Le Ala e Tasi i le Ola e Faavavau
Le Ala e Tasi i le Ola e Faavavau
“O aʻu nei le ala, ma le upu moni, ma le ola.”—IOANE 14:6.
1, 2. O le ā na faatusatusa atu i ai e Iesu le ala i le ola e faavavau, ma o le ā le tāua o lana talafaatusa?
I LANA Lauga taʻutaʻua i luga o le Mauga, o loo faatusatusa atu ai e Iesu le ala i le ola e faavavau i se auala o loo ulu atu ai se tagata i se faitotoa. Seʻi mātau o loo faamamafa e Iesu faapea o lenei ala i le ola e lē o se ala faigofie, i lona faapea mai: “Ia outou ulu atu i le faitotoa va apiapi; auā e va tele le faitotoa, e lautele foi le ala e tau atu i le malaia, e toatele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola [e faavavau], e toaitiiti foi i latou o e maua.”—Mataio 7:13, 14.
2 Po o e maua mai le tāua o lenei talafaatusa? Pe lē o faaalia ai ea e tasi lava le auala, po o le ala, e taitaiina atu ai i le ola ma o le a manaomia ai lo tatou uaʻi atu ma le faaeteete ina ia alofia le paʻū ese mai lena ala i le ola? O le ā la, lenei ala e tasi i le ola e faavavau?
Le Vaega a Iesu Keriso
3, 4. (a) Ua faaalia faapefea e le Tusi Paia le vaega tāua a Iesu i lo tatou faaolataga? (e) O anafea na uluai faaalia mai ai e le Atua faapea e mafai e tagata ona maua le ola e faavavau?
3 E manino lava, e iai se vaega tāua a Iesu e fesootai atu i lena ala, e pei ona folafola mai e le aposetolo o Peteru: “E leai foi se tasi ua i ai le ola; e leai lava se isi igoa i lalo o le lagi [vaganā le suafa o Iesu] ua foaiina mai i tagata, e mafaia ona faaolaina ai o i tatou.” (Galuega 4:12) Na faapena foi ona faalauiloa mai e le aposetolo o Paulo: “O le ola faavavau, o le mea foaifuaina mai lea e le Atua, i lo tatou Alii o Keriso Iesu.” (Roma 6:23) O Iesu lava ia na faaalia maia faapea e na o le pau le ala e oo atu ai i le ola e faavavau, o le ui atu lea ia te ia, auā na ia folafola: “O aʻu nei le ala, ma le upu moni, ma le ola.”—Ioane 14:6.
4 E tāua tele la lo tatou taliaina o le vaega a Iesu lea ua mafai ai ona maua le ola e faavavau. O lea, seʻi o tatou iloiloina totoʻa lana vaega. Pe e te silafia, ina ua agasala Atamu, o anafea na faaalia mai ai e Ieova le Atua faapea e mafai e tagata ona maua le ola e faavavau? O le taimi tonu lava lea na lē taulau ai Atamu. Seʻi o tatou iloiloina nei la pe na faapefea ona muai valoia mai le sauniuniga o le avea o Iesu Keriso e fai ma Faaola o tagata.
Le Fanau Folafolaina
5. E mafai faapefea ona tatou mataulia le gata lea na olegiaina Eva?
5 Sa faailoa mai e Ieova le Atua i se gagana faafaatusa le Faaola folafolaina. Na ia faia lenei mea ina ua ia folafola atu le faasalaga i “le gata” o lē na tautala atu ia Eva ma faaosoosoina ai o ia e lē usitai i le Atua e ala i le ʻaina o le fua faasāina. (Kenese 3:1-5) O le mea moni, o lena gata e lē o se gata moni. O se foafoaga agaga malosi ua faailoa mai i le Tusi Paia faapea o “le gata tuai lea, ua igoa i le tiapolo, i le ma Satani.” (Faaaliga 12:9) Sa faaaogā e Satani lenei meaola faatauvaa e avea ma mea e tautala atu ai o ia ina ia olegia Eva. O lea, ina ua faasalaina Satani, na fetalai atu le Atua ia te ia: “Ou te faatupuina le feitagai ia te oulua ma le fafine, o lau fanau foi ma lana fanau; na te [le fanau a le fafine] tuʻimomomoina lou ulu, a o oe e te tuʻimomomoina lona mulivae.”—Kenese 3:15.
