Ia Savavali Pea i le Ala a Ieova

“Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le nuu.”—SALAMO 37:34.

1, 2. Mo le tupu o Tavita, o le ā na aofia ai i le savali i le ala a Ieova, ma o le ā e manaomia ai mo i tatou i aso nei?

“IA E faasino mai le ala ou te savali ai; auā o loo naunau atu loʻu loto ia te oe.” (Salamo 143:8) O loo toe faaleo atu ma le loto atoa e Kerisiano i aso nei na upu a le tupu o Tavita. Ua latou mananao moni lava e faafiafia Ieova ma savavali i lona ala. O le ā e aofia ai i lenei mea? Mo Tavita, sa uiga i lona tausia o le tulafono a le Atua. Sa aofia ai le faatuatua atu ia Ieova na i lo le faia o ni feagaiga soofaatasi ma nuu ese. Ioe, ma sa uiga i le auauna ma le faamaoni ia Ieova, ae lē i atua o tagata sa latou tuaoi. Mo Kerisiano, o le savavali i le ala a Ieova e tele isi mea e aofia ai.

² O se tasi o mea, o le savavali i le ala a Ieova i aso nei o lona uiga ia faaalia le faatuatua i le taulaga togiola a Iesu Keriso, ma faailoa atu o ia o “le ala, ma le upu moni, ma le ola.” (Ioane 3:16; 14:6; Eperu 5:9) E uiga foi i le faataunuuina o “le tulafono a Keriso,” lea e aofia ai le faaalia o le alofa o le tasi i le isi, ae maise i uso faauuina o Iesu. (Kalatia 6:2; Mataio 25:34-40) O i latou o ē savavali i le ala a Ieova e naunau i ana mataupu silisili ma ana poloaiga. (Salamo 119:97; Faataoto 4:5, 6) Latou te faatāuaina lo latou faaeaga tautele o le faia o se sao i le faiva faa-Kerisiano. (Kolose 4:17; 2 Timoteo 4:5) E avea le tatalo o se vaega faifai pea o o latou olaga. (Roma 12:12) Ma latou te ‘matuā faaeteete ina ia latou savavali ma le faautauta, ia lē faapei o ē valelea, a ia faapei o ē popoto.’ (Efeso 5:15) E mautinoa lava latou te lē faataulagaina oa faaleagaga mo ni lelei faaletino e gata mai le aogā, po o ni fiafiaga lē tatau o tuinanauga o le tino. (Mataio 6:19, 20; 1 Ioane 2:15-17) E lē gata i lea, e matuā tāua ia i latou le faamaoni ia Ieova ma  le faatuatua ia te ia. (2 Korinito 1:9; 10:5; Efeso 4:24) Aisea? Auā e talitutusa lava lo latou tulaga ma le tulaga sa iai Isaraelu anamua.

Le Manaoga mo le Faatuatua ma le Alofa Faamaoni

3. Aisea o le a fesoasoani ai le alofa faamaoni, le faatuatua, ma le faamoemoe ina ia tatou savavali ai pea i le ala a Ieova?

³ O Isaraelu o se nuu laitiiti sa siomia e nuu tuaoi e lē fiafia ane o ē na auai i ni faiga sauniga lē taupulea i tapuaiga i tupua na fai ma atua. (1 Nofoaiga a Tupu 16:26) Sa na o Isaraelu na tapuai atu i le Atua moni e toatasi e lē vaaia, o Ieova, ma sa ia faafinagaloina lo latou tausisia o ana tapulaa maualuluga tau amioga tatau. (Teuteronome 6:4) E faapena foi i aso nei, e na o ni nai miliona tagata o loo tapuai ia Ieova, ae o loo latou ola i se lalolagi e toetoe lava ono piliona le aofai o tagata, o ē matuā ese lava tapulaa ma manatu faalotu, mai o latou tapulaa ma manatu. Pe afai o aofia ai i tatou i nai na miliona, e tatau la ona tatou leoleomalu mai le oo ina taaʻina i se ala sese. Faapefea? O le a fesoasoani le alofa faamaoni atu ia Ieova le Atua, le faatuatua ia te ia, ma se faamoemoe mausalī faapea, o le a ia faataunuuina ana folafolaga. (Eperu 11:6) O lena mea o le a puipuia ai i tatou mai lo tatou faamoemoe atu i mea o loo faamoemoe i ai le lalolagi.—Faataoto 20:22; 1 Timoteo 6:17.

