Pe E te Faaalia o Oe o Sē e Loto Faafetai?

I se fale misionare i Aferika i Sisifo, sa tausia aʻe ai se taifau mo le leoleoina sa faaigoa ia Teddy. Pe a togi atu e se tasi se fasipovi ia Teddy, e vave lava ona ia foloina, e aunoa ma se sogisogi, pe faamalūina. A o selasela i le susulu o le la, sa ia faatalitali ai mo le isi fasi meaʻai e togi ane i le mea o loo i ai. Pe afai e maeʻa ona ʻaiina le fasi povi, ona ia liliu loa lea ma alu ese.

Sa lē tāitai ona faaalia e Teddy sina loto faafetai mo mea na ia mauaina. Sa leai foi se tasi na faatalitalia o ia e faia faapea. Ua na o ia o se taifau.

E TUSA ai o le loto faafetai, e masani ona sili atu ona tatou faatalitalia mai tagata na i lo manu. Ae e masani ona tatou lē fiafia ai. O le toatele o tagata e latou te suʻeina vave mea latou te mafaia mai le olaga ma toe saili mo nisi mea. E lē o se itu e faateia ai. Ua valoia mai e le Tusi Paia e faapea o aso e gata ai, o le a leai se loto faafetai i tagata.—2 Timoteo 3:1, 2.

Peitai, e ese le uiga e iai i auauna a le Atua. E latou te utagiaina le fautuaga a le aposetolo o Paulo, o lē na lapataia uso talitonu: “Ia outou saga faafetai.”—Kolose 3:15.

Ua Faaalia e Ieova o Ia e Loto Faafetai

Ua faataatia e Ieova le Atua le faaaoaoga lelei atoatoa i le faaalia o le talisapaia. Seʻi iloiloina le auala e manatu ai o ia i ana auauna faamaoni. I lalo o le faagaeega, na tusi ai Paulo i Kerisiano Eperu: “E le amioletonu le Atua, na te le faagalogaloina la outou galuega ma le alofa ua outou faaali mai ai i lona suafa, auā na outou auauna i le au paia, i le o loo outou auauna i ai.”—Eperu 6:10.

E anoanoai faaaoaoga o le talisapaia e Ieova o ana auauna faamaoni. Na ia faamanuiaina Aperaamo e ala i le faatoateleina o lana fanau, ina ia latou “pei o fetu o le lagi, e pei o le oneone foi i le matafaga.” (Kenese 22:17) I le talisapaia o le faamaoni o Iopu i lalo o tofotofoga, sa lei na ona toe faafoisia e Ieova le tamaoaiga tele o Iopu ae na foaiina atu foi e “lua mea i mea uma.” (Iopu 42:10) O feutagaiga a Ieova  ma tagata i le faagasologa o meleniuma ua faamaonia ai le moni o lenei faamatalaga: “O fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 Nofoaiga a Tupu 16:9.

O le loto talisapaia o le Atua ma le faanaunauga e tauia i latou o ē saili e faia lona finagalo, o vala autū na o lona uiga totino. O le iloaina o lenei mea e faaautū i ai le faatuatua faa-Kerisiano. Na tusi Paulo: “A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu . . . o ia foi na te tauia mai o e matuā saili ia te ia.”—Eperu 11:6.

Pe ana faapea e faaalia e Ieova se uiga inainā ma faitio, semanū o le a faasalaina i tatou uma lava. Ua loa ona taʻua e le faisalamo lenei manatu e faapea: “Ioa e, afai e te mataulia le amio leaga, le Alii e, o ai se na te mafaia ona tulai?” (Salamo 130:3) E lē faaalia e Ieova se uiga lē talisapaia ma e lē faitio foi. Na te faapelepeleina i latou e auauna ia te ia. Na te faaalia o ia e loto faafetai.

Iesu—O se Tagata e Matuā Loto Talisapaia

I le faaātaina atoatoa o uiga o lona Tamā faalelagi, na faaalia ai e Iesu Keriso lava ia le loto faafetai mo mea na fai e isi i le faatuatua. Seʻi manatunatu i se mea na tupu i le malumalu i Ierusalema: “Ua tepa ae [Iesu], ua silafia o e mauoa, o lafo a latou taulaga i le mea e teu ai tupe. Ua silafia foi e ia le tasi fafine mativa ua oti lana tane, ua lafo i ai tupe iti e lua. Ona fetalai atu lea o ia, ‘E moni, ou te fai atu ia te outou, o mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma, ua latou lafo atu i taulaga nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.’”—Luka 21:1-4.

I se vaaiga i le tulaga tau tupe, sa itiiti le meaalofa, ae maise lava pe a faatusatusa atu i meaalofa a tagata mauoloa. O le toatele o i latou sa auai sa seāseā ona latou matauina o ia. Peitai, sa silafia mai e Iesu lena fafine ua oti lana tane. Na ia malamalama i lona tulaga. Na silasila mai Iesu ia te ia ma talisapaia o ia.