6, 7. (a) O ai le fafine lea e fanauina mai le “fanau”? (e) O ai le Fanau folafolaina, ma o le ā na te faataulauina?
6 O ai lenei “fafine” e ita pe ʻinoʻino i ai Satani? E pei lava ona faailoa mai “le gata tuai” i le Faaaliga mataupu e 12, ua faapena foi ona faailoa mai ai lenei fafine e ʻinoʻino i ai Satani. Seʻi mātau i le fuaiupu 1 ua taʻua ai lenei fafine faapea o loo “ofu i le la, o i lalo o ona vae le masina, o i lona ulu foi le palealii fetu e sefulu ma le lua.” O lenei fafine o loo faaātaina ai le faalapotopotoga faalelagi o agelu faamaoni a le Atua, ma o le “tama tane” lea ua ia fanauina mai o loo faaātaina ai le Malo o le Atua, lea e pule ai Iesu Keriso o le Tupu.—Faaaliga 12:1-5.
7 O ai la le “fanau” a le fafine, lea o loo taʻua i le Kenese 3:15, faapea o le a ia tuʻimomomoina “le ulu” o Satani, ma taia ai o ia i se ta e faaumatia ai? O ia lea na auina mai e le Atua mai le lagi ina ia fanau mai faavavega i se taupou, ioe, le tama o Iesu. (Mataio 1:18-23; Ioane 6:38) Ua faaalia mai i le mataupu e 12 o le tusi o Faaaliga faapea i le avea o ia ma Pule faalelagi ua toe faatuina mai le oti, o le a taitaia ai e lenei Fanau, o Iesu Keriso, le faatoilaloina o Satani, ma faavaeina ai loa, e pei ona taʻu mai e le Faaaliga 12:10, “le malo o lo tatou Atua, ma le pule a lona Keriso.”
8. (a) O le ā le mea fou na saunia e le Atua e fesootai atu i lana uluai fuafuaga? (e) O ai e faia aʻe ai le pulega fou a le Atua?
8 O lenei Malo i aao o Iesu Keriso o le mea fou lea na saunia e le Atua e fesootai atu i lana uluai fuafuaga mo tagata ina ia maua ai le ola e faavavau i luga o le lalolagi. Ina ua mavae le fouvalega a Satani, ona gaoioi loa lea o Ieova ina ia faaleaogaina uma āuga leaga o le amioleaga e ala i lenei pulega fou o le Malo. A o iai Iesu i le lalolagi sa ia faailoa mai ai e lē na o ia o le a iai i lenei pulega. (Luka 22:28-30) E iai isi o le a filifilia mai tagata, ma o le a aufaatasi atu i latou nei ia te ia i le lagi ina ia latou pule faatasi, o iina o le a latou faia aʻe ai se vaega lagolago o le fanau a le fafine. (Kalatia 3:16, 29) O le aofaiga o nei pule lagolago ia Iesu o loo taʻua i le Tusi Paia—ua aoaoina uma mai le fanau agasala a tagata i le lalolagi—e toʻa 144,000.—Faaaliga 14:1-3.
9. (a) Aisea na manaomia ai ona aliai mai Iesu i le lalolagi o se tagata? (e) Na faapefea ona faaleaogaina e Iesu galuega a le Tiapolo?
9 Peitai, a o lei amata le pulega a lena Malo, sa tāua ona aliai mai i le lalolagi le vaega autū o le fanau, o Iesu Keriso lea. Aisea? Auā ua tofiaina o ia e Ieova le Atua e avea ma Lē na te “faaumatia [pe, faaleaogaina] galuega a le tiapolo.” (1 Ioane 3:8) O galuega a Satani e aofia ai le faaosoosoina o Atamu ia agasala, ma oo mai ai le faasalaina i le agasala ma le oti i le fanau uma a Atamu. (Roma 5:12) Na faaleaogaina e Iesu nei galuega a le Tiapolo e ala i le foaiina atu o Lona soifua e fai ma togiola. O lea ua ia saunia ai se faavae mo le faasaolotoina o tagata mai le faasalaina i le agasala ma le oti ma tatala ai le ala i le ola e faavavau.—Mataio 20:28; Roma 3:24; Efeso 1:7.
