Ia Mataala ma ia Finafinau!

“O lea, ia outou mataala pea auā tou te lē iloa le aso po o le itula.”—MATAIO 25:13, NW.

1. O le ā le mea sa tulimataia e le aposetolo o Ioane?

I LE talanoaga mulimuli lava o loo faamauina i le Tusi Paia, na folafola ai e Iesu: “Ou te vave alu atu.” Na tali atu lana aposetolo o Ioane: “Amene. O lea lava, le Alii e Iesu, ia e afio mai!” Sa lē masalosalo le aposetolo o le a toe afio mai Iesu. O Ioane le isi aposetolo na iai i aposetolo na fesili atu ia Iesu: “Pe oo afea ia mea, ma o le ā foi le faailoga o lou faatasi mai [faa-Eleni, pa·rou·siʹa] ma le faaiuiuga o le faiga o mea?” Ioe, sa tulimataia ma le mautinoa e Ioane le faatasi mai o Iesu i se taimi o i luma.—Faaaliga 22:20; Mataio 24:3, NW.

2. E tusa ai o le faatasi mai o Iesu, o le ā le tulaga o iai i lotu?

² Ua seāseā toe maua lena ituaiga o mautinoa i aso nei. O le tele o lotu ua iai sa latou aʻoaʻoga aloaia e faatatau i le “afio mai” o Iesu, ae toaitiiti lava o latou tagata lotu e faatalitalia moni le tupu o lena mea. Ma ua faaalia mai lava i le auala o loo latou ola ai. Ua matauina i le tusi, The Parousia in the New Testament e faapea: “E itiiti lava se aafiaga uigā o le faamoemoe o le Parousia i le olaga, le manatu, ma le galuega a le lotu. . . . O le uiga e matuā faanatinati lea e tatau i le lotu ona faagaoioia ai ana galuega o le salamō ma le folafola atu faamisionare o le tala lelei, ua faasolo ifo ina vāivai pe ua matuā leai lava.” Peitai, e lē o le tulaga lena o tagata uma!

3. (a) O ā lagona o Kerisiano moni e faatatau i le pa·rou·siʹa? (e) O le ā le mea patino o le a tatou manatunatu nei i ai?

³ O loo faatalitali ma le naunautai soo moni o Iesu i le iuga o lenei faiga amioleaga o mea. A o faamaoni i le faia faapea, e manaomia ona tatou tausia se vaaiga saʻo i mea uma e aofia i le faatasi mai o Iesu ma gaoioi e tusa ai ma na mea. O le faia faapea o le a mafai ai ona tatou ‘tumau seia oo i le iuga ma faasaoina ai.’ (Mataio 24:13) A o tuuina mai le valoaga lea tatou te maua i le Mataio mataupu e 24 ma le 25, na saunia ai e Iesu se fautuaga atamai e mafai ona tatou faatatauina, mo so tatou lelei tumau. I le mataupu e 25 o loo iai faataoto atonu ua e silafia, o loo aofia ai le faataoto i taupou e toasefulu (taupou popoto ma taupou vālea) ma le faataoto i taleni. (Mataio 25:1-30) E mafai faapefea ona aogā ia i tatou na tala faatusa?

Ia Mataala, e Pei o Taupou e Toalima!

