Le Taui o le Faamaualuga—O le ā Lona Telē?

PO UA e feagai ea ma se tagata e taumafai ma le loto i ai e faamā oe? Atonu o se pule, se ovasia, po o sou tauaiga foi o lē e vaai maulalo ia te oe ma matuā faaali atu lava ia te oe lona ʻinoʻino? O le ā sou lagona e faatatau i lena tagata? Pe na e tosina atu ea i ona uiga? E mautinoa e leai! Aisea? Auā e faatupuina e le faamaualuga papupuni ma faatamaia ai fesootaiga.

O le faamaualuga e taʻufaatauvaaina ai e se tasi isi tagata, ina ia faaauau ai pea ona foliga atu e sili o ia. O le tagata e iai se uiga faapena, e seāseā lava ona faia se tala lelei e faatatau i isi. E masani lava ona iai faamatalaga lē mautinoa ina ia suia ai viiga lelei—“ioe, atonu e saʻo peitai e ia te ia le faafitauli lea po o le pona lea.”

I le tusi Thoughts of Gold in Words of Silver, o loo faamatalaina ai le faamaualuga o se “uiga leaga e faigata ona faatoilaloina. Na te faaleagaina se tagata, ma tau leai ai se uiga lelei e totoe e viia ai.” Pe o se mea e ofo ai le faapea atu e leai se tagata e toafilemu pe a faatasitasi ma se tagata faamaualuga? O le mea moni, o le taui o le faamaualuga e masani lava o le leai o ni uo moni. “I le tuufaafeagai,” na faaauau ona faapea mai le tusi lava lea, “e alolofa tagata i lē lotomaulalo—e lē o lē mitamita ona o ia e lotomaulalo, ae o lē lotomaulalo moni.” Ua talafeagai la, le faapea mai o le Tusi Paia: “O le faamaualuga o le tagata e faamaulaloina ai o ia; a o le faamaulalo o le loto e maua ai le viiga.”—Faataoto 29:23.

Peitai, e sili atu i le maua ai o uo po o le faamamaluina e tagata, ae e faapefea i le faamaualuga ona aafia ai le faiā a se tasi ma le Atua? O le ā le silasila a le Atua i le faamaualuga, le lotofefete, ma le faafiapoto? Faamaualuga po o le lotomaulalo—pe e taulia ea ia te ia?

Se Lesona o le Lotomaulalo

Na tusi le tusitala faagaeeina o le Faataoto e faapenei: “E muamua le faamaualuga i le malaia; e muamua foi le loto faasiasia i le paū. E lelei ona maulalo o le loto faatasi ma e ua agamalu; a e leaga ona tufa le vete faatasi ma ē faamaualuga.” (Faataoto 16:18, 19) Ua faamautuina le atamai o na upu i le mea na tupu i le taʻitaʻiʻau a Suria o Naamanu, o lē na soifua i le vaitaimi o le perofeta Isaraelu o Elisaia.

Sa avea Naamanu o se lepela. I lana sailiga fofo, na malaga atu ai i Samaria ma lona mafaufau o le a la feiloai totino ai ma Elisaia. Na i lo lena, na auina mai e le perofeta lana auauna ma le faatonuga mo Naamanu ina ia taele faafitu i le Vaitafe o le Ioritana. Na faalumaina Naamanu i le fofō ma le fautuaga. Aisea na lē sau ai le perofeta i fafo e talanoa atu ia te ia ae auina atu i ai se auauna? Ma e mautinoa foi, so o se vai lava o Suria e tutusa lona lelei ma le Ioritana! O lona  faafitauli o le faamaualuga. O le iuga? O le mea e fiafia ai, na mālō fautuaga atamai mo ia. “Ona alu ifo ai lea o ia, ua fufui faafitu i Ioritana, e tusa ma le upu a le tagata o le Atua, ona foi mai ai lea o lona tino tuai pei o le tino o le tama itiiti, ua mamā foi ia.”—2 Tupu 5:14.

I nisi taimi e tele aogā e maua mai i le faatinoina o sina lotomaulalo.

