O Ai o Fauina Ou Mafaufauga?

“OU TE lē manao e taʻu mai e se tasi ia te au mea e ao ona ou mafaufau i ai! Ma ou te lē manao e taʻu mai e se tasi ia te au le mea e ao ona ou faia!” O le fai atu ma le maumauai o na faaupuga e masani lava ona faauiga faapea, ua matuā tele lou faatuatuaina o oe lava ma lou faatuatuaina o lau lava faaiuga. Po o ou lagona ea na? O le mea mautinoa, e lē tatau ona faia fua e se isi tagata au faaiuga. Ae pe atamai ea le vave ona e teteeina o se mea atonu o se fautuaga lelei? Po o lona uiga ea e matuā augapiu lava ma se tasi e mafai ona fesoasoani ia te oe mo le faia o ni faaiuga atamai? E ui i lea, pe mafai ona e matuā mautinoa e lē o iai moni se tasi o faaaafiaina ou mafaufauga e aunoa ma sou iloaina?

Mo se faaaoaoga, a o lei oo i le Taua Lona Lua a le Lalolagi, na pulea ai e Joseph Goebbels, o lē na faauluulu i ai le polokalame a Hitila mo le fafagaina o faamatalaga i tagata, le kamupanī fai atatifaga a Siamani. Aisea? Auā na ia iloa lelei o iina o le a ia matuā maua ai se avanoa na te mafai ona “taaʻina ai talitonuga o tagata faapea foi i a latou amioga.” (Propaganda and the German Cinema 1933-1945) Atonu o e iloa le matuā taulau o lenei auala ma isi foi auala sa ia faia e faasese ai tagata lautele—o tagata masani o ē mafaufau lelei—ina ia mulimuli pogisa atu i filosofia a Nasi.

O le mea moni, o le auala o loo e mafaufau ai, faapea le auala o loo e gaoioi ai, e masani ona taaʻina i nisi taimi e lagona ma manatu o i latou o loo e faalogo atu i ai. O le mea moni e lē faapea ai e leaga lenei mea. Pe afai o tagata na o loo naunau moni mo sou lelei—e pei o faiaʻoga, uo, po o mātua—o le a tele la se aogā e te maua mai a latou fautuaga ma timaiga. Ae afai o i latou o tagata e na o latou lava lelei o loo popole i ai ma ua faaseseina foi pe faaleagaina i latou e o latou lava mafaufauga, o ‘ē faasese atu i le mafaufau,’ e pei ona faamatala ai i latou e le aposetolo o Paulo, ia faaeteete la!—Tito 1:10; Teuteronome 13:6-8.

O lea, aua neʻi faatalalē ma manatu faapea e leai lava se tasi e mafaia ona ia taaʻina oe. (Faatusatusa i le 1 Korinito 10:12.) Atonu o loo tupu—e masani ona tupu e ui e te lē fia ioeina—e aunoa ma sou matauina. Fai ma faaaoaoga faigofie po o le ā se oloa e te filifili e faatau pe a e alu e faatau. Po o lena ea filifiliga o sa oe lava faaiuga totino, e lei aiā ane i ai se isi? Po o le mea, e iai isi tagata, e masani ona lē iloa atu, ae o loo latou matuā faaaafiaina ma lou lē iloa lau filifiliga? E manatu le tagata e suesue ma tusitusia tala i nusipepa o Clark e faapea, o le mea lena o loo tupu. Fai mai ā ia: “O le tele o le osofaia o i tatou i faasalalauga faatosina o mea faatau, o le itiiti foi lena o lo tatou matauina o aafiaga a na faatosinaga, ae o le mea moni, o loo telē so tatou aafia ai.” Ua ia lipotia mai foi faapea pe a fesiligia tagata po o le ā se tele o le aafia o o latou faalogona i faasalalauga faatosina, “e toatele e ioe mai e iai aafiaga, ae lē aafia ai i latou.” E tele ina manatu tagata faapea o isi uma e faigofie ona taaʻina, ae lē faapena i latou. “E  foliga mai, pe a na o latou lava e lē mafai ona taaʻina.”—The Want Makers.

Ua Omia i Fausaga a Satani

E tusa lava pe taaʻina oe i faasalalauga faatosina i aso taitasi ae atonu e lē matuā tugā ni āuga. Peitai, e iai se isi taaʻiga, lea e sili atu ona matautia. Ua faaalia manino mai e le Tusi Paia faapea o Satani o le matai o le taufaasese. (Faaaliga 12:9) O lana filosofia e talitutusa lava ma le manatu o se tagata fai faasalalauga faatosina o lē na faapea mai e lua lava auala e faatosina mai ai tagata faatau—“e ala i le faasee o i latou pe faamasani i latou e gauai mai.” Afai o lea e mafai e i latou o faia faufauga ma i latou o faia faasalalauga faatosina ona faaaogā na auala iloagata e fafauina ai ou mafaufauga, pagā la le sili atu ona taulau le taufaasese sili o Satani i le faaaogaina o na lava mailei!—Ioane 8:44.

