Rashi—Se Tagata Faitofā o le Tusi Paia e Telē Sana Taaʻiga

O LE ā se tasi o tusi mai uluai tusi na muamua lava lomia i le gagana Eperu? O se tusi o faamatalaga e faatatau i le Penetatuka (o tusi e lima a Mose). Na lomia i Reggio Calabria, i Italia, i le 1475. O ai lona tusitala? O le tagata e suafa ia Rashi.

Aisea o le a avatu ai lenei aloaia faapitoa i se tusi o faamatalaga? I lana tusi o le Rashi—The Man and His World, o loo taʻua ai e Esra Shereshevsky e faapea o le tusi o faamatalaga a Rashi “na oo ina avea ma tusi autū i le toetoe lava o aiga uma o Siu ma i maota sa faia ai suesuega a tagata (o le tusi Torah). E leai lava se isi lomiga i tusitusiga a tagata Siu e latalata ane i lenei tusi i le matuā talisapaia . . . E silia i le 200 tusi o faamatalaga faaopoopo ua iloa faapea o loo faasino tonu atu i le tusi o faamatalaga a Rashi e uiga i le Penetatuka.”

Pe na o tagata Siu ea ua aafia i le tusi o faamatalaga a Rashi? E ui e lē o iloa e le toatele, ae o le tusi o faamatalaga a Rashi e faatatau i Tusitusiga Eperu ua taaʻina ai faaliliuga o le Tusi Paia mo le tele o senituri. Ae o ai Rashi, ma na faapefea ona oo ina lautele ana taaʻiga?

O Ai Rashi?

O Rashi na fanau i Troyes, i Falani, i le tausaga e 1040. * I lona talavou, sa auai atu o ia i aʻoga faalotu a tagata Siu i Worms ma Mainz i le vaipanoa o Rhineland. O iina na aʻoaʻoina ai o ia e nisi o faiaʻoga atamamai Siu sa iloga i Europa. Pe ā ma le 25 o ona tausaga, e tusa ai o ni ona lava tulaga totino, sa tatau ai ona toe foi atu o ia i Troyes. Ma talu ai ua mataulia o ia o se tasi o tagata atamai mataina, na vave ai ona avea Rashi ma taʻitaʻi lotu mo tagata Siu iina, ma faavaeina ai lana ia lava aʻoga faalelotu. A o faagasolo taimi, na iu ina sili atu ona telē le taaʻiga a lenei aʻoga fou Siu na i lo aʻoga a ē na aʻoaʻoina Rashi i Siamani.

I lena taimi, sa iai se filemu ma le autasi o tagata Siu o ē na nonofo i Falani ma o latou tuaoi o ē na faapea ane o ni Kerisiano, ma o iina na atili maua ai e Rashi se saolotoga tele mo ana sailiiliga tau aʻoaʻoga. Peitai, e lē o ia o se tagata atamai faapitoa e vavae ese mai isi tagata. E ui i lona tulaga taʻutaʻua o se faiaʻoga ma o le faauluuluga o le aʻoga, ae sa galue Rashi o sē na te faia le uaina. O lenei malamalamaga loloto i galuega masani na fesootai vavalalata atu ai o ia i tagata Siu lautele, ma mafai ai ona ia malamalama ma tiga alofa atu i o latou tulaga. O le vaipanoa sa tu ai Troyes na telē foi se sao i le malamalamaga o Rashi. Talu ai sa tu tonu i auala o fefaatauaiga tetele, sa avea ai le aai o le nofoaga tutotonu e feiloai ai tagata mai vaega eseese o le lalolagi, ma o lena itu na mafai ai e Rashi ona masani lelei i uiga ma tū masani a atunuu eseese.

 Aisea na Manaomia ai se Tusi o Faamatalaga?

Sa iloga tagata Siu faapea o tagata o le tusi. Peitai o “le tusi”—le Tusi Paia—sa tusia i le gagana Eperu, ae o lea ua tautatala “tagata” i le gagana Arapi, Falani, Sepania, Siamani, ma le anoanoai o isi gagana. E ui o le toatele lava o tagata Siu sa aʻoaʻoina mai a o laiti i le gagana Eperu, ae sa latou lei malamalama lelei i le tele o faaupuga faale-Tusi Paia. E lē gata i lea, mo le tele o senituri, sa iai se uiga malosi na fai ma taaʻiga i totonu o le lotu faa-Iutaia a tagata rapi na tataʻi ese ai mafaufau o tagata mai le iloiloina o le uiga moni o mau o le Tusi Paia. Sa anoanoai faaupuga faafaatusa ma talafatu e fesootai atu i upu ma fuaiupu o le Tusi Paia. O le tele o na faamatalaga ma tala sa faamaumauina i le anoanoai o tusitusiga, lea na tuufaatasia ma faaigoa o le Midrash. *

