Se Tusi o le Atamai o Loo Iai se Feau mo Aso Nei

“E SILI atu le tāua o le taga e tumu i le atamai i lo le taga e tumu i penina,” o le mea lena na matauina e le augatamā anamua o Iopu o lē e lē mafesiligia o se tasi o tagata sa sili ona maumea i lona vaitaimi. (Iopu 1:3; 28:18, NW, 42:12) E moni, e sili mamao atu le tāua o le atamai na i lo mea faitino pe a oo mai i le tulaga o le fesoasoani atu i se tagata ia taulau manuia i le olaga. Na faapea mai le tupu poto o Solomona: “Ua fai le poto ma mamalu, ua fai foi tupe ma mamalu; a o le aoga lenei o le poto ua maua, e ola ai e ua i ai.”—Failauga 7:12.

Ae o fea e maua ai lena ituaiga o atamai i aso nei? Ua liliu atu tagata i tusitala faufautua o nusipepa, o tagata suesue tau i le mafaufau ma amioga, o fomaʻi o le mafaufau, e oo i le au otiulu ma avetaavale laupasese, i o latou faafitauli totino. Ma e anoanoai le au faufautua ua sauni e tuuina atu fautuaga i le toetoe lava i so o se mataupu—mo se tau fetaui. E ui i lea, e masani lava o na upu “atamai” ua taitaia atu ai i le na o le lē fiafia, e oo atu ai foi i puapuaga. E mafai la faapefea ona tatou maua le atamai moni?

Na fetalai mai Iesu o lē na iai sona malamalama i mataupufai a tagata e faapea: “E taʻuamiotonuina le poto i ana galuega.” (Mataio 11:19) Seʻi o tatou vaai la i nisi o faafitauli masani i olaga o tagata ma matauina ai po o ā upu atamai na fesoasoani moni ia i latou ma na faamautinoa le sili atu ona tāua ia i latou na i lo “le taga e tumu i penina.” E ono mafai foi e oe ona mauaina lena “taga e tumu i le atamai” ma maua ai aogā.

 Po o E Puapuagatia ea i le Loto Mafatia?

Na taʻua i le International Herald Tribune a Lonetona e faapea: “Afai na faaulufale mai e le 20 senituri le Tupulaga o Popolega, ua molimauina la e lona faaiuga le amatamataga o le Tupulaga Loto Mafatia.” Ua faaopoopo mai faapea, “i le uluai suesuega faava-o-malo o le tulaga maoae o le loto mafatia ua faaalia ai le faatuputupulaia o lea maʻi i le lalolagi aoao. I atunuu eseese e pei o Taiwan, Lepanona ma Niu Sila, o loo tuputupu aʻe ai ona tupulaga fai mai i se tulaga e faigofie ai lava ona afaina i lea faamaʻi.” O i latou na fananau mai ina ua mavae le 1955 o loo taʻua faapea e faatoluina avanoa latou te ono afaina ai i le matuā loto mafatia na i lo le tulaga sa iai mātua o o latou mātua.

O le tulaga lena na tupu ia Tomoe, o lē na afaina i le matuā loto mafatia ma faataotolia i le tele o aso. Ona ua lē mafai ona ia tausia lana tama tama e lua tausaga le matua, na ia toe siitia atu ai i le fale o ona mātua. E lei umi ae faauo ane se tuaoi o lē e iai lana tama teine e tupulaga ma le tama a Tomoe. Ina ua taʻu atu e Tomoe faalogona lē aogā sa ia te ia, ona faasino ane lea e lona tuaoi se fuaiupu mai se tusi. E faapea lona faitauina: “E le mafai foi i le mata ona fai ane i le lima, ‘E leai sou aoga ia te au’; e le mafai foi i le ulu ona fai ifo i vae, ‘Lua te le aoga ia te au.’ A e peitai, e sili lava ona aoga o itutino e taʻua e vaivai.” * Na maligi loimata o Tomoe ona ua ia iloa e faapea, e aogā uma tagata taitoatasi i le lalolagi ma e moomia.

Na fautua atu le tuaoi ina ia ona tilofaia le tusi o loo iai na upu. Na lue atu le ulu o Tomoe e ioe i ai, e ui lava e oo ane i le taimi lea na te lei mafaia lava ona faia se mea, e oo lava i lona faia o se folafolaga faigofie. Na fesoasoani foi le tuaoi ia te ia i le faia o faatau, ma sa ia fesoasoani i le sauniunia o meaʻai faatasi ma Tomoe i aso uma. E tasi le masina mulimuli ane ae amata loa ona ala usu Tomoe i taeao uma e fai le tagamea, faamamā le fale, fai faatauga, ma sauniuni meaʻai, e pei ona faia e so o se avā tausi aiga. Sa tatau ona ia manumalo mai le tele o faafitauli, ae sa ia faapea mai: “Sa ou mautinoa afai ou te mulimuli tonu lava i upu atamai lea na ou mauaina, o le a faapea lava ona ou toe sologa lelei.”

