O Aiga Toatele ua Autasi e Auauna i le Atua

Na tusi le faisalamo e faapea: “O le fanau, o le tofi lea mai ia Ieova; o e ua fanau mai, o le taui lea mai ia te ia. E pei o u fanafana i le lima o le toa, e faapea lava atalii o taulelea. amuia le tagata ua tumu ai lana utu.”—Salamo 127:3-5.

IOE, e mafai ona avea fanau ma faamanuiaga mai ia Ieova. Ma e pei lava ona maua e le tagata fanafana ū le faamalieina pe a ia iloa le auala e tafanaina ai ū o loo i lana utu, e faapena foi ona mauaina e mātua le fiafiaga pe a latou taitaiina a latou fanau i le ala e taʻitaʻia atu ai i le ola e faavavau.—Mataio 7:14.

I aso ua mavae, sa taatele ai i tagata o le Atua aiga sa ‘faatumulia a latou utu’ i fanau toatele. Seʻi tomānatu mo se faaaoaoga i tausaga o lo latou faaaunuua ai i Aikupito: “Ua fanafanau le fanauga a Isaraelu, ua matuā faatoateleina, ua uluola, ma ua faasilisili ona toatele, ua tumu lava le nuu ia te i latou.” (Esoto 1:7) Pe a faatusatusa atu le fuainumera o tagata Isaraelu na ulu atu i Aikupito ma le fuainumera o i latou na toe tuumuli ese mai, ua aumaia ai se tuufaatatauga e tusa ma le taʻi toasefulu le aofai o tamaiti na iai i le aiga!

Mulimuli ane, na soifua aʻe ai Iesu i se aiga e ono manatu i ai le toatele i aso nei o se aiga toatele. O Iesu o le ulumatua, ae sa iai foi isi fanau tama e toʻafā ma ni fanau teine a Iosefa ma Maria. (Mataio 13:54-56) Ona sa toatele naua la la fanau, e foliga mai o le pogai lea sa faafaigata ai ona matauina e Maria ma Iosefa e lē o iai o Iesu i la latou solo, ina ua amata ona toe foi atu la latou malaga mai Ierusalema.—Luka 2:42-46.

 O Aiga Toatele i Aso Nei

I aso nei, e toatele Kerisiano ua filifili e faatapulaa le faitau aofai o o latou aiga mo ni mafuaaga faaleagaga, tulaga tau tamaoaiga, le vafealoai, ma isi lava mafuaaga. E ui i lea, o aiga toatele o loo avea pea ma tulaga masani i le tele o atunuu. E tusa ai ma le State of the World’s Children 1997, o le itumalo pito sili ona maualuga pe a faatusatusa le faitau aofai, o le itu i saute o Sahara, i Aferika. Iina, o le tuufaatatauga e toaono tamaiti e fanau mai e se fafine e toatasi.

Mo mātua Kerisiano o aiga toatele, o le tausia aʻe o a latou fanau ina ia latou alolofa ia Ieova e lē faigofie, ae e toatele ua taulau manuia i le faia faapea. E faalagolago le taulau manuia pe a autasia le aiga i le tapuaiga mamā. O upu a le aposetolo o Paulo i le faapotopotoga i Korinito e tutusa foi lona faatatauga i aiga Kerisiano i aso nei. Na ia tusi: “Le au uso e, ou te aioi atu ia te outou . . . ina ia tasi la outou upu uma lava, ina neʻi i ai ni maseiga ia te outou; a ia maopoopo lava i le loto e tasi ma le manatu e tasi.” (1 Korinito 1:10) E ono mafai faapefea ona mauaina lena autasi?

E Tatau Ona Avea Mātua ma ni Tagata Faaleagaga

O le vala autū o le tatau lea ona tuutoina atu atoatoa mātua i le Atua. Seʻi mafaufau i le mea na taʻu atu e Mose i tagata Isaraelu: “Isaraelu e, faalogologo mai ia, o Ieova lo tatou Atua, o Ieova e toatasi lava ia. Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa. Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.”—Teuteronome 6:4-7.

