Le Sailia o le Parataiso

E PEI ONA FAAMATALAINA E PASCAL STISI

Ua leva lava le po, ma sa matuā gaogao foi auala o le taulaga o Béziers, i Falani i saute. Ina ua ma tau atu i se pa o se faletusi faalelotu faatoʻā uma lava ona vali, na ma tusitusia ai ma laʻu uo i luga o le pa i ni mataitusi uli matuā matamata tetele upu a le faifilosofia Siamani o Nietzsche e faapea: ‘Ua feoti atua. Ia soifua le Supameni!’ Ae o le ā na māfua ai ona ou faia nei mea uma?

SA OU fanau i Falani i le 1951 i se aiga Katoliko e tupuga mai i Italia. A o oʻu laitiiti, na matou ō ai i ni faiga malologa i le itu i saute o Italia. O iina, e tofu ai lava nuu taitasi ma le faatusa o le taupou o Maria. A o ma savalivali ma le tamā o loʻu tinā, sa ou mulimuli atu i le laina faasolo e lē gata mai o nei faatusa tetelē o loo faaofuina e oo atu lava i mauga—ae e matuā leai lava soʻu talitonu i ai. Na maeʻa aʻu aʻoaʻoga amata i le aʻoga faalelotu na faia e tagata na taʻua o Jesuits. Ae peitai, ou te lē o manatua lava loʻu faalogo ai i se mea na atiina ae moni ai loʻu faatuatua i le Atua.

Ae ina ua tusia loʻu igoa i se iunivesite i Montpellier e aʻoaʻoina ai le poto tau vailaau faafomai, na amata ai ona ou manatunatu i le fuafuaga o le olaga. Sa manuʻa loʻu tamā i le taua ma sa ō atu pea fomaʻi i taimi uma e vaai o ia. Pe e lē sili ea ona lelei pe a faaiuina le taua na i lo o le faaalu o le matuā tele o le taimi ma taumafaiga e togafitia ai tagata mai āuga o le taua? Ae peitai, o le taimi lena sa matuā vevela ai le taua i Vietiname. Ia te au lava ia mo se faaaoaoga, e na o le pau lava le auala saʻo mo le togafitiga o le kanesa o māmā, o le taofia lea o le mafuaaga autū—o le tapaa. Ae faapefea le maʻi paee lea e māfua ona o le leai o ni meaʻai paleni i atunuu tau atiae, ma maʻi i atunuu tamaoaiga ona o le soona aai? Pe lē sili ea ona lelei le aveesea o pogai na i lo le taumafai e togafitia iuga faanoanoa? Aisea ua matuā tele ai mafatiaga i le lalolagi? Sa ou lagona e iai lava se mea ua matuā sese i lenei sosaiete ua lamatia ola, ma sa ou tuuaia ai pulega a malo i lenei mea.

O le tusi sa sili ona ou fiafia e faitau i ai, na tusia lea e se tagata sa fouvale i pulega a malo, ma sa ou tusia ni fuaiupu mai lena tusitusiga i luga o pa puipui. Sa faifai mālie ai lava ona avea aʻu o sē e fouvale, e aunoa ma se faatuatua ma ni tapulaa tau amio tatau, sa ou lē manao foi i le Atua po o sē e pule mai. Ia te au, o le manatu i le Atua ma lotu, sa o ni mea na fatu aʻe e tagata mauoa ma malolosi ina ia mafai ai ona latou pulea ma faaleagaina i tatou uma. E foliga sa  faapea mai le vasega o tagata mauoa: ‘Ia galulue malolosi mo i matou i le lalolagi, ona tele ai lea o lo outou taui e maua i le parataiso i le lagi.’ Ae ua uma le taimi o pulega a atua. O le mea lena sa manaomia ona taʻu atu i tagata. O le faia la o tusitusiga i luga o pa po o puipui, o le tasi lena o auala e taʻu atu ai ia i latou.

O le iuga, na taofia ai laʻu aʻoga. I le taimi lena sa tusia ai loʻu igoa i se isi iunivesite i Montpellier e suesueina ai le lalolagi ma ola o loo iai faapea ma le ekolosi (fesootaiga o mea ola ma o latou siosiomaga) lea foi sa pulea e se isi faiga malo tetee. O le tele o loʻu suesue i le ekolosi, o le tele foi lea o loʻu lē fiafia i le vaai atu i le faapolusioneina o lo tatou paneta matagofie.