4. Aisea ua ‘faapouliuligia ai mafaufau’ o nuu ese?

⁴ Na faaalia mai e le aposetolo o Paulo le auala e tatau ona ese ai Kerisiano mai le lalolagi ina ua ia tusi: “O lenei, ou te fai atu ia te outou, ma taʻutino atu lenei mea ona o le Alii, aua tou te toe savavali faapei o nuu faapaupau, o e savavali i le valea o o latou loto. O loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto.” (Efeso 4:17, 18) O Iesu “le malamalama moni.” (Ioane 1:9) So o se tasi e tetee ia te ia pe faapea mai e talitonu ia te ia ae lē usitai i “le tulafono a Keriso” o lona uiga o loo “faapouliuligia o latou mafaufau.” I le matuā lē savavali lava i le ala a Ieova, ua latou ‘liliuese ai i le ola o i le Atua.’ Po o le ā lava se poto atonu latou te manatu o loo latou mauaina i le ala faalelalolagi, o loo ‘ia i latou le valea,’ e tusa ai o le poto e taitaia ai i le ola, o le poto lea e uiga ia Ieova le Atua ma Iesu Keriso.—Ioane 17:3; 1 Korinito 3:19.

5. E ui lava o loo susulu atu le malamalama o le upu moni i le lalolagi, ae aisea ua tele ai loto e lē tali lelei mai?

⁵ Peitai, o loo susulu atu le malamalama o le upu moni i le lalolagi! (Salamo 43:3; Filipi 2:15) “O loo alaga le poto i fafo.” (Faataoto 1:20) I le tausaga talu ai, na faaaluina ai e Molimau a Ieova le silia i le piliona itula e taʻu atu ai i o latou tuaoi mea e uiga ia Ieova le Atua ma Iesu Keriso. E faitau selau o afe i latou na tali lelei mai. Ae, pe tatau ea ona faateia i tatou i le toatele o isi e lē o tali lelei mai? E leai. Na taʻua e Paulo ‘le maaa o o latou loto.’ O nisi o loo iai ni loto lē tali lelei mai ona o le manatu faapito po o le manao i tupe. O isi ua taaʻina e lotu sese po o le vaaiga faaletino lea ua matuā taatele i aso nei. O mea faigata e tutupu i le olaga ua taitaia ai le toatele e fulitua i le Atua. O isi e mumusu e ola i tapulaa maualuluga a Ieova i amioga tatau. (Ioane 3:20) Pe mafai ea e le loto o se tasi o loo savali i le ala a Ieova ona iu ina maaa ona o na vala?

6, 7. E ui lava o i latou o ni tagata sa tapuai ia Ieova le Atua, ae o ā taimi na paʻūū ese ai le fanauga a Isaraelu, ma aisea?

⁶ O le mea lena na tupu ia Isaraelu anamua, e pei ona faaalia mai e Paulo. Na ia tusi mai: “Na fai foi na mea ma faailoga mo i tatou, ina neʻi tatou tuʻinanau atu i mea leaga, pei ona tuʻinanau lava i latou. Aua foi tou te ifo i tupua, pei o isi o i latou, pei ona tusia, Sa nonofo le nuu i lalo ma aai ma inu, ona latou tutū lea i luga e sisiva. Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu.”—1 Korinito 10:6-8.

⁷ O loo faasino muamua manatu o Paulo i le taimi lea na tapuai ai Isaraelu i se tamai povi auro i le auvaemauga o le Mauga o Sinai. (Esoto 32:5, 6) O se lē usiusitai tuusaʻo lea i se poloaiga tauatua lea sa na o ni nai vaiaso muamua atu na latou malilie ai e usiusitai i ai. (Esoto 20:4-6; 24:3) Ona faasino atu lea o Paulo i le taimi na ifo atu ai Isaraelu ia Paala faatasi ma afafine o  Moapi. (Numera 25:1-9) O le tapuaiga i le tamai povi sa faaalia i ni faiga matuā matagā o le faamalieina ai o le tagata lava ia, ‘ua sisiva.’ * Sa faia faatasi le tapuaiga ia Paala ma amioga lē mamā faaleituaiga sili ona matagā. (Faaaliga 2:14) Aisea na faia ai e le fanauga a Isaraelu nei agasala? Talu ai sa latou faataga o latou loto ia oo ina ‘tuinanau atu i mea leaga’—po o le ifo i tupua po o faiga tau amio lē tatau na aofia ai.

