Na Latou Faia le Finagalo o Ieova

Ua Manumalo Paulo i Mea Faigata

UA IAI Paulo i se tulaga e foliga mai ua leai se faamoemoe. O loo iai o ia faatasi ma le isi toʻa 275 tagata i luga o se vaa ua puea i peau sousou o le afā o Eurokuto—le matagi aupito sili ona matautia i le Metitirani. E matuā matautia le afā ua lē mafai ai ona vaaia le la i le ao, po o fetu i le po. E manino le mafuaaga ua matuā fefefe ai le pasese ina neʻi meanē ua latou oti. Peitai, ua faamafanafanaina i latou e Paulo e ala i le faaali atu ia i latou o se faaaliga tauatua na faailoa atu ia te ia i se miti e faapea: “E leai so outou ola e māumau, na o le vaa.”—Galuega 27:14, 20-22.

I lona 14 o po talu ona agi le afā, na iloa ai e le auvaa se mea e faateia ai—ua na o le 20 gafa [36 mita] le loloto o le sami. * I se isi mamao teisi atu, na latou toe faailoa mai ai foi. I le taimi lea, ua na o le 15 gafa [26 mita] le loloto o le sami. Ua lalata mai fanua! Ae o lenei tala lelei, o loo avatua ai se faaaliga manino. O le felafoaiina o le vaa i le papaʻu o le sami i le po atonu e ono fetoai ai ma ni papa ma malepe ai. Ma le atamai la, ua lafo ai i lalo e le auvaa taula. O nisi o i latou, ua mananao e tuu le tulula i le sami ma feosofi i ai, ma ō atu loa po o le ā lava le mea e oo ia i latou i le sami. * Ae ua taofi i latou e Paulo. Ua ia taʻu atu i le taitaiau ma le autau e faapea: “Afai e le tumau i latou na i le vaa, e le mafai ona faaolaina o outou.” Ua usiusitai le taitaiau ia Paulo, ma ua faatalitali ma le naunau le pasese uma e 276 seʻi ao.—Galuega 27:27-32.

Ua Malepe le Vaa

I le taeao na sosoo ai, na iloa atu ai e le pasese o le vaa se faga oneone e iai se matafaga. I le toe maua o se faamoemoe, na sala ese ai e le auvaa ia taula ma sisi i luga le la taumua faasaga i le matagi. Ona amata ai lea ona agaʻi atu le vaa i le matafaga—e lē taumatea sa faia lenei mea faatasi ma se alaga o le fiafia.—Galuega 27:39, 40.

Ae peitai, ua faafuasei lava ona paʻulia le vaa. Ua sili atu ona leaga, ona o le fetaiaʻi pea o le taumuli o le vaa ma galu malolosi, na matuā malepe leaga ai lava. Ua tatau loa i le pasese uma ona tuua le vaa! (Galuega 27:41) Ae o lenei mea na tulai mai ai se faafitauli. O le toatele o i latou i luga o le vaa—e aofia ai ma Paulo—o ni pagota. I le tulafono a Roma, o se leoleo na te faatagaina sana pagota e sola, e tatau ona faaoo i ai le faasalaga lea sa fuafuaina mo lana pagota. Mo se faaaoaoga, afai e sola se fasioti tagata, o le a totogia e ala i le fasiotia ai o le leoleo faatamala.

Ona o le fefefe i na iuga, ua filifili ai fitafita e fasiotia uma lava pagota. Ae peitai, na faalaa ane le taitaiau lea ua faauo ma Paulo. Ua ia faatonuina ai i latou uma o ē e mafai ona feausi ina ia feosofi i le sami ma feausi i uta. A o i latou e lē iloa feausi e tatau ona fepiiti i ni laupapa po o nisi mea mai le vaa. Sa taitasi loa ma feausi atu i le matafaga le pasese a le vaa ua malepe. E faamaoni lava upu a Paulo, e lei iai lava se tagata e toatasi na maimau sona ola!—Galuega 27:42-44.

Vavega i Melita

Na maua e le vaega ua vāivai se lafitaga i se motu e igoa ia Melita. O tagata e aināina le motu ‘o ni tagata e ese la latou gagana,’ o le mea moni o ni tagata “faanuupo” (Eleni, barʹba·ros). * Ae e lē taufeaai tagata o Melita. I le tuufaafeagai, ua lipotia mai e Luka, o se aumea faimalaga a Paulo e faapea: “Ua maeu lava le alolofa mai o le nuu ese ia i matou; auā ua latou tafu le afi, ma talia mai i matou uma lava, ona o le uaga ua to ifo, ma le malulu.” Na aufaatasi atu Paulo ma tagata o le nuu o Melita i le aoina mai o fafie ma tuu atu i le afi.—Galuega 28:1-3, faaopoopoga i le pito i lalo, NW.

Ua faafuasei lava ona pipii se gata uogo i le lima o Paulo! Sa manatu ai tagata o le motu e faapea ai o Paulo o se fasioti tagata. Atonu ua latou manatu e faasalaina e le Atua tagata agasala i le faaleagaina o vaega o o latou tino na sa māfua ai le agasala. Ae faauta! I le matuā  ofo tele o tagata o le motu, ona ua lūlū ese e Paulo le gata uogo i le afi. E pei ona faapea mai le molimau vaaitino a Luka, “ua faatali i latou faʻi e fulafula, pe paū i lalo [Paulo] ma lipiola.” Ona liliu lea o manatu o tagata o le nuu, ua faapea ane, ai o Paulo o se atua.—Galuega 28:3-6.

E tolu masina na nofo ai Paulo i Melita, o le taimi lena na ia faamalolo ai le tamā o Popilio, le alii o le motu, o lē na faaalia le agaga talimalo ia Paulo ma isi o ē na maua i maʻi tiga. E lē gata i lea, ua lūlū ai e Paulo fatu o le upu moni ma iu ai i le tele o faamanuiaga mo tagata agalelei ma le talimalo o le nuu o Melita.—Galuega 28:7-11.

Lesona mo i Tatou

I le faagasologa o lana faiva faamisionare, na fesagai ai Paulo ma le tele o luʻi. (2 Korinito 11:23-27) I le faamatalaga o loo i luga, sa faapagotaina ai o ia ona o le tala lelei. I lea, na fesagai ai o ia ma le tele o tofotofoga e lei faatalitalia: o se afā matautia na iu ai ina malepe le vaa. I le faagasologa o nei mea uma lava, e lei faavāivai lava Paulo i lana filifiliga maumauai e avea ma tagata talaʻi maelega o le tala lelei. I lona poto masani, na ia tusia ai e faapea: “O i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea, ma ia oge mea. Ou te mafaia mea uma lava ona o ia ua faamalosi mai ia te au.”—Filipi 4:12, 13.

E lē tatau ona avea faafitauli o le olaga ma mea e faavaivaia ai la tatou faaiuga ina ia avea ma faifeau maelega a le Atua moni! Pe afai e tulai mai se tofotofoga e lei faatalitalia, ia lafo atu ia Ieova mea uma tatou te mafatia ai. (Salamo 55:22) Ona tatou faatali lea ma le onosai ina ia iloa ai le auala ua ia faia ia mafai ai ona tatou tumau i le tofotofoga. Ae i le taimi nei, ia faaauau ona tatou auauna faamaoni ia te ia, ma le mautinoa o loo manatu mai o ia ia i tatou. (1 Korinito 10:13; 1 Peteru 5:7) O le tumau mausalī, e tusa lava po o ā faafitauli e oo mai, tatou te—i le pei o Paulo—mafai ai ona manumalo i mea faigata.

[Faaopoopoga i lalo]