I tausaga uma lava i le vaitaimi o faiga malologa i le taumafanafana, sa ou faimalaga ai mo le faitauafe o maila (kilomita) e suesue lifi i taavale feoai i Europa atoa. A o faimalaga ma talatalanoa ma le faitau selau o ave taavale, na ou vaaitino ai lava aʻu i le leaga ma le iuvale o loo pagatia ai le sosaiete faaletagata. I se tasi taimi a o oʻu saili mo le parataiso, na ou tau atu ai i ni matafaga matuā uigaese i le motu matagofie o Kereta ma iloa ai ua liloia atoa i le suauu. Sa ou lagona le faanoanoa i loʻu loto. Pe sa iai ea sina vaega o le parataiso o totoe i se isi mea i le lalolagi?

Toe Foi e Galueaiina le Laueleele

I Falani na lagolagoina ai e tagata suesue i le ekolosi le toe foi e fai faatoaga e faapea o se vaifofo i mafatiaga o le sosaiete faaletagata. Sa ou manao e fai aʻu lava galuega. O lea na ou faatauina ai se fale tuai na fausia i maa i se nuu laitiiti i le auvae mauga o le mauga o Cévennes i le itu i saute o Falani. I le faitotoa o le fale, sa ou tusia ai upu faapea, “Ua Avea Nei ma Parataiso,” o se faaupuga e fiafia i ai tagata hipi o Amerika. O se teine talavou mai Siamani na faimalaga atu i lo matou vaipanoa, sa avea ma aʻu paaga. Sa ou matuā lē manao lava e ma te faaipoipo i luma o le pulenuu, o se sui o le malo. Ae ā le faaipoipo i le lotu? E sili pe a faataatia!

O le tele lava o taimi, sa ma savavali ai e leai ni seevae, ma sa uumi loʻu lauulu ma laʻu ʻava uumi ma veuveua. O le totoina o laau ʻaina suamalie ma laau faisua sa matuā faafiafiaina ai aʻu. I le taumafanafana sa lanumoana le vanimonimo ma sa mālie le tausagi mai o alisi. Sa sasala le manogi o fugalaau o vaomuʻa, ma laau ʻaina suamalie e ola i le Metitirani na ma totoina—o vine ma mati—sa matuā susua lava! E foliga mai na ma maua lo ma nofoaga i le parataiso.

Faaosofia le Talitonu i le Atua

I le iunivesite, sa ou suesue ai i mataupu tau paiolosi o sela, le afuafuaina o le ola, ma le fausaga o le tino, ma sa ou matuā maofa lava i le lavelave ma le ogatusa o nei mea uma o loo fausia aʻe ai le tino. O lea la ua mafai nei ona ou iloiloina ma matauina mo le uluai taimi le foafoaga i aso uma, o lona matagofie ma le tomai, sa ou matuā viiviia lava. I lea aso ma lea aso, sa faaalia mai pea ia te au vala eseese o le foafoaga. I se tasi aso a o oʻu faia se savaliga umi i luga o mauga ma ina ua uma ona ou manatunatu loloto e uiga i le ola, na iu ai ina ou faia se faaiuga e faapea, e tatau lava ona iai Sē na Foafoaina Mea. Sa ou filifili ai i loʻu loto ina ia talitonu i le Atua. Muamua atu, sa ia te au se faalogona gaogao, sa faalavelavea i se faalogona tuuatoatasi. O le aso lava na amata ai ona ou talitonu i le Atua, na ou faapea ifo ai ia te au lava, ‘Pascal, e lē toe mafai lava ona tuua na o oe.’ Sa o se faalogona matuā uigaese.

