Le Togiola a Keriso—le Ala a le Atua Mo le Faaolataga

“Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—IOANE 3:16.

1, 2. Faamatala mai le tulaga faigata ua tuputupu aʻe e faatatau i le fanau a tagata.

SEʻI faapea o loo e aafia i se maʻi e mautinoa e ono uma ai lou soifua seʻi vaganā ua faia sou taotoga. O le ā sou lagona pe afai o le tau o le taotoga sa matuā lē mafai lava ona e gafatia? E faapefea pe afai e tusa lava pe tuufaatasi uma se tupe a lou aiga ma uo, ae lē mafai lava ona totogiina ai? O le fesagaia o se tulaga faigata faapena e faamataʻuina ai le ola o se mea e matuā tiga!

² Ua faataitaia i lena mea le tulaga ua tuputupu aʻe e faatatau i le fanau a tagata. O o tatou uluai mātua, o Atamu ma Eva, sa lelei atoatoa ona foafoaina. (Teuteronome 32:4) Sa ia i laua le faamoemoe o le ola e faavavau ma le faataunuuina o le fuafuaga a le Atua: “Ia fanafanau ia, ma ia uluola, ma ia tumu ai le lalolagi, ia faatoilalo i ai.” (Kenese 1:28) Peitai, na fouvale Atamu ma Eva i Lē na Foafoaina i laua. (Kenese 3:1-6) O lo la lē usiusitai na aumaia ai le agasala e lē gata ia Atamu lava ia ma Eva, ae faapena foi i a la fanau e lei fananau mai. Na taʻua mulimuli ane e le tagata faamaoni o Iopu: “Po o ai ea e au mai se mea mamā nai le mea eleelea? e leai se tasi.”—Iopu 14:4.

3. Ua faapefea ona faasolo atu le oti i tagata uma?

³ Ua pei ai la le agasala o se maʻi ua aafia ai i tatou uma taitoatasi, auā ua taʻua e le Tusi Paia “ua agasala tagata uma.” O lenei tulaga ua oo i ni āuga e lamatia ai le ola. O le mea moni lava, “o le oti, o le totogi lea o le agasala.” (Roma 3:23; 6:23) E leai se tasi o i tatou e mafai ona sao mai ai. O tagata uma lava e agasala, o lea la, o tagata uma foi e feoti. Ona o ni ē tupuga mai ia Atamu, ua tatou fananau mai ai i lenei tulaga faigata. (Salamo 51:5) Na tusi mai Paulo e faapea: “[Ua] oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ae lē faapea ai la ua tuua i tatou e aunoa ma se faamoemoe mo le faaolataga.

Le Soloiesea o le Agasala ma le Oti

4. Aisea e lē mafai ai e tagata i lo latou lava malosi ona soloiesea maʻi ma le oti?

⁴ O le ā e manaomia ina ia soloiesea ai le agasala ma lona āuga, o le oti? E mautinoa, o se mea e sili atu na i lo se mea e mafai e so o se tagata ona saunia. Na auē le faisalamo e faapea: “E matuā taugata lava le totogi mo le ola o le tagata. O le mea e mafai ona ia totogia e lē tāitai ona lava e taofia mai ai lona alu atu i le tuugamau, ina ia mafai ona ia ola e faavavau.” (Salamo 49:8, 9, Today’s English Version) O le mea moni, atonu e mafai ona tatou faateleina le umi tatou te ola ai mo ni nai tausaga e ala i le fuafua lelei o a tatou taumafa tatau ma tausiga faafomai, peitai, e leai se tasi o i tatou e mafai ona foiaina lo tatou tulaga agasala ua tuufaasolo mai. E leai se tasi o i tatou e mafai ona toe suia aafiaga leaga o loo faasolo mai i le soifuaga matua, ma toe faafoi lo tatou tino i le lelei atoatoa lea  na uluai fuafuaina ai e le Atua. E mautinoa sa lei soona faamamafa naʻuā le tala a Paulo ina ua ia tusi e faapea, ona o le agasala a Atamu, ua ‘faatoilaloina ai [le tagata] i le iu vale’—pe e pei ona taʻua e le The Jerusalem Bible, “ua lē mafai ai ona ausia lona fuafuaga.” (Roma 8:20) Peitai, o le mea e fiafia ai, auā ua lē lafoaia i tatou e Lē na Foafoaina Mea. Ua ia faia se sauniuniga ina ia aveesea le agasala ma le oti ma lē toe iai e faavavau. E faapefea?