4. O le ā le manatu autū o le faataoto i taupou?

⁴ Atonu e te manao e toe faitau le faataoto i taupou, o loo maua i le Mataio 25:1-13. O le faatulagaga, o se faaipoipoga tele faa-Iutaia lea e alu atu ai le faatoafaiavā i le fale o le tamā o le faatoanofotane ina ia avatu o ia ma la ō atu faatasi  i le aiga o le faatoafaiavā (pe i le aiga o lona tamā). O sea solo atonu sa aofia ai le au faimusika ma tagata pepese, ae o le taimi o lona taunuu ane e lē o iloa tonu. E tusa ai o le faataoto, e toasefulu taupou sa faatalitali i le po mo le taunuu ane o le faatoafaiavā. E toalima na vālea, e lei lava ni a latou suauu na aumai mo a latou lamepa, o lea sa tatau ai ona toe foi atu e faatau mai nisi suauu. O le isi toalima sa popoto, ma aumai ni suauu faasili i ni fagu ina ia mafai ona toe utu ai a latou lamepa pe a manaomia a o faatalitali. Ma e na o le toalima lena sa nofo sauni ma iai i le taimi tonu na taunuu ane ai le faatoafaiavā. O lea, sa na o latou foi na faataga e ulu atu i le tausamaaga. Ina ua toe taliu ane isi taupou vālea e toalima, sa tuai ma lē mafai ai ona latou ulufale atu.

5. O ā mau ua faasusuluina atu le malamalama i le uiga faafaatusa o le faataoto i taupou?

⁵ E tele vala o lenei faataoto e mafai ona malamalama i ai e faafaatusa. Mo se faaaoaoga, o loo taʻua e le Tusi Paia Iesu o ia o le faatoafaiavā. (Ioane 3:28-30) Sa faatusaina e Iesu o ia lava i le atalii o se tupu, lea na sauniunia mo ia le tausamaaga o le faaipoipoga. (Mataio 22:1-14) Ma e faatusatusa atu e le Tusi Paia Keriso i se tane. (Efeso 5:23) E lelei ona mātau, e ui ina iai isi faamatalaga o loo taʻua ai Kerisiano faauuina faapea o le “faatoanofotane” a Keriso, ae i le faataoto e lē o taʻua ai se faatoanofotane. (Ioane 3:29; Faaaliga 19:7; 21:2, 9) Peitai, o loo tautala i taupou e toasefulu, ma o loo iai se isi faamatalaga ua faatusaina ai le vaega faauuina i se taupou ua fāufautane ia Keriso.—2 Korinito 11:2. *

6. O le ā le timaiga na tuuina mai e Iesu ina ua faaiu lana faataoto i taupou?

⁶ E ese mai na auiliiliga ma ni faatatauga faavaloaga, e mautinoa lava e iai ni mataupu silisili lelei e mafai ona tatou aʻoaʻoina mai lenei faataoto. Mo se faataitaiga, seʻi mātau na faaiu e Iesu le faataoto i upu nei: “O lea, ia outou mataala pea, auā tou te le iloa le aso po o le itula.” Ua faailoa mai la e le faataoto le manaoga mo i tatou taitoatasi ina ia mataala, ia mataalia i le oo mai o le iuga o lenei faiga amioleaga. E leai se fesiligia o le oo mai o lenei iuga, e ui e lē mafai ona tatou iloa patino le aso. I lenei itu, seʻi mātau uiga sa faaalia e vaega e lua o taupou.

7. I le ā le itu na faamaonia ai le vālea o isi taupou e toalima o le faataoto?

⁷ Na fetalai Iesu: ‘Ua vālea le toalima o i latou.’ Po o le mafuaaga ea ona sa latou lei talitonu o le a sau le faatoafaiavā? Pe na latou iai ea i se isi mea e saili i mea faafiafia? Pe sa faaseseina ea i latou? E lē o mafuaaga na. Na taʻua e Iesu faapea na ō atu i latou nei e toalima “e faafetaiai i le faatoafaiavā.” Sa latou iloa o le a afio mai o ia, ma sa latou mananao e aofia ai iina, ma ia auai foi i le “tausamaaga” o le faaipoipoga. Peitai, pe na lava ea a latou sauniuniga? Sa latou faatalitali teisi mo ia, seia oo “i le tulua o po,” peitai sa latou lei sauniuni mo lona taunuu mai i so o se taimi o le a oo mai ai—pe vave mai pe tuai mai na i lo le taimi sa latou muai faatalitalia.

