Le Faamanuia a Ieova i lo Tatou “Laueleele”

“E ola ai foi mea uma e oo atu i ai le vaitafe.”—ESEKIELU 47:9.

1, 2. (a) O le ā le tele o le tāua o le vai? (e) O le ā e faaāta mai e vai o le vaitafe lea na vaaia e Esekielu i le faaaliga?

O LE vai o se mea faasuavaia e ofoofogia tele. E faalagolago i ai meafaiola faaletino uma. E leai ma se tasi o i tatou e mafai ona ola umi e aunoa ma le vai. Tatou te faalagolago foi i ai mo le faamamāina, auā e fufulu ma aveesea e le vai mea lē mamā. O lea la tatou te faamamā ai o tatou tino, o tatou lavalava, e oo lava i a tatou meaʻai. O le faia faapea e ono faasaoina ai o tatou ola.

² O loo faaaogā e le Tusi Paia le vai e faaāta mai ai sauniuniga faaleagaga a Ieova mo le ola. (Ieremia 2:13; Ioane 4:7-15) E aofia ai i nei sauniuniga le faamamāina o ona tagata e ala i le taulaga togiola a Keriso ma le poto e uiga i le Atua o loo maua i lana Afioga. (Efeso 5:25-27) I le malumalu na vaaia e Esekielu i le faaaliga, o le vaitafe faavavega lea o loo tafe mai le malumalu  o loo faaātaina ai faamanuiaga faapena e ola ai. Ae o anafea na tafe ai lena vaitafe, ma o le ā lona uiga mo i tatou i aso nei?

Ua Tafe Atu le Vaitafe i se Laueleele ua Toe Faafoisia

3. O le ā na oo ia Esekielu, e pei ona lipotia mai i le Esekielu 47:2-12?

³ A o faaaunuua i Papelonia, sa manaomia lava e tagata o Esekielu sauniuniga a Ieova. Maeu la se faalaeiauina o Esekielu, ina ua ia vaaia le sinasina mai o le vai a o amata ona tafe atu mai le malumalu, ma faasolo atu i fafo o le malumalu lea sa vaaia i le faaaliga! Ua fuatia le vai e le agelu i le taʻi 1,000 kupita. Ua faasolo aʻe lona loloto mai le tapuvae seia oo atu i tulivae, ma faasolo aʻe ai i sulugatiti seia oo ina avea ma vaitafe ua tatau ona aau ai. E aumaia e le vaitafe le ola ma faaola ai isi mea. (Esekielu 47:2-11) Na taʻu atu ia Esekielu e faapea: “O le auvai o le vaitafe i lea itu ma lea itu, e tutupu ai laau uma e ʻaina.” (Esekielu 47:12a) A o paʻi atu le tafe a le vai i le Sami Mate—o se vai e leai se ola e maua ai—ona feola ai lea o meaola i lea sami! Ua tataa ai iʻa e tele. Ua matuā lelei i faiga faiva.

4, 5. E faapefea ona taitutusa le valoaga a Ioelu i se vaitafe ma le valoaga a Esekielu, ma aisea e tāua ai lenei mea?

⁴ Atonu sa faamanatu atu e lenei valoaga matagofie i tagata Iutaia sa faaaunuua se isi valoaga na tusia i le silia ma le lua senituri muamua atu: “E tafe mai se punāvai ai le fale o Ieova, e faasūsū ai le vanu o Setima.” * (Ioelu 3:18) E pei lava le valoaga a Ioelu o le valoaga a Esekielu, o loo valoia ai se vai o le a tafe mai le maota o le Atua, le malumalu, ma iu ai ina tutupu aʻe mea i se vaipanoa sa lei iai se ola e maua i ai.

⁵ Ua faamatala mai i le tele o tausaga e Le Olomatamata e faapea, o loo faataunuu le valoaga a Ioelu i o tatou taimi. * E mautinoa la, e faapena foi le faaaliga a Esekielu lea e taitutusa lelei. I le laueleele toe faafoisia o tagata o le Atua i aso nei, e pei ona sa iai i Isaraelu anamua, ua mautinoa le tafe atu ai o faamanuiaga a Ieova.

Se Tafega Tetele o Faamanuiaga

6. O le ā le mea na tatau ona faamanatu atu i tagata Iutaia e ala i le sausauina o le toto i luga o le fata faitaulaga o le faaaliga?

