Lipoti a Ē Faalauiloa le Malo

Talaʻiga ‘i Aso e Taugalemu ai ma Aso e Lē Taugalemu Ai’

INA ua pa le taua i le atunuu o Bosnia ma Herzegovina, e faitauafe i latou na oo i ai mafatiaga e sili ona faigata. I lena taimi o faigata, na faia ai e Molimau a Ieova taumafaiga uma ina ia tuuina atu faalaeiauga ma se faamoemoe i tagata. O ni faamatalaga nei na siiina mai se tusi na tusia e se Molimau na auauna mo se vaitaimi i Sarajevo.

“Ua faigata tele le olaga iinei, ae o loo matuā tali lelei mai tagata i upu moni o le Tusi Paia. Ua avea Molimau o i lenei atunuu ma faataitaiga matilatila o le tutumau. I le tulaga faaletino, e utiuti mea latou te maua, ae e lelei tele lo latou agaga faaalia. E toeitiiti lava o talavou uma i totonu o le faapotopotoga o loo iai i le faiva faataimi atoa. Ua faalaeiauina tagata talaʻi fou ona o lenei maelega, ma e lē o se mea fou mo i latou le tuutoina atu o le 60 itula pe sili atu foi i le faiva mai lava i lo latou masina muamua i le auaunaga.

“E ese mai le talaʻiga mai le fale i le fale, ua matou faataitaia foi isi vala eseese ina ia maua ai tagata. Mo se faataitaiga, ua matou maua ni iuga lelei i le tufatufaina o lomiga faale-Tusi Paia i le tele o nofoaga o fanuatanu i le aai.

“Ua tuuina atu foi se molimau i falemai. I le Matagaluega e Suesueina Faamaʻi o le Fatu (Cardiology Department) i se falemai i Sarajevo, na taliaina ai e le fomaʻi sili le Ala Mai! o Tesema 8, 1996, lea o loo iai le matua i le faavaa, ‘Le Pe Faafuasei o le Fatu—O le ā se Mea e Mafai Ona Fai?’ Na ia talosaga mai mo nisi kopi faaopoopo ina ia mafai ona ia tufaina atu i isi fomaʻi. Ona avatu foi lea o le faatagaga i Molimau e asiasi i gasegase uma o loo i lana vaega. O lea, i le ova laitiiti atu ma le itula, e sili atu ma le 100 mekasini na tufatufaina mai lea moega i lea moega. O le toatele o gasegase na faapea mai o le taimi muamua lea ua asiasi atu ai nisi ia i latou i le falemai ina ia ofoina atu faalaeiauga ma se faamoemoe.

“I se tasi taimi na asiasi atu ai i le Falemai o Tamaiti ma ni mekasini o iai mataupu e fetaui mo tamaiti. Na taliaina foi e le fomaʻi sili nisi o tusi o Laʻu Tusi o Tala o le Tusi Paia e tuu i le potu faitau tusi. I le taimi nei o tinā o loo asiasi atu i a latou fanau latou te faitauina atu tala faale-Tusi Paia ia i latou i aso uma. Ua faia foi ni fuafuaga e asiasi atu i lenei tamaitai fomaʻi i lona fale.

“E iai i Sarajevo le faitauafe o fitafita o le NATO [North Atlantic Treaty Organization] mai atunuu eseese. Ua oo atu foi se molimau maeʻaeʻa ia i latou na. O nisi o taimi matou te ō atu ai mai lea taavaletau i le isi taavaletau e ala i le faaaogaina o le tamai tusi Good News for All Nations faatasi ai ma mekasini o Le Olomatamata ma le Ala Mai! i gagana eseese. E silia i le 200 mekasini na tufatufaina i nofoaga o vaegaau a Italia. O le mea e faateia ai, e toatele fitafita Italia na fai mai latou te lei talanoa muamua lava ma ni Molimau a Ieova. Ae o lea ua matou feiloai ma i latou i Sarajevo.

“I se tasi aso na paka ai se taavaletau i autafa o le auala. Na ou tuʻituʻi atu i le taavale i loʻu faamalu, ma oso mai ai i fafo se fitafita. Na ou ofoina ia te ia Le Olomatamata o loo iai le matua i le faavaa, ‘Avefeau o le Filemu—O Ai i Latou?’ Na tilotilo mai le fitafita ia te au ma fesili mai, ‘E lē o oe o se Molimau a Ieova, e saʻo?’ Ina ua ia iloa o aʻu o se Molimau, ona ia fai mai lea, ‘Ua matuā ou ofo lava; o lea foi tou te iinei! E iai ea se vaipanoa o lenei lalolagi e lē o iai ni Molimau?’”

Na apoapoai mai le aposetolo o Paulo: “Ia e talaʻi atu le upu, ia e faamalosi i ona aso e taugalemu ai, ma ona aso e le taugalemu ai.” (2 Timoteo 4:2) E pei lava o o latou uso talitonu i le lalolagi aoao, o loo faapena foi ona faia e Molimau a Ieova i Sarajevo, e oo lava i le ō atu mai lea moega i lea moega ma mai lea taavaletau i lea taavaletau!