8. Na faapefea ona faamaonia le popoto o isi taupou e toalima o le faataoto?

⁸ O le isi toalima—i latou ia sa taʻua e Iesu o ē popoto—na ō atu foi ma a latou lamepa mumū e faatalia le taunuu ane o le faatoafaiavā. Sa tatau foi ona latou faatalitali, peitai sa latou “popoto.” O le upu Eleni ua faaliliuina i le “popoto” e mafai ona faailoa mai ai le uiga o le “faautauta, faaaogā le mafaufau, e atamai i mea o le olaga.” Sa faamaonia e lenei toalima lo latou popoto, e ala i le aumai o ni fagu sa iai ni suauu faaleoleo e toe utu ai a latou lamepa pe a manaomia. O le mea moni, sa latou matuā naunau e nofo sauni mo le faatoafaiavā, o le mafuaaga lea sa lē foaia ai a latou suauu. Sa lei tuuseseina lena mataala, e pei ona faamaonia mai i lo latou auai ma le sauniuni atoatoa ina ua taunuu ane le faatoafaiavā. O i latou nei o ē na “saunia foi ua latou ulufale atu faatasi ma ia i le tausamaaga, ona pupuni ai lea o le faitotoa.”

9, 10. O le ā le manatu autū o le faataoto i taupou, ma o ā fesili e tatau ona tatou fesili ifo ai ia i tatou lava?

 ⁹ Sa lei aʻoaʻo mai e Iesu se lesona i ni amioga talafeagai e ao ona amioai i se faaipoipoga, na te lei aumaia foi se fautuaga i le fetufaai o mea. O lona manatu autū: “O lea, ia outou mataala pea, auā tou te le iloa le aso po o le itula.” Seʻi e fesili ifo ia te oe lava, ‘Po o oʻu mataala moni e tusa ai o le faatasi mai o Iesu?’ Ua tatou talitonu o loo nofotupu nei Iesu i le lagi, ae o le ā le tele o lo tatou uaʻi atu i le mea moni faapea ‘ua lē o toe umi ona afio mai lea o le Atalii o le tagata i ao o le lagi i le mana ma le mamalu tele’? (Mataio 24:30) E oo ane i “le tulua o po,” ua mautinoa lava le sili atu ona latalata le taunuu ane o le faatoafaiavā na i lo le taimi ina ua faatoʻā ō atu taupou e faafetaiai ia te ia. E faapena foi le oo mai o le Atalii o le tagata ina ia faaumatia lenei faiga amioleaga o mea, ua matuā lalata mai lava na i lo le taimi a o faatoʻā amata ona tatou tulimataia lona afio mai. (Roma 13:11-14) Po o tatou tausisia ea la lo tatou mataala, ia sili atu ona mataala a o matuā latalata mai lena taimi?

¹⁰ Ina ia usitaia le poloaiga e “mataala pea” e manaomia ai se mataalia e faifai pea. Na tuu e taupou e toalima seia uma a latou suauu ona toe foi atu lea e faatau mai nisi suauu. E ono faapena foi i aso nei ona toe tosina ese atu se Kerisiano ina ia lē sauniuni atoatoa ai mo le vave taunuu mai o Iesu. Sa tupu i nisi Kerisiano i le uluai senituri. E mafai foi ona tupu i nisi i aso nei. O lea seʻi o tatou fesili ifo ia i tatou lava, ‘Po o tupu ea ia te au?’—1 Tesalonia 5:6-8; Eperu 2:1; 3:12; 12:3; Faaaliga 16:15.

Ia Finafinau a o Latalata Mai le Iuga

11. O le ā le faataoto na sosoo ona tuuina mai e Iesu, ma o le ā sa talitutusa atu i ai lena faataoto?

¹¹ I lana faataoto na sosoo ai, na faia ai e Iesu se isi mea e sili atu na i lo le tau ina uunaia ona soo e mataala. Ina ua uma ona taʻua taupou popoto ma taupou vālea, ona ia faamatala lea o le tala faatusa i taleni. (Faitau le Mataio 25:14-30.) I le tele o vala, o lenei tala e talitutusa ma lana faataoto muamua i mina, lea na faamatala e Iesu talu ai le toatele o tagata na “fa te i latou o le a faaalia loa mai le malo o le Atua.”—Luka 19:11-27.