8. O le ā e mafai ona tatou aʻoaʻoina mai mea na tutupu ia Isaraelu?

⁸ Na faaalia mai e Paulo faapea e tatau ona tatou aʻoaʻo mai nei mea na tutupu. O ā mea e aʻoaʻo mai ai? E faigata ona iai se manatu faapea o le a ifo atu se Kerisiano i se tamai povi auro po o se atua o Moapi anamua. Ae faapefea amioga lē mamā po o faiga o le faamalieina o le tagata lava ia ma le lē taupulea? O mea na o loo taatele i aso nei, ma pe afai tatou te faataga o tatou tuinanauga i na mea ina ia tuputupu aʻe i o tatou loto, o le a oo ina ō ese ai mai ia Ieova. Ona oo ai foi lea ia i tatou iuga e peiseai ua tatou faia le ifo i tupua—e ō ese ai mai le Atua. (Faatusatusa i le Kolose 3:5; Filipi 3:19.) O le mea moni lava, ua faaiu mai e Paulo lana talanoaga i na mea na tutupu e ala i lona timai mai i ona uso talitonu: “Ia outou sosola ese ai i le ifo i tupua.”—1 Korinito 10:14.

Fesoasoani Ina ia Savavali i le Ala a le Atua

9. (a) O le ā le fesoasoani o tatou maua ina ia tatou savavali ai pea i le ala a Ieova? (e) O le ā se tasi o auala o tatou lagonaina ai le ‘upu i o tatou tua’?

⁹ Pe afai ua tatou filifili maumauai e savavali i le ala a Ieova, ua lē o tuua ai i tatou e aunoa ma se fesoasoani. Na vavalo mai Isaia: “E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” (Isaia 30:21) E faapefea ona faalogo atu ‘o tatou taliga’ i lena ‘upu i o tatou tua’? E leai se tasi i aso nei o faalogo atu i se leo moni pe mauaina se feau totino mai le Atua. O le “upu” ua lagonaina e tutusa uma lava le auala o loo oo mai ai ia i tatou. Muamua ma o le auala sili foi lea, e faaauala mai Tusitusiga faagaeeina, le Tusi Paia, o loo iai manatu o le Atua ma se faamaumauga o ana feutagaiga ma tagata. Talu ai ua tatou fesagai i aso taitasi ma faufauga leaga mai puna eseese o ē ua ‘liliuese mai le ola o i le Atua,’ e manaomia la ona tatou faitau le Tusi Paia ma mafaufau loloto i ai e lē aunoa pe a tatou fia maua se maloloina lelei faaleagaga. O le a fesoasoani lenei ia i tatou e alofia ai ‘mea lē aogā’ ae ia ‘lava saunia mo galuega lelei uma lava.’ (Galuega 14:14, 15; 2 Timoteo 3:16, 17) O le a faamalosia ai i tatou e lagolagoina, ma fesoasoani ia i tatou ia ‘manuia o tatou ala.’ (Iosua 1:7, 8) O lea, ua aioi mai ai le Afioga a Ieova e faapea: “O lenei, le fanau e, faalogologo mai ia ia te au; amuia lava i latou o e tausi i oʻu ala. Ia outou faalogologo i mea e aʻoaʻo atu, ia outou popoto ai; aua foi le teena.”—Faataoto 8:32, 33.