⁶ O le ā le puna o faamanuiaga ua maua e tagata toe faafoisia o le Atua? Seʻi mātau foi, o loo tafe mai le vai mai le malumalu o le Atua. E faapena foi i aso nei, o faamanuiaga e mai ia Ieova e ala mai i lona malumalu sili faaleagaga—le faatulagaga mo le tapuaiga mamā. Ua faaopoopo mai e le faaaliga a Esekielu se vaega tāua. I totonu o le lotoā tuloto, e tafe ai le vai e ui mai le fata faitaulaga, i lona itu i saute. (Esekielu 47:1) O le fata faitaulaga o loo i le ogatotonu o le malumalu i le faaaliga. Ua faamatalaina maeʻaeʻa e Ieova lea fata ia Esekielu, ma faatonu atu ina ia sausau ai i luga o le fata faitaulaga le toto o se taulaga. (Esekielu 43:13-18, 20) Sa matuā uigā lena fata faitaulaga i tagata Isaraelu uma. Ua leva ona faamaonia la latou feagaiga ma Ieova, mai lava i le taimi na sausau ai e Mose le toto i luga o le fata faitaulaga, i le auvae mauga o le Mauga o Sinai. (Esoto 24:4-8) O le sausauina o le toto i luga o le fata faitaulaga i le faaaliga sa tatau ona faamanatu atu ai ia i latou e faapea, o le taimi lava latou te toe foi ai i lo latou laueleele toe faafoisia, ona toe tafe mai foi lea o faamanuiaga a Ieova, pe a latou tausi pea i le feagaiga na latou osia ma ia.—Teuteronome 28:1-14.

7. O le ā le uiga ua iloa e Kerisiano i aso nei i le fata faitaulaga faafaatusa?

⁷ Ua faapena foi ona faamanuiaina tagata o le Atua i aso nei i se feagaiga—se feagaiga e sili atu ona lelei, o le feagaiga fou. (Ieremia 31:31-34) Ua leva foi ona faamaonia mai lena feagaiga e ala i le toto, le toto lea o Iesu Keriso. (Eperu 9:15-20) I aso nei, e tusa lava po o tatou o le au faauuina o loo aofia ai i lena feagaiga, po o tatou o “isi mamoe” lea e maua aogā mai lena feagaiga, ae telē lava se uigā ia i tatou o le fata  faitaulaga faafaatusa. Ua faaatagia mai ai le finagalo o le Atua, e fesootai atu i le taulaga a Keriso. (Ioane 10:16; Eperu 10:10) E pei lava ona iai le fata faitaulaga faafaatusa i le ogatotonu o le malumalu faaleagaga, ua faapena foi ona avea le taulaga togiola a Keriso, ma ogatotonugalemu o le tapuaiga mamā. O le faavae lena mo le faamagaloina o a tatou agasala, ma faapena ona faalagolago i ai o tatou faamoemoega uma mo le lumanai. (1 Ioane 2:2) O lea ua tatou taumafai ai ia ola e talafeagai ma tulafono e fesootai atu i le feagaiga fou, “le tulafono a Keriso.” (Kalatia 6:2) Pe a tatou faia pea faapea, o le a tatou maua ai aogā mai sauniuniga a Ieova mo le ola.

8. (a) O le ā sa lē iai i le lotoā tuloto o le malumalu i le faaaliga? (e) E ala i le ā na mafai ai e ositaulaga sa i le malumalu na vaaia i le faaaliga ona faamamāina i latou lava?

⁸ O se tasi o na aogā o le iai lea i se tulaga mamā i luma o Ieova. I le malumalu na vaaia i le faaaliga, e iai se mea e lē o iai i le lotoā tuloto, o se mea sa matilatila lona iai i le lotoā o le fale fetafai ma le malumalu o Solomona—o se tanoa tele, lea na taʻua mulimuli ane o le sami, sa mulumulu ai ositaulaga. (Esoto 30:18-21; 2 Nofoaiga a Tupu 4:2-6) O le ā sa mafai e ositaulaga sa i le malumalu lea na vaaia e Esekielu i le faaaliga, ona faaaogā e faamamāina ai? Ae ā foi le vai faavavega lea na tafe e ui mai i le lotoā tuloto! Ioe, o le a faamanuiaina i latou e Ieova i le saunia o se auala latou te olioli ai i se tulaga mamā pe paia.