Mea ua Faataulauina e le Togiola
10. Sa faapefea ona tutusa Iesu ma Atamu?
10 Talu ai na faaliliuina le ola o Iesu mai le lagi ma tuu atu i le manava o se fafine, o lea na fanau mai ai o ia o se tagata lelei atoatoa, ua lē pisia i le agasala mai ia Atamu. Sa ia te ia se avanoa e ola ai e faavavau i le lalolagi. Sa faapena foi Atamu, na foafoaina o ia o se tagata lelei atoatoa ma ni faamoemoega o le ola e faavavau i luga o le lalolagi. Sa mafaufau le aposetolo o Paulo i mea e tutusa ai nei tane e toalua, ina ua ia tusi: “Na faia Atamu le uluai tagata ma tagata ola; a o le Atamu mulimuli [Iesu Keriso], o le Agaga faaola o ia. E faaleeleele le uluai tagata, na fua mai i le eleele; a o le tagata mulimuli, o le Alii lea mai le lagi.”—1 Korinito 15:45, 47.
11. (a) O ā āuga na aumaia e Atamu ma Iesu i le fanau a tagata? (e) E tatau faapefea ona tatou manatu i le taulaga a Iesu?
11 O le tulaga tutusa o i laua nei—na o le pau ia o tane e toalua e atoatoa ona lelei sa iai i le lalolagi—ua faamaonia mai e le faalauiloaga a le Tusi Paia faapea o Iesu “na foaifuaina o ia e ia e fai ma togiola [“tutusa,” NW] mo tagata uma lava.” (1 Timoteo 2:6) O ai sa tutusa atu i ai Iesu? Ioe, ia Atamu a o iai pea o ia o se tagata lelei atoatoa! O le agasala a le Atamu muamua na iu ina faamalaiaina ai le fanau uma a tagata i le oti. O le taulaga a “le Atamu mulimuli” ua saunia ai le faavae mo le laveaiina mai le agasala ma le oti, ina ia mafai ona tatou ola e faavavau. Maeu le tautele o le taulaga a Iesu! Na taʻua e le aposetolo o Peteru: “E lei togiolaina outou i mea e pala, o le ario po o le auro.” Na i lo lea, na faamatala mai e Peteru: “A o le toto tāua o Keriso pei o lo le tamai mamoe e le ponā lava, e leai foi sona ila.”—1 Peteru 1:18, 19.
12. Ua faapefea ona faamatalaina e le Tusi Paia le aveesea o lo tatou faamalaiaina i le oti?
12 Ua matagofie ona faamatala mai e le Tusi Paia le auala o le a aveesea ai le faamalaiaina o le fanau a tagata i le oti, ina ua faapea mai: “Faapei ona faasalaina o tagata uma lava i le agasala e tasi [a Atamu], e faapea foi ona taʻuamiotonuina [e le ala atoa o le faamaoni o Iesu, seia oo atu i lona maliu] o tagata uma lava i le amiotonu e tasi, latou te ola ai. Auā faapei ona avea ma agasala o le toatele i le le anaana o le tagata e toatasi [o Atamu], e faapea foi ona avea ma amiotonu o le toatele i le anaana o le toatasi [o Iesu].”—Roma 5:18, 19.
Se Faamoemoega Pupula
13. Aisea ua lagona ai e le toatele o tagata le manatu lea o loo ia i latou e faatatau i le ola e faavavau?
13 O lenei sauniuniga a le Atua e tatau ona matuā faafiafiaina ai i tatou! Po ua lē faagaeetia ea oe ona ua saunia mai se Faaola? Ina ua fesiligia i se suesuega na faia e se nusipepa a se tasi o aai tele i Amerika le fesili, “Pe logoleleia ia te oe le faamoemoe o le ola e faavavau?” sa faateia i se aofaiga e 67.4 pasene na tali atu, “Leai.” Aisea na latou faapea atu ai e lē fia ola e faavavau? E foliga mai ona ua anoanoai faafitauli o loo fesagai ma le olaga i le lalolagi i le taimi nei. Na faapea mai se tasi tamaitai: “Ou te lē fiafia pe a ou mafaufau atu i ni oʻu foliga o le a iai pe a 200 oʻu tausaga.”