12. O le ā le manatu autū o le faataoto i taleni?

¹² I le faataoto i taleni, na taʻua ai e Iesu se tagata o lē, a o lei alu atu i se faiga malaga i se atunuu mamao, sa ia valaau i auauna e toatolu. Sa ia tuu atu taleni e lima i le tasi auauna, o le isi na tuu i ai taleni e lua, ae o le auauna mulimuli na tuu i ai na o le tasi le taleni—“ua faatatau i le mea ua mafai ai e le tagata.” E foliga mai, sa faauiga i se taleni ario, o se aofaiga tupe sa tutusa i na taimi ma le totogi e ono maua e se tagata faigaluega faatauvaa mo tausaga e 14—o se vaega tupe tele! Ina ua toe taliu ane le tamaloa, sa ia tāpā ai auauna e tusa o mea sa latou faia i ‘ona po e tele’ ia na alu ese ai. O auauna muamua e toalua sa la faaluaina le tele o taleni na tuuina atu la te tausia. Ona faapea atu lea o ia, “ua lelei ia,” ma folafola atu ia i laua uma isi tiute tauave atili la te maua, ma faapea atu: “Ina ulufale mai ia i le fiafia o lou alii.” A o le auauna lea sa iai le taleni e tasi, sa manatu o ia faapea o le matai o se tagata faigata tele, ona ia lē faia ai lea o se gaoioiga e faateleina ai le taleni. Sa ia nanā le tupe, na te lei avatua foi e teu i tagata teutupe ina ia maua ai se tupe tului. Na taʻua o ia e le matai o le ‘auauna leaga ma le paie’ auā sa ia lei faia se galuega mo se lelei o lona matai. Ona o lea, na fao ese ai le taleni mai ia te ia, ae tulia o ia i fafo i le mea o iai lona “taufaitagiaue ma le lilivau o nifo.”

13. Na faamaonia mai faapefea e Iesu o ia e pei o le matai i le faataoto?

¹³ Ua faapena foi i lenei tala, o ona auiliiliga e mafai ona malamalama i ai i se uiga faafaatusa. Mo se faaaoaoga, o Iesu, na faaatagia ai le tamaloa na alu malaga, o le a tuua ona soo, alu atu i le lagi, ma faatali ai iina mo se taimi umi seia oo ina maua lona mana tautupu. * (Salamo 110:1-4; Galuega 2:34-36; Roma 8:34; Eperu 10:12, 13) Peitai, ua toe mafai foi ona tatou iloa ai se lesona po o se mataupu silisili e sili atu ona  lautele, lea e tatau ia i tatou uma ona faatatauina i o tatou olaga. O le ā lea?

14. O le ā le manaoga sili ona tāua ua faamamafa mai e le faataoto i taleni?

¹⁴ E tusa lava po o lo tatou faamoemoe o le ola e lē mafai ona oti i le lagi po o le ola e faavavau i le lalolagi parataiso, ae ua manino mai i le faataoto a Iesu faapea, e tatau ona tatou matuā faamalosi i galuega faa-Kerisiano. O le mea moni, e mafai ona tāaofai uma le feau o lenei faataoto i se upu e tasi: finafinau. Sa faataatia e le au aposetolo le faaaʻoaʻo mai le Penetekoso 33 T.A. ma faasolo mai ai. Tatou te faitau ai: “O isi upu foi e tele na ia [Peteru] molitino atu [“maeʻaeʻa,” NW] ma apoapoai atu ai, ua faapea atu, ‘Ia faaolaina outou ai lenei tupulaga faapiopio.’” (Galuega 2:40-42) Maeu ni taunuuga sili ona lelei na ia maua mai ana taumafaiga! A o aufaatasi atu isi i le au aposetolo i le galuega talaʻi faa-Kerisiano, sa faapena foi ona latou finafinau, ma ‘faateleina atu ai le tala lelei i le lalolagi uma.’—Kolose 1:3-6, 23; 1 Korinito 3:5-9.