Le Taui o le Fiasili

Peitai o le taui e maua mai le faamaualuga, e mafai ona sili atu ona matuia na i lo le lē maua o ni faamanuiaga. E iai se isi ituaiga o faamaualuga lea e faamatalaina mai e le upu “faasausili” (hubris), lea o loo faamatalaina o se “matuā faamaualuga po o le mautinoa naua ia te ia lava ma e masani ona iu ai i le faasalaina.” (Webster’s Ninth New Collegiate Dictionary) O lenei upu na tupuga mai i Eleni, ma e tusa ai ma le faamatalaga a se tagata fai tofā Eleni o William Barclay, “o le faasausili e fesootai ai le faamaualuga ma le faasauā . . . , le manatu faatauvaa ma le fiasili lea e uunaia ai [se tagata] ina ia matuā solipala faalogona o ona uso a tagata.”

O se faataitaiga manino o lenei matuā faamaualuga o loo taʻua i le Tusi Paia. O le mea lea na faia e Anuni le tupu o Amoni. Ua faapea mai le Insight on the Scriptures: “Ona o le faaalia o le agalelei o Naasa ia Tavita, na aauina atu ai e Tavita ana auauna e faamafanafana ia Anuni ona o le maliu o lona tamā. Ae peitai, na talitonu Anuni i ona alii o ē na faapea atu ua na o se togafiti lenei a Tavita i lona taulamalama mai i le aai, ma latou faalumaina ai auauna a Tavita e ala i lo latou seleina faaitutasi o a latou ʻava ma taselei i o latou ofu seia oo ifo i o latou nofoaga ona toe aauina ese atu lea o i latou.” * E tusa ai o lenei mea na tupu, ua faapea mai ai Barclay: “Sa matuā faasausili lena faiga. Sa avea o se taufaifai, faasauā, o se faiga ua aofia ai faiga uma e faalumaina ai i le lautele.”—2 Samuelu 10:1-5.

Ioe, e mafai e le tagata faamaualuga ona avea ma sē e faasausili, gutuā, e faapogaia ai le faalumaina. E fiafia i le faatiga i se tasi i se auala lē alofa ma lē faaleuo ona faaamuamu atu lea i le tulaga faalemanuia ma le matuā faalumaina o le isi tagata. Ae o le faaleagaina po o le aveesea o le faaaloalogia o se tasi e pei o se pelu e faataumaai ona itu. E iu ai i le leai o se uo, ma sili atu ona foliga mai o le a avea ma fili.

E faapefea i se Kerisiano moni ona faaalia sea faamaualuga faatiga, e ui o lea na faatonuina e lona Matai e faapea ‘e te alofa atu i lē lua te tuaoi, ia pei o oe lava ia te oe’? (Mataio 7:12; 22:39) E manino le feteenai ma mea uma e atagia atu ai le Atua ma Keriso. I lenei tulaga, na faia ai e Barclay se manatu tāua: “O le faasausili o le faamaualuga lea e uunaia ai se tasi e tetee i le Atua.” O le faamaualuga lena lea e faapea mai: ‘E leai se Ieova.’  (Salamo 14:1) Ia po o lea foi o loo faamatala mai i le Salamo 10:4: “O le faasiasia o mata o le ua amio leaga e le saili ai o ia; o ona mafaufau uma, E leai se Atua.” O sea faamaualuga, po o le lotofefete, e faaesea ai se tasi e lē gata mai uo ma aiga ae maise foi o le Atua. Maeu se taui e ao ona totogia!

Aua Neʻi Faatagaina le Faamaualuga e Faaleagaina Oe

E tele tāfa o le faamaualuga—o le faamaualuga e māfua mai i le lotonuu, le faailogalanu, faailogatagata ma le faaituau, i aʻoaʻoga, tamaoaiga, mamalu, ma le malosi. I so o se itu, e faigofie lava i le faamaualuga ona sao atu ma faaleagaina ai ou uiga totino.

