Sila—Se Puna o Faalaeiauga

MAI le amataga lava o le talafaasolopito o Kerisiano, sa tāua tele ai galuega a ovasia femalagaai faamaoni e lē gata i le faalaeiauina ai o faapotopotoga o tagata o le Atua ae i le faasalalauina ai foi o le tala lelei i vaega sili ona mamao o le lalolagi. I uluai ovasia la na tofiaina, sa iai Sila, o se perofeta ma o se tasi e taimua i le faapotopotoga i Ierusalema. Na ia galue i se tofiga autū i atinae tāua i le galuega talaʻi ma o se tasi o misionare na muai faaooina atu le tala lelei i oganuu o Europa. O le ā na mafai ai ona agavaa lelei faapitoa Sila e faia uma lea galuega? Ma o ā ona uiga iloga faaletagata e lelei ona tatou faataitai i ai?

Le Finauga i le Peritomeina

Ina ua aliae le fesili atonu e ono fevaevaeai ai o le peritomeina i le pe ā o le 49 T.A., na manaomia ai e le vaega pule i Ierusalema ona faataamilo i Kerisiano se taiala manino e foia ai le finauga. I ia tulaga, ua aliali mai ai loa Sila, na taʻua foi o Siluano, i faamaumauga a le Tusi Paia. Atonu o ia o se tasi na iai i ē faia faaiuga lea na mulimuli ane filifilia o se sui e auina atu o “le au aposetolo, ma toeaina,” e faailoa atu la latou faaiuga i “le au uso . . . o i Anetioka, ma Suria, ma Kilikia.” I Anetioka, o Sila ma Iuta (Pasapa), faatasi ma Panapa  ma Paulo, na faaooina atu le feau faanatinati na latou avatua, e foliga mai na faamatala gutu atu mea na talanoaina i le fono i Ierusalema, le faaiuga ua oo i ai, ma mea o iai i le tusi. Na latou ‘faalaeiau atu [foi], ma faamalosi atu i le au uso i upu e tele.’ O le iuga fiafia na iai, o le “olioli” lea o Kerisiano i Anetioka.—Galuega 15:1-32.

Na faia e Sila se vaega iloga i le foiaina o lenei finauga autū. Peitai sa lē o se tofiga faigofie lona tofiga. Sa lei iloa po o le a tali mai faapefea le faapotopotoga i Anetioka i le iuga ua faia. O lea, fai mai se tasi tagata fai tofa, “e manaomia ai se tasi e tele sona poto ma le faautauta ina ia faamalamalama saʻo atu ai le mea ua tusia e le au aposetolo i la latou tusi.” O le filifilia o Sila mo lea tofiga faigata ua taʻu mai ai ia i tatou se mea e uiga i le ituaiga o tagata sa iai o ia. Sa ono mafai ona faatuatuaina o ia e fai ma sui o le vaega pule i le tuuina atu o ana taiala ma le faamaoni. E aliali mai o ia foi o se ovasia atamai na mafai ona faagaoioia se aafiaga e faalelei ai le faapotopotoga ina ua faamataʻuina lo latou tulaga e fefinauaiga.

Faimalaga Faatasi ma Paulo

E lē o mautinoa pe na toe foi Sila i Ierusalema ina ua mavae lena tofiga pe leai. I so o se tulaga, ina ua mavae se feeseeseaiga i le va o Panapa ma Paulo ia Ioane Mareko, ona filifilia lea e Paulo o Sila, o lē sa i Anetioka i lena taimi, mo se faigamalaga e agaʻi muamua atu lava i le toe asia o aai ia na talaʻi ai Paulo a o faia lana uluai malaga faamisionare.—Galuega 15:36-41.

O le filifilia o Sila atonu na māfua mai i lona uiga mautinoa agaʻi i le tofiga i Nuu Ese ma le pule i le avea o ia o se perofeta ma o se fofoga taumomoli mo le vaega pule, lea na mafai ai ona ia fesoasoani i le faaooina atu o la latou faaiuga i uso talitonu i Suria ma Kilikia. O iuga na iai na matuā lelei lava. Ua taʻu mai e le tusi o Galuega: “Ua ui ane i latou i aai, ma latou tuuina atu ia te i latou iugafono, na tuu e le au aposetolo ma toeaina o i Ierusalema, latou te tausia. Ua faamalosia foi ekalesia i le faatuatua, ma ua faatoateleina i lea aso ma lea aso.”—Galuega 16:4, 5.