Mātau na taʻua e Mose faapea o faatonuga a le Atua sa manaomia ona iai ‘i loto’ o mātua. Ona faatoʻā gaoioi loa lea o mātua e tuuina atu e lē aunoa taiala faaleagaga i a latou fanau. O le mea moni, pe afai e malolosi faaleagaga mātua, latou te naunau foi e aʻoaʻo a latou fanau i mataupu faaleagaga.

Ina ia avea o se tagata faaleagaga ma alofa ia Ieova ma le loto atoa, e tāua le faitau, mafaufau loloto, ma faatatauina e lē aunoa le Afioga a le Atua. Na tusi le faisalamo e faapea o lē e fiafia i le tulafono a Ieova ma faitau i ai i le “ao atoa ma le po” o le a “faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.”—Salamo 1:2, 3.

E pei lava ona fua mai o fua lelei i se laau pe afai e faasūsūina e lē aunoa, e faapena foi ona fuaina mai e aiga o loo fafagaina faaleagaga uiga amio Atua, e viia ai Ieova. O se faaaoaoga, o le aiga o Uwadiegwu e nonofo i Aferika i Sisifo. E ui o Uwadiegwu ma lona faletua e toavalu la la fanau, ae o loo auauna uma i laua o ni paeonia sauatoa, po o ni faifeau faataimi atoa o Molimau a Ieova. Ua ia faapea mai: “O loo tausisia pea e lē aunoa e lo matou aiga se suesuega faale-Tusi Paia ua silia nei i le 20 tausaga. Na ma aʻoaʻoina le fanau i le Afioga a le Atua a o tama meamea lava i latou, e lē na o le taimi o la matou suesuega faaleaiga ae faapena foi i le faiva ma isi lava taimi. Ua avea uma la ma fanau o ni ē folafola le tala lelei o le Malo, ae e na o le uii, o lē ua ono ona tausaga, e lei papatiso.”

Galulue o se ʻAu

“Ua atiina ae le fale i le poto,” ua faapea mai ai le Tusi Paia. (Faataoto 24:3) I totonu o le aiga, e fafau aʻe ai e lena poto ni galuega e galulue faatasi ai. O le “kapeteni” o le auaiga o le tamā lea; o ia o lē na tofia e le Atua e fai ma ulu i le  auaiga. (1 Korinito 11:3) Na faamamafa mai e le aposetolo faagaeeina o Paulo le tāua o le avega tauave a le ulu ina ua ia tusi: “Afai e le tausi e se tasi [i le itu faaletino ma le itu faaleagaga] i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.”—1 Timoteo 5:8.

Ina ia ogatusa ma lenei fautuaga mai le Afioga a le Atua, e manaomia e tane Kerisiano ona tausia le itu faaleagaga o a latou avā. Pe afai ua mamafatu tiutefai o avā i le aiga, o le a faaletonu foi la lo latou tulaga faaleagaga. I se tasi nuu o Aferika, na faitio atu ai se tasi o Kerisiano faatoʻā uma ona papatiso i toeaina i lana faapotopotoga faapea e aliali mai ua lē amanaiaina e lana avā mea faaleagaga. Na fautuaina e toeaina o loo manaomia e lana avā se fesoasoani aogā. O lea na amata ai loa ona fesoasoani le tane i tiutefai a lana avā i le aiga. Na ia faaaluina foi se taimi e fesoasoani ai i lana avā e faaleleia lana faitau ma lona malamalamaaga i le Tusi Paia. Na tali lelei mai le avā, ma i le taimi nei ua autasia le aiga atoa i le auaunaga i le Atua.

O tamā foi e manaomia ona manatu mamafa i latou lava i le itu faaleagaga o a latou fanau. Na tusi atu Paulo: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.” (Efeso 6:4) Pe afai e utagia e mātua le apoapoaiga ia lē faaonoono i a latou fanau, faapea foi le faatonuga ina ia toleniina i latou, e lagonaina ai e fanau o i latou o se vaega o le auaiga. O le iuga, o le a oo ina fesoasoani ma faalaeiau le tasi tamaitiiti i le isi ina ia ausia sini faaleagaga.