O le toatele o tagata e faaalia lo latou lotomaulalo pe a feagai ma ē maualuluga po o ē latou te tupulaga faatasi. Ae o le ā e tupu pe a oo atu le tagata lotomaulalo lea i le tulaga o le avea ma pule? E faafuasei lava, ona avea o ia ma pule sauā ua avea ai le olaga o se faanoanoaga mo ē e i lalo o lana vaavaaiga! E ono tupu lenei mea i se tasi pe a ia ofuina se toniga po o le tauaveina o se pine e iloa ai le tulaga pule. E oo foi i tagata faigaluega a le malo le faamaualuga i lo latou feagai ai ma tagata a lautele, i le manatu faapea o tagata na o loo auauna mo i latou, ae lē o i latou mo tagata. E mafai e le faamaualuga ona uunaia oe e inainā, ma leai ma ni faalogona mo le isi; a o le agamalu e uunaia ai oe e agalelei.

Sa ono mafai ona faamaualuga Iesu ma inainā i ona soo. Sa avea o ia o se tagata lelei atoatoa, le Alo o le Atua, sa feagai ma ni soo lē lelei atoatoa, aioso, ma malolosi loto. Ae peitai, o le ā le valaaulia na ia tuuina atu i ē na faalogologo? “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.

Pe o masani ona tatou taumafai e mulimuli i le faaaoaoga a Iesu? Po o tatou faaalia ea le inainā, pulepuletutū, pule sauā, lē alofa, ma faamaualuga pe mitamita? I le pei o Iesu, taumafai ina ia faafouina ai, ae lē o le faapologa. Ia tetee atu i aafiaga e faaleagaina ai o le faamaualuga.

E tusa ai ma manatu ua talanoaina, pe o le faamaualuga po o le mitamita e leaga i taimi uma?

Faaaloalogia Totino Faatusatusa Atu i le Faualuga

O le faamaualuga po o le mitamita e mafai foi ona avea “o se faaaloalogia totino ua talafeagai i ai.” O le faaaloalogia totino o lona uiga o le iai lea o se faaaloalo mo oe lava. O lona uiga e te amanaia le auala o loo manatu ai isi ia te oe. E te manatu mamafa i ou foliga vaaia ma lou talaaga. Ua saʻo ai le muagagana faa-Sepania, “Taʻu mai po o ai o lua savavali faatasi ona ou taʻu atua lea po o ai oe.” Afai e sili ia te oe le aumea ma tagata tueleelea, paiē, tūfanua, ma tautala lē mafaufau, ona e pei ai lea o i latou. O le a e pisia i o latou uiga, ma pei ai o i latou, o le a leai ai sou faaaloalo totino.

O le mea moni, e iai le isi itu e matuā vala lava—o le faamaualuga po o le mitamita lea e taitaia ai i le faualuga po o le lē aogā. Sa faamaualuga le au tusiupu ma le au Faresaio i le vaitaimi o Iesu i a latou tu ma o latou foliga mapolotu naua. Na lapatai Iesu e faatatau ia i latou: “Ua latou fai a latou galuega uma, ina ia iloa ai e tagata; ua latou faalautele i a latou filateri, ma faatele i tuupao o latou ofu [ina ia foliga atu ai o ni ē ua matuā tuutoina i le lotu]. Ua latou fiafia foi i le mea sili e taoto ai i faigaai, ma nofoa sili i sunako, ma ia alofaina i latou i malae, ia taʻua foi i latou e tagata, Rapi e.”—Mataio 23:5-7.

O lea, o le faamaualuga po o le mitamita tatau, o se uiga e ao ona faapaleni. Ia manatua foi, e silasila Ieova i le loto, ae lē na o mea o loo faaali mai i fafo. (1 Samuelu 16:7; Ieremia 17:10) O le faafiaamiotonu totino e lē o le amiotonu lena a le Atua. E ui i lea, o le fesili lenei, E faapefea ona tatou atiina ae le lotomaulalo moni ma alofia ai le totogia o le taui matautia o le faamaualuga?

[Faaopoopoga i lalo]

[Ata i le itulau 4]

O sina lotomaulalo na maua ai e Naamanu aogā e tele