Pe e Gaoioi le Atua i ni Auala “Piopio”?

“DEUS ESCREVE CERTO POR LINHAS TORTAS” (“UA TUSIA MA LE SAʻO E le Atua e ala i le faaaogaina o ni laina piopio”) o se alagaupu i Pasili. Ua taʻua e faapea e masani lava ona faia e le Atua le mea saʻo ae i se auala e foliga atu e lē saʻo i manatu o tagata i nisi o taimi. Mo se faaaoaoga, pe afai e maliu se tasi a o i le tauosoosoga o le malosi o le olaga, e toatele ua faapea mai, ‘Ua valaauina o ia e le Atua i le lagi.’ Pe afai e mafatia se tasi ona o le lē atoatoa o le malosi faaletino po o le feagai foi ma se mala, ua faapea mai isi, ‘O le finagalo o le Atua.’ Talu ai o le maliu, o faafitauli i le tulaga o le tino, ma isi mea e faapogaia ai le faanoanoa ua tuuaia ai le Atua, ua faauigaina ai le faaupuga e faapea ua ‘tusia ma le pio,’ e le Atua, o lona uiga ua ia faia mea i se auala e lē mafai ona malamalama i ai tagata.

Aisea ua toatele ai tagata lotu e talitonu faapea ua tuuaia le Atua ona o le oti ma tulaga faigata? O nei talitonuga ua masani ona faavae mai i nisi o mau faale-Tusi Paia ia e lē fesootai o latou faatatauga. Seʻi o tatou iloiloina puupuu nisi o nei mau.

● ”O ai ea na na faia le gutu o le tagata, po o ai na te faia le gūgū, po o le tutuli, po o le vaai, po o le tauaso? E le o aʻu ea o Ieova.”—Esoto 4:11.

Pe o le uiga ea o lenei mea e tuuaia le Atua ona o i latou uma o ē mafatia i tulaga eseese o le lē atoatoa o le malosi o le tino? E leai. E lē ogatusa lenei mea ma uiga totino o le Atua. Ua faailoa mai e le Tusi Paia ia i tatou: “O mea uma ua faia e le Atua, e lelei lava ia.” (1 Timoteo 4:4) E lē tuuaia o ia pe afai e fanau mai se tasi e tauaso, gūgū, pe tutuli. E naunau o ia na o mea lelei mo ana foafoaga, ona o ia o le Puna o “mea lelei uma e foaifuaina mai.”—Iakopo 1:17.

O o tatou uluai matua, o Atamu ma Eva, o ē na filifili e fouvale faasaga i le Atua ma leiloa ai lo laua lelei atoatoa ma lē maua ai le avanoa e fanau mai ai ni fanau lelei atoatoa. (Kenese 3:1-6, 19; Iopu 14:4) A o faaipoipo ē tupuga mai ia i laua ma fai fanau, ua saga faaopoopo atu i ai le lē lelei atoatoa, e aofia ai le lē atoatoa o le tino, ia ua amata ona aliali mai i tagata. Sa lē faapogaia e Ieova le Atua lenei mea, ae ua ia faatagaina e tupu. O lea, ua mafai ai ona ia fetalai o ia lava na ‘faia’ le gūgū, le tutuli, ma le tauaso.

● ”O le mea ua piopio e le mafaasaʻoina.”—Failauga 1:15.

Pe o le Atua na faia ia piopio mea? E mautinoa e leai. Ua faapea mai le Failauga 7:29: “Na faia e le Atua le tagata e amiotonu, a o i latou ua sailiili i latou i togafiti e tele.” Ua toe faaupuina lenei fuaiupu e le Contemporary English Version e faapea: “Na atoatoa lo tatou faamaoni ina ua foafoaina i tatou e le  Atua, ae i le taimi nei ua piopio o tatou mafaufau.” Na i lo o le tausisia la o tapulaa amiotonu a le Atua, o le toatele lava o tane ma fafine ua filifili ma le loto malilie e mulimuli i a latou lava fuafuaga, faufauga, togafiti po o auala—ua iu ai i lo latou lava leaga.—1 Timoteo 2:14.