O galuega fai faatasi a le auaiga, e aofia ai le tuuina atu i fanau o tiute tauave faaleagaga pe afai ua talafeagai ai mo i latou. O se tasi tamā, o se toeaina Kerisiano e toʻa 11 lana fanau, e alapo i le taeao ma faia suesuega ma nisi o i latou a o lei alu atu o ia mo le galuega. O le fanau matutua, ina ua mavae lo latou papatisoga, sa feauauaʻi e fesoasoani i o latou tei laiti, e aofia ai le aʻoaʻoina o i latou i le Tusi Paia. O le tamā na te faatonutonuina, ma faamālō atu i a latou taumafaiga. E toaono tamaiti ua papatiso, a o isi o loo faaauau pea ona galulue agaʻi i lena sini.

Fesootaiga Lelei, Soosoo Tauʻau i Sini

O le mea tāua i aiga autasi o fesootaiga alofa ma le soosoo tauʻau i sini faaleagaga. O Gordon, o se toeaina Kerisiano e nofo i Nigeria, o se tamā e toafitu lana fanau e amata i le 11 e oo atu i le 27 tausaga le matutua. O le toaono o i latou o ni paeonia, e pei o mātua. O le uii, lea e lei leva ona papatiso, e auai e lē aunoa faatasi ma le isi vaega o le aiga i le galuega o le faia o soo. O tama matutua e toalua o ni auauna o le faiva i le faapotopotoga.

E faia lava e Gordon suesuega faale-Tusi Paia a lana fanau taitoatasi. E ese mai lena, e iai le polokalame a le aiga e faalolotoina ai lo latou malamalamaaga i aʻoaʻoga a le Tusi Paia. I taeao uma e latou te faapotopoto ai e iloiloina le mau faale-Tusi Paia ona sosoo ai lea ma le sauniuni mo sauniga a le faapotopotoga.

O se tasi o sini e faataatia mo tagata taitoatasi o le aiga o le faitauina lea o mataupu uma o mekasini o Le Olomatamata ma le Ala Mai! Talu ai nei lava, na latou faaopoopoina atu ai i la latou faasologa le faitauga Tusi Paia o aso taitasi. E ala i le talanoaina o mea o loo latou faitauina, ua fefaalaeiauai ai tagata o le aiga ina ia faaauau lea masaniga.

O suesuega faale-Tusi Paia faalevaiaso a le aiga ua faatumauina lelei ma e lē manaomia ai e se isi ona toe faamanatu atu—o se mea e tulimatai e tagata uma. A o faagasolo tausaga, sa fesuisuiai mea na talanoaina, le faatulagaga, ma le umi o le taimi e fai ai le suesuega faaleaiga e tusa ai ma le matutua ma manaoga o tamaiti. E mafana atu le aiga i isi auauna faamaoni a le Atua, ma ua mafai ai i lenei mea ona maua aafiaga lelei i tamaiti.

I le avea o se aiga, latou te faifaimea faatasi ma e faataatia ese foi se taimi mo evaevaga. E faatasi i le vaiaso ona faia sa latou “afiafi faaleaiga” e olioli ai, lea e faia ai ni taaloga o fesili ma tali, o tausuaga mālie, tāina o le piano, faamatalaina o ni tala, ma ni evaevaga masani. E iai foi taimi, latou te ō ai i le matafaga ma isi nofoaga e fiafia i ai.

 Faalagolago Atu ia Ieova

E leai ma se tasi e pei ona taʻua i luga e manatu māmā i le faigata o le tausia aʻe o aiga toatele. Na faapea mai se isi tamā Kerisiano: “O se matuā luʻi le avea o se tamā lelei mo se fanau e toavalu. E manaomia ai le anoanoai o ni meaʻai faaletino ma ni meaʻai faaleagaga e tausia ai i latou; e tatau ona ou galue mamafa e sailia ia lava ni tupe e tausia ai i latou. O tamaiti matutua ua i le va o le 13 ma le 19 tausaga, ma ua aʻoʻoga uma le toavalu. Ou te iloaina o le toleniga faaleagaga e tāua, peitai o nisi o laʻu fanau e lotomaaa ma faalogogata. Latou te faia le mea ou te faanoanoa ai, ae ou te iloa ou te faia foi mea e faanoanoa ai le finagalo o Ieova i nisi o taimi, ae o loo ia faamagaloina aʻu. O lea e tatau ai ona ou onosai e faaauau ona faasaʻoina laʻu fanau seia oo lava ina lagona e i latou.