5. Na faapefea i le Tulafono na tauaao atu ia Isaraelu ona atagia mai ai se matuā naunau i le faamasinoga tonu?

⁵ O Ieova “e fiafia o ia i le amiotonu ma le faamasinoga [tonu].” (Salamo 33:5) O le Tulafono na ia tauaao atu ia Isaraelu ua atagia mai ai lona matuā naunau i se faamasinoga e paleni ma e lē faaituau. Mo se faaaoaoga, i totonu o nei tulafono, tatou te faitau ai faapea “e tatau ona avatu le ola e sui aʻi le ola.” I se isi faaupuga, afai e fasiotia e se Isaraelu se isi, o lona lava ola o le a tatau ona fasiotia ina ia totogi ai le ola na ia faatamaia. (Esoto 21:23, NW; Numera 35:21) Ona fetaui ai lea o le fua o le faamasinotonu tauatua.—Faatusatusa i le Esoto 21:30.

6. (a) I le ā le uiga na mafai ai ona taʻua Atamu o se fasioti tagata? (e) O le ā le ituaiga o ola na melea e Atamu, ma o le ā le ituaiga o taulaga o le a manaomia ina ia faafetaui ai le fua o le faamasinotonu?

⁶ Ina ua agasala Atamu, sa avea o ia o se fasioti tagata. I le ā le uiga? Auā o lea ua ia tuufaasolo mai lona tulaga agasala—ma faapea ona oo ai le oti—i ē uma e tupuga mai ia te ia. Ona o le lē usiusitai o Atamu, ua māfua ai i lenei lava taimi ona faasolosolo ina faaleagaina o tatou tino, ma agaʻi atu ai i le tuugamau. (Salamo 90:10) E iai foi se isi āuga e sili atu ona matuia o le agasala a Atamu. Manatua foi, o le mea na melea e Atamu mo ia lava ma ana fanau, sa lē o se olaga masani o sina 70 pe 80 tausaga. Sa ia melea le ola lelei atoatoa—o le mea moni lava, o le ola e faavavau. Afai la e ‘tatau ona sui le ola i le ola’ o le ā la le ituaiga o ola o le a avatu e faapaleni ai le faamasinotonu i lenei itu? I se tulaga talafeagai, e tatau ona avatu se ola faaletagata lelei atoatoa—se ola e pei o le ola o Atamu, sa iai se faamoemoega o le fananau mai ai o ni fanau faaletagata lelei atoatoa. Afai e ofoina faataulaga, o lona uiga la o le ola faaletagata lelei atoatoa e lē gata ia paleni ai le fua o le faamasinotonu, ae ia mafai ai foi ona soloiesea atoatoa le agasala ma lona āuga, o le oti.

Totogiina le Tau o le Agasala

7. Faamatala mai le uiga o le upu “togiola.”

⁷ O le tau e manaomia ina ia togiola ai i tatou mai le agasala o loo taʻua i le Tusi Paia e faapea o “le togiola.” (Salamo 49:7) I le faa-Peretania o lena taʻu e mafai ona faatatau atu i le tau e tāpā e se tagata o loo ia taofia faamalosi se tasi, ina ia totogi atu ona toe faafoi mai lea o le tagata o loo ia taofia faamalosi. O le mea moni, o le togiola ua saunia e Ieova e lē aofia ai se taofia faamalosi o se tasi. O loo tumau pea le manatu i le totogiina o se tau. O le mea moni, o le vaega faaveape o le upu Eperu lea ua faaliliuina o le “togiola” o lona uiga moni o le “ia totogi.” Ina ia togiolaina le agasala, e tatau ona tutusapau le togiola ma le mea lea e ao ona totogia—le ola faaletagata lelei atoatoa o Atamu.

8. (a) Faamatala mai le mataupu silisili e tusa o le toe faatauina mai o se mea. (e) E faapefea i le mataupu silisili o le toe faatauina mai o se mea ona fesootai mai ia i tatou o tagata agasala?

