Ia Aua Neʻi Faatoilaloina e Popolega

“AUA tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.” (Mataio 6:34) O lena fautuaga na tuuina mai e Iesu Keriso e mautinoa le aogā mo i tatou uma o loo ola i se olaga televave i aso nei ma se sosaiete o tagata ua tumu i mea e omia ai.

Ae, i lona tulaga moni lava, pe mafai ona tatou lē popole i o tatou faafitauli, o filifiliga, matafaioi ma tiute tauave? E faitau miliona tagata ua loto mafatia, faavaivaia, ma pagatia. O le mafuaaga lena ua faitau fia miliona ai tālā e maua e pisinisi o faia vailaau ma fualaau, e tau faaitiitia ai popolega faalemafaufau.

Le Va o Fuafuaga Aogā ma le Soona Popolevale

E manaomia ona tatou fuafua ma sauniuni mo a tatou matafaioi, o tofiga, faaiuga ma faafitauli—e tusa lava po o na mea o loo manaomia ai le faanatinati pe leai. Ua faalaeiauina i tatou e le Tusi Paia ina ia “muai nofo i lalo e faitau tupe e totogi aʻi” a o lei faagaoioia se fuafuaga tele. (Luka 14:28-30) E aofia ai i lenei mea le fefuafuatai o filifiliga e ono mafai ona fai, iloiloina o aafiaga e ono oo i ai, ma fuafua le tau atoa e alu ai i tulaga i le taimi, le malosi, ma le tupe.

A o tatau i se tasi ona iloilo ma le faaeteete le tulaga e foliga e ono tulai mai, ae matuā lē mafai ona manatunatu i taunuuga uma lava pe atiina ae ai foi pe a faia faapea. Mo se faataitaiga, mo le lelei o le saogalemu o le aiga, e te ono iloiloina le mea e fai pe a teʻi ua mu lou fale. Atonu e te faatauina ma faapipii i lou fale ni mea e faailoa mai ai se mu ma ni mea e tapeina ai. Atonu e te fuafuaina ma faataitai ni ala e sao ese mai ai i vaega eseese o le fale. Ae o le ā le eseesega o le fuafua ma le mafaufau lelei ma le soona popolevale naʻuā? O lena popolega e aliae ina ua amata ona e popolevale i ni tulaga eseese e mafaufauina e ono oo i ai, o le tele lava atonu ua na o ni mafaufauga. O mafaufauga faatalatala, e ono lofia ai oe ma faatalitonuina ai oe faapea ua galo ia te oe se mea po o le faapea e lē o lava lau gaoioiga o faia e puipuia ai lou aiga. O lenei popolega ua mapuna aʻe ia te oe lava e mafai ona mafatia ai lou mafaufau ma ono iu i le lē lelei ai o sau moe.

O Mose i Luma o Farao

Na avatu e Ieova le Atua i lana perofeta o Mose se tofiga fitā. Muamua, sa tatau ona alu atu Mose i luma o tagata Isaraelu ma faamautinoa ia i latou e faapea ua tofia o ia e Ieova e taitaieseina mai i latou nai Aikupito. Ina ua uma lena, sa tatau ona oo atu Mose i luma o Farao ma talosaga atu ina ia tuu mai Isaraelu e ō. Mulimuli lava, sa tatau ona taitaia atu e Mose se aofaiga tele o le faitau fia miliona o tagata e asa atu i le vaomatua e agaʻi atu i se laufanua sa nonofo ai tagata na matuā feita ane. (Esoto 3:1-10) O nei mea uma sa ono mafai ona  palaai ai, ae pe na faataga e Mose lea tiute tauave e faatumu ai lona mafaufau i ni popolega lē tatau?

E manino mai, sa manatu mamafa Mose i ni mataupu tāua. Na ia fesili atu ia Ieova: “Pe a aʻu alu i le fanauga a Isaraelu, ma aʻu fai atu ia i latou, Ua auina mai aʻu ia te outou e le Atua o outou tamā; ona latou fai mai lea ia te au, O ai ea lona suafa? Se a ea saʻu e fai atu ai ia te i latou?” Na avatua e Ieova ia te ia le tali. (Esoto 3:13, 14) Na manatu mamafa foi Mose e faatatau i le mea e ono tupu pe a lē talitonuina o ia e Farao. Ma sa toe tali atu i ai Ieova i le perofeta. Toe tasi lava le faafitauli—na tautino atu e Mose faapea o ia “o le tagata e le iloa fai lauga.” E mafai faapefea ona foia lenei mea? Na saunia e Ieova Arona e lauga mo Mose.—Esoto 4:1-5, 10-16.