10. O le ā le auala lona lua o tatou lagonaina ai le ‘upu i o tatou tua’?

¹⁰ O le ‘upu i o tatou tua’ e faaauala mai foi i “le auauna faamaoni ma le mafaufau,” o loo aumaia “mea e ʻai i ona itu aso.” (Mataio 24:45-47) O se tasi o auala o loo aumaia ai nei meaʻai o lomiga faale-Tusi Paia, ma i tausaga talu ai nei ua matuā anoanoai ai na meaʻai. Mo se faaaoaoga, e ala mai i le mekasini o Le Olomatamata, ua faaleleia atili ai lo tatou malamalamaga i valoaga. I lenei mekasini, ua faalaeiauina ai i tatou ia finafinau i le galuega o le talaʻi ma le faia o soo e ui ina faateteleina uiga faalēano mai, ua tatou maua ai fesoasoani ina ia alofia mailei, ma ua uunaia ai i tatou e ati ae uiga lelei faa-Kerisiano. Maeu so tatou faatāuaina o na meaʻai i ona itu aso e tatau ai!

11. Faamatala mai le auala lona tolu e mafai ona tatou lagonaina ai le ‘upu i o tatou tua.’

¹¹ Ua aumaia foi e le auauna faamaoni ma le mafaufau meaʻai e ala mai i a tatou sauniga e lē aunoa. E aofia ai a tatou sauniga faalefaapotopotoga, fonotaga matagaluega e faalua i le  tausaga, ma tauaofiaga tetele e faatasi i le tausaga. O ai se Kerisiano faamaoni e na te lē o faatāuaina na faatasitasiga? O ni fesoasoani matuā tāua i le lagolagoina o i tatou a o tatou savavali i le ala a Ieova. Talu ai e faaaluina e le toatele o tagata le tele o le taimi i galuega ma aʻoga e faifaimea faatasi ai ma i latou e lē tutusa o latou talitonuga, ua avea ai nei faatasitasiga faifai pea faa-Kerisiano o se faasaoola moni. O sauniga ua tatou maua ai se avanoa lelei ‘e taufaatupu ai le alofa ma galuega lelei.’ (Eperu 10:24) Tatou te alolofa i o tatou uso, ma tatou te fiafia tele e aufaatasi ma i latou.—Salamo 133:1.

12. O le ā le filifiliga maumauai ua iai i Molimau a Ieova, ma na faapefea ona latou faailoa mai lena filifiliga talu ai nei?

¹² Ona ua faamalosia i nei meaʻai faaleagaga, ua toetoe ai ono miliona tagata i aso nei o loo savavali i le ala a Ieova, ma le faitau miliona o isi o loo suesueina le Tusi Paia ina ia iloa ai pe faapefea ona savavali i le ala a Ieova. Po o loto vaivai ea pe faavaivaia i latou ona o le toalaiti o lo latou faitau aofai pe a faatusatusa i le faitau piliona o le aofai o tagata o le lalolagi? E matuā leai lava! Ua filifili maumauai i latou e utagia pea le ‘upu i o latou tua,’ e ala i le faia ma le faamaoni o le finagalo o Ieova. I le avea o se  faalauiloaga lautele o lenei filifiliga maumauai, na taliaina ai e se au usufono se iugafono a o faagasolo Tauaofiaga Itumalo ma Tauaofiaga Faava-o-atunuu o “Le Ala a le Atua i le Ola” i le 1998/1999, o loo faalauiloa ai lo latou tulaga ma le loto atoa. O loo sosoo mai upu o lena iugafono.

Iugafono

13, 14. O le ā le vaaiga moni ua iai i Molimau a Ieova e faatatau i le tulaga o le lalolagi?

¹³ “O i tatou, o Molimau a Ieova o loo faapotopoto i le Tauaofiaga o “Le Ala a le Atua i le Ola,” ua tatou ioe ma le loto atoa e faapea, o le ala a le Atua o le ala sili lea i le ola. Peitai ane, ua tatou iloa, e lē o lagona ia o le toatele o tagata i aso nei. E anoanoai talitonuga, o filosofia, ma manatu faalotu ua iai i le sosaiete faaletagata i le mea ua latou faapea o le ala sili lea i le olaga. O se sailiiliga totoʻa i le talafaasolopito o tagata ma tulaga o le lalolagi i aso nei ua iloa mai ai le moni o le folafolaga tauatua lea o loo faamauina i le Ieremia 10:23: ‘E le o i le tagata e savali ona faatonuina le mea e ui ai o ia.’