⁸ E ogatasi lenei ma se mataupu silisili sa iai i le Tulafono Faa-Mose—le mataupu silisili o le toe faatauina mai o se mea. Pe a oo ina mativa se tagata Isaraelu ma faatauina atu o ia e avea ma pologa i se tagata e lē o se Isaraelu, sa mafai e sona tauaiga ona toe faatau mai (pe, togiolaina) o ia e ala i le totogia o se tau lea sa manatu i ai e tutusa lelei ma le tau o le pologa. (Levitiko 25:47-49) Ua faapea mai le Tusi Paia ona o i tatou o ni tagata lē lelei atoatoa, ua avea ai i tatou ma ē ‘faapologaina i le agasala.’ (Roma 6:6; 7:14, 25) O le ā o le a manaomia ina ia toe faatauina ai i tatou? E pei ona tatou iloa, o le leiloa o le ola faaletagata lelei atoatoa e manaomia ona totogi i se ola faaletagata lelei atoatoa—e lē sili atu, e lē itiiti ifo foi.

9. Ua faapefea ona faia e Ieova le sauniuniga ina ia totogia ai agasala?

⁹ O le mea moni, o i tatou o tagata, tatou te fananau mai ua lē lelei atoatoa. E leai se tasi o i tatou e tutusa ma Atamu; e leai foi se tasi o i  tatou e mafai ona totogia le tau o le togiola lea e tāpā mai e le faamasinoga tonu. E pei ona taʻua i le amataga o le mataupu, ua peiseai ua tatou aafia i se maʻi ua lamatia ai o tatou soifua ae tatou te lē gafatia ona totogia se taotoga lea e mafai ona togafitia ai. I se tulaga faapena, pe tatou te lē loto faafetai ea pe afai ua tulai ane se tasi mo i tatou ma totogia le tau? O le mea tonu lava lena ua faia e Ieova! Ua ia faia le sauniuniga ina ia togiolaina i tatou mai le agasala, e faatasi ona faia ae faavavau ona aogā. Ioe, o loo naunau o ia e foai mai ia i tatou se mea e lē tāitai mafai ona tatou totogia. E faapefea? Na tusi mai Paulo: “O le ola faavavau, o le mea foaifuaina mai lea e le Atua, i lo tatou Alii o Keriso Iesu.” (Roma 6:23) Na faamatalaina e Ioane Iesu e faapea o “le Tamai mamoe a le Atua, na te aveesea le agasala a le lalolagi.” (Ioane 1:29) Seʻi o tatou vaai pe na faapefea ona faaaogā e Ieova lona Alo pele e totogi ai le tau o le togiola.

“Se Togiola Talafeagai”

10. Na faapefea i valoaga e faatatau i le “fanau” ona taulai atu ia Iosefa ma Maria?

¹⁰ O le taimi lava na uma ai le fouvalega i Etena, na faasilasila ai e Ieova lana fuafuaga ina ia saunia se “fanau,” o le a togiolaina tagata mai le agasala. (Kenese 3:15) E ala i se faasologa o faaaliga tauatua, na faailoa mai ai e Ieova le gafa o le aiga o le a tupu mai ai lenei fanau. Na oo mai le taimi na taulai atu ai nei faaaliga ia Iosefa ma Maria, o se alii ma se tamaitai sa faamau, na nonofo i Palesitina. I se faalepo, na taʻu atu ai ia Iosefa e faapea ua tō Maria e ala i le agaga paia. Na faapea atu le agelu: “E fanau mai e ia le tama tane, e te faaigoa foi ia te ia o Iesu; auā e faaola e ia lona nuu ai a latou agasala.”—Mataio 1:20, 21.

11. (a) Na faapefea ona fuafuaina e Ieova ia fanau mai lona Alo o se tagata lelei atoatoa? (e) Aisea na mafai ai e Iesu ona saunia “se togiola talafeagai”?