E ala i le faatatauina o le atamai na ia mauaina, na manumalo ai Tomoe i vaitaimi faigata o lona loto mafatia. I le taimi nei o loo galue faataimi atoa Tomoe i le fesoasoani atu i isi ina ia faatatauina upu lava ia na mafai ai ona ia faafetaiaia ona faafitauli. O na upu atamai o loo maua i se tusi mai anamuā lea o loo iai se feau mo tagata uma i aso nei.

 Po o E Feagai ea ma Faafitauli Tau le Aiga?

I le lalolagi aoao o loo faatuputupulaia ai pea le aofai o talagā faaipoipoga. O loo faateleina faafitauli tau le aiga e oo lava i atunuu i Asia, lea sa avea ma masani le mitamita ai o ona tagata ona o le faatāuaina o sootaga vavalalata i o latou aiga. O fea e mafai ona tatou maua ai taiala tau faaipoipoga e aogā?

Seʻi manatu i le mea na tupu ia Shugo ma Mihoko, o se ulugalii sa anoanoai faafitauli i le la faaipoipoga. E so o se tamai mea faatauvaa e finau ai lava. Sa maitaita tele Shugo, ae sa osofai atu foi Mihoko i so o se taimi lava na te iloa ua sese ai Shugo. Na iu ina mafaufau faapea Mihoko, ‘E matuā lē mafai lava ona ma ioe faatasi i se mea.’

I se tasi aso na asiasi atu ai se fafine ia Mihoko ma faitau atu ia te ia upu nei mai se tusi: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” * E ui ina sa lē fiafia i lotu, ae na malie Mihoko e suesueina le tusi o loo iai na upu. O le mea sa ia naunau i ai o le faaleleia lea o le olaga o lona aiga. O lea ina ua valaaulia o ia e auai i se sauniga na talanoaina ai se tusi e faamatuaina faapea Faia o Lou Olaga Faaleaiga ia Fiafia, na vave lava ona taliaina e Mihoko—ma lana tane—lenei valaaulia. *

I le sauniga, na matauina ai e Shugo faapea o tagata o loo auai sa latou faatatauina moni mea na latou aʻoaʻoina ma e foliga mai o loo fiafia i latou. Na faia lana faaiuga o le a ia tilofaia le tusi lea na suesueina e lana avā. E lei umi ae faateia o ia i se tasi o faaupuga: “O le ua faatoatoa, e tele lona mafaufau; a o le ua itagofie, e faaeaina i luga e ia le valea.” * E ui ina sa alu se taimi umi o ia taumafai e faatatauina lenei mataupu silisili i lona olaga, ae o suiga mālie ia te ia na aliali manino atu i ē latou te iloa o ia, e aofia ai ma lana avā.

O le vaaia o suiga i lana tane, na amata ai loa foi e Mihoko ona faatatauina mea sa ia aʻoaʻoina. O se tasi o mataupu silisili e mautinoa sa sili ona aogā o lenei: “Aua tou te faamasino atu, ina neʻi faamasinoina outou. Auā o le faamasinoga tou te faamasinoina atu ai, e faamasinoina ai outou.” * O lea na filifili ai Mihoko ma lana tane o le a la talanoa i o la manatu lelei aogā ma le auala e faaleleia ai i laua na i lo le sailiili masei o le tasi i le isi. O le ā na iu i ai? Ua toe taʻua e Mihoko: “Ua faapea ona faafiafiaina moni ai lava aʻu. O loo ma faia lava faapea i ʻaiga i afiafi taitasi. E oo foi i la ma tama tama e tolu tausaga le matua e auai ai foi i talanoaga. Ua avea moni ma mea e faafouina ai i matou!”

 Ina ua faatatauina e lenei aiga fautuaga aogā na latou maua, na mafai ai ona latou manumalo mai faafitauli na oia ai la latou mafutaga faaleaiga lea na toetoe a faataapeapeina ai. Pe e lei sili atu ea ona tāua lena ia i latou i lo se taga e tumu i penina?

Pe E te Manao ia Taulau Manuia i Lou Olaga?