E lei umi lava se taimi mulimuli ane, ae maua loa sa ma tama teine ma laʻu paaga—o lona igoa o Amandine. Sa avea o ia ma oʻu iʻoi mata. Ona o lea ua ou talitonu i le Atua, sa amata loa ona ou faaaloalo i ni nai tulafono tau amio sa ou iloa. Na tuu loʻu gaoi ma le pepelo, sa lei pine ae ou iloa le fesoasoani o lenei mea ia te au e alofia ai le tele o faafitauli ma i latou sa siomia aʻu. Ioe, sa iai o ma faafitauli, ma sa lē maua atoatoa ai loʻu parataiso lea na ou faamoemoe i ai. Sa faaaogā e tagata faifaatoaga o le nuu o ē sa totoina laau e fai ai le uaina ia vailaau e tapē ai iniseti, lea sa faaleagaina ai foi fua o aʻu laau. Sa lei maua lava se tali o laʻu fesili e uiga i le pogai o le amioleaga. Ma le isi, e ui lava ina tele tusi na ou faitau i ai e uiga i le olaga faaleaiga, ae sa lei taofia ai i lenei mea ni finauga aasa sa ma faia ma laʻu paaga. Sa iai ni nai a ma uo, ma o i latou o ni uo pepelo; sa oo lava ina taumafai nisi i ni faiga ina ia lē faamaoni  ai laʻu paaga ia te au. Sa tatau ona iai se isi parataiso e sili atu ona lelei.

Le Tali i Aʻu Tatalo

I laʻu lava auala, sa masani ai ona ou tatalo i le Atua ina ia ona taitaiina aʻu i le olaga. I le taeao o le tasi Aso Sa, na ō mai ai i lo matou fale se fafine e uiga faaleuo e igoa ia Irène Lopez ma si ana tama laitiiti. O ia o se tasi o Molimau a Ieova. Sa ou faalogologo i mea na ia fai mai ai ma talia le ofoina mai o se se isi asiasiga. E toalua ni tamaloloa na ō mai e vaai aʻu. Mai i la matou talanoaga, na ou maua ai ni mea se lua—le Parataiso ma le Malo o le Atua. Sa ou taofia ma le faaeteete na manatu i loʻu loto, ma i le mavae atu o masina, sa ou malamalama ai e faapea, i se aso, o le a tatau ai ona ou faasaʻosaʻo mea i lo ma va ma le Atua pe afai ou te manao ia maua se loto fuatiaifo mamā ma maua ai le fiafia moni.

Ina ia ogatusa o ma olaga ma le Afioga a le Atua, na malie ai laʻu paaga i le taimi muamua e ma te faaipoipo. Ae sa oo ina aumea atu o ia i ni tagata amioleaga o ē na tauemu i le Atua ma ana tulafono. Ina ua ou foi atu i le fale i se tasi afiafi o le tau totogo, na matuā faateia lava aʻu. Ua leai ma nisi i lo matou fale. Ua alu ese laʻu paaga ma ave la ma tama teine e tolu tausaga. Sa ou faatalitali mo le tele o aso mo lo la toe foi mai—ae na lē taulau. Na i lo o le tuuaia o le Atua, sa ou tatalo atu ia te ia ina ia fesoasoani mai ia te au.

E lei pine mulimuli ane, sa ou tago ai i le Tusi Paia, nofo i lalo o loʻu mati, ma amata ona faitau. O le mea moni, sa ou utufia mai ai i upu o le Tusi Paia. E ui sa ou faitau i ituaiga eseese o tusi a tagata suesue tau i faalogona ma le mafaufau, ae ou te lei tau lava i se atamai uigaese faapea. O lenei tusi e lē taumatea na faagaeeina e le Atua. Sa ou matuā maofa lava i aʻoaʻoga a Iesu ma lona malamalama e uiga i le natura faaletagata. Sa faamafanafanaina aʻu i tusi o Salamo ma ou maofa i le atamai aogā o tusi o Faataoto. Sa vave lava ona ou iloa e faapea, e ui lava e lelei tele le suesueina o le foafoaga e faalatalata atu ai se tasi i le Atua, ae ua na ona faaalia mai ai “o mea aupito mai ia a ona ala.”—Iopu 26:14.

Na tuua foi e Molimau ia te au ia tusi, O Le Upu Moni E Taʻitaʻi Ai I Le Ola Faavavau ma le Faia o Lou Olaga Faaleaiga ia Fiafia. * O le faitauina o na tusi na pupula ai oʻu mata. O le tusi o le Upu Moni na fesoasoani ia te au e malamalama ai i le mafuaaga ua fesagai ai tagata ma le mala o le polusione, taua, faateleina o faiga sauā, ma le faamataʻu mai o le faaumatiaga faaniukilia. Ma e pei lava o le mūmū mai o le lagi lea na ou iloa atu mai loʻu togalaau e faailoa mai ai o le a lagi lelei le tau i le aso e sosoo ai, ua faapena i nei mea tutupu ona faailoa mai ai e faapea, ua matuā latalata mai lava le Malo o le Atua. A o le tusi Olaga Faaleaiga, sa ou moomoo ai lava maimau pe ana mafai ona ou faaali atu i laʻu paaga ma taʻu atu ia te ia e mafai ona ma maua le fiafia e ala i le faatinoina o fautuaga a le Tusi Paia. Ae sa lē toe mafai ona fai o lena mea.