15. O le ā le itu faapitoa e tatau ona tatou faatatauina i ai le manatu autū o le faataoto i taleni?

¹⁵ Seʻi teu i mafaufau le faamatalaga atoa o loo iai lenei faataoto—o se valoaga e uiga i le faatasi mai o Iesu. E anoanoai faamautinoaga ua tatou maua e iloa ai o le pa·rou·siʹa o Iesu o loo faagasolo nei ma ua lē o toe umi ona oo lea i lona tumutumuga. Seʻi manatua le sootaga na faia e Iesu i le va o “le gataaga” ma le galuega o loo manaomia ona faia e Kerisiano: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Pe a manatu atu i lenei mea, o le ā le ituaiga o auauna o loo tatou faaatagia atu? Fesili ifo ia te oe lava: ‘Pe o le a iai ea se mafuaaga ou te manatu ai ua faapei aʻu o le auauna lea na nanāina le taleni na tuuina atu na te tausia, atonu ina ia tausia ona lava faanaunauga totino? Pe na i lo lena, po o manino atu o loo faapei aʻu o auauna ia sa lelei ma faamaoni? Po o oʻu uaʻi atu atoatoa i le faateleina o mea a le Matai i taimi uma lava?’

Ia Mataala ma Finafinau i le Taimi o Lona Faatasi Mai

16. O le ā le feau ua tuuina mai mo oe e faataoto e lua sa tatou talanoaina?

¹⁶ Ioe, e ese mai i o la uiga faafaatusa ma faavaloaga, ua faaoo mai foi e nei faataoto e lua ia i tatou se faalaeiauga manino e mai le fofoga o Iesu lava ia. O lana feau lenei: Ia mataala; ia finafinau, ae maise pe a vaaia le faailoga o le pa·rou·siʹa o Keriso. O nei le taimi. O lea po o moni ea lo tatou mataala ma finafinau?

17, 18. O le ā na fautuaina e le soo o Iakopo e faatatau i le faatasi mai o Iesu?

¹⁷ Sa lei iai Iakopo le ʻafa uso o Iesu i luga o le Mauga o Olive e faalogo atu i le valoaga a  Iesu; peitai sa ia iloa mulimuli ane, ma na ia malamalama i lona uiga. Na ia tusi mai: “O lenei, le au uso e, onosai ia seia oo i le afio [“faatasi,” NW] mai o le Alii. Faauta, e faatali lē galue fanua i le fua aoga o le eleele, e faatalitali i ai, seia maua le uaga muamua ma lē mulimuli. Ia onosai foi outou, ia faatumauina o outou loto, auā ua latalata le afio [faatasi] mai o le Alii.”—Iakopo 5:7, 8.

¹⁸ I le aumaia o le faamautinoaga faapea o le a faamasinoina e le Atua i le nofosala i latou o ē faaaogā sese a latou oa, na uunaia ai e Iakopo Kerisiano ina ia aua neʻi lē lava le onosai a o faatalitali atu i le taimi e gaoioi ai Ieova. O se Kerisiano e lē onosai e ono fia taui ma sui, e peiseai o ia e tatau ona faasaʻoina mea sese ua faia. Peitai, e lē o le mea lena e tatau ona iai, auā e mautinoa lava le oo mai o le aso o le faamasinoga. E faataitaia mai lena mea i le faaaoaoga a lē galue fanua, e pei ona sa faamatala e Iakopo.