E lē gata i lea, e pei ona matauina e le aposetolo o Paulo, ona o le agasala a le tagata, ua “faatoilaloina [ai] mea uma na faia i le iu vale.” (Roma 8:20) Ma o lenei tulaga “e le mafaasaʻoina” e taumafaiga faaletagata. E na o le faalaa ane lava tauatua o le a aveesea ai faiga faapiopio ma iuvale uma o mataupufai faalelalolagi.

● ”Ina manatunatu ia i le galuega a le Atua; auā o ai se na te mafaia ona faasaʻoina o le mea ua faapiopioina e ia?”—Failauga 7:13.

I se isi faaupuga, ua fesili mai le tupu o Solomona e faapea: ‘O ai se tagata e mafai ona faasaʻoina faaletonu ma lē lelei atoatoa ua faatagaina e le Atua?’ E leai se tasi, ona e iai se mafuaaga ua faataga ai e Ieova le Atua nei mea e tutupu.

O lea la, ua faapea mai ai Solomona: “Ina fiafia ia i le aso e manuia ai, ia mafaufau foi i le aso e malaia ai; ua tuu feagai e le Atua le tasi i le tasi, ina ia le iloa e le tagata se mea e tupu pe a mavae atu o ia.” (Failauga 7:14) E tatau i le tagata ona talisapaia se aso e sologa lelei ai mea ma faaalia lona talisapaia e ala i le faaataina atu o le lelei. E tatau ona ia vaai i se aso e sologa lelei o se meaalofa mai le Atua. Ae faapefea pe afai e aumai e le aso se mala? E lelei ona “mafaufau” sea tagata, ia iloa, ua faataga e le Atua le mala e tupu. Aisea ua ia faia ai faapea? Ua faapea mai Solomona: “Ina ia le iloa e le tagata se mea e tupu pe a mavae atu o ia.” O le ā le uiga o lenei mea?

O le mea moni e faapea ua faataga e le Atua i tatou e faafesagaia mea e olioli ai ma faafitauli, e faamanatu mai ai ia te i tatou faapea tatou te lē mafai ona iloaina mea o le a aumaia e le lumanai. E mafai ona tutupu mala i le tagata amiotonu ma le tagata amioleaga. E oo na mea uma ia i laua. E tatau i lenei mea ona tatou iloa ai le tāua o le faalagolago, e lē ia i tatou lava, ae i le Atua, i le manatuaina lea “o le Atua, o le alofa lava ia.” (1 Ioane 4:8) Atonu tatou te lē o malamalama i nisi o mea i le taimi nei, ae e mafai ona tatou mautinoa faapea a maeʻa ona faataunuuina atoatoa mea uma, o mea ua faatagaina e le Atua o le a iai se fuafuaga aogā mo i latou uma e aafia ai.

Po o le ā lava na te faatagaina o le a lē tāitai ona iu i se faaleagaina tumau mo ē saʻo o latou loto. Na faamanino mai e le aposetolo o Peteru lenei mea ina ua ia taʻua mafatiaga sa iai i uso talitonu i ona taimi: “O le Atua e ona le alofa tunoa uma lava, o le na valaauina i tatou ia iu atu i lona mamalu faavavau o ia Keriso, pe a tigaina outou i nai aso, e faaatoatoaina outou e ia lava, e faatumauina, e faamalosia foi outou.”—1 Peteru 5:10, LF.

Le Taimi e Faasaʻoina ai Mea

Ua foai mai e Ieova ia i tatou le malosi e onosaia ai tofotofoga o feagai ai i le taimi nei. Ua ia folafolaina mai foi e faia “ia fou mea uma lava.” (Faaaliga 21:5) Ioe, o lana fuafuaga e faapea o lona Malo faalelagi o le a lē pine ae toe faafoisia mai ai le soifua maloloina ia i latou o mafatia i tulaga lē lelei atoatoa ma o le a gafa ma le faatutuina mai o ē ua maliliu. O le a tafiesea foi e lena faiga malo, lē e mautinoa le piopio o ona ala—o Satani le Tiapolo. (Ioane 5:28, 29; Roma 16:20; 1 Korinito 15:26; 2 Peteru 3:13) Maeu se faamanuiaga o le a iai mo tagata e matatau i le Atua i le lalolagi aoao pe a oo mai le taimi a le Atua e faasaʻoina ai mea!

[Ē Ana le Ata i le itulau 28]

Faalogo Iopu i Lona Faatamaiaga/The Doré Bible Illustrations/Dover Publications