Tapuaiga ia Paala le Taua ia Maua Loto o Tagata Isaraelu

E toetoe lava atoa le afe tausaga, o faia pea le taua i loto o tagata o le nuu o Isaraelu. I le isi itu, o le mataʻu i talitonuga faanuupo ma tu faaletapuaiga o faiga faaleituaiga sa faasagatau atu i le faatuatua ma le faamaoni. O lenei tauiviga o le ola ma le oti na feteenai ai le tapuaiga a Paala ma le tapuaiga a Ieova.

PE O LE A pipiimau faamaoni atu ea le nuu o Isaraelu i le Atua moni, o lē na aumaia i latou mai Aikupito? (Esoto 20:2, 3) Pe faamata o le a latou taaʻina atu ia Paala, le atua pele o Kanana, o lē na folafola ane o le a ia faafuateleina le laueleele?

O lenei taua faaleagaga, na tauina i le faitauafe o tausaga ua mavae, e aogā ia i tatou. Aisea? Na tusi mai le aposetolo o Paulo e faapea: “[O] na mea . . . ua tusia foi e fai ma apoapoaiga mo i tatou o e ua aulia mai ai tausaga e gata ai.” (1 Korinito 10:11) O le lapataiga autū o lenei taua iloga i le talafaasolopito o le a sili atu ona uigā pe afai tatou te malamalama po o ai Paala ae o ā mea e aofia ai i le tapuaiga ia Paala.

O Ai Paala?

Na fesootai atu tagata Isaraelu ia Paala ina ua latou taunuu i Kanana, i le pe ā o le tausaga e 1473 T.L.M. Na latou iloaina ai e faapea na tapuaia e tagata Kanana le anoanoai o atua o ē na leai se eseesega ma atua o Aikupito, e ui sa eseese o latou igoa ma ni uiga e iloga ai. Peitai, i le Tusi Paia ua faamatilatila mai ai Paala o le atua autū o tagata Kanana, ma na faamautinoa i mea na maua i suesuega i le eleele lona tulaga maoae na iai. (Faamasino 2:11) E ui lava sa lei avea Paala ma atua e sili i o latou atua sa aloaia, ae o ia o le atua na faatāua e le toatele o tagata Kanana. Na latou talitonu e iai lona mana e pulea ai le timu, o le matagi, ma ao ma e na o ia lava e mafai ona laveaiina tagata—e faapena foi i a latou lafumanu ma faatoaga—mai le lē toe fua po o le mamate foi. Pe a aunoa ma le puipuiga a Paala, e  mautinoa o le a aumaia e Mot, o se atua taui ma sui o tagata Kanana ni mala i luga o i latou.

Na pulea le tapuaiga a Paala i amioga faaleituaiga. E oo lava i mea a le lotu sa fesootai atu ia Paala, e pei o poutu paia, ma pou paia, na iai o latou faauigaga faaleituaiga. E foliga mai, o poutu paia—o ni papa po o ni maa ua vaneina e faafoliga i se totoga fanau tama o le tane—le totoga sa (tulou) o le tane mo faiga faaleituaiga e fai ma sui o Paala. O le isi, o pou paia, e faia i laupapa po o ni laau e faafoliga o le totoga fanautama o le fafine, e fai ma sui o Asaira, le avā a Paala.—1 Tupu 18:19.

O faiga faatalitane i le malumalu ma taulaga e fai i tamaiti o nisi na o vala taʻutaʻua o le tapuaiga ia Paala. (1 Tupu 14:23, 24; 2 Nofoaiga a Tupu 28:2, 3) Ua faapea mai le tusi The Bible and Archaeology: “I malumalu o tagata Kanana sa iai tane ma fafine mo faiga faatalitane (tane ma fafine ‘paia’) ma isi lava ituaiga uma o amioga lē mamā faaleituaiga na faia ai. Na talitonu [tagata Kanana] faapea atonu o nei gaoioiga e māfua ai ona fuatele faatoaga ma faateleina lafumanu.” O lena manatu sa avea ma faamolemolega a le lotu e ui lava o na amioga lē mamā e mautinoa sa talafeagai ma tuinanauga faaletino o tagata tapuai. O lea la, sa faapefea ona ooleina e Paala loto o tagata Isaraelu?

Aisea na Matuā Faatosina Ai?

Atonu o le toatele o tagata Isaraelu sa sili ia i latou le faia o se tapuaiga sa itiiti ni mea na manaomia mai ia i latou. I le tapuai atu ia Paala na saoloto mai ai i latou i le tausia o le Tulafono, e pei o le Sapati ma le tele o faasasaaga ina ia tausia amioga mamā. (Levitiko 18:2-30; Teuteronome 5:1-3) Atonu o le tamaoaiga faaletino o tagata Kanana na faatalitonu ai isi e faapea sa manaomia ona faafiafia Paala.