O se tasi o mea na tupu sa aofia ai se fafine mauoloa, o Maria. A o nofo Iesu i se taumafataga, na liligiina ai e le fafine se suauu manogi taugata i aao o Iesu ma luga o lona ao. Na faitioina e nisi lana gaoioiga, i le manatu e faapea sa ono mafai ona faatau atu le suauu ma faaaogā le tupe e fesoasoani atu ai i ē matitiva. Sa faapefea ona tali atu i ai Iesu? Na ia fetalai atu: “Tuupea ia ia te ia; se a le mea tou te faalavelave ai ia te ia? O le mea lelei ua faia e ia ia te au nei. E moni, ou te fai atu ia te outou, o nuu uma lava i le lalolagi e talaʻiina i ai lenei tala lelei, e taʻua ai foi lenei mea ua faia e ia, e faamanatu aʻi ia te ia.”—Mareko 14:3-6, 9; Ioane 12:3.

Sa lei faitioina ma le faanoanoa e Iesu faapea sa lē tatau ona faaaogaina lena suauu tautele mo se isi lava fuafuaga. Na ia talisapaia le faailoaga lelei o le alofa ma le faatuatua o Maria. Ua faamauina i le Tusi Paia le mea na tupu e fai ma faamanatuga o lana gaoioiga lelei. O nei tala ma isi foi tala ua faaalia ai o Iesu o se tagata e matuā loto talisapaia.

Pe afai o oe o se auauna a le Atua, e mafai ona e mautinoa e talisapaia loloto e Ieova le Atua ma Iesu Keriso au taumafaiga mo le faaauilumaina o le tapuaiga mamā. O lena iloa e taaʻina ai i tatou ia te i laua ma uunaia ai i tatou e faaaoao ia i laua e ala i le faamaonia atu tatou te loto faafetai.

Le Agaga Faitio o Satani

Seʻi o tatou iloiloina nei se faaaoaoga o se tasi o lē na te lē faaalia se loto faafetai—o Satani le Tiapolo. O le leai o se talisapaia o Satani na saosaolaumea i lona taulamua i se fouvalega matautia faasaga i le Atua.

I le fofoaina aʻe o lena uiga faitio i totonu ia te ia ona o le lē faamalieina, na amata ai  ona totoina e Satani i totonu o isi. Seʻi mafaufau i mea na tutupu i le faatoaga o Etena. Na foafoaina e Ieova le uluai tane ma le fafine, ma tuuina atu i laua i se faatoaga o le parataiso, ma na faatonuina i laua: “O laau uma o i le faatoaga e te ʻai ai.” Peitai sa na o le tasi lava le mea sa faasāina. Na fetalai atu le Atua: “O le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.”—Kenese 2:16, 17.

E ui i lea, sa lei umi lava ae luia loa e Satani le maufaatuatuaina o Ieova. I se isi itu, sa ia manao ia matuā leai se loto faafetai o Eva mo Ieova ma uunaia ai o ia e fouvale ia Ieova, e pei ona fouvale Satani lava ia. Na fesili atu Satani: “E moni ea, na fetalai mai le Atua, lua te le aai i laau uma o le faatoaga?” (Kenese 3:1) O le faauigaga manino sa faapea na taofia e le Atua se mea tāua mai ia Eva, se mea o le a faapupulaina ai ona mata ma avea ai o ia e pei o le Atua lava ia. Na i lo le faaalia o sona loto faafetai mo le tele o faamanuiaga na faatotoina ifo e Ieova ia te ia, ae sa amata ona tuinanau atu Eva i le mea sa faasāina.—Kenese 3:5, 6.

Ua lausilafia āuga matautia. E ui sa faaigoaina ia Eva “auā o le tinā o ia o tagata ola uma,” ae i le isi itu ua avea o ia ma tinā o tagata o loo faasolo uma atu i le oti. Ua tuufaasolo mai ia Atamu i tagata uma le agasala lea e oo atu ai i le oti.—Kenese 3:20; Roma 5:12.

Faaaoao i le Atua ma Keriso

Seʻi iloilo le eseesega o Satani ma Iesu. Ua faamatalaina Satani o sē “na molia o tatou uso, o le na molia i latou i luma o lo tatou Atua i le ao ma le po.” (Faaaliga 12:10) Ua ‘mafai e Iesu ona faaola pea lava i ē faalatalata atu i le Atua ona o ia, auā o loo soifua pea ia e fautua mo i latou.’—Eperu 7:25.

O loo tuuaia e Satani auauna a le Atua. O loo talisapaia e Iesu i latou ma fautua mo i latou. I le avea ma ni ē e faaaoao ia Keriso, e ao i Kerisiano ona taumafai e taitasi ma saili mo le lelei o le isi, talisapaia ma faatāuaina e le tasi le isi. I le faia faapea, ua latou faaalia ai lo latou loto faafetai i lē na faataatia le faaaoaoga silisili o le talisapaia, o Ieova le Atua.—1 Korinito 11:1.

[Ata i le itulau 17]

Na faaalia e Iesu le talisapaia mo le gaoioiga lelei a Maria