“Ou te taumafai e mulimuli i le faaaoaoga a Ieova o lē e faapalepale ia i tatou ona e naunau o ia ina ia salamō tagata uma. Matou te suesue ma loʻu aiga, ma o nisi o laʻu fanau o loo taumafai atu i le sini o le papatisoga. Ou te lē faalagolago i loʻu lava malosi ina ia maua mai ai ni iuga; ua na o sina vaega itiiti e mafai ona faataunuuina e loʻu malosi. Ou te taumafai e matuā faalatalata atu ia Ieova i le tatalo ma faatatauina le faataoto lea o loo faapea mai: ‘Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.’ O le a fesoasoani mai Ieova ia te au ina ia faamaeaina le toleniina o laʻu fanau.”—Faataoto 3:5, 6.

Ia Aua Lava Neʻi Fiu!

I nisi taimi e aliali mai o le toleniina o fanau o se galuega e lē talisapaiaina, ae aua lava neʻi fiu ai! Ia finafinau pea i ai! Pe afai e lē o tali lelei mai pe lē talisapaiaina e lau fanau au taumafaiga i le taimi nei, atonu o le a latou faia faapea mulimuli ane ai. E alu se taimi e tuputupu aʻe ai se tamaitiiti e avea ma Kerisiano e fuaina mai fua o le agaga.—Kalatia 5:22, 23.

O Monika, o loo nofo i Kenya, o se tasi o le fanau e toasefulu. Ua ia faapea mai: “Na aʻoaʻoina i matou e oʻu mātua i le upu moni o le Tusi Paia talu mai ona matou tama meamea. Na matou suesueina ma Tamā lomiga faa-Kerisiano i vaiaso uma. Ona o lana galuega, o lea sa lē tausisia ai se aso patino. O nisi taimi, pe a manava mai, ma vaaia i matou o taaalo i fafo, ona valaau mai lea ia i matou e toe lima minute ona matou ō ane loa lea i totonu mo la matou suesuega faale-Tusi Paia. Pe a maeʻa la matou suesuega faale-Tusi Paia, ona faalaeiauina lea o i matou e faia ni fesili po o le talanoaina o ni faafitauli.

“Na ia faamautinoaina o loo matou auaumea faatasi ma tamaiti amioatua. E asiasi atu e lē aunoa Tamā i le aʻoga e fesili i faiaʻoga e uiga i a matou amio. I le isi ana asiasiga na ia faalogo ai na fusu oʻu tuagane matutua e toatolu ma isi tamaiti, ma e lē faaaloalo foi i isi taimi. Na faasalaina e Tamā i latou i le faalogogata, ae sa ia faaalu foi le taimi e faamatala atu ai le mafuaaga mai le Tusi Paia e manaomia ai ona amio i latou i le amioatua.

“Na faaalia e o matou mātua ia i matou aogā o le auai i sauniga ma sauniuni faatasi ma i matou i vaega o sauniga. Na toleniina i matou ina ia avea ma faifeau e ala i le faia o polokalame e faataitai ai i le aiga. Mai lava i le tama meamea na matou auai ai faatasi ma o matou mātua i le auaunaga i le fanua.

“I aso nei, ua avea nei oʻu tuagane matutua e toalua ma paeonia faapito, o le isi oʻu uso e laitiiti ifo ia te au o se paeonia sauatoa, ae o le isi oʻu uso e matua atu ia te au, o lē ua faaipoipo ma fai lona aiga, o se Molimau maelega. O oʻu uso laiti e toalua, e 18 tausaga o le isi ae o le isi e 16, o ni tagata talaʻi papatisoina. O tama laiti e toalua o loo toleniina pea. Ua tolu nei tausaga talu ona ou auauna i le ofisa o le lālā o Molimau a Ieova i Kenya. Ou te alofa ma talisapaia oʻu mātua ona o i laua o ni tagata faaleagaga; na la faataatia se faaaoaoga lelei mo i matou.”

Tusa lava pe toatele le aofai o lau fanau, aua lava neʻi e fiu e fesoasoani atu ia i latou e taitaiina atu i le ala i le ola e faavavau. A o faamanuia e Ieova au taumafaiga o le a e toe faaleoina atu ai upu a le aposetolo o Ioane e faatatau i lana fanau faaleagaga e faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.”—3 Ioane 4.