O le saunia lelei i tali ua maua mo ana fesili ma le ia te ia o le faatuatua i le Atua, na sagai atu ai Mose e faia e pei ona faatonuina ai e Ieova. “Sa faapea lava ona fai” e Mose mea na poloai atu ai Ieova na i lo le faataugā o ia lava i mafaufauga atuatuvale i ni mea e ono tutupu pe a faafesagai ma Farao. (Esoto 7:6) Pe ana ia faatagaina popolega e lofia o ia, e mafai ai e ia mea ona faavaivaia le faatuatua ma le lototele na manaomia e faataunuuina ai lona tofiga.

O le auala paleni a Mose i le faafoeina o lona tofiga o se faaaoaoga lea o le mea na taʻua e le aposetolo o Paulo o le “faautauta o le mafaufau.” (2 Timoteo 1:7, NW; Tito 2:2-6) Pe ana lē faatinoina e Mose le faautauta o le mafaufau, semanu e faigofie lava ona matuā lofituina o ia i le telē o lona tofiga lea atonu e na te lē taliaina ai.

Le Puleaina o Ou Manatunatuga

E faapefea ona e tali atu pe a lua fetaiai i aso taitasi ma tofotofoga o lou faatuatua po o ni puapuaga? Pe e te mafuli atu ina lē toʻa pe popolevale le mafaufau ona o toʻatugā ma luʻitau o faamalumalu mai luma? Pe e te vaai atu i na mea i se ala paleni? E pei ona fai mai nisi, ‘Aua le laasia le alalaupapa seʻi e oo atu i ai.’ Atonu e lē manaomia lava ona laasia fua lena alalaupapa o loo faaata i le mafaufau! Aisea la e faataugāina ai fua i se mea atonu e lē taitai ona tupu? Ua fai mai le Tusi Paia: “O le atuatuvale i le loto o le tagata ua faavaivai ai o ia.” (Faataoto 12:25) O le iuga e masani ona iai o le toe tolopoina ai e se tasi o le faia o se faaiuga, ma faatuatuai seia oo ina tuai tele ona faagaoioia.

E sili atu ona matautia le faaleagaina faaleagaga e ono faapogaia e le soona popolevale. Na faailoa mai e Iesu Keriso e faapea o le talisapaia mo le “upu o le malo” e mafai ona matuā tapēina i lalo e le mana taufaasese o le oa ma le “loto popole i mea a lenei lalolagi.” (Mataio 13:19, 22) E pei lava ona taofia e vaotuitui fatu ua amata ona tutupu mai le oo ina matua ma fua mai, e faapena foi e popolega ua lē puleaina ona taofia i tatou mai le agaigai i luma faaleagaga ma fuaina mai fua e viia ai le Atua. O popolega e faatupuina e i tatou lava ma e faaleagaina ai, ua oo lava ina taofia ai nisi mai le tuuina atu o i latou lava ia Ieova. Ua latou popole faapea, ‘Ae faapefea pe a ou lē ola ai e tusa ma loʻu tuuina atu?’

Na taʻu mai e le aposetolo o Paulo ia i tatou e faapea i la tatou taua faaleagaga, ua tatou tauivi ai ia “faatoilaloina manatu uma ia anaana ia Keriso.” (2 Korinito 10:5) O lo tatou fili sili o Satani le Tiapolo, e fiafia tele e faaaogā o tatou popolega ina ia faalotovaivai ai i tatou ma faavaivaia lo tatou itu faaletino, tau faalogona, ma le itu faaleagaga. O ia o se matai i le faaaogaina o masalosaloga e maileia ai lē e lē o mataala. O le mafuaaga lena na lapataia ai foi e Paulo Kerisiano ina ia aua “neʻi tuuina atu . . . se mea e mautu ai le tiapolo.” (Efeso 4:27) I le avea ma “atua o le lalolagi nei,” ua taulau manuia ai Satani e “faatauasoina manatu o i latou o e le faatuatua.” (2 Korinito 4:4) Tau ina ia aua lava neʻi o tatou faatagaina o ia e puleaina o tatou mafaufau!