O malumalu o tagata Kanana, sa lauiloa o nofoaga maualuluga ma sa faatutuina i totonu o ni togalaau i tumutumu o mauga, atonu sa mauaina ai se vaaiga faatosina sa taatia mai tua, i tu masani faaletapuaiga ina ia fuatele le laueleele na faia ai iina. E lei umi lava ae fiu tagata Isaraelu e auai atu i nofoaga paia o tagata Kanana; o lea na oo ai lava ina fausia ni o latou lava malumalu. “Na latou faia mo i latou o mea maualuluga, ma tupua, ma tupua o Asaira, i luga o mauga maualuluga uma, ma lalo o laau tauluuluola uma.”—1 Tupu 14:23; Hosea 4:13.

Ae o le mea muamua lava ma le autū, o le tapuaiga ia Paala sa talafeagai ma tuinanauga o le tino. (Kalatia 5:19-21) Sa sili atu tuinanauga faaletino na i lo le faanaunau ina ia fuatele faatoaga ma faateleina lafumanu. Na faasilisilia faiga faaleituaiga. E faamaonia lenei mea e ala i le tele o faatagata na eliina mai le eleele, ia sa matuā faamatilatila mai ai vaega o le tino mo faiga faaleituaiga, e faaāta ai faagaeega faaleituaiga. O faigaai, siva, ma musika sa faagaeeina ai faalogona mo amioga matagā.

E mafai ona tatou vaai faalemafaufau i na ituaiga o vaaiga i le amataga o le tau e afu ai mea. I se vaaiga moni e faateia ai, le sisiva o tagata tapuai ae ua matuā gugula i faigaai ma ua faagaeeina e le uaina. O a latou siva sa fuafuaina e fafagu ai Paala mai lona lē toe gaoioi i le taumafanafana ina ia mafai ai ona faamanuiaina le laueleele e ala i se timu. Ua sisiva faataamilomilo i poutu paia ma pou paia. O gaoioiga, ae maise lava a i latou o talitane o le malumalu, e matuā faagaeeina ai lava faalogona ma faiga faaleituaiga. E uunaia i latou e le aofia ma musika. Ma e foliga mai, pe a maeʻa le siva, ona gasolosolo atu ai lea o le au sisiva i potu moe o le fale o Paala mo faiga lē mamā faaleituaiga.—Numera 25:1, 2; faatusatusa i le Esoto 32:6, 17-19; Amosa 2:8.

Na Latou Savavali i le Tino Mai o Mea, ae Lē o le Faatuatua

A o tosina atu le toatele i ia faiga faaleituaiga o le tapuaiga, na taaʻina foi e le faalogona mataʻu tagata Isaraelu i le tapuaiga ia Paala. A o leiloa atu le faatuatua o tagata Isaraelu ia Ieova, na avea ai le matataʻu i ē maliliu, le popole i le lumanai, ma le tosina atu i faiga faalilolilo, ma pogai na taitaiina atu ai i latou e faia faiga faataulaitu, lea na iu ai ina aafia i faiga sa pito i sili ona matagā. Ua faamatala mai e le International Standard Bible Encyclopedia le auala na faaaloalogia ai e tagata Kanana le agaga e alu ese mai o se vaega o le tapuaiga i tuaa: “O faigaai . . . sa faamanatuina i le tuugamau a se aiga po o fanuatanu faatasi ai ma tu masani faaletapuaiga o le onanā ma faiga faaleituaiga (atonu e aofia ai faiga faamataifale) ia na manatu faapea o loo auai mai i ai ma le tagata ua maliu.” I le faia o se vaega  i ia faiga faatemoni matagā na sili atu ai ona matuā mamao ese tagata Isaraelu mai lo latou Atua, o Ieova.—Teuteronome 18:9-12.

O tupua—ma tu masani faaletapuaiga na aofia ai—na tosina ai foi na tagata Isaraelu o ē na sili atu ia i latou le savavali i le tino mai o mea na i lo le faatuatua. (2 Korinito 5:7) E ui lava na vaai i vavega ofoofogia na faia i aao e lē vaaia o Ieova, ae sa toatele lava tagata Isaraelu na tuua Aikupito sa mananao i se mea e vaaia e faamanatu mai ai o ia. (Esoto 32:1-4) O nisi o ē na tupuga mai ia i latou sa faapena foi ona moomoo e tapuai i se mea e mafai ona vaaia, e pei o tupua a Paala.—1 Tupu 12:25-30.

O Ai na Manumalo?