9. E mafai faapefea e le vasega faauuina ma le motu o tagata e toatele ona maua se tulaga mamā i aso nei?

⁹ E faapena foi i aso nei, ua faamanuiaina le vaega totoe i se tulaga mamā i luma o Ieova. E silasila Ieova ia i latou e paia, ma taʻuamiotonuina i latou. (Roma 5:1, 2) Ae faapefea le “motu o tagata e toatele,” lea ua faaāta mai e ituaiga e lē o ni ositaulaga? Latou te tapuai i le lotoā i fafo, ma o le vai lava lena e tasi e tafe mai foi i le vaega lea o le malumalu na iloa i le faaaliga. Maeu la le talafeagai, o le iloa e le aposetolo o Ioane o le motu o tagata e toatele, o loo oofu i ofu mamā ma sinasina, a o latou tapuai i le lotoā o le malumalu faaleagaga! (Faaaliga 7:9-14) E tusa lava po o ā faiga na fai ia i latou i lenei lalolagi lē mamā, ae mafai ona latou mautinoa, pe afai latou te faaalia le faatuatua pea i le taulaga togiola a Keriso, e silasila Ieova ia i latou e mamā. E faapefea ona latou faaalia le faatuatua? E ala i le mulimuli i tulagaaao o Iesu, ma ia mautinoa atoatoa i le taulaga togiola.—1 Peteru 2:21.

10, 11. O le ā se tasi vaega tāua o le vai faafaatusa, ma e faapefea ona fesootai atu lenei mea i le faatetele o le faalauteleina mai o le vaitafe?

¹⁰ E pei ona sa taʻua, o loo iai le isi vaega tāua o lenei vai faafaatusa—o le poto lea. I Isaraelu toe faafoisia, sa faamanuia e Ieova ona tagata i faatonuga faale-Tusi Paia e ala mai le faiva faaositaulaga. (Esekielu 44:23) Ua faapena foi ona faamanuia e Ieova ona tagata i aso nei i le anoanoai o faatonuga e faatatau i lana Afioga le upu moni, e ala mai i “tupu ma ositaulaga.” (1 Peteru 2:9) O le poto e uiga ia Ieova le Atua, e uiga i ana fuafuaga mo tagata, ae maise e uiga ia Iesu Keriso ma le Malo Faa-Mesia, ua matuā faateleina lona tatafe tele mai i nei aso e gata ai. Maeu le matagofie o lo tatou mauaina o lenei vai loloto e faafouina ai faaleagaga!—Tanielu 12:4.

¹¹ E pei lava o le vai na fuaina e le agelu sa faasolosolo lona loloto, ua faapena foi le tafe mai o faamanuiaga e ola ai mai ia Ieova, ua matuā faateleina lava, ina ia tausi lelei ai le lolofi mai o tagata i lo tatou nuu faamanuiaina faaleagaga. Na valoia mai e le isi valoaga o le toe faafoisia e faapea: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:22) Ua faamaonia le moni o nei upu—e faitau miliona ua lolofi mai e auai faatasi ma i tatou i le tapuaiga mamā! Ua saunia e Ieova le anoanoai o “vai” e mafai ona maua e i latou uma e liliu atu ia te ia. (Faaaliga 22:17) Na te faamautinoa ua tufa atu e lana faalapotopotoga faalelalolagi Tusi Paia ma lomiga faale-Tusi Paia i le lalolagi uma, i le faitau selau o gagana. Ua faapena foi ona fuafuaina sauniga ma tauaofiaga faa-Kerisiano i le lalolagi aoao, ina ia mafai ai ona avatu i tagata uma vai manino o le upu moni. Ua faapefea ona aafia ai tagata i na sauniuniga?

 E Aumaia e le Vai le Ola!

12. (a) Aisea ua mafai ai e laau i le vaaiga a Esekielu ona fuaina mai i se tulaga ese? (e) O le ā ua faaāta mai e nei laau ua fua tele i aso e gata ai?