A o faaauau ona faimalaga atu misionare, na faalua ona faafoi mai i latou e le agaga paia mai le ala na latou ō atu ai. (Galuega 16:6, 7) Na faaopoopo atu Timoteo i le vaega na ō atu i Lusa, ina ua mavae ni “valoaga” sa lei auiliili maia e faatatau ia te ia. (Timoteo 1:18; 4:14) E ala i se faaaliga na iloa e Paulo, o lē na iai foi le meaalofa o le vavalo, na faatonuina ai i latou na faimalaga e tuuvaa atu mo Maketonia, i Europa.—Galuega 16:9, 10.

Sasaina ma Faafalepuipui

I Filipi, “le aai o le itumalo,” na oo ai Sila i se tulaga pagatia e lē mafaagaloina. Ina ua uma ona tulia e Paulo se agaga leaga nai se teine pologa, ona fetoso ai lea o Sila ma Paulo i luma o faamasino o le aai e i latou na pule i le teine, ina ua latou iloa ua alu ese le faamoemoe e maua ai a latou oa. O le iuga, na oo ai ina faamaasiasiina i laua i le tuuaia i luma o le lautele o ni tagata amioleaga, na saeia ese o la ofu, ma sasaina i laau i le malae.—Galuega 16:12, 16-22.

Sa lē gata o ia faasalaga matuitui na matuā oo i se tulaga sa tatau ona gata ai le onosai faaletagata ae, i le tulaga foi o Paulo ma Sila, sa lē talafeagai ma le tulafono ia faasalaga. Aisea? Na faavaeina le tulafono a Roma e faapea e lē tatau ona sasaina se tagatanuu Roma. O Paulo o se tagatanuu Roma, e foliga mai e faapena foi ma Sila. Ina ua mavae le “matuā sasaina” o i laua, ona lafo atu loa lea o Paulo ma Sila i le falepuipui lea sa faamauina ai o la vae i laupapa pūpū. O ni “mea e gatete ai” nei mea, e pei ona faamalamalama mai e Gustav Stählin, “ia sa matuā faava ai lava vae o pagota i le mamao e faatonuina, ina ia aua ai neʻi momoe.” Peitai i le tulua o le po, e mautinoa  na matuā liloia o la papatua i manuʻaga tiga, ae ‘na tatalo ai ma pepese Paulo ma Sila i le Atua.’—Galuega 16:23-25.

Ua taʻu mai ai ia i tatou iinei se isi mea e faatatau i uiga faaletagata o Sila. Sa olioli o ia ona na tigaina i laua mo le suafa o Keriso. (Mataio 5:11, 12; 24:9) E foliga mai o le agaga lava lea na mafai ai e Sila ma isi ana aumea a o iai i lo latou tofiga ua mavae atu i Anetioka, ona uigā i le faalaeiauina ma le faamafanafanaina o le faapotopotoga, ma faaosofia le olioli i o latou uso Kerisiano. Sa tatau ona faatuputeleina le olioli o Paulo ma Sila ina ua faasaolotoina faavavega mai le falepuipui e se mafuie ma mafai ona fesoasoani atu i le leoleo o le falepuipui na tau pule i le ola ma lona aiga ia faatuatua i le Atua.—Galuega 16:26-34.

Sa lei faamataʻuina Paulo po o Sila i le sasaina ma le faafalepuipuiina. Ina ua avatua le faatonuga ia tatalaina i laua, sa la lei mananao e ō ese atu lemū ua masiasi mai Filipi, e pei ona manatu ai faamasino. Na la tutū atu i lo la moliaga ma toe lafo atu le tulaga leaga i na taʻitaʻi faaituau ma le faasausili. “Ua sasa mai i latou ia te i maʻua nei i luma o le nuu a o lei faasalaina, o i maʻua o tagata Roma, ona latou tuu mai lea ia i maʻua i le fale puipui; latou te tuu lemu atu nei ea ia te i maʻua?” na fesili atu ai Paulo. “Aua lava; a o i latou, seʻi o mai lava i latou e avatu ia te i maʻua i fafo.” O le fefefe i āuga e oo i ai, na aioi atu ai faamasino ia i laua ina ia la ō ese atu mai le aai.—Galuega 16:35-39.