Na faitau senituri o faia le taua i loto o tagata Isaraelu, mai lava i le taimi na latou taunuu ai i fanua laugatasi o Moapi a o lē o toe umi ae ulufale atu i le Nuu Folafolaina seʻi oo atu i le taimi na avatu faamalosi ai i Papelonia. Na foliga mai sa femoumouai lo latou tulaga maualuga sa iai. Na iai taimi, na tumau ai le toatele o tagata Isaraelu i le faamaoni ia Ieova, ae sa iai foi taimi na toe liliu atu ai ia Paala. O le mafuaaga autū mo lenei mea o le auaumea lea ma tagata faapaupau na siomia ai i latou.

Ina ua mavae le faatoilaloina o la latou vaegaau, sa faasagatau ane pea tagata Kanana i isi auala sa iloagata. Na nonofo latalata ane i latou i tagata Isaraelu ma faamalosia ē na faatoilaloina i latou ina ia fai le atua o le laueleele ma o latou atua. Na teena e ni faamasino lototetele e pei o Kitiona ma Samuelu lenei togafiti. Na timai e Samuelu tagata e faapea: “Ina tuu ese ia o atua ese . . . ma sauniuni atu o outou loto ia Ieova, na o ia tou te auauna i ai.” Na iai le taimi na amanaia ai e tagata Isaraelu le timaiga a Samuelu, ma na latou “tuu ese ai lea . . . o Paala ma Asaira, ua na o Ieova ua latou auauna i ai.”—1 Samuelu 7:3, 4; Faamasino 6:25-27.

Ina ua mavae nofoaiga a Saulo ma Tavita, ona amata lea ona faia e Solomona i tausaga mulimuli ane ai taulaga i atua ese. (1 Tupu 11:4-8) Na faia foi faapea e isi tupu o Isaraelu ma Iuta ma tuutoina atu ia Paala. E ui i lea, o perofeta ma tupu faamaoni, e pei o Elia, Elisaia, ma Iosia, na taimua i le tau faasaga atu i tapuaiga faa-Paala. (2 Nofoaiga a Tupu 34:1-5) E lē gata i lena, i le faagasologa o lena vaitaimi o le talafaasolopito o tagata Isaraelu, na iai tagata taitoatasi o ē na tumau faamaoni pea ia Ieova. E oo lava i le taimi o Aapo ma Iesepela, o le taimi lea na matuā olaola ai le tapuaiga ia Paala, e toafituafe na mumusu e ‘tootutuli ia Paala.’—1 Tupu 19:18.

I le faaiuga, ina ua toe foi mai le tafeaga a sā Iutā mai Papelonia, sa lei toe taʻua ai lava le tapuaiga ia Paala. E pei o i latou na faasino atu i ai i le Esera 6:21, na ‘vavae mai i latou ai le leaga o tagata ese o le nuu, ae saili atu ai ia Ieova le Atua o Isaraelu.’

Lapataiga Mai le Tapuaiga ia Paala

E ui ua leva ona mou atu le tapuaiga ia Paala, ae ua iai se mea e tasi e talitutusa ai lena lotu a tagata Kanana ma le sosaiete i aso nei—o le faasilisilia lea o faiga faaleituaiga. O faatosinaga i faiga faaleituaiga e foliga mai o loo i le ea lea o loo tatou manavaina. (Efeso 2:2) Ua fautua mai Paulo: “O loo tatou tau faasaga i le malosi e lē vaaia o loo pulea lenei lalolagi pogisa, ma foafoaga agaga mai le nofoaga autū o mea leaga.”—Efeso 6:12, Phillips.

O lenei “malosi lē vaaia” o Satani ua faasilisilia ai faiga lē mamā faaleituaiga ina ia faapologaina ai tagata faaleagaga. (Ioane 8:34) I le sosaiete ua faaleagaina i ona po nei, ua faia ai faiga faaleituaiga e lē ona o se gaoioiga ina ia fuatele ai le laueleele, ae o se auala e faamalieina totino ai po o le faia foi o le mea e manao ai le tagata lava ia. Ae o le faasalalauina o nei manatu taufaasese e faia i se tulaga faatauanau. E ala i faafiafiaga, musika, ma faasalalauga faatosina, ua faamalieina ai manatu o tagata i feau faaleituaiga o loo momoli atu ai. E lē o saoloto mai ai auauna a le Atua mai nei faiga e faaleagaina ai. O le mea moni, o le toatele o i latou e faateaeseina mai le faapotopotoga Kerisiano, o tagata taitoatasi ia ua lolo atu i nei faiga. Seʻi vaganā lava le faaauau pea ona teena o nei manatu e uiga i amioga lē mamā ona faatoʻā faatumauina lea o le mamā o se Kerisiano.—Roma 12:9.