Sa iloa e le aposetolo o Paulo lenei mea. Sa popole o ia ina neʻi lē mataala nisi o ona uso Kerisiano ma lavevea ai i mailei a Satani. Na ia tusi mai: “Ou te fefe, ina neʻi pei ona faaseseina o Eva e le gata i lana togafiti, e faapea ona faaleagaina o outou manatu ina ia le tonu ia Keriso.” (2 Korinito 11:3) Aua neʻi manatu māmā i lena lapataiga. O le lē faia faapea e te ono pei ai o na tagata o ē talitonu e iai aafiaga leaga a faufauga ma uunaiga faamalosi ina ia lolo atu—“ae lē aafia ai i latou.” O le mea moni faapea o faufauga faasatani e taaʻina ai, ua manino lelei mai i mea o loo siomia ai i tatou i se uiga sauā, matagā, ma taufaaʻoleʻole lea e mataulia ai lenei augatupulaga.

O le mea lea, na aioi atu ai Paulo i ona uso Kerisiano ina ia ‘aua le amio faatasi ma lenei lalolagi.’ (Roma 12:2) Na toe faaupu mai e se tasi tagata faaliliu o le Tusi Paia upu a Paulo faapenei: “Aua le faatagaina le lalolagi o loo siomiaina oe e oomia oe i totonu o ana lava faufauga.” (Roma 12:2, Phillips) O le a taumafai e Satani so o se mea ina ia uunaia faamalosi ai oe i lana faufauga, e pei o le fai ipu omea o aso anamua e na te vaneina se ata i se fausaga ona oomi lea i ai o le omea ina ia iloga ai faailoga ma foliga sa ia manao ia pipii atu i le omea. Ua sauniunia e Satani faiga faapolotiki a le lalolagi, o faiga tau fefaatauaiga, o faiga faalotu, ma faafiafiaga, ina ia faia ai lena mea. Ae o le ā le telē ua salalau atu i ai ana faaaafiaga? Ua matuā lautele le salalau atu e pei ona sa iai i aso o le aposetolo o Ioane. Na faapea mai Ioane: “O le lalolagi uma o loo nofo toilalo i loo leaga.” (1 Ioane 5:19; tagai foi i le 2 Korinito 4:4.) Afai o iai ni ou masalosaloga i le tomai o Satani e faaseeina ai tagata ma faaleaga o latou mafaufauga, seʻi manatua le matuā taulau na ia faia ai lenei mea i le nuu atoa o Isaraelu, o tagata o ē na tuuina atu i le Atua. (1 Korinito 10:6-12) Faamata e lē ono tupu foi lena mea ia te oe? E mafai ona tupu pe afai e te tuu faasamasamanoa lou mafaufau e faaofi atu i ai faaaafiaga taufaasee a Satani.

Ia Iloa le Mea o Loo Tupu

O le tulaga masani, e faatoʻā taaʻina ou mafaufauga e na uunaiga faaʻoleʻole pe afai e te faataga e tupu. I lana tusi The Hidden Persuaders, na taʻu mai ai e Vance Packard lenei manatu: “O loo tatou maua pea se puipuiga malosi e tetee atu ai i na mea taufaaʻoleʻole [faalilolilo]: e mafai ona tatou filifili ia lē faaʻoleʻoleina i tatou. E toetoe lava o tulaga uma o loo iai lava sa tatou filifiliga e faia ai, ma e lē mafai ona matuā faaʻoleʻoleina i tatou pe afai tatou te iloa le mea o loo tupu.” O le tulaga moni foi lena e faatatau i faufauga ma le taufaaʻoleʻole.

O le mea moni, ina ia “iloa le mea o loo tupu,” e tatau ona e mataala ma talia aafiaga lelei. O se mafaufau e maloloina lelei, e pei lava o se tino e maloloina lelei, e manaomia ona fafaga lelei pe afai e tatau ona faagaoioia lelei. (Faataoto 5:1, 2) E tutusa lava le matautia o le lē lava o faamatalaga e tuuina atu ma le sese o faamatalaga e tuuina atu. E ui o le mea moni e te manaomia ona leoleoina lou mafaufau mai manatu ma filosofia sese, ae ia taumafai foi e aua neʻi faatupuina se vaaiga lē saʻo ma le lē talitonu i timaiga uma po o faamatalaga e ofoina atu ia te oe.—1 Ioane 4:1.

O se faatauanau atu ma le faamaoni e lē tutusa ma se faufauga faalilolilo. O le mea moni na lapataia e le aposetolo o Paulo le tama talavou o Timoteo ina ia nofouta i “tagata amio leaga ma e taupelopelo, [o ē] e alualu pea lava lo latou leaga, o loo faasese atu, ua faaseseina foi i latou.” Ae na toe fai mai atili Paulo: “A o oe, ia e tumau i mea ua aʻoaʻoina ai oe, ma ua mautinoa ia te oe [“faatauanauina ai oe,” NW], ina ua e iloa o ia na aʻoaʻo atu ai ia te oe.” (2 Timoteo 3:13, 14) Talu ai o  mea uma lava e te tuuina i lou mafaufau o le a iai sona taaʻiga ia te oe, o le ki la o le ‘iloaina po o ā ituaiga o tagata o loo e iloa mai ai mea,’ ia faamautinoa o i latou o ni tagata e naunau moni mo sou lelei, ae lē mo o latou lava lelei.