Agaigai i Luma Faaleagaga

Sa ou manao ou te fia iloa atili, o lea na ou talosaga atu ai ia Ropati, o se Molimau, ina ia asiasi mai ia te au. Sa matuā faateia o ia ina ua ou fai atu i ai e faapea, ua ou manao ou te papatiso, o lea, na amataina ai loa se suesuega faale-Tusi Paia. Sa amata loa ona ou talanoa atu i isi e uiga i mea na ou aʻoaʻoina, ma amata foi ona ou tufatufa atu lomiga na ou maua mai i le Maota o le Malo.

Ina ia maua ni mea e tausi ai aʻu, na ou auai atu ai i se aʻoga e aʻoaʻoina ai le gaosia o piliki. I le iloa e uiga i le lelei e mafai ona faia e le Afioga a le Atua i se tagata, sa ou puʻea ai avanoa uma e talaʻi lē fuafuaina atu ai i tagata i le aʻoga ma faiaʻoga. I se tasi afiafipo, na ma feiloai ai ma Serge i se poletito. Sa ia umia ni mekasini i lona lima. Na ou fai atu, “Ou te vaai atu e te fiafia e faitau tusi.” “Ioe, ae ua ou fiu foi i nei mekasini.” Na ou fesili atu, “E te manao i se mea e lelei moni lava mo le faitau?” Sa matuā manaia lava la ma talanoaga e uiga i le Malo o le Atua, lea na iu ina ia talia ai ni lomiga faale-Tusi Paia. I le vaiaso na sosoo ai, na ma ō faatasi ai i le Maota o le Malo, ma na amataina ai se suesuega faale-Tusi Paia.

I le tasi aso, na ou talosaga atu ai ia Ropati pe mafai ona ou talaʻi mai lea fale i lea fale. Na alu atu o ia i le potu e tautau ai ona lavalava ma aumai  se suti mo aʻu. I le Aso Sa na sosoo ai, na ou faia ai le uluai laasaga i le faiva i le fanua faatasi ma ia. O le iuga, ia Mati 7, 1981, na ou faalauiloa atu ai i le lautele loʻu tuuina atu ia Ieova le Atua e ala i le papatisoga.

Fesoasoani a o Mafatia le Mafaufau

I le taimi lena, na ou iloa ai le nuu mamao sa nonofo ai Amandine ma lona tinā. Pagā se faanoanoa, ona sa faia e lona tinā ni feuiuiaiga uma faaletulafono—e tusa ai ma tulafono a le atunuu sa ia nofo ai—e faasā ai aʻu mai loʻu alu atu e vaai i loʻu afafine. Sa leai soʻu faamoemoe. Ua faaipoipo le tinā o Amandine, ma na atili ai ona matuā vāivai loʻu loto ina ua ou maua se pepa faalemalo e faailoa mai ai e faapea, ua liliu e lana tane loʻu afafine ia te ia—e aunoa ma loʻu malie atoatoa i ai. Sa lē toe iai saʻu aiā i loʻu afafine. E ui i le tele o taumafaiga faaletulafono sa ou faia, ae sa lē mafai ona ou maua se aiā e asiasi atu ai ia te ia. Sa ou lagona e pei ua ou amoina se avega e selau pauna (50 kilokalama) le mamafa, e faapena foi loʻu tiga.