14. Aisea o le a avea ai le ola e faavavau o se fiafiaga atoatoa?
14 Peitai, e lē o talanoa le Tusi Paia e faatatau i le ola e faavavau i se lalolagi e pagatia ai tagata i faamaʻi, tino matua, ma isi mala. Leai, auā i le avea ma Pule o le Malo o le Atua, o le a aveesea ai e Iesu na faafitauli uma na faapogaia e Satani. E tusa ai ma le Tusi Paia, o le a “tuʻimomomoina ma faaumatia” e le Malo o le Atua faiga malo pule sauā uma o lenei lalolagi. (Tanielu 2:44) I lena taimi, i le tali atu i le tatalo na aʻoaʻo e Iesu i ona soo, o le a “faia ai i le lalolagi e pei ona faia i le lagi” le “finagalo” o le Atua. (Mataio 6:9, 10) I le lalolagi fou a le Atua, pe a maeʻa ona faamamā ese mai le lalolagi mea leaga uma, ona faatatau atoatoa ai loa lea o aogā o le togiola a Iesu. Ioe, o i latou uma e agavaa o le a faafoisia i ai le soifua maloloina e atoatoa ona lelei!
15, 16. O ā tulaga o le a iai i le lalolagi fou a le Atua?
15 Mo tagata o le a ola i le lalolagi fou a le Atua, o le a faatatau atu ia i latou le feau lenei a le Tusi Paia: “E toe ola lelei ai lona tino e sili i le tama itiiti, e toe foi o ia i ona po o lona taulealea.” (Iopu 33:25) O le a iai foi se faataunuuga o le isi folafolaga a le Tusi Paia: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.”—Isaia 35:5, 6.
16 Seʻi tau ina manatu ifo: E tusa lava po o le ā lo tatou matutua i tausaga, po ua taʻi 80, 800, pe sili atu foi, ae o le a tumau pea o tatou tino i le tauosoosoga o le malosi. O le a faapei ona folafola mai e le Tusi Paia: “E le fai mai foi se tasi ua mau ai, Ou te maʻi.” I lena taimi, o le a faataunuu ai foi le folafolaga lenei: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Isaia 33:24; Faaaliga 21:3, 4.
17. O ā ni mea tatou te ono faatalitalia o le a faataulauina e tagata i le lalolagi fou a le Atua?
17 I lena lalolagi fou, o le a mafai ai ona tatou faaaogaina o tatou faiʻai ofoofogia i le auala na fuafuaina ai e Lē na Foafoaina i tatou ina ua ia faia i se auala e lē gata mai mea e mafai ona aʻoaʻoina ai. Ioe, seʻi tau ina mafaufau i mea matagofie o le a mafai ona tatou faataulauina! E oo lava i tagata lē lelei atoatoa ua latou faia mai i le faaputuga o elemeni o i le lalolagi mea uma ua tatou vaaia i o tatou autafa—o telefoni feaveai, o mea faaleoteleleo, o uati, o uaealesi, o komepiuta, o vaalele, ioe, o mea uma e mafai ona e taʻu maia. E aunoa ma se tasi o na mea na faia mai i ni mea na latou aumai i se nofoaga mamao i le vateatea. Talu ai o loo tatou faatalia le ola e lē uma, o le a lē gata mai ai foi le avanoa e mafai ona tatou gaosia ai ni mea matagofie i le Parataiso faalelalolagi o fotuai mai!—Isaia 65:21-25.
18. Aisea o le a lē tāitai ai ona avea le olaga o se mea e fiu ai i le lalolagi fou a le Atua?
18 Ma o le a lē avea le olaga o se mea e fiu ai. E oo foi i le taimi nei, tatou te tulimataia le isi a tatou taumafataga, e ui lava atonu ua faafia sefulu afe o tatou aai. I le lelei atoatoa faaletagata, o le a sili atu ona tatou olioli i le matalasi o mea e fuaina mai e le Parataiso i le lalolagi. (Isaia 25:6) Ma o le a tatou maua le fiafiaga e faavavau i le tausia o le anoanoai o meaola i le lalolagi ma olioli i le matalasi o ona la goto, o mauga, o vaitafe, ma vanu. O le mea moni, o le a lē tāitai ona musuā i le olaga i totonu o le lalolagi fou a le Atua!—Salamo 145:16.