O le tama tama a le afafine o Rashi, o Rabbi Samuel ben Meir, sa avea foi o se tagata aʻoga atamai i mataupu faale-Tusi Paia. I ana faamatalaga e faatatau i le Kenese 37:2, na ia faapea mai ai, “o le au faitofa anamua [e muamua atu ia Rashi] . . . sa naunau e talaʻi atu lauga (derashot), lea na latou vaai i ai o se sini e sili ona tāua, [peitai] sa latou lē masani ona matuā vaʻili i le loloto o uiga moni o mau o le Tusi Paia.” I sona manatu e faatatau i lenei faiga, ua tusi mai ai Dr. A. Cohen (o le faatonu sili o le Soncino Books of the Bible e faapea: “E moni o le au Rapi na faataatiaina se tulafono faapea e lē tatau ona taliaina se faaliliuga e lē fetaui ma le peshat po o le uiga moni o le mau; peitai i a latou gaoioiga moni, e itiiti lava so latou faamamaluina o lenei tulafono.” I se ituaiga siomaga faalelotu faapena, sa matuā lē mautonu ai lava se tagata Siu pe a ia faitauina se mau o le Tusi Paia, ma ona manaomia ai se auala e faamalamalamaina ai.

Le Sini ma Metotia a Rashi

O le sini ua leva ona faaautū i ai le olaga o Rashi, o lona fia saunia lea o Tusitusiga Eperu i se auala e mafai ona malamalama uma i ai tagata Iutaia. Ina ia taunuu lenei sini, sa amata ona ia aoaoina api sa tusitusia ai faamatalaga e faatatau i ni upu ma fuaiupu patino sa ia manatu e ono faafaigata i se tagata faitau. I faamaumauga a Rashi o loo taʻua ai faamatalaga a ona faiaʻoga, ma o loo taʻua ai foi ona lava manatu mai sona malamalamaga lautele i le faagasologa atoa o tusitusiga faarapi. I sana sailiiliga i mea tau gagana, na saili ai e Rashi puna uma lava o faamatalaga sa mafai ona ia maua. Sa ia uaʻi atu i le auala na mafai ai e faailoga faailoa ma faailoga faamamafa o tusitusiga faa-Masoreta ona aafia ai le malamalamaga i mau. Ina ia faamalamalama le uiga o se upu, e masani ai ona faasino atu ana faamatalaga e uiga i le Penetatuka, i le faaliliuga faa-Arama (Targum of Onkelos). Sa faaalia e Rashi lona fetuutuunai ma lona atamai a o ia iloiloina ni avanoa sa lei iloiloina muamua, mo le faamalamalamaina o fesootaiga nauna, o fesootaiga fuaiupu, uiga o veape, ma isi vala o le kalama ma le faatulagaga lelei o upu. O na faamatalaga sa aogā ina ia malamalama ai i le faatulagaina lelei o upu ma le kalama o le gagana Eperu.

I se faaeseesega mai uiga sa taatele i rapi o le lotu Iutaia, sa masani ona saili atu Rashi ina ia faamatilatila le uiga faigofie ma le uiga moni o se mau. Peitai, o le tele o tusitusiga e fesootai i le Midrashi, lea sa masani lelei ai tagata Siu, sa tatau lava ona amanaiaina. O se vala sili ona mataina o faamatalaga a Rashi o le auala o loo ia faafesootai atu ai i tusitusiga Midrashic lea sa masani ona nenefu ai le uiga moni o le mau o le Tusi Paia.

I lana faamatalaga e faatatau i le Kenese 3:8, ua faamatala ai e Rashi faapea: “E tele midrashim faa-aggadah * ua uma ona faatulaga lelei e o tatou Tagata Atamamai i le Bereshit Rabbah faapea foi i isi faaputuga o tusitusiga faa-midrash. Peitai, o loo sili ona ou popole i le uiga tuusaʻo (peshat) o le fuaiupu, faatasi ai ma aggadot ua faamatalaina ai le tala a le Tusi Paia i lona aotelega atoa.” E ala i lona filifilia ma faamaumauina na o uiga loloto o mau na ia iloa e  aogā mo le faamaninoina o le uiga po o le aotelega atoa o se fuaiupu, sa aveese ai e Rashi, uiga loloto sa faapogaia ai feteenaiga ma le fenuminumiai. O lenei faamaumauina, na oo ai ina sili atu ona masani lelei tupulaga fai mai o Siu, i vaega na filifilia e Rashi mai tusitusiga a le Midrash.

E ui sa ia viiviia ona faiaʻoga, ae sa lei fefe Rashi e faaali atu sona lē ioe pe a ia iloa e feteenai a latou faamatalaga ma le faamalamalamaga manino o se mau. Pe a lē malamalama o ia i se fuaitau pe manatu sa lei saʻo lona faamalamalamaina muamua o lea fuaitau, sa ia taʻutino mai lenei mea, e oo lava i lona taʻua o nisi tulaga sa fesoasoani atu ai ana tagata aʻoga e faasaʻo sona malamalamaga.