¹² O le vaitafe na vaaia i le faaaliga a Esekielu, e maua ai le ola ma le soifua maloloina. Ina ua iloa e Esekielu o le a ola laau i tafatafa o le vaitafe, sa taʻu atu ia te ia e faapea: “E le mamae o latou lau, e le uma lava o latou fua; . . . e fai foi o latou fua ma mea e ʻai, ma o latou lau e fai ma vailaau.” Aisea ua maua ai lenei tulaga mataina mai nei laau? “Auā e tafe atu o latou vai ai le malumalu.” (Esekielu 47:12e) O nei laau faafaatusa e faaatagia ai sauniuniga uma a le Atua mo le toe faafoisia o tagata i le lelei atoatoa e faavae i le taulaga togiola a Iesu. I le lalolagi i aso nei, o loo taimua le vaega totoe faauuina i le saunia o le fafagaina ma le faamalologa faaleagaga. Pe a oo ina maua uma e le 144,000 lo latou taui faalelagi, o le a faaauau atu pea i le lumanai aogā o loo maua mai la latou auaunaga faaositaulaga o ni tupu faatasi ma Keriso, seia oo ina faaumatia atoatoa le oti na pogai mai ia Atamu.—Faaaliga 5:9, 10; 21:2-4.

13. O le ā le toe faamalologa lea ua faataunuuina i o tatou taimi?

¹³ O le vaitafe na vaaia i le faaaliga o loo tafe atu i le Sami Mate e leai se mea e ola ai, ma iu ina ola ai mea uma o iai. O lenei sami ua faaāta mai ai le siomaga o le oti faaleagaga. Peitai ua toe oo atu le ola i “mea uma e oo i ai le vaitafe.” (Esekielu 47:9) E faapena foi i aso e gata ai, e so o se mea lava e tafe atu i ai le vai o le ola, e faaolaina ai faaleagaga tagata. O i latou na muamua toe faaolaina o le vaega totoe faauuina i le 1919. Na toe faafoisia i latou i le ola faaleagaga mai le tulaga sa pei ua oti, sa lei toe galulue. (Esekielu 37:1-14; Faaaliga 11:3, 7-12) Talu mai lena taimi, ua oo atu foi na vai sili ona tāua mo le ola i isi tagata sa oti faaleagaga, ma aumaia ai i latou i le ola, ma ati ae ai se motu o tagata e faatuputupulaia o isi mamoe, o loo alolofa ma auauna ia Ieova. E lē o toe mamao, ona faasafua atu lea o lenei sauniuniga i le toatele o i latou e toe faatutūina mai.

14. O faiga faiva o loo manuia ona faia i le gataifale o le Sami Mate ua faataitaia lelei mai ai le ā i aso nei?

¹⁴ O le malosi faaleagaga e iu i le fuatele mai. Ua faataitaia mai lenei mea i faiga faiva o loo fai i le gataifale o le sami lea sa avea muamua ma sami mate. Na fetalai atu Iesu i ona soo: “Ou te faia oulua ma fai faiva i tagata.” (Mataio 4:19) I aso e gata ai, sa amata le faiga faiva i le aoaoina o ē na totoe o le vasega faauuina, peitai e lei taofia ai iina. O le vai e maua ai le ola mai le malumalu faaleagaga o Ieova, e aofia ai le faamanuiaga o le poto saʻo, e aafia ai tagata o atunuu uma. Po o fea lava e tafe atu i ai lena vai, ua iu ina maua ai le ola faaleagaga.

15. O le ā e faaalia ai e lē o tagata uma o le a latou talia sauniuniga a le Atua mo le ola, ma o le ā le iuga mo i latou na?

¹⁵ O le mea moni, e lē o tagata uma e tali lelei mai i le taimi nei i le feau o le ola; e lē o tagata uma foi e toe faatutū mai i le taimi o le Pulega Faa-Meleniuma a Keriso, o le a latou faia faapea. (Isaia 65:20; Faaaliga 21:8) Ua faalauiloa mai e le agelu faapea, e iai vaega o le sami e lei toe faamagaloina. O nei vaega faataufusi, e leai se ola e maua ai ua ‘tuuina atu i le masima.’ (Esekielu 47:11) E tusa ai o tagata i o tatou aso, e lē taliaina e i latou uma le vai foai ola a Ieova lea e ofoina atu i ai. (Isaia 6:10) Pe a oo mai Amaketo, o i latou uma e filifili e tumau i le tulaga faamaʻia ma le leai o se ola faaleagaga, o le a tuuina atu i latou i le masima, o lona uiga, o le a faaumatia e faavavau. (Faaaliga 19:11-21) Peitai, o i latou sa feinu ma le faamaoni i nei vai, e mafai ona faamoemoe e faasaoina atu ma vaai i le faataunuuga mulimuli o lenei valoaga.