Ina ua uma ona faailoa atu i mafaufau o taʻitaʻi o la aiā o ni tagata Roma, ona malilie lea o Paulo ma Sila i le olega a faamasino e ō ese—ina ua uma lena ona faamavae i a la uo. Ina ia ogatusa ma le tulaga lea ua tulai mai i le talaʻiga atoa, na toe “faalaeiauina” ai e Sila ma lana paga ia uso ma tuumuli ese loa.—Galuega 16:40.

Mai Maketonia Agaʻi i Papelonia

I le lē faavaivaia ai i le mea na tupu, na agaʻi atu ai Paulo ma Sila ma a la aumea i isi oganuu fou faamisionare. I Tesalonia, na latou toe fesagai ai ma faigata. Ona o le taulau manuia o Paulo i lana faiva i se vaitaimi o vai Sapati e tolu, na faapogaia ai e ē tetee lotoleaga se motu o tagata e osofai atu, ma tatau ai ona tuua e misionare le aai i le po. Sa latou ō atu loa i Perea. Ina ua iloa le tulaga faataulauina o faia e Paulo ma ana aumea i lena aai, ona ō mai ai lea o ē tetee, mai lava i Tesalonia. Sa faaauau atu le malaga a Paulo na o ia, ae nonofo ai Sila ma Timoteo i Perea e vaaia le vaega o tagata fiafia fou. (Galuega 17:1-15) Sa toe aufaatasi atu Sila ma Timoteo ia Paulo i Korinito, ma avatua tala lelei ma faapea foi ma se meaalofa mai uo faamaoni i Maketonia. Na mautinoa le mafai ai i lea ona taofia le aposetolo mativa mai le toe galue i lana galuega totogi, lea sa ia galue ai i lea taimi, ma toe foi atu ma le malosi i le talaʻiga faataimi atoa. (Galuega 18:1-5; 2 Korinito 11:9) I Korinito, na taʻua ai foi Sila ma Timoteo o le au faievagelia ma o aumea a Paulo. E manino mai la o la latou galuega sa lei faaitiitia ai i lena foi aai.—2 Korinito 1:19.

O le faaaogaina o le suinauna “matou” i le tusi atoa i Tesalonia—o tusi ia na tusia mai Korinito i lea vaitaimi—ua faamaonia ai na fai se sao o Sila ma Timoteo i le tusiaina. O  le manatu faapea na auai Sila i galuega tau tusiupu, e faavae patino mai lava i le mea ua fai mai ai Peteru i se tasi o ana tusi. Ua faapea mai Peteru na ia tusia lana tusi muamua mai Papelonia ‘e ala atu ia Siluano, o le uso faamaoni.’ (1 Peteru 5:12,13) E ui atonu o le uiga o lenei mea faapea o Siluano e ana le tusi, ae o le eseesega i le auala o tusia ai tusi e lua a Peteru atonu e faailoa ai na ia faaaogaina Sila o sē e tusia le tusi muamua ae lē o le lona lua. O lea, o se tasi o agavaa o Sila, ma ona faaeaga faale-Atua atonu o le avea lea o se failautusi.

Se Faaaoaoga e Mulimuli Ai

Pe a tatou toe vaai atu i mea moni ua tatou iloa sa faia e Sila, e faagaeetia ai i faamaumauga e uiga ia te ia. O ia o se faaaoaoga sili ona lelei mo misionare o aso nei ma ovasia femalagaai. Sa ia faagaoioia ma le lē manatu faapito le totogia o mea mamao na femalagaai ai, e lē ina ia maua ai ni lelei faaletino po o le fialelei ai i le vaaiga a tagata, ae ia fesoasoani ai i isi. O lona sini sa iai ia faalaeiau ia i latou i fautuaga poto ma le faautauta, o lauga mafana ma saunia lelei, faapea foi ma lona maelega i le faiva i le fanua. Po o le ā lava lou tofiga o e auauna ai i totonu o tagata maopoopo o Ieova, afai o loo e tauivi i se tulaga faapea ina ia saʻo le vaai—e oo lava i le feagai ai ma faigata—o le a avea foi oe ma puna o faalaeiauga i ou uso talitonu.

[Faafanua i le itulau 29]

(Tagaʻi i le lomiga mo le ata atoa)

Le Malaga Lona Lua Faamisionare a Paulo

Le Sami Tele

Anetioka

Teipe

Lusa

Ikonio

Teroa

Filipi

Amefipoli

Tesalonia

Perea

Atenai

Korinito

Efeso

Ierusalema

Kaisareia

[Ē Ana le Ata]

Mountain High Maps® Copyright © 1997 Digital Wisdom, Inc.