu mai i le aofia faapea o le alofa faataulagaina totino, o se tasi lea o vala e mataulia ai le Faa-Kerisiano, ma o lena alofa mo le Atua ma tuaoi o vala taulia ia o le tapuaiga e talia e Ieova.

Na sosoo mai ai ma se lauga faasolo e tolu ona vaega ua faamatuaina, “Mātua e—Ia Totō le Ala a le Atua i a Outou Fanau.” E mafai ona fesoasoani mātua i fanau ina ia auauna i le Atua e ala i le faataatia o se faaaoaoga lelei i le faitauina ma le suesueina o lana Afioga. E mafai ona latou totō le upu moni i a latou fanau e ala i suesuega faifai pea a le aiga, ma faatatau atu ina ia talafeagai ma manaoga o le aiga. E tāua foi le fesoasoani  i le fanau ina ia faaaofia i latou i galuega a le faapotopotoga ma le faiva i le fanua. E ui o se luʻi le tausia aʻe o ni fanau e matataʻu i le Atua i lenei lalolagi amioleaga, ae o le faia faapea e aumaia ai taui e tele.

Na mulimuli mai i lenei lauga faasolo le lauga, “Tuu Atu ia Ieova e Saunia Oe e Faaaogā i se Tulaga Faamamaluina.” E faapei lava ona saunia e le fai ipu omea o le ipu omea, e faapena foi ona saunia e le Atua i latou o ē fia auauna ia te ia. (Roma 9:20, 21) Ua ia faia faapea e ala i le saunia mai o fautuaga o loo i lana Afioga ma e ala mai i lana faalapotopotoga. O le a fesoasoani mai Ieova ia i tatou e faaaogaina atoatoa o tatou agavaa pe afai tatou te faaavanoaina atu i tatou, tali atu i avanoa, ma loto malie e tuu atu ia te ia e faatonuina o tatou ala.

Ua oo mai nei i le vaega faaoso fiafia o le polokalame—“Le Auaunaga i le Faiva Faamisionare.” I le taimi nei o loo auauna ai i le lalolagi aoao i atunuu e 148 le 2,390 o faifeau Kerisiano o ē o loo iai tulaga faamisionare. Ua latou faataatia se faaaoaoga lelei o le faamaoni ma le maelega ma o loo matuā loto faafetai i lo latou faaeaga o le auauna i atunuu ese. I le vaega lenei o le polokalame i tauaofiaga faava-o-atunuu, sa talanoa mai ai misionare i luʻi faapea ma le olioli o le olaga faamisionare.

O le lauga mulimuli i le aso muamua sa faamatuaina, “Pe Iai se Isi Ola pe a Mavae le Oti?” O le fesili lenei ua lē mautonu ai tagata mo le tele o meleniuma. O loo tauivi pea tagata o ituaiga uma ma lenei mataupu. E anoanoai foi tali i ai. O ni tali e matuā eseese e pei lava o le eseese o tu ma talitonuga a tagata o loo aumaia na tali. Ae e manaomia ona iloa e tagata le upu moni.

O lea, na faasilasila mai ai e le failauga le tatalaina o le polosiua felanulanuai e 32 ona itulau o le What Happens to Us When We Die? O loo faamatalaina e lenei polosiua le amataga o lenei aʻoaʻoga o le lē mafai ona oti o le solu, ma o loo faaalia ai le auala ua avea ai ma talitonuga autū i le toetoe lava o lotu uma i le lalolagi i aso nei. I se auala manino ma faaoso naunau, o loo auiliilia ai le mea o loo fai mai ai le Tusi Paia e faatatau i le solu, le mafuaaga ua oo mai ai le oti ia i tatou, ma le mea e tupu ia i tatou pe a tatou feoti. O loo faamatalaina foi e le polosiua po o le ā le faamoemoe mo ē maliliu ma ē o loo ola. Maeu se faamanuiaga o lenei polosiua o le a iai mo ē saili i le upu moni i so o se mea!