¹⁴ “I aso taitasi ua tatou vaaia faamaoniga atili e faamautinoa ai le moni o na upu. Mo se vaega tele, ua lafoaia e tagata le ala a le Atua i le ola. Ua sailia e tagata le mea e foliga e saʻo i o latou lava mata. E matautia iuga ua iu i ai—le malepelepe o olaga faaleaiga, ua tuua ai fanau e aunoa ma ni taiala; le matuā uaʻi atu i sailiga matapeapea o meafaitino, e leai ni iuga lelei e maua ai, na o lagona tiga; o solitulafono ma faiga sauā lē mafaufau, e lē mafaitaulia ola ua aafia ai; o fetauaiga ma taua i le va o ituaiga o tagata, ua fasiotia ai le anoanoai o tagata; le taatele o amioga lē mamā, le matuā faateleina o faamaʻi pipisi ona o feusuaiga lē mamā. Ua na o nisi na o le anoanoai o faafitauli lavelave o loo faalavelavea ai le sailia o le fiafia, le filemu, ma le saogalemu.

15, 16. E tusa ai o le ala a le Atua i le ola, o le ā le filifiliga maumauai sa faamatalaina mai i le iugafono?

¹⁵ “I le mātau atu i mala faanoanoa ua iai le fanau a tagata, ma le latalata mai o le “taua i le aso tele o le Atua e ona le malosi uma lava,” ua taʻua o Amaketo (Faaaliga 16:14, 16), o i tatou o Molimau a Ieova, ua iu ai la tatou faaiuga e faapea:

¹⁶ “Muamua: Tatou te iloa o i tatou e ā Ieova le Atua, ua taitoatasi ma tuuina atu ma le lē mataofiofia i tatou lava ia te ia, ma o le a tatou tausisia le faatuatua lē maluelue i le sauniuniga a Ieova o le togiola e ala mai i lona Alo, o Iesu Keriso. Ua tatou filifili maumauai e savavali i le ala a le Atua i le ola, e ala i le auauna o ni ana Molimau ma gauai atu i lana pule silisili ese e pei ona faatino mai i le pulega a Iesu Keriso.

17, 18. O le ā le tulaga o le a faaauau ona tausisia e Molimau a Ieova e faatatau i tapulaa o amioga tatau ma le auuso Kerisiano?

¹⁷ “Lua: O le a faaauau ona tatou pipii atu i tapulaa maualuluga a le Tusi Paia i amioga tatau ma le faaleagaga. Ua tatou filifili maumauai ina ia lē savavali e pei ona savavali o nuu ese i le valea o o latou mafaufau. (Efeso 4:17-19) O la tatou filifiliga ina ia tausisia pea le mamā i luma o Ieova ma ia lē ponā mai lenei lalolagi.—Iakopo 1:27.

¹⁸ “Tolu: O le a tatou taofimau i lo tatou tulaga faale-Tusi Paia o se auuso Kerisiano i le lalolagi aoao. O le a tatou tausisia le solitu faa-Kerisiano i totonu o atunuu, i le lē faatagaina o i tatou e maileia i feitagaiga po o fevaevaeaiga a lanu, o atunuu, po o ituaiga o tagata.

19, 20. (a) O le ā o le a faia e mātua Kerisiano? (e) O le a faapefea e Kerisiano moni uma ona latou faailoa mai o i latou o soo o Keriso?

¹⁹ “Fa: O i tatou, ua avea ma mātua, o le a tatou totōina le ala a le Atua i loto o a tatou fanau. O le a tatou faataatia se faaaoaoga i le olaga faa-Kerisiano, lea e aofia ai le faitauina e lē aunoa o le Tusi Paia, o suesuega a le aiga, ma se sao atoatoa i le faapotopotoga Kerisiano ma le faiva i le fanua.

²⁰ “Lima: O le a tauivi i tatou uma e atiina ae uiga faale-Atua o loo faataitaia mai e Lē na Faia i tatou, ma o le a tatou taumafai malosi e faataitai atu i ona uiga ma ona ala, e pei ona sa faia e Iesu. (Efeso 5:1) Ua tatou filifili e faatinoina a tatou mataupufai uma i le alofa, lea e mataulia ai i tatou o soo o Keriso.—Ioane 13:35.

21-23. O le ā o le a faaauau ona faia e Molimau a Ieova, ma o le ā ua latou talitonu ma le mautinoa i ai?