¹¹ E mautinoa e matuā uigaese mai lenei maʻito, auā sa soifua muamua Iesu i le lagi a o lei avea o se tagata. (Faataoto 8:22-31; Kolose 1:15) Na faaliliuina e le mana faivavega o Ieova lona ola i le manava o Maria, ma mafai ai e lenei Alo pele o le Atua ona fanau mai o se tagata. (Ioane 1:1-3, 14; Filipi 2:6, 7) Sa vaavaaia e Ieova tulaga o mea ina ia lē ponā Iesu i le agasala a Atamu. I se faaeseesega, sa fanau mai Iesu e lelei atoatoa. O lea, na ia maua ai le mea na leiloa ia Atamu—le ola faaletagata lelei atoatoa. Faatoʻā mafai ai ona iai se tagata e mafai ona totogia le tau o le agasala! Ma o le mea tonu lava lena na faia e Iesu ia Nisani 14, 33 T.A. I lena aso mataina, na faataga ai e Iesu o ia lava ina ia fasiotia e ona fili, ma saunia ai “se togiola talafeagai.”—1 Timoteo 2:6, NW.

 Le Aogā o le Ola Faaletagata Lelei Atoatoa

12. (a) Faamatala mai le eseesega tāua tele i le va o le maliu o Iesu ma le oti o Atamu. (e) Ua faapefea ona avea Iesu o le “Tamā o le faavavau” mo tagata usiusitai?

¹² E iai le eseesega i le va o le maliu o Iesu ma le oti o Atamu—o se eseesega e faamatilatila mai ai le aogā o le togiola. Na tatau le oo o le oti ia Atamu, auā na ia lē usitai ma le loto i ai i Lē na Faia o ia. (Kenese 2:16, 17) Ae peitai, o le maliu o Iesu sa matuā lē ono ma tatau lava i ai, auā o ia “o le na le agasala lava.” (1 Peteru 2:22) Ina ua maliu la Iesu, sa ia te ia se mea e matuā telē le aogā, lea sa lei ia Atamu ina ua oti—o le aiā e maua ai se ola faaletagata lelei atoatoa. O lea, sa iai se aogā faatogiola o le maliu o Iesu. Ina ua afio aʻe i le lagi o se peresona agaga, na ia foai atu ai le aogā o lana taulaga ia Ieova. (Eperu 9:24) O le faia faapea, na faatauina mai ai e Iesu tagata agasala ma avea o ia ma o latou Tamā fou, o sē ua suitulaga ia Atamu. (1 Korinito 15:45) O se mafuaaga lelei la ua taʻua ai Iesu o le “Tamā o le faavavau.” (Isaia 9:6) Seʻi manatu i le uiga o lenei mea! O Atamu, le tamā agasala, ua ia tuufaasolo mai le oti i ana fanau uma. O Iesu, le Tamā lelei atoatoa, ua ia faaaogā le aogā o lana taulaga e faaoo mai ai le ola e faavavau i tagata usiusitai.

13. (a) Ia faataitai mai pe na faapefea ona tafiesea e Iesu le aitalafu na faapogaia e Atamu. (e) Aisea e lē totogia ai e le taulaga a Iesu le agasala a o tatou uluai mātua?

¹³ Ae mafai faapefea e le maliu o se tagata e toatasi ona totogia uma ai agasala a le toatele? (Mataio 20:28) I se mataupu i ni tausaga ua mavae, sa tatou faataitaia ai le togiola i le auala lenei: “Tagaʻi faalemafaufau i se falegaosimea ma ni ona tagata faigaluega e faitau selau. Ua gau le pisinisi ona o le lē faamaoni o le pule; tapuni loa ma faitotoa o le falegaosimea. Ua leai nei ni galuega a le faitau selau ma ua lē mafai ona totogia a latou aitalafu. O a latou paaga faaipoipo, o fanau, ioe, ma ē nonofo aitalafu i ai, ua mafatia uma lava ona o le leaga o lena tagata e toatasi! Ona sau lea o se mauoloa matamau, totogi uma aitalafu a le kamupani ma toe tatalaina le falegaosimea. Na iʻu le solofuaina o lena aitalafu e tasi, i le aumaia o se mapusaga atoatoa i le toatele o tagata faigaluega, o latou aiga, ma ē nonofo aitalafu i ai. Peitai faamata e maua se sao o le uluai pule i lenei tamaoaiga fou? Leai, ua tuua o ia i le falepuipui ma ua tuliesea e faavavau o ia mai lana galuega! E faapena foi, o le solofuaina o le agasala e tasi a Atamu ua aumaia ai aogā i le faitau miliona o ē tupuga mai ia te ia—ae lē ia Atamu.”

14, 15. Aisea e mafai ai ona taʻua Atamu ma Eva o ni ē na agasala ma le loto i ai, ma ua faapefea ona ese lo tatou tulaga mai ia i laua?