Mo le toatele i aso nei, o le sailia o oa o le sini lena i le olaga. E ui i lea, na faapea mai se tamaloa faipisinisi mauoloa i le Iunaite Setete o lē na foai atu le faitau selau miliona tala mo ē matitiva: “Ua faatosina e tupe nisi tagata, ae e leai se tasi e mafai ona ia seeina ni pea seevae se lua i le taimi e tasi.” E toaitiiti i latou ua taliaina lenei mea moni ae sili atu ai ona toaitiiti i latou ua latou taofia le sailia o oa.

Na ola aʻe i se olaga mativa Hitoshi, o lea sa matuā faanaunau ai lava ia mauoa. Ina ua vaai i le auala faatogafiti o loo faia ai e tagata e ana tupe faaune a latou tagata aitalafu, na faia ai loa lana faaiuga: “O le tagata lava o loo maua ma umia le tele o tupe o ia lena e mālō.” Na matuā talitonu lava Hitoshi i le malosi o le tupe lea na ia manatu ai e oo lava i ola o tagata e mafai ona faatau ai. Ina ia sailia la le oa, na galue malosi ai i lana pisinisi palama ma galue mo le tausaga atoa, e aunoa ma le aveina o se aso mālōlō. E ui i ana taumafaiga fitā, e lei umi ae iloa e Hitoshi e faapea, e lē mafai ona sili atu lona malosi o ia o se tagata konekarate, i lo lē ana konekarate tetele ia e tuuina atu ai ia te ia galuega. Sa fesagai o ia i aso uma ma le lē fiafia ma le fefe neʻi gau le pisinisi.

Ona alu atu lea o se tamaloa i le fale o Hitoshi ma fesili atu ia te ia pe na ia iloa na maliu Iesu Keriso mo ia. Ona sa lagona e Hitoshi e faapea e leai se tasi o le a maliu mo se tagata e pei o ia, na naunau fia iloa ai o ia ma malie e faia atili nisi talanoaga. I le vaiaso na sosoo ai, na ia auai atu ai i se lauga sa faia ma na faateia ai i le faalogo atu i le fautuaga ina ia ‘faafaigofie le vaai.’ Na faamatala e le failauga faapea o mata e “faigofie” e tofā mamao ma e taulai atu i mea faaleagaga; i le isi itu, o mata e “leaga,” pe e “matauʻa,” e taulai atu lava na o tuinanauga o le tino o loo manaomia i lena taimi ma o se vaaiga e pumoomoo. O le fautuaga, “O le mea ua i ai lo outou oa, e i ai atoa foi ma o outou loto,” na matuā aafia ai lava o ia. * E iai se mea e sili atu ona tāua na i lo le mauaina o oa! E lei faalogo muamua lava o ia i se mea faapea.

Ona o le faafiafiaina, na amata ai ona ia faatatauina mea na ia aʻoaʻoina. Na i lo le soona pupū mo le sailia o tupe, na amata ona ia faamuamua oa faaleagaga i lona olaga. Na faaalu foi lona taimi mo le tausia o le lelei faaleagaga o lona aiga. O le mea masani lava la, ua itiiti  le taimi mo le galuega, peitai na manuia lana galuega. Aisea?

O lona uiga fiamalosi ua suia i le agamalu ma le toafimalie a o ia tali atu i fautuaga na tuuina atu. Na faagaeetia faapitoa o ia i le timaiga: “Ia tuu ese ai e outou lava o nei mea uma, o le ita, o le lotoa, o le loto leaga, o le upu leaga, ma le upu matagā ai o outou gutu. Aua le fetaupelopeloai, ina ua toeseina e outou le tagata tuai atoa ma ana amio, a ua outou oofu i le tagata fou, o le ua faafouina i le poto, e faatatau ia foliga i le na faia o ia.” * O le mulimuli atu i lenei fautuaga e lei faamauoloaina ai o ia, ae o lona “tagata fou” na faafiafiaina ai tagata sa latou manaomia lana tautua faalegaluega ma na latou talitonuina ma faatuatuaina o ia. Ioe, o upu atamai na ia mauaina na fesoasoani ia te ia ina ia taulau manuia ai i lona olaga. Ia te ia, sa matuā sili atu ona aogā moni na i lo se taga e tumu i penina po o tupe.

Pe o le a E Tatalaina ea le Taga?