Ausia Mea o Loo Faafinagaloina e le Atua
19. Aisea e talafeagai ai ona talitonu faapea e iai mea manaomia mo le mauaina o le meaalofa a le Atua o le ola?
19 Pe e te faatalitalia ea lou mauaina o le meaalofa silisili a le Atua o le ola e faavavau i le Parataiso e aunoa ma sau taumafaiga e fai? Po ua lē talafeagai ea ona manaomia mai e le Atua se mea? E mautinoa le talafeagai. E lē faapea e na ona togi mai lava e le Atua le meaalofa ia i tatou. Ua ia faaavanoa mai ia i tatou, peitai e ao ona tatou aapa atu ina ia maua. Ioe, e aofia ai taumafaiga. Atonu e te fesiligia le fesili tonu lava lea na fesili atu ai se pule talavou mauoa ia Iesu: “Se a se mea lelei ou te faia ou te maua ai le ola faavavau?” Pe e te toe faaupu le fesili lea na fesili ai le leoleo o le falepuipui i Filipi i le aposetolo o Paulo: “Se a le mea e tatau ona ou faia ina ia faaolaina ai o aʻu?”—Mataio 19:16; Galuega 16:30.
20. O le ā se mea e matuā manaomia lava mo le ola e faavavau?
20 I le po a o lei maliu, na faaalia ai e Iesu se manaoga autū ina ua ia taʻua i lana tatalo i lona Tamā faalelagi: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Po ua lē o se manaoga talafeagai ea lo tatou aʻoaʻoina o le poto e uiga ia Ieova, o lē ua mafai ai ona maua le ola e faavavau, ma le poto e uiga i lē na maliu mo i tatou, o Iesu Keriso? Peitai, e iai ma isi mea e manaomia na i lo le tau ina aʻoaʻoina lea poto.
21. E faapefea ona tatou faaalia atu o loo tatou ausia mea o loo manaomia e faaalia ai le faatuatua?
21 Ua faapea mai foi le Tusi Paia: “O lē faatuatua i le Alo, ua ia te ia le ola faavavau.” Ona toe faaopoopo mai lea: “O lē lē faatuatua i le Alo e le iloa e ia le ola, a o le toasa o le Atua o loo tumau lava i ona luga.” (Ioane 3:36) E mafai ona e faaalia atu o loo e faatuatua i le Alo e ala i le faia o ni suiga i lou olaga ma ia aumai ina ia ogatasi ma le finagalo o le Atua. E ao ona e teena so o se ala sese atonu o loo e uia ma faia ni gaoioiga ina ia fai le mea e fiafia ai le finagalo o le Atua. E manaomia ona e faia le mea na poloaiina e le aposetolo o Peteru: “O lenei, ina salamo ia ma liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii.”—Galuega 3:19.