Ia Matuā Faaeteete i le pe Faapefea Ona Outou Savavali

Maeu le talafeagai o lenei matua mo le aso lona lua o le tauaofiaga! (Efeso 5:15) Sa taulai le polokalame o le taeao i le talaʻiga ma le galuega o le faia ma soo. Na sosoo mai i le talanoaina o le mau o le aso le lauga, “Fesoasoani i Tagata ia Maua le Ala i le Ola.” I le faataunuuina o lenei galuega faanatinati, e tāua le iai o se uiga mautinoa, i le iloaina faapea o le tufaina atu o le upu moni i isi o se faaeaga ma o se tiute tauave. I le uluai senituri T.A., o le toatele lava o tagata sa latou teena le Afioga a le Atua. E ui lava i teteega, ae peitai, na ‘faatuatua foi i latou uma lava o ē ua saunia i le ola e faavavau.’ (Galuega 13:48, 50; 14:1-5) Ua talitutusa lena tulaga ma aso nei. E ui ina tetee le toatele i upu moni o le Tusi Paia, ae o loo tatou faaauau pea ona saili mo i latou e tali lelei mai.—Mataio 10:11-13.

Na talanoaina i le lauga na sosoo ai le luʻi o le oo atu i isi ma le feau o le ola. Ona ua faafaigata i le taimi nei ona maua tagata i aiga, ua manaomia ai ona tatou faia ma le maeʻaeʻa le galuega ma faatōʻaga, ina ia tatou oo atu i se toatele e mafai ai ma le feau o le Malo. I le tele o atunuu, ua maua ai e tagata talaʻi o le tala lelei iuga lelei i le molimau atu e ala i telefoni ma i oganuu o pisinisi, ua faapea ona oo atu ai ia i latou e faafaigata ona faafesootai.

Sa taulai le lauga o lona matua, “Le Aʻoaʻoina o Soo i Mea Uma na Poloaia e Keriso” i le tāua o le avea ma tagata tomai i la tatou faiva. E faamaaiina o tatou tomai tau aʻoaʻo atu i mea tatou te aʻoaʻoina mai isi ma le faatatauina o toleniga sili ona lelei o loo maua mai i sauniga a le faapotopotoga. A o tatou agaʻi atu i le avea ma tagata tomai i le aʻoaʻo atu, tatou te maua ai le faateleina o le olioli ma le faamalieina i la tatou galuega o le fesoasoani i tagata e aʻoaʻoina upu moni o le Tusi Paia.

Na taualuga le polokalame o le taeao i se lauga na faatatau i le uiga o le tuutoina atu ma le  papatisoga. Sa taʻua e le failauga se manatu faapea, afai tatou te matuā faatuatua i le Atua ma tatou taumafai ma le faamaoni e faia lona finagalo, o le a ia faamanuia mai ma faatumauina i tatou. Na tusi le tagata poto e faapea: “Ia e manatua [le Atua] i ou ala uma, ona faatonuina lea e ia lava ou ala.” (Faataoto 3:6) O le papatisoga olioli lava ia o se mea tāua mo le tauaofiaga, e faailoa atu ai e toatele ua amata ona gauai atu i le ala a le Atua i le ola.

Na amataina le polokalame o le aoauli ina ua maeʻa le malologa i le lauga, “Auauna ma Tepa Taulai Atu i le Ola e Lē Uma.” O le fuafuaga a le Atua ia iai ni tagata usiusitai e auauna atu ia te ia e faavavau i luga o le lalolagi o le a faataunuuina. Maeu le talafeagai la, o le taulai atu o o tatou mafaufauga, fuafuaga, ma faamoemoega i se vaaiga ia faavavau ona auauna ia Ieova! A o tatou mananao e tausisia pea “le aso o Ieova” i o tatou mafaufau, e tāua tele le manatuaina o lo tatou sini o le auauna atu lea e faavavau. (2 Peteru 3:12) O le lē iloa tonu o le taimi o le a faaoo mai ai e Iesu le taui ma sui a le Atua, o le a tausisia ai pea lo tatou mataala, ma aumaia ai foi avanoa i aso taitasi e faamaonia ai lo tatou auauna ia Ieova e aunoa ma ni uunaiga manatu faapito.

O lauga e lua na sosoo atu ai na auiliili ai le mataupu lona fa o le tusi a Paulo i Efeso. Na aofia ai i manatu sa talanoaina faamanuiaga ua ia i tatou i “mea alofa i tagata,” o tane agavaa faaleagaga o ē ua tofia e le agaga paia. Ua saunia e nei toeaina fautuaga ma taiala mo lo tatou lelei faaleagaga. I lenei foi tusi faagaeeina a Paulo, na ia timai atu ai i Kerisiano ina ia oofu i “le tagata fou.” (Efeso 4:8, 24) O se tagata e faale-Atua e iai uiga e pei o le alofa mutimutivale, agalelei, loto maulalo, agamalu, onosai, ma le alofa.—Kolose 3:12-14.