O Molimau talavou ua faapitoa ona aafiagofie i le lamatiaga talu ai o le tele o mea latou te ono tosina atu i ai ua faaalia mai i ni faatosinaga faaleituaiga. O le isi mea ua sili ona leaga, o le taumafai  lea e teena taaʻiga a isi talavou o loo uunaia i latou. (Faatusatusa i le Faataoto 1:10-15.) O le toatele ua tutupu ai faafitauli, mo se faaaoaoga, i faatasitasiga tetele. E pei lava o tapuaiga ia Paala i aso anamua, ua iai musika, o siva, ma faatosinaga faaleituaiga, ua faia aʻe ai se tuufaatasiga o mea ua matuā faaseseina ai le mafaufau.—2 Timoteo 2:22.

“E faapefea ea ona faamamāina e le taulealea o lona ala?” na fesili ai le faisalamo. “Ona ua tausi i ai e tusa ma [le afioga a Ieova],” na ia toe tali mai ai. (Salamo 119:9) E pei lava ona faatonuina e le Tulafono a le Atua tagata Isaraelu e alofia le auaumea ma tagata Kanana, o lea foi la ua lapataia mai ai e le Tusi Paia i tatou i lamatiaga o aumea lē atamamai. (1 Korinito 15:32, 33) E faaalia e se talavou Kerisiano lona taʻumatuaina pe a ia teena mea, atonu o ni faatosinaga e faagaee ai faalogona ae o lea na te iloa e faaleagaina ai tau amio. I le faapei o Elia faamaoni, e lē mafai ai ona tatou faatagaina manatu taatele ua fesouaina mai e faia faaiuga mo i tatou lava.—1 Tupu 18:21; faatusatusa i le Mataio 7:13, 14.

O se tasi o lapataiga e faatatau i le leiloa o le faatuatua, o “le agasala e faalavelavegofie ai i tatou.” (Eperu 12:1) E foliga mai e toatele tagata Isaraelu sa tumau pea ona talitonu ia Ieova, ae na latou vaai ia Paala o se atua na te puipuia a latou faatoaga ma foaiina mai o latou manaoga i aso fai soo. Atonu sa latou manatu ua matuā mamao tele le malumalu o Ieova i Ierusalema ma o le tausia o ana tulafono sa lē aogā. Sa lē mamafa naʻuā le tapuaiga ia Paala ma sa latalata ane foi—sa mafai ona ofoina atu a latou taulaga ia Paala i tumutumu o o latou fale. (Ieremia 32:29) Atonu, na latou tafetafea atu i le tapuaiga faa-Paala e ala i le tau lava o le faia ai o se vaega i nisi o tu masani po o le faia foi o ni taulaga ia Paala i le suafa o Ieova.

E faapefea ona ono leiloa lo tatou faatuatua ma tafetafea mālie ese atu mai le Atua soifua? (Eperu 3:12) E mafai ona faifai mālie le leiloa atu o lo tatou talisapaiaina sa iai muamua mo sauniga ma fonotaga. O se uiga faapena e atagia mai ai le leai o se mautinoa i sauniuniga a Ieova mo “mea e ʻai [faaleagaga] i ona itu aso.” (Mataio 24:45-47) A oo ina vaivai, tatou te ono faamaamulu ai i lo tatou ‘taofimauina o le upu o le ola’ pe oo lava foi ina tuputupu aʻe se loto ua vaeluaina, atonu i le lolo atu i sini matapeapea i mea faaletino po o amioga lē mamā.—Filipi 2:16; faatusatusa i le Salamo 119:113.

Taofi Mau i lo Tatou Faamaoni

E lē masalomia lenei mea, i aso nei ua faia ai se taua i le loto. Pe o le a tatou tumau pea ona faamaoni ia Ieova po o le a maileia i tatou e ola i se olaga lē mamā o lenei lalolagi? E faanoanoa e faapea atu, e pei lava ona taaʻina atu tagata Isaraelu i faiga matagā a tagata Kanana, ua faapena foi ona tosina atu nisi o tane ma fafine Kerisiano i aso nei i gaoioiga e masiasi ai.—Faatusatusa i le Faataoto 7:7, 21-23.

O lena toilalo faaleagaga e mafai ona alofia pe afai, i le pei o Mose, tatou te ‘faaauau ona tutumau e pei o sē iloa atu i lē e lē o vaaia.’ (Eperu 11:27) E moni, e tatau ona tatou “faamalolosi ona finau mo le faatuatua.” (Iuta 3) Peitai e ala i le tumau i le faamaoni i lo tatou Atua ma ana mataupu silisili, e mafai ai ona tatou tepa taulai atu i le taimi o le a aveesea ai e faavavau tapuaiga sese. E pei lava ona manumalo le tapuaiga ia Ieova i le tapuaiga ia Paala, e mafai foi ona tatou mautinoa ua lē o toe umi ae “tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

[Ata i le itulau 31]

O faatafunaga i Kasera o poutu paia na faaaogaina i tapuaiga ia Paala

[Ē Ana le Ata i le itulau 28]

Musée du Louvre, Paris