O oe lava e ana le filifiliga. E mafai ona e filifili ina ia ‘amio faatasi ma lenei lalolagi’ e ala i le faataga o filosofia o lenei lalolagi ma mea o loo faatāua e le faiga o mea e puleaina ou mafaufauga. (Roma 12:2) Peitai e lē o naunau lenei lalolagi mo sou lelei. O lea la, ua lapatai mai ai le aposetolo o Paulo faapea: “Ia outou, neʻi faapologaina outou e se tasi i le poto le aoga e faasese ai, e tusa ma le uputuu a tagata.” (Kolose 2:8) O le omia i le fausaga a Satani i lenei auala, po o le ‘maileia i ana togafiti,’ e lē tele ni taumafaiga e alu ai. E tai pei o se tagata e lē ulaula ae o loo ia manavaina le asu o le tapaa a le isi tagata. E mafai ona e aafia ai i le tau lava o lou manavaina o le ea ua faaleagaina.

Ae i le isi itu, e mafai ona e alofia le manavaina o lena “ea.” (Efeso 2:2) Na i lo lea, ia usitaia le fautuaga a Paulo: “Ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) E manaomia ai i lenei mea ni taumafaiga. (Faataoto 2:1-5) Manatua, o Ieova e lē o ia o sē taufaasese. Ua ia saunia mai faamatalaga uma lava e manaomia, ae ina ia maua ai aogā, e tatau ona e faalogo atu i ai ma faataga e faaaafiaina ou mafaufauga. (Isaia 30:20, 21; 1 Tesalonia 2:13) E ao ona e naunau e faatumu lou mafaufau i upu moni o loo iai i “tusitusiga paia,” le Afioga faagaeeina a le Atua, o le Tusi Paia lea.—2 Timoteo 3:15-17.

Tali Atu i Fausaga a Ieova

O le manaoga mo sau tali naunau atu ma le usiusitai pe a e fia maua aogā mai le taaʻiga o faufauga a Ieova, sa matuā faataitaia mai ina ua faatonuina e Ieova le perofeta o Ieremia e asiasi atu i le fale o fai ai galuega a se tagata fai ipu omea. Na vaaia e Ieremia le fai ipu omea ua sui lona mafaufau i le mea o le a ia faia i se tasi ipu ona ua ‘faaleaga e lona lima’ le mea sa ia taumafai e fai. Ona fetalai loa lea o Ieova: “Le aiga o Isaraelu e, ou te le mafaia ea ona fai ia te outou e pei o lena fai ipu omea? . . . Faauta, le aiga o Isaraelu e, e pei o le omea i le lima o le fai ipu omea, e faapea foi outou i loʻu lima.” (Ieremia 18:1-6) Pe na uiga ea lena manatu faapea o tagata i Isaraelu sa pei o ni potopotoi omea e lē o iai se ola ma o loo uu e aao o Ieova, ina ia fafauina e ia i se tasi ituaiga o ipu po o se isi?

E lē tāitai ona faaaogaina e Ieova lona mana e iai le malosi uma lava e faapogaia ai tagata ina ia latou faia mea e feteenai ma o latou manaoga; e lē tuuaʻia foi o ia i iuga lē lelei, e pei o le tulaga atonu na oo i le tagata fai ipu omea. (Teuteronome 32:4) O mea lē lelei e māfua pe a taumafai Ieova e fafau tagata i se auala lelei, ae teena e i latou ana taiala. O se tasi lena eseesega tele i le va o oe ma se potopotoi omea e lē o iai se ola. O loo iai lau filifiliga saoloto. O le faatinoina o lena filifiliga saoloto, e mafai ai ona e filifili e tali atu i le taaʻiga o faufauga a Ieova, po o lou teena ma le loto i ai.

Maeu se lesona uigā! Maeu le sili atu ona lelei o le faalogo i le siufofoga o Ieova na i lo le folafola atu ma le faamaualuga, “Ou te lē manao e taʻu mai e se tasi ia te au le mea e ao ona ou faia!” Tatou te manaomia uma lava faaaafiaga a Ieova e taitaia ai i tatou. (Ioane 17:3) Ia pei o le faisalamo o Tavita, o lē na tatalo: “Ieova e, ia e faailoa mai ia te au ou ala; ia e aʻoaʻo mai ia te au i ou magāala.” (Salamo 25:4) Ia manatua le mea na fai mai ai le tupu o Solomona: “E faalogo mai le tagata poto, e tupu ai pea lona poto.” (Faataoto 1:5) Po o le a e faalogo ea? Afai e te faalogo, ona “faafeao [ai lea o] le mafaufau ia te oe; e leoleo ia te oe le faautauta.”—Faataoto 2:11.