E Mafai Ona Maua le Fesoasoani

Pe a feagai ma faafitauli, e mafai e se tamaitiiti ona alu atu i se tamā alofa ma maua mai ai taiala ma faamafanafanaga. E faapena foi le mafai ona tatou ō atu i lo tatou Tamā faalelagi o Ieova, mo o tatou faafitauli. O le mea moni,  ua valaaulia i tatou e Ieova ina ia lafo atu o tatou mafatiaga ma popolega ia te ia. (Salamo 55:22) I le pei o se tamaitiiti e lē o toe popole i ona faafitauli pe a uma ona ia mauaina se faamautinoaga mai lona tamā, e tatau ai ona lē gata ina lafo atu o tatou mafatiaga ia Ieova ae ia tuu ai foi ia te ia.—Iakopo 1:6.

E faapefea ona tatou lafoina atu o tatou popolega ia Ieova? Ua tali mai le Filipi 4:6, 7: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia [“filemu,” NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” Ioe, i le tali mai i a tatou tatalo faatauanau ma olega, e mafai e Ieova ona aumaia ia i tatou le filemu i totonu lea e puipuia ai o tatou mafaufau mai le faavevesiina e popolega lē talafeagai.—Ieremia 17:7, 8; Mataio 6:25-34.

Ina ia galue la ia ogatusa ma a tatou tatalo, e lē tatau ai ona tatou faaesea i tatou lava pe i le tino po o le mafaufau. (Faataoto 18:1) Na i lo lea, e lelei ona tatou iloiloina mataupu silisili faale-Tusi Paia ma ona taiala e faatatau i o tatou faafitauli, ma alofia ai le faalagolago i lo tatou lava atamai. (Faataoto 3:5, 6) E mafai e talavou ma ē matutua ona liliu atu i le Tusi Paia ma lomiga a le Olo Matamata mo faamatalaga e tele o loo iai i le faia o filifiliga poto ma le faafetaiaia o faafitauli. E faaopoopo i ai, i le faapotopotoga Kerisiano, ua faamanuiaina ai i tatou i le au toeaina popoto ua lava le tomai atoa ma isi Kerisiano taʻumatuaina o ē e masani ona fiafia tele e talanoa ma i tatou. (Faataoto 11:14; 15:22) O i latou e lē o aofia ai i o tatou popolega ma o loo ia i latou le manatu faale-Atua i le mataupu, e mafai ona fesoasoani mai ia tatou vaai i o tatou faafitauli mai se isi vaaiga aogā. Ma a o lē faia e i latou filifiliga mo i tatou, ae mafai ona avea i latou ma puna sili o faalaeiauga ma le lagolagosua.

“Faamoemoe i le Atua”

E leai se tasi e mafai ona faafitia le matuā omia i le faafetaiaia o o tatou faafitauli moni lava i aso taitasi e aunoa ma le faaopoopo atu i ai ma le popole i mafaufauga faivavale. Afai o le popole i le mea e ono tutupu e faafefevale ai i tatou ma lē toafilemu ai o tatou faalogona, ona tatou liliu atu loa lea ia Ieova i le tatalo ma olega. Saili atu i lana Afioga ma lana faalapotopotoga mo le taitaiga, le poto ma le mafaufau lelei. O le a tatou iloa ai po o le ā lava se tulaga e ono tulai mai, ae o loo mafai ona maua le fesoasoani e faafetaiaia ai.

O le lagona o le mafatia tele o le loto ma le atuatuvale, na pese ai le faisalamo: “Loʻu agaga e, se a ea le mea ua e faanoanoa ai? ua atuatuvale foi oe i totonu ia te au i se a? ia e faamoemoe i le Atua, auā ou te toe vivii ia te ia, o loʻu faaolataga ia ma loʻu Atua.” (Salamo 42:11) Ia avea foi na upu ma o tatou lagona.

Ioe, ia fuafua mo le mea e mafai moni ona faatalitalia e taunuu, ae tuu mea e lē o iloa ia Ieova. “Ia tuuina atu ia te ia mea uma tou te popole ai, auā o loo manatu mai o ia ia te outou.”—1 Peteru 5:7.

[Ata i le itulau 23]

Pe e te pei o Tavita, e lafo atu ou mafatiaga ma popolega ia Ieova?