E Tafe le Vaitafe i Totonu o le Parataiso

16. O afea ma o le a faapefea ona iai le faataunuuga mulimuli o le malumalu na vaaia e Esekielu?

¹⁶ I le pei o isi valoaga i le toe faafoisia, o le faaaliga o le malumalu na vaaia e Esekielu, o le a iai lona faataunuuga mulimuli i le Meleniuma. O le a lē toe iai i le lalolagi i lena taimi le vasega faaositaulaga. “E avea i latou ma ositaulaga a le Atua ma Keriso, latou te fai ma tupu foi faatasi ma ia [i le lagi] i tausaga e afe.” (Faaaliga 20:6) O le a aufaatasi atu nei ositaulaga  faalelagi ia Keriso i le faasoaina mai o aogā atoatoa o le taulaga togiola a Keriso. Ona faasaoina ai lea o ē amiotonu o le fanau a tagata, ma toe faafoisia i le lelei atoatoa.—Ioane 3:17.

17, 18. (a) Ua faapefea ona faamatalaina i le Faaaliga 22:1, 2 se vaitafe o loo maua mai ai le ola, ma o afea le taimi autū mo le faatatauga o lena faaaliga? (e) I le Parataiso, aisea o le a vaaia ai le taimi o le matuā faalauteleina atu o le vaitafe o le vai o le ola?

¹⁷ O lona uiga, i le taimi lea, o le vaitafe sa vaaia e Esekielu o le a matuā faateleina ma atoatoa le avea ma vai o le ola. O le taimi autū lea e faataunuu atoatoa ai le valoaga o loo faamauina i le Faaaliga 22:1, 2, (NW): “Ona faaali mai lea e ia ia te au le vaitafe o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai Mamoe e faasolo atu i le moa o lona ala tele. O itu taitasi o le vaitafe sa iai laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata. O lau foi o laau sa faamalolo ai nuu.”

¹⁸ I le vaitaimi o le Meleniuma, o maʻi uma lava—faaletino, faalemafaufau, ma faalogona—o le a faamaloloina. O loo faaāta lelei mai lena mea i le ‘faamaloloina o nuu’ e ala i laau faafaatusa. E faafetai ai i sauniuniga ua faasoa mai e Keriso ma le 144,000, auā o le a “le fai mai foi se tasi ua mau ai, Ou te maʻi.” (Isaia 33:24) Ma o le a oo atu le tatafe o le vai i lona tulaga e sili ona lautele. O le a tatau ona lautele atu ma loloto ina ia mafai ona tausia le faitau miliona, po o le faitau piliona, o tagata o le a toe tutū aʻe ma feinu ai i nei vai mamā o le ola. O le vaitafe na vaaia i le faaaliga lea sa toe magalo ai le Sami Mate, ma maua ai le ola i mea uma na tafe atu i ai. I le Parataiso, o le a maua ai e tane ma fafine le ola i se tulaga e sili ona atoatoa, ua faamaloloina mai le oti tuufaasolo mai ia Atamu, pe afai latou te faaalia le faatuatua i aogā o le taulaga ua faaoo atu ia i latou. Ua valoia e le Faaaliga 20:12 e faapea, o le a fofola “tusi’ i ia aso, ina ia maua ai se malamalamaga faaopoopo e aogā i tagata oti o le a toe tutū mai. Ae faanoanoa ai, ona e iai nisi o le a lē mananao e faamaloloina, e oo lava i totonu o le Parataiso. O nei tagata fouvale o i latou ia o le a ‘tuuina atu i le masima’ o le faaumatiaga e faavavau.—Faaaliga 20:15.

19. (a) O le a faapefea ona faataunuuina le vaevaeina o le laueleele i le Parataiso? (e) O le ā le vala i le Parataiso o loo faaāta mai e le aai? (i) O le ā le tāua ua faaatagia mai e le tulaga tau mamao ese atu o le aai mai le malumalu?