O le matuā faaeteete i le pe faapefea ona tatou savavali, e aofia ai le tausia o lo tatou lē ponā mai le lalolagi—o le mataupu lena o le lauga na sosoo ai. E manaomia le paleni i le filifilia o faafiafiaga, tafaoga, ma le sailia o mea faitino. E ala i le faatatauina o le fautuaga o loo i le Iakopo 1:27 ina ia tausia le lē ponā mai le lalolagi, ua tatou olioli ai i se tulaga mamā ma le Atua ma se loto fuatiaifo lelei. E mafai ai foi ona tatou ola i se olaga aogā ma o le a faamanuiaina i le filemu, le manuia faaleagaga, ma aumea sili ona lelei.

 Na sosoo mai ai loa ma le lauga faasolo e tolu ona vaega ua faamatuaina, “Talavou e—Ia Mulimuli Atu i le Ala a le Atua.” I le iloaina faapea e alofa le Atua ia i latou ma talisapaia a latou taumafaiga i le sapasapaia o le tapuaiga mamā, e tatau la i talavou ona toleniina o latou tomai e mafaufau ai ina ia auauna ia Ieova ma le faamaoni. O se tasi o auala e atiina ae ai le tomai e mafaufau ai, o le faitauina lea o le Afioga a le Atua i aso taitasi ma mafaufau loloto i ai. Afai tatou te faia faapea, e mafai ai ona tatou iloa ala o Ieova. (Salamo 119:9-11) E mafai foi ona atiina ae le tomai e mafaufau ai e ala i le taliaina o fautuaga maufaatuatuaina mai mātua, toeaina, ma lomiga a le Sosaiete. E ala i le faaaogaina ma le saʻo o lo latou tomai e mafaufau ai, o le a teena ai e talavou le aafia i mea faitino, gagana lē mamā, ma le sailia o faafiafiaga ia e atagia atu ai lenei lalolagi ua vavae ese mai le Atua. E ala i le mulimuli i le ala a le Atua i le ola, o le a taufai olioli ai ē matutua ma ē talavou i le manuia moni.

O le lauga faaiu o lena aso e faapea lona matua, “Lē na Foafoaina Mea—Ona Uiga Totino ma Ona Ala.” Ina ua maeʻa ona taʻua faapea e faitau piliona latou te lē iloa Lē na Foafoaina Mea, ona faapea mai lea o le failauga: “O le uiga moni o le olaga e fesootai atu i le iloaina o Lē na Foafoaina Mea, lo tatou Atua; iloaina o ona uiga totino; ma le usiusitai atu i ona ala. . . . O loo iai mea moni e faatatau i lo tatou lalolagi ma i tatou e mafai ona tatou faaaogaina, e fesoasoani ai i tagata ia taliaina Lē na Foafoaina Mea ma iloa le fuafuaga ua faatatau ai ia te ia.” Ona talanoaina ai lea e le failauga faamaoniga e faasino atu i le iai o Lē na Foafoaina Mea e atamai ma alofa.  Na taualuga le lauga i le tatalaina o se tusi fou—Is There a Creator Who Cares About You?

“O le Ala Lava Lenei, ia Outou Savavali Ai”

O le matua lenei o le aso lona tolu o le tauaofiaga. (Isaia 30:21) Na tatalaina le polokalame i se lauga faasolo faaoso fiafia e tolu ona vaega, sa faaautū i le vaaiga na iloa e Esekielu e faatatau i le malumalu. E telē se uiga ua aumaia e lenei vaaiga mo tagata o le Atua i aso nei, talu ai e fesootai ma le tapuaiga mamā i o tatou aso. O le manatu autū lenei ina ia malamalama ai i le vaaiga: Ua faaatagia i le malumalu sili faaleagaga a Ieova lana faatulagaga mo le tapuaiga mamā. A o talanoaina vala eseese o le vaaiga, sa manatunatu ai le au faalogologo i a latou galuega e lagolago atu ai i galuega ua faia e ovasia alolofa o le vaega totoe lea faauuina ma ē o le a avea ma sui o le vasega o alii sili.

Mulimuli ane i le taeao, na iai se tala faale-Tusi Paia felanulanuai sa faaaogaina ai teuga faaanamua. Sa faamatuaina le tala, “Aiga e—Ia Avea le Faitauina o le Tusi Paia i Aso Uma o se Vaega o lo Outou Soifuaga!” Sa faaāta mai ai le faatuatua ma le loto tetele o Eperu e toatolu, ia na latou teena le ifo toele atu i le tupua auro na fausia e le tupu o Papelonia o Nepukanesa. O le sini o le tala o le faaali atu lea o le Tusi Paia e lē gata o se tusi o talafaasolopito o aso anamua, ae o ana fautuaga e aogā moni i ē matutua ma ē talavou i aso nei.