Ae na faamalosiau le Afioga a Ieova ia te au i nisi o auala. I se tasi aso a o oʻu matuā mafatia lava, sa ou taulotoina ai pea upu o le Faataoto 24:10 e faapea: “Afai e te faavaivai i le aso vale, ua itiiti lava lou malosi.” O le mau lenei na fesoasoani ia te au ou te lē matapogia ai. I se tasi taimi, ina ua mavae se faatoilaloina i le taumafai e vaai i loʻu afafine, sa ou alu ai i le faiva ma matuā uumau le ʻau o laʻu ato tusi. I na taimi faigata, sa mafai ona ou tofo i le faamaoni o le Salamo 126:6, lea e faapea mai: “O le ua alu atu ma tagi fano, o loo ave le saito e lulu, e foi mai lava ia ma le alaga fiafia, o loo au mai ana fusi saito.” O se lesona tāua na ou aʻoaʻoina e faapea, pe a oo ni tofotofoga matuia ia te oe, pe a uma ona e faia mea uma e te mafaia e faaleleia ai, e tatau ona e faagalo ae agaʻi i luma ma le maumauai i le auaunaga a Ieova. E na o le pau lava lenei o le auala e maua ai pea lou olioli.

Aapa Atu mo se Mea e Silisili Ona Lelei

I le vaai mai i suiga na ou faia, na ofo mai ai oʻu mātua pele e fesoasoani mai ia te au ina ia faaauau pea laʻu aʻoga i le iunivesite. Sa ou faafetai atu ia i laua, ae i le taimi nei, o lea ua iai le isi oʻu sini. Ua tuusaolotoina aʻu e le upu moni mai filosofia faaletagata, faiga faataulaitu, ma sailiiliga i fetu. O lea ua iai nei ni aʻu uo moni o ē e lē mafai ona fasiotia e le tasi le isi i taua. Ma ua iu ina ou maua tali i aʻu fesili e uiga i le pogai ua matuā tele ai puapuaga i le lalolagi. Ma loʻu loto faafetai, sa ou manao ai ou te auauna i le Atua ma loʻu malosi atoa. Na tuutoina atoatoa atu e Iesu o ia lava i lana faiva, ma sa ou manao e mulimuli ai i lana faaaoaoga.

I le 1983, na ou tuua ai laʻu pisinisi o le faia o piliki ae avea ma faifeau faataimi atoa. I le taliaina o aʻu tatalo, na ou maua ai se galuega faavaitaimi i se paka mo le tausiaina o aʻu. Maeu se olioli i le auai i le aʻoga a paeonia faatasi ai ma Serge, le tama talavou lea na ou molimau atu i ai i le aʻoga mo le gaosiga o piliki! Ina ua mavae le tolu tausaga o avea ma paeonia sauatoa, sa ou naunau ai ina ia faia ni mea e sili atu i le auaunaga ia Ieova. O lea, i le 1986, na tofia ai aʻu e  avea ma paeonia faapito i le taulaga matagofie o Provins, e lē mamao ma Pale. Pe a ou foi mai i le fale i le afiafi, sa masani lava ona ou tootuli ma tatalo atu ia Ieova mo le aso matagofie na ou faaaluina e talanoa atu ai i isi e uiga ia te ia. O le mea moni, o mea e lua sa silisili ona ou fiafia i ai i le olaga, o le talanoa atu lea i le Atua ma le talanoa atu e uiga i le Atua.

O le isi mea sa sili ona ou olioli ai, o le papatisoga lea o loʻu tinā ua 68 tausaga le matua o lē sa nofo i Cébazan, o se nuu laitiiti i le itu i saute o Falani. Ina ua amata ona faitau e loʻu tinā le Tusi Paia, sa ou aauina atu ia te ia ni tusiga o Le Olomatamata ma le Ala Mai! O ia o se tagata mafaufau, ma e lei pine lava ae ia iloa mai mea na ia faitauina, o le upu moni lea.

Peteli—O se Parataiso Matagofie Faaleagaga

Ina ua filifili le Sosaiete o le Olo Matamata e faaitiitia le aofai o paeonia faapito, sa ou talosaga loa mo le Aʻoga mo Toleniga i le Faiva ma talosaga foi mo le auaunaga i Peteli, le lālā o le ofisa o Molimau a Ieova i Falani. Sa ou manao e tuu atu ia Ieova e na te filifilia le auala e sili ona lelei e mafai ona ou auauna ai ia te ia. Ina ua mavae ni nai masina, ia Tesema 1989, na valaaulia ai aʻu i Peteli i Louviers, i le itu i mātū i sisifo o Falani. Sa avea lenei o se faaiuga e matuā sili ona lelei, ona o lea tulaga na mafai ai ona ou fesoasoani atu i loʻu uso laitiiti ma lana avā i le tausiga o oʻu mātua ina ua oo ina matuā mamaʻi lava. Semanū e lē mafai ona ou faia o lenei mea pe ana faapea ou te iai i le auaunaga faamisionare i se nofoaga e matuā mamao lava.