Pe e mafai ona e mataulia le taga e tumu i le atamai lea na faamautinoaina le tāua tele ia i latou na taʻua i faataitaiga o loo i luga? O le atamai lea o loo maua i le Tusi Paia, le tusi ua sili ona salalau atu ma faafaigofie ona maua i le lalolagi. Atonu ua iai sau kopi ia pe faigofie foi lava ona maua sau tusi. Ae peitai, e pei lava ona itiiti se aogā i le tagata pe afai e ia te ia se taga e tumu i penina tautele ae lē faaaogaina, e faapena foi le itiiti o le aogā o le tau ina iai o se Tusi Paia i se tasi. Aisea e lē tatala ai loa le taga, i se uiga faafaatusa, ma faatatauina fautuaga poto ma timaiga fetaui mai le Tusi Paia ma vaai i le auala e mafai ona fesoasoani ai ia te oe ina ia taulau manuia i le feagai ai ma faafitauli o le olaga.

Afai ae tuuina atu ia te oe se taga e tumu i penina, pe e lē faagaeetia ea oe ma taumafai e sailia lē na foaiina atu ina ia faafetai atu ia te ia? I le tulaga la o le Tusi Paia, pe e te iloa Lē na Foaiina maia?

O loo faailoa mai e le Tusi Paia le Puna o le atamai o loo iai i totonu i le faapea mai: “O Tusi Paia uma lava e mai le Agaga o le Atua ia, e aoga foi ia.” (2 Timoteo 3:16) O loo taʻu mai foi ia i tatou e faapea “o loo ola le afioga a le Atua, o loo matuā galue foi.” (Eperu 4:12) O le mafuaaga lena ua fetaui ai ma aogā fautuaga poto o loo maua i le Tusi Paia mo i tatou i aso nei. O le a fiafia tele Molimau a Ieova e fesoasoani ia te oe e aʻoaʻoina e faatatau ia Ieova le Atua o Lē Foai ma le matamau, ina ia e maua ai aogā mai le “taga e tumu i le atamai” o loo maua i le Tusi Paia—le tusi o le atamai ma le feau mo tagata i aso nei.

[Faaopoopoga i lalo]

[Pusa/Ata i le itulau 4]

Upu Atamai mo le Tausisia o le Paleni Tau i Faalogona

“Ioa e, afai e te mataulia le amio leaga, le Alii e, o ai se na te mafaia ona tulai? A o ia te oe le faamagaloina o sala, ina ia matautia oe.”—Salamo 130:3, 4.

“O le loto fiafia e tupu ai mata fiafia; a o le loto faanoanoa e momomo ai le agaga.”—Faataoto 15:13.

“Aua e te amiotonu naua, aua foi e te faatele naua lou poto; se a le mea e oti ai oe ia te oe?”—Failauga 7:16.

“E sili le manuia o le na te foai atu, i lo le na te talia mai.”—Galuega 20:35.

“A outou ita, aua le agasala ai; aua neʻi goto le la o ita pea outou.”—Efeso 4:26.

[Pusa/Ata i le itulau 5]

Upu Atamai mo se Olaga Faaleaiga Fiafia

“E faaleaogaina mafaufauga pe a leai se filifiliga; a e faatumauina i le toatele o faipule.”—Faataoto 15:22.

“O le loto o le ua mafaufau na te maua le poto; o taliga foi o le ua poto, e saili ia i le poto.”—Faataoto 18:15.

“O le upu ua fai faatatauina, o moli auro ia i ato ario togitogi faamamanuina.”—Faataoto 25:11.

“Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:13, 14.

“O lenei, oʻu uso pele e, ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.”—Iakopo 1:19.

[Pusa i le itulau 6]

Upu Atamai mo le Taulau Manuia i le Olaga

“O fua faatāutau faaaimago e inosia ia e Ieova; a o le maa e fua aʻi e atoatoa, o lona lea fiafia.”—Faataoto 11:1.

“E muamua le faamaualuga i le malaia; e muamua foi le loto faasiasia i le paū.”—Faataoto 16:18.

“O le aai ua sofaia, ua leai se pa, o le tagata lea na te le mataofia lona loto.”—Faataoto 25:28.

“Aua le faataalise ona ita o lou loto; auā e tumau le ita i loto o e valelea.”—Failauga 7:9.

“Ina lafo ia lau mea e ʻai i luga o le vai; auā a mavae aso e tele e te toe maua.”—Failauga 11:1.

“Aua neʻi alu atu se upu leaga ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.”—Efeso 4:29.

[Ata i le itulau 7]

O le suesueina o le Tusi Paia o le laasaga muamua lea e agaʻi atu ai i le mauaina o aogā mai le “taga e tumu i le atamai”