¹⁴ O se faiga ua saʻo lenei. Manatua, sa faia ma le loto i ai e Atamu ma Eva le agasala. Sa la filifili e lē usiusitai i le Atua. I se faaeseesega, ua tatou fananau mai i le tulaga agasala. E leai sa tatou filifiliga na faia. Po o ā lava ni a tatou taumafaiga malolosi, e lē mafai ona tatou alofia atoatoa ai le agasala. (1 Ioane 1:8) E iai taimi tatou te ono lagona ai e pei o Paulo, o lē na tusi mai: “Pe a ou loto atu i le lelei e fai, ua ia te au le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua  fai foi aʻu ma tagata o taua i le tulafono a le agasala o loo i oʻu tino. Aue o aʻu le tagata malaia!”—Roma 7:21-24.

¹⁵ Peitai, ona o le togiola, ua tatou maua ai se faamoemoe! O Iesu o le fanau lea, e pei ona folafola mai e le Atua, “e manuia ai atu nuu uma lava o le lalolagi.” (Kenese 22:18; Roma 8:20) O le taulaga a Iesu ua tatala atu ai le faitotoa i avanoa ofoofogia mo i latou o ē faaalia le faatuatua ia te ia. Seʻi o tatou talanoaina nisi o na avanoa.

Mauaina o Aogā Mai le Togiola a Keriso

16. E ui lava i lo tatou tulaga agasala, ae o ā aogā ua mafai nei ona tatou olioli ai ona o le togiola a Iesu?

¹⁶ Ua taʻutino mai e le tusitala o le Tusi Paia o Iakopo e faapea “o mea e tele e sese ai i tatou uma.” (Iakopo 3:2) Ae ona o le togiola a Keriso, ua mafai ai ona faamagaloina o tatou sese. Ua tusi mai Ioane: “Pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu. O le togiola foi o ia mo a tatou agasala.” (1 Ioane 2:1, 2) O le mea moni, e lē tatau ona tatou manatu māmā i le agasala. (Iuta 4; faatusatusa i le 1 Korinito 9:27.) Peitai ane, pe afai tatou te sese, e mafai ona sasaa atu o tatou loto ia Ieova, i le mautinoa e ‘nofo sauni o ia e faamagalo.’ (Salamo 86:5; 130:3, 4; Isaia 1:18; 55:7; Galuega 3:19) E ala la i le togiola, ua mafai ai ona tatou auauna atu i le Atua ma se loto fuatiaifo mamā ma faafaigofie ona tatou faalatalata atu ia te ia i le tatalo e ala i le suafa o Iesu Keriso.—Ioane 14:13, 14; Eperu 9:14.

17. Ona o le togiola, o ā faamanuiaga o le a mafai ona maua i le lumanai?

¹⁷ O le togiola a Keriso ua tatala ai le ala mo le faataunuuina o le fuafuaga a le Atua—ina ia ola e faavavau tagata usiusitai i le Parataiso i luga o le lalolagi. (Salamo 37:29) Na tusi mai Paulo: “O [Iesu] o le Ioe i mea uma ua folafolaina e le Atua.” (2 Korinito 1:20) E moni, “ua pule e pei o se tupu” le oti. (Roma 5:17, NW) O le togiola ua saunia ai le faavae mo le Atua ina ia soloiesea lenei “toe fili.” (1 Korinito 15:26; Faaaliga 21:4) E mafai foi e le togiola a Iesu ona aogā mo ē ua maliliu. Na fetalai Iesu e faapea: “E oo mai le aso e faalogo ai i [le leo o Iesu] o i latou uma ua i tuugamau, ma latou o mai ai.”—Ioane 5:28, 29; 1 Korinito 15:20-22.

18. O ā āuga matautia ua aumaia e le agasala i tagata, ae o le a faapefea ona toe suia lenei mea i le lalolagi fou a le Atua?