E iai ni taimi e asi mai ai aʻu e loʻu tinā i Peteli. E ui lava sa avea o se faataulagaga mo ia le nofo mamao ese mai ia te au, ae sa masani lava ona ia fai mai ia te au: “Si aʻu tama e, ia e nofo ai pea i Peteli. Ua ou fiafia ona o loo e auauna ia Ieova i lenei auala.” O se mea e faanoanoa ai, ona ua maliliu uma nei oʻu mātua. Maeu loʻu āloalo atu i le lumanai o le a ou toe vaai ai ia i laua i le lalolagi o le a faaliliuina i se parataiso moni!

Ou te matuā talitonu lava e faapea, afai e iai se fale e tatau ona avatu i ai le faaupuga lea, “Ua Avea Nei ma Parataiso,” o Peteli—le “Fale o le Atua”—auā o le parataiso moni, ae maise lava i le tulaga faaleagaga, ma o loo pulea Peteli i le faaleagaga. Ua matou maua ai le avanoa e ati ae ai fua o le agaga. (Kalatia 5:22, 23) O meaʻai susua faaleagaga o loo matou maua i le talanoaina o le mau o le Tusi Paia i aso taitasi ma le suesueina e le aiga o Le Olomatamata, ua fesoasoani e faamalosia ai aʻu mo le auaunaga i Peteli. E lē gata i lea, o le mafai foi ona auaufaatasi ma uso ma tuafāfine e malolosi faaleagaga, o ē ua tele tausaga o auauna faamaoni ia Ieova, ua avea ai Peteli o se nofoaga tutasi e tupu aʻe ai faaleagaga. E ui lava ina ma valavala ma loʻu afafine mo le 17 nei o tausaga, ae ua ou maua le anoanoai o talavou maelega i Peteli, o ē o loo oʻu manatu i ai o saʻu fanau, ma o ē ua avea lo latou agaigai i luma faaleagaga o se mea ou te matuā olioli ai. I le valu tausaga ua mavae, na ou maua ai ni tofiga eseese se fitu. E ui lava sa lei faigofie pea nei suiga, ae o na toleniga e aogā mo se taimi umi.

Sa masani ona ou totoina se ituaiga o fatu pī e fua mai e taiselau. Sa faapena foi ona ou iloa e faapea, pe afai e te luluina se mea leaga, o le a e selesele mai foi le taiselau o mea e silisili atu ona leaga—ma e lē i na o se seleselega e tasi. O mea tutupu, e pei lava o se aʻoga, o iina e matuā faigata lava lesona e aʻoaʻoina mai ai. E sili atu ia te au loʻu lē ulu atu lava i lena aʻoga, ae na i lo lena, e sili mamao atu ai le tausia aʻe i ala o Ieova. Maeu se faaeaga mo na talavou o ē ua tausia aʻe e ni mātua Kerisiano! E aunoa ma se masalosalo, e sili atu ona lelei le lūlū o mea lelei i le auaunaga a Ieova ma selesele mai ai le sili atu i le taiselau le filemu ma le loto malie.—Kalatia 6:7, 8.

Ina o avea aʻu ma paeonia, ou te ui ane ai i nisi taimi i luma o le faletusi faalelotu lea na ma tusitusia ai i pa ni upu tetee a tagata fouvale. Ua ou oo foi i totonu ma ou talanoa atu i lē ona le faletusi e uiga i le Atua soifua ma ana fuafuaga. Ioe, o loo soifua le Atua! E lē gata i lea, o Ieova le Atua moni e toatasi, o se Tamā faamaoni, o lē na te lē tuulafoaiina lana fanau. (Faaaliga 15:4) Tau ina ia maua e le anoanoai o tagata mai atunuu uma le parataiso faaleagaga i le taimi nei—ma le Parataiso o le a toe faafoisia lea o loo fotuai mai—e ala i le auauna ma vivii atu i le Atua soifua, o Ieova!

[Faaopoopoga i lalo]

[Ata i le itulau 26]

I le uunaia i mea ofoofogia o le foafoaga, na ou filifili ai i loʻu loto ou te talitonu i le Atua.

(Taumatau) I le auaunaga i Peteli i aso nei