¹⁹ I lena foi taimi, o le a iai le faataunuuga mulimuli o le vaevaeina o le laueleele, e pei ona iai i le faaaliga na vaaia e Esekielu. Sa vaaia e Esekielu le vaevaeina lelei o le laueleele; i se tulaga tutusa, e mafai foi e Kerisiano faamaoni taitoatasi ona mautinoa o le a iai sona nofoaga, sona tofi, i le Parataiso. E foliga mai o le manaoga ina ia tofu le tagata ma lona fale e nofo ai ma tausia lelei o le a faataunuu i se faiga maopoopo. (Isaia 65:21; 1 Korinito 14:33) O le aai lea na vaaia e Esekielu ua faaāta lelei ai le faatulagaga tau pulega ua fuafua e Ieova mo le lalolagi fou. O le a lē toe iai i le tino le vasega o ositaulaga faauuina faatasi ma tagata. E foliga mai o le manatu lena o loo iai i le faaaliga e pei foi ona faaāta mai, o loo tū le aai i se fanua “lē paia” e fai sina mamao ese mai le malumalu. (Esekielu 48:15, NW) A o pule le 144,000 ma Keriso i le lagi, o le a iai foi sui o le Tupu iinei i le lalolagi. O le a matuā faamanuiaina tagata o lana pulega i le taitaiga ma le faasinoga alofa a le vasega a le alii sili. Peitai ane, o le nofoaga moni o le pulega, e lē o luga o le lalolagi, ae i le lagi.  O tagata uma i le lalolagi, e aofia ai le vasega o le alii sili, o le a gauai atu i le Malo Faa-Mesia.—Tanielu 2:44; 7:14, 18, 22.

20, 21. (a) Aisea ua talafeagai ai le igoa o le aai? (e) O ā fesili e tatau i lo tatou malamalamaga i le faaaliga a Esekielu ona uunaia ai i tatou e fesili ifo ia i tatou lava?

²⁰ Mātau upu faaiu o le valoaga a Esekielu: “O le igoa foi o le aai, e afua mai i lea aso, O Loo Afio ai Ieova.” (Esekielu 48:35) O le a iai lenei aai, e lē ina ia avatu ai i tagata le pule pe taaʻina ai tagata; e lē faapea foi ua iai iina ina ia faamalosia se mea o manao i ai se isi. O le aai a Ieova, o le a faaatagia mai ai pea lona finagalo ma ana auala alofa, ma le fetuutuunai i le faia o mea. (Iakopo 3:17) Ua aumaia e lenei mea ia i tatou se faamautinoaga faamafanafana loto e faapea, o le a faamanuia e Ieova lana faatulagaga o le sosaiete o tagata o le “lalolagi fou,” e oo atu i le lumanai e faavavau.—2 Peteru 3:13.

²¹ Pe tatou te lē olioli ea i le faamoemoe o loo i lo tatou lumanai? Ua talafeagai la, mo i tatou taitoatasi ona fesili ifo faapea, ‘E faapefea ona ou tali atu i faamanuiaga matagofie ua faaalia mai i le faaaliga na vaaia e Esekielu? Po o oʻu lagolagoina ea ma le faamaoni le galuega ua faia e ovasia alolofa, e aofia ai i latou mai le vaega totoe faauuina, ma ē o le a avea ma sui o le vasega a le alii sili? Po o oʻu avea ea le tapuaiga mamā ma ogatotonu o loʻu olaga? Po o oʻu faaaogā atoatoa ea vai o le ola o loo tafe tetele mai i aso nei?’ Tau ina ia faaauau e i tatou taitoatasi ona faia faapea ma ia fiafia i sauniuniga a Ieova seia oo lava i le faavavau!

[Faaopoopoga i lalo]

E Faapefea Ona E Tali?

□ O le ā e faaātaina e vai o loo tafe mai le malumalu?

□ O le ā le faamalologa ua faataunuu e Ieova e ala i le vaitafe faafaatusa, ma aisea ua faasolo ai ina loloto le vaitafe?

□ O le ā e faaātaina e laau o loo ola i autafa o le vaitafe?

□ O le ā o le a faaātaina e le aai i le Pulega Faa-Meleniuma, ma aisea ua talafeagai ai le igoa o le aai?

[Fesili mo le Suʻesuʻega]

[Ata i le itulau 23]

O le vaitafe o le ola e faaatagia ai le sauniuniga a le Atua mo le faaolataga