¹⁸ Seʻi manatu i le fiafiaga o le a iai i le ola i se olaga sa muai fuafuaina ia iai—e aunoa ma ni popolega e pei o ia e faavaivaia i tatou i aso nei! O le agasala ua lē gata ina lē ogatasi ai i tatou ma le Atua, ae ua tatou lē ogatasi ai foi ma o tatou lava mafaufau, loto, ma tino. Peitai ane, ua folafola mai e le Tusi Paia e faapea i le lalolagi fou a le Atua, “e le fai mai foi se tasi ua mau ai, Ou te maʻi.” Ioe, o maʻi o le tino ma faalogona o le a lē toe pagatia ai le fanau a tagata. Aisea? Ua tali mai Isaia: “E faamagaloina agasala a le nuu e nonofo ai.”—Isaia 33:24.

Le Togiola—Le Faailoaga o le Alofa

19. E tatau faapefea ia i tatou taitoatasi ona tali atu i le togiola a Keriso?

¹⁹ O le alofa na uunaia ai Ieova e auina mai lona Alo pele. (Roma 5:8; 1 Ioane 4:9) Ma o lea, o le alofa foi na uunaia ai Iesu ina ia “oo ia te ia le oti ona o tagata uma.” (Eperu 2:9; Ioane 15:13) Ua saʻo la le tusi mai o Paulo faapea: “Ua pulunaunauina i matou i le alofa o Keriso; . . . na maliu foi o ia ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Korinito 5:14, 15) Pe afai tatou te talisapaia mea na fai e Iesu mo i tatou, o le a tatou tali atu la. Ae maise, o le togiola ua mafai ai ona laveaiina i tatou mai le oti! E mautinoa tatou te lē mananao e faailoa atu i a tatou gaoioiga faapea tatou te manatu i le taulaga a Iesu o se mea e leai sona aogā uigaese.—Eperu 10:29.

20. O ā nisi auala tatou te usitaia ai le “upu” a Iesu?

 ²⁰ E mafai faapefea ona tatou faaali atu se talisapaia mai le loto mo le togiola? A o toeitiiti oo i lona puʻeina faapagota, na fetalai ai Iesu: “Afai e alofa mai se tasi ia te au, e tausia e ia laʻu upu.” (Ioane 14:23) O le “upu” a Iesu e aofia ai lana poloaiga ina ia faia so tatou sao maelega i le faataunuuina o le tofiga: “O lenei, ia outou o atu e fai nuu uma lava ma soo, ma papatiso atu ia te i latou.” (Mataio 28:19) O le usiusitai ia Iesu e aofia ai foi lo tatou faaalia o le alofa mo o tatou uso faaleagaga.—Ioane 13:34, 35.

21. Aisea e tatau ai ona tatou auai i le Faamanatuga ia Aperila 1?

²¹ O se tasi o auala e sili ona lelei e mafai ona tatou faaalia ai le talisapaia mo le togiola, o le auai atu lea i le Faamanatuga o le maliu o Keriso, lea o le a faia i lenei tausaga ia Aperila 1. * O lenei foi mea o se vaega lea o le “upu” a Iesu, auā ina ua faavaeina lenei faamanatuga, na poloai atu ai Iesu i ona soo: “Tou te faia le mea nei e fai ma faamanatuga ia te au.” (Luka 22:19) E ala i lo tatou auai atu i lenei sauniga e sili ona tāua ma lo tatou uaʻi totoʻa atu i mea uma na poloaia e Keriso, o le a tatou faaalia ai lo tatou talitonuga mausalī e faapea, o le togiola a Iesu o le ala lea a le Atua mo le faaolataga. E moni lava, “e leai foi se tasi ua i ai le ola.”—Galuega 4:12.

[Faaopoopoga i lalo]

Pe Mafai Ona E Manatua?

□ Aisea e lē mafai ai e tagata ona togiolaina lo latou tulaga agasala?

□ I le ā le itu ua avea ai Iesu ma “se taulaga talafeagai”?

□ Na faaaogā faapefea e Iesu lana aiā i se soifua faaletagata lelei atoatoa mo lo tatou lelei?

□ O ā faamanuiaga e maua e tagata ona o le togiola a Keriso?

[Fesili mo le Suʻesuʻega]

[Ata i le itulau 15]

E na o se tagata lelei atoatoa—e tutusa atu ia Atamu—e mafai ona faapaleniina le fua o le faamasinotonu

[Ata i le itulau 16]

Talu ai sa ia Iesu le aiā e maua ai le soifua faaletagata lelei atoatoa, o lona maliu la sa iai se aogā faataulaga