Sa faatulagaina le lauga i le lautele i le polokalame i le afiafi i lona matua, “Le Ala e Tasi i le Ola e Faavavau.” Ina ua maeʻa ona faailoa mai le talafaasolopito o le paʻū atu o le fanau a tagata i le agasala ma le oti, ona faaiu mai lea o le failauga i upu faatupu manatu nei: “O le mau faale-Tusi Paia ua faamatuaina ai le aso lenei o le tauaofiaga o loo aumaia i le Isaia mataupu e 30, fuaiupu e 21, lea o loo faapea mai: “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” E faapefea ona tatou faalogo atu i lenei siufofoga? E ala i le faalogo atu i le Afioga a le Atua, le Tusi Paia, ma i le mulimuli atu i taiala o loo iai ua saunia e lo tatou Aʻoaʻo Sili, o Ieova le Atua, ma e ala mai i lana faalapotopotoga Kerisiano i aso nei. O le mea moni, o le faia faapea ua na o le pau lea o le ala i le ola e faavavau.

Na mulimuli mai i le otootoga o le mataupu o le suesuega o Le Olomatamata o le vaiaso le lauga faaiu, o lona matua, “Ia Savavali Pea i le Ala a Ieova.” O se vaega o le lauga, na autaluina ai manatu tāua o le polokalame. Ona tuuina atu loa lea e le failauga o se iugafono e faailoa atu ai le maumauai e faaauau pea ona ola i le ala a le Atua.

Na faaiu le iugafono i upu faagaee loto nei: “Ua tatou talitonu o le ola e ogatusa ma mataupu silisili o le Tusi Paia, o ana fautuaga, ma ana timaiga e maua ai le ala silisili ona lelei o le olaga i aso nei, ua maua ai se faavae lelei mo le lumanai, ina ia mafai ona tatou taofi mau atu i le ola moni. A o le sili o na mea uma, ua tatou faia lenei iugafono talu ai tatou te alolofa ia Ieova le Atua ma o tatou loto atoa, agaga atoa, manatu atoa, ma le malosi atoa!” Na faaleoina mai e i latou uma na iai i le aofia lo latou taliaina o lenei iugafono.

[Pusa/Ata i le itulau 8]

o o Iai Sē na Foafoaina Mea o Silasila Alofa Mai ia te Oe?

Ua aumaia e lenei tusi fou faamaoniga e faatalitonuina ai o loo soifua Lē na Foafoaina Mea, o Ieova, ma o loo talanoaina ai ona uiga. Ua saunia faapitoa mo i latou o ē ua lava le aʻoaʻoina i mataupu faalelalolagi ae e lē talitonu i le Atua. O le a fesoasoani foi lenei tusi e 192 ona itulau i le faatuatua o tagata taitoatasi o ē ua talitonu i le Atua, ma ati ae se talisapaia mo ona uiga totino ma ona ala.

O le tusi Is There a Creator Who Cares About You? e lē o taumateina mai faapea e talitonu le tagata faitau i le Atua. Na i lo lea, o loo talanoaina le auala ua faamaonia ai i iuga o suesuega ma manatu faasaienisi talu ai nei le iai o Lē na Foafoaina Mea. Ua faamatuaina faapenei nisi o ona mataupu, “O le ā na te Faaopoopoina Atu le Uigā i Lou Olaga?,” “Na Faapefea Ona Iai lo Tatou Vateatea?—Le Fefinauaiga,” ma le “Maeu Lou Tutasi!” O isi mataupu o loo taulai atu i le mafuaaga ua tatou mautinoa ai e faagaeeina tauatua le Tusi Paia. Ua aumaia foi e le tusi fou se vaaiga atoa i le Tusi Paia, lea o loo faaali mai ai uiga totino o Lē na Foafoaina Mea ma ona ala. E lē gata o loo talanoaina e le tusi le mafuaaga ua faatagaina ai e le Atua puapuaga ae o loo ia faamatala maia foi le auala o le a ia faaiuina ai e faavavau.

[Ata i le itulau 7]

E toatele na papatisoina

[Ata i le itulau 7]

Na tatalaina le polosiua fou e A. D. Schroeder, o se sui o le Vaega Pule a Molimau a Ieova

[Ata i le itulau 8, 9]

Se tala faafiafia loto na faalaeiau ai le faitauina o le Tusi Paia i aso taitasi