19. O le ā le ituaiga o onosai e mafai ona faaalia e se tagata Isaraelu galue fanua?

¹⁹ O se tagata Isaraelu galue fanua na te totōina fatu laau sa tatau ona faatalitali, muamua mo le tatupu mai o se lau, sosoo ai ma le faatali seʻi matua le laau, ona faaiu loa lea i le seleseleina. (Luka 8:5-8; Ioane 4:35) A o faagasolo na masina, sa iai se taimi ma atonu o se pogai e ono faapopoleina ai. Po o le a totō mai ea uaga muamua ma pe lava foi? Ae faapefea i uaga mulimuli? Faamata o le a faatamaia laau e ni manu ninii po o se afā foi? (Faatusatusa i le Ioelu 1:4; 2:23-25.) E ui i lea, sa mafai ona faalagolago atu se tagata Isaraelu galue fanua ia Ieova ma faataamilosaga masani o le natura o mea ia ua uma ona ia faatulagaina. (Teuteronome 11:14; Ieremia 5:24) O le onosai o lē galue fanua sa mafai moni ai lava ona avea ma faatalitali ma le mautinoa. O lona faatuatua na ia iloa ai o le a oo mai le mea o loo ia faatalitalia. O le a oo moni mai lava!

20. E mafai faapefea ona tatou faaalia le onosai ina ia ogatusa ma le fautuaga a Iakopo?

²⁰ Atonu sa iai sina iloa o lē galue fanua i le taimi o le a faia ai le seleselega, peitai o Kerisiano i le uluai senituri sa lē mafai ona latou fuafuaina le taimi o le faatasi mai o Iesu. Ae sa mautinoa lava le oo mai. Na tusi mai Iakopo: “Ua latalata le faatasi mai [faa-Eleni, pa·rou·siʹa] o le Alii.” I le taimi na tusia ai e Iakopo na upu, sa lei aliali mai ni faamaoniga o le faatasi mai o Keriso, i se tulaga telē, pe i le lalolagi aoao. Ae o lea ua iai faamaoniga i le taimi nei! O ā la o tatou lagona e tatau ona iai i lenei vaitaimi? Ua mafai ona vaaia le faailoga. Ua tatou vaai i ai. E mafai ona tatou faapea atu ma le mautinoa, ‘Ua ou vaai ua faataunuuina le faailoga.’ E mafai ona tatou faapea atu ma le mautinoa, ‘Ua faatasi mai nei le Alii, ma ua lalata mai lava lona tumutumuga.’

21. O le ā ua tatou filifili ma le maumauai e fai?

²¹ Ona o lena le tulaga ua iai, ua matuā malosi ai lava le mafuaaga ua ia i tatou e teuloto ai ma faatatauina lesona faavae o faataoto e lua a Iesu lea ua uma ona tatou talanoaina. Na ia fetalai: “O lea, ia outou mataala ai, auā tou te le iloa le aso po o le itu aso.” (Mataio 25:13) O le taimi tonu lenei mo i tatou e maelega ai i la tatou auaunaga faa-Kerisiano. Seʻi o tatou faaali atu i aso taitasi i o tatou olaga ua tatou malamalama i le manatu na faataatia e Iesu. Seʻi o tatou mataala ai! Seʻi o tatou finafinau ai!

[Faaopoopoga i lalo]

E te Manatua?

□ O le ā le manatu autū ua e maua mai le faataoto i taupou popoto ma taupou vālea?

□ E ala i le faataoto i taleni, o le ā le fautuaga autū o loo ofoina mai ai e Iesu ia te oe?

□ I le ā le uiga e fesootai atu ai lou onosai i le pa·rou·siʹa e pei o le onosai o se tagata Isaraelu galue fanua?

□ Aisea ua avea faapitoa ai lenei vaitaimi o se taimi o gaoioiga fiafia ma le tele o luʻitau e faafetaiaia?

[Fesili mo le Suʻesuʻega]

[Ata i le itulau 23]

O ā lesona ua e aʻoaʻoina mai faataoto i taupou ma taleni?