Ua Taaʻina e Mea sa Iai i Ona Vaitaimi

O Rashi o se tagata sa matuā masani lelei ma mea tutupu o ona vaitaimi. O le auala lenei na tāaofai ai e se tasi tusitala lena manatu: “O le sao tele a [Rashi] i olaga o tagata Siu o lona toe faaliliuina atu lea o fuaitau tāua uma i le gagana o loo taatele i lena taimi, i se gagana e manino, e malamalamagofie, ma se uiga e māfana ma agavaivai, ae i se atamai ma se tomai e tumatilatila ese lava, o lea na faaaloalogia ai ana faamatalaga faapea o ni mau paia ma sapasapaia faapea o ni tusitusiga sa sili ona lelei. Sa tusitusi Rashi i le gagana Eperu e peiseai o le gagana Falani, i se faiga atamai ma le sologa lelei. So o se taimi lava e na te lē maua ai le upu tonu i le faa-Eperu, ona ia faaaogā lea o se upu faa-Falani, ae sipela i mataitusi faa-Eperu.” O nei upu faa-Falani na suia mataitusi e sipela ai—e silia i le 3,500 nisi o na upu sa faaaogā e Rashi—na oo ina avea ma puna aogā mo tagata aʻoga o ē na sailiili i le auala talafeagai e tautala ma faaleo ai upu o le faa-Falani Tuai.

E ui o le olaga o Rashi sa amata mai i se siomaga e toafimalie, ae na molimauina i ona tausaga mulimuli ane le faateteleina o feteenaiga i le va o tagata Siu ma ē na faapea mai o Kerisiano. I le 1096 na faapogaia ai e le Taua Muamua o Eleele Paia se faatamaiaga i nuu o tagata Siu sa iai i Rhineland, o iina sa fai ai suesuega a Rashi. E faitau afe tagata Siu na fasiotia. E foliga mai o tala i nei fasiotiga tagata sa aafia tele ai le soifua maloloina o Rashi (lea na faasolo ifo ona faaletonu seia oo i lona maliu i le 1105). Mai lena taimi ma faasolo mai ai, sa iai se suiga iloga i ana faamatalaga e faatatau i le Tusi Paia. O se tasi faaaoaoga mataina o le Isaia mataupu e 53, o loo tautala e uiga i le auauna o loo mafatia a Ieova. Muamua atu, sa faatatau ai e Rashi nei mau i le Mesia, e pei foi ona faatatau ai e le Talmud. Peitai e foliga mai ina ua mavae Taua o Eleele Paia, sa ia manatu ai loa o nei fuaiupu e iai se faatatauga atu i tagata Iutaia, o ē na fesagai ma mafatiaga lē tonu na faia i ai. Na mautinoa le avea o lenei manatu o se suiga tele i faaliliuga a tagata Siu o nei mau. * O lea, na avea amioga lē faa-Kerisiano a Kerisinetoma ma pogai o le liliu ese o le toatele o tagata, e aofia ai tagata Siu, mai le upu moni e uiga ia Iesu.—Mataio 7:16-20; 2 Peteru 2:1, 2.

Na Faapefea Ona Ia Taaʻina Faaliliuga o le Tusi Paia?

E lei umi ae oo atu taaʻiga a Rashi i isi vaega e ese mai le talitonuga faa-Iutaia. Sa faasino soo atu le tagata faitofa mai Falani o le Tusi Paia o Nikolao o Lyra (1270-1349) i manatu o “Rapi Solomona [Rashi]” lea sa faaigoa ai o ia o “Lē Faataitai ia Solomona” (the Ape of Solomon). O le iuga, e toatele le au faitofa ma tagata faaliliu na taaʻina e Lyra, e aofia ai ē na mua i malae i le au faaliliu o le King James Version faa-Peretania ma lē na toe fuataiina le lotu o Matini Luteru, o lē na suia atoa faaliliuga o le Tusi Paia i Siamani. Sa faalagolago tele Luteru i manatu o Lyra, o lea na faapea mai ai se solo lauiloa: “Pe ana lē tāina e Lyra le napeli, semanū e lē tāitai siva Luteru.”

Sa matuā taaʻina Rashi i manatu o le au rapi lea sa lē ogatusa ma le upu moni faa-Kerisiano. Peitai, ona o le loloto o lona malamalamaga i faaupuga faa-Eperu o le Tusi Paia, i le faatulagaga lelei o upu, ma le kalama faapea foi ana taumafaiga faifai pea ina ia iloa le uiga moni o le mau, ua saunia ai e Rashi se puna aogā e tapa atu i ai le au sailiili ma le au faaliliu o le Tusi Paia, pe a faia faatusatusaga o ni manatu o mau.

[Faaopoopoga i lalo]

[Ē Ana le Ata i le itulau 26]

Text: Per gentile concessione del Ministero dei Beni Culturali e Ambientali