22. O ā gaoioiga e aofia i le mulimuli atu i tulagāaao o Iesu?
22 Tau ina ia tatou lē faagaloina, ua na o le faaalia o le faatuatua ia Iesu e mafai ai ona tatou maua le ola e faavavau. (Ioane 6:40; 14:6) Tatou te faaalia lo tatou faatuatua ia Iesu e ala i le ‘mulimulituʻi i ona tulagāaao.’ (1 Peteru 2:21) O le ā e aofia i le faia o lena mea? I lana tatalo atu i le Atua, na alaga ai Iesu: “Le Atua e, . . . ou te alu atu e faia lou finagalo.” (Eperu 10:7) E tāua tele ona faataitai atu ia Iesu e ala i le malie e faia le finagalo o le Atua ma tuuina atu lou ola ia Ieova. Mulimuli ane e manaomia ona e faailogaina lena tuuina atu e ala i le papatisoga i le vai; sa ofo atu foi e Iesu o ia lava e ala i le papatisoga. (Luka 3:21, 22) O le uia o na laasaga ua matuā talafeagai lava. Na taʻua e le aposetolo o Paulo faapea “ua pulunaunauina i [tatou] i le alofa o Keriso.” (2 Korinito 5:14, 15) I le ā le itu? Manatua foi, o le alofa na uunaia ai Iesu e foai mai lona soifua e sui aʻi i tatou. Po ua lē tatau la ona uunaia ai i tatou e talilelei atu e ala i le faaalia o le faatuatua ia te ia? Ioe, e tatau ona uunaia ai i tatou e mulimuli i lana faaaoaoga alofa o le foai mai o ia lava e fesoasoani i isi. O le soifuaga atoa o Keriso sa faaaogā mo le faia o le finagalo o le Atua; e ao foi ona tatou faia faapena, ia lē toe ola mo i tatou lava.
23. (a) O le ā e tatau ia i latou o ē maua le ola ona faaopoopo atu i ai? (e) O le ā e manaomia e i latou o loo i le faapotopotoga Kerisiano?
23 E lē muta ai iina le mataupu. Fai mai le Tusi Paia, ina ua papatisoina le toʻa 3,000 i le Penetekoso 33 T.A., sa “faaopoopoina” i latou. Faaopoopo i le ā? Ua faamatala mai e Luka: “Ua tumau pea i latou i le aʻoaʻoga a le au aposetolo, ma le mafuta faatasi.” (Galuega 2:41, 42) Ioe, sa latou feiloai faatasi mo le suesueina o le Tusi Paia ma le auaumea faatasi, ma faaopoopo atu ai, pe avea ai ma vaega o le faapotopotoga Kerisiano. Sa auai e lē aunoa uluai Kerisiano i sauniga mo le aʻoaʻoina faaleagaga. (Eperu 10:25) O loo faia foi e Molimau a Ieova lenei mea i aso nei, ma e latou te fia faalaeiauina oe ina ia e auai atu ma i latou i nei sauniga.
24. O le ā “le ola moni,” ma e faapefea ma o afea o le a iloatino ai?
24 E faitau miliona o loo mulimuli atu nei i le ala vaapiapi lea e taitaiina atu i le ola. E manaomia taumafaiga ina ia tumau ai pea i lenei ala vaapiapi! (Mataio 7:13, 14) Na faaalia e Paulo lenei mea i lana olega mai lona loto: “Ia e tau le taua lelei i la le faatuatua, tago atu ia i le ola faavavau, na valaauina ai foi oe.” E manaomia ona faamalolosi i lenei taua ina ia “fetagofi atu i le ola moni.” (1 Timoteo 6:12, 19) O lena ola e lē o le ola lea o loo iai i le taimi nei o tiga ma mafatiaga ma puapuaga ua aumaia ia i tatou e le agasala a Atamu. Na i lo lea, o le ola i le lalolagi fou a le Atua, lea ua toe o se aga ona iloatino pe a oo ina faatatauina le taulaga togiola a Keriso i ē uma e alolofa ia Ieova le Atua ma lona Alo, pe a maeʻa ona tafiesea lenei faiga o mea. Tau ina ia filifilia e i tatou uma le ola—“le ola moni”—le ola e faavavau i le lalolagi fou faamamaluina a le Atua.
E Faapefea Ona E Tali?
□ O ai le gata, le fafine, ma le fanau lea e taʻua i le Kenese 3:15?
□ Na faapefea ona tutusa atu Iesu ia Atamu, ma o le ā ua mafai ona maua ona o le togiola?
□ O le ā se mea e mafai ona e tulimataia o le a avea ai le lalolagi fou a le Atua o se matuā fiafiaga mo oe?
□ O ā manaoga e manaomia ona tatou faataunuu ina ia ola ai i le lalolagi fou a le Atua?
[Fesili mo le Suʻesuʻega]
[Ata i le itulau 10]
Mo ē iti ma ē matutua, ua na o Iesu lava le ala i le ola e lē uma
[Ata i le itulau 11]
I le taimi atofaina a le Atua, o le a toe foi ai ē matutua i le tauosoosoga o le malosi talavou