Pe E te Manatua?

Pe na e talisapaia le faitauina o lomiga talu ai nei o Le Olomatamata? Seʻi vaai la pe mafai ona e taliina fesili o loo mulimuli mai:

□ Aisea ua talafeagai ai le faaupuga na faaaogā e Paulo o ‘sāvali a Keriso’ mo Kerisiano faauuina? (2 Korinito 5:20)

I taimi anamua, sa tele ina auina atu sāvali i vaitaimi o feeseeseaiga aasa ina ia vaai pe mafai ona alofia le ono tupu o se taua. (Luka 14:31, 32) Talu ai ua faaesea le lalolagi agasala o tagata mai le Atua, ua ia aauina atu ai ana sāvali faauuina ina ia faailoa i tagata ana tuutuuga o mea e ao ona fai mo se leleiga, i le uunaia o i latou e saili le filemu ma le Atua.—12/15, itulau 18.

□ O ā mea e fa na faamalosia ai le faatuatua o Aperaamo?

Muamua, sa ia faaalia lona faatuatua ia Ieova e ala i lona gauai atu pe a fetalai le Atua (Eperu 11:8); lona lua, sa fesootai vavalalata atu lona faatuatua i lona faamoemoe (Roma 4:18); lona tolu, sa masani ona talanoa atu Aperaamo ia Ieova; ma lona fa, sa lagolagosua atu Ieova ia Aperaamo ina ua ia usiusitai i le taitaiga a le Atua. E mafai foi e na mea ona faamalosia ai lo tatou faatuatua i aso nei.—1/1, itulau 17, 18.

□ O le ā le uiga o le faaupuga “Aua foi e te taitaiina i matou i le faaosoosoga”? (Mataio 6:13)

O loo tatou ole atu i le Atua ina ia aua neʻi ona faatagaina i tatou e paʻūū pe a faaosoosoina i tatou ia lē usiusitai ia te ia. E mafai e Ieova ona taitaia i tatou ina ia lē lolo atu ma lē manumalo ai Satani, ‘lē o leaga.’ (1 Korinito 10:13)—1/15, itulau 14.

□ O le ā e tatau i se tasi ona fai ina ia maua ai le faamagaloga a le Atua mo se sese ua fai?

O le tautino atu o agasala i le Atua e ao ona ō faatasi ma le salamō ma “fua e tatau ma le salamo.” (Luka 3:8) O se uiga salamō ma se faanaunauga e faasaʻo le mea sese, o le a uunaia ai foi i tatou e saili le fesoasoani faaleagaga a toeaina Kerisiano. (Iakopo 5:13-15)—1/15, itulau 19.

□ Aisea e tatau ai ona tatou tauivi ina ia lotomaulalo?

O le tagata lotomaulalo e onosai ma faapalepale, ma na te lē soona faatāuaina o ia lava. O le lotomaulalo e tosina mai ai uo moni o ē alolofa ia te oe. Ae sili atu ona tāua, e maua ai faamanuiaga a Ieova. (Faataoto 22:4)—2/1, itulau 7.

□ O le ā le eseesega tāua o loo iai i le va o le maliu o Iesu ma le oti o Atamu?

Na tatau le oo o le oti ia Atamu, auā na ia lē usitai ma le loto i ai i Lē na Faia o ia. (Kenese 2:16, 17) Ae peitai, o le maliu o Iesu sa matuā lē ono ma tatau lava i ai, auā o ia “o le na le agasala lava.” (1 Peteru 2:22) Ina ua maliu la Iesu, sa ia te ia se mea e matuā telē le aogā, lea sa lei ia Atamu le tagata agasala ina ua oti—o le aiā e maua ai se ola faaletagata lelei atoatoa. O lea, sa iai le aogā faatogiola o le maliu o Iesu i le togiolaina o tagata.—2/15, itulau 15, 16.

□ I le faaaliga faavaloaga a Esekielu, o le ā na faaāta mai e le aai?

Talu ai o loo taoto le aai i le ogatotonu o le fanua ua faaleagaina (lē paia), e tatau la ona avea o se mea faalelalolagi. O lea la, e foliga mai o le aai e faaāta ai le pulega faalelalolagi lea ua manuia ai i latou uma o le a faia aʻe ai le sosaiete amiotonu faalelalolagi.—3/1, itulau 18.

□ Aisea na mulumulu ai e Iesu vae o ona soo ina ua latou faamanatuina le Paseka i le 33 T.A.?

Sa lei faavaeina e Iesu se tu o le mulumuluina o vae. Na i lo lena, na ia fesoasoani i ona aposetolo ina ia mauaina se uiga fou—se uiga o le lotomaulalo ma le lotomalie e faataunuuina se galuega pito sili ona faatauvaa mo o latou uso.—3/1, itulau 30.

□ I lo tatou aʻoaʻoina o isi, o le ā e sili mamao atu ona tāua na i lo tomai masani?

O uiga ia o loo ia i tatou ma masaniga faaleagaga ua tatou atiina ae e mafai ona faataitai mai i ai a tatou tagata suesue. (Luka 6:40; 2 Peteru 3:11)—3/15, itulau 11, 12.

□ E mafai faapefea e i latou o loo faia atu lauga i le lautele ona faaleleia lo latou faitauina o le Tusi Paia?

E ala i le faataitai soo. Ioe, e ala i le faitau leotele pea lava pea seia oo ina mafai ona sologa lelei la latou faitau. Pe afai o maua i la outou gagana kaseti o le faitauina o le Tusi Paia, o se faiga atamai le faalogologo atu i vaega o loo faamamafa e le tagata faitau, faapea foi ma le fesuiaiga o le leo, ma ia mātau le auala o loo faaleo ai igoa ma upu e lē masani ai.—3/15, itulau 20.

□ E faapefea ona ‘toe foi atu le agaga i le Atua’ pe a oti le tagata? (Failauga 12:7)

Talu ai o le agaga o le malosi ola lea, e ‘toe foi atu la i le Atua moni’ i le uiga faapea, so o se faamoemoe o le olaga i le lumanai o lena tagata ua faalagolago atoatoa atu nei i le Atua. E na o le Atua e mafai ona ia toe faafoisia mai le agaga, po o le malosi ola, ma faapogaia ai ona toe ola le tagata. (Salamo 104:30)—4/1, itulau 17.