 ²¹ “Ono: O le a tatou lē faavaivai e talaʻi atu le tala lelei o le Malo o le Atua, ma le faia o soo, ma o le a tatou aʻoaʻo atu i na soo le ala a le Atua i le ola ma faalaeiau i latou ia latou maua ni toleniga atili mai sauniga a le faapotopotoga.—Mataio 24:14; 28:19, 20; Eperu 10:24, 25.

²² “Fitu: I le avea o ni tagata taitoatasi ma o se faalapotopotoga faalotu, o le a tatou faaauau pea ona faamuamuaina le faia o le finagalo o le Atua i o tatou olaga. I le faaaogaina o lana Afioga, le Tusi Paia, e fai ma o tatou tapasā, o le a tatou lē ui ese ai i le itu taumatau pe i le itu agavale, ma faamautinoa ai o ala a le Atua e sili atu na i lo ala o le lalolagi. Ua tatou filifili maumauai e saili atu i le ala a le Atua i le ola—ma le mausalī ma le faamaoni, i le taimi nei ma e oo i le faavavau!

²³ “Ua tatou faia lenei iugafono talu ai ua tatou mautinoa atoatoa i le folafolaga alofa a Ieova e faapea, o lē e faia le finagalo o le Atua e tumau lea e faavavau. Ua tatou faia lenei iugafono talu ai ua tatou talitonu o le ola e ogatusa ma mataupu silisili o le Tusi Paia, o ana fautuaga, ma ana timaiga e maua ai le ala silisili ona lelei o le olaga i aso nei, ma maua ai se faavae lelei mo le lumanai, ina ia mafai ona tatou taofimau atu i le ola moni. (1 Timoteo 6:19; 2 Timoteo 4:7e, 8) A o le sili o na mea uma, ua tatou faia lenei iugafono talu ai tatou te alolofa ia Ieova le Atua ma o tatou loto atoa, tagata atoa, manatu atoa, ma le malosi atoa!

24, 25. O le ā le tali mai na faaalia i le iugafono na faatū atu, ma o le ā le filifiliga maumauai a i latou o loo savavali i le ala a Ieova?

²⁴ “O i latou uma o loo i le aofia o lenei tauaofiaga o ē fiafia e talia lenei Iugafono, faamolemole ia tali mai IOE!”

²⁵ Na matuā taalili le faitau fia selau o malae tetele o faafiafiaga ma malae taalo i vaega eseese o le lalolagi a o tali mai i latou uma sa iai i na aofia “IOE!” Ua lē masalomia e Molimau a Ieova faapea, o le a faaauau pea ona latou savavali i ala o Ieova. Ua latou faamoemoe atoatoa atu ia Ieova ma faatuatua o le a ia faataunuuina lava ana folafolaga. E tumau ona latou faamaoni atu ia te ia, e tusa lava po o le ā le mea e tupu. Ma ua latou filifili maumauai e faia lona finagalo.

“Ua ʻAu ma i Tatou le Atua”

26. O le ā le tulaga fiafia ua iai i latou o loo savavali i le ala a Ieova?

²⁶ E manatua e Molimau a Ieova upu timai a le faisalamo: “Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le nuu.” (Salamo 37:34) E lē o galo foi ia i latou upu faalaeiau a Paulo: “Afai ua ʻau ma i tatou le Atua, o ai sē faasaga tau mai ia i tatou? O ia lava sa na le faasaoina lona lava Alo, a ua tuuina mai o ia ona o i tatou uma lava, e le foai fua mai ea e ia ia te i tatou mea uma lava faatasi ma ia i se a?” (Roma 8:31, 32) Ioe, afai tatou te savavali pea i le ala a Ieova, o le a ia foai mai ia i tatou “mea uma lava e faafiafia ai.” (1 Timoteo 6:17) E leai se isi nofoaga e sili atu ona lelei na i lo le nofoaga lea ua tatou iai nei—le savavali i le ala a Ieova, faatasi ma o tatou uso ma tuafāfine pele. Faatasi ai ma le lagolago mai a Ieova ia i tatou, seʻi o tatou filifili maumauai e tumau ai pea ia te ia ma tumau seia oo i le iuga, i le mautinoa atoatoa faapea, i lana taimi atofaina, o le a tatou vaai atu ai a o ia faataunuu vaega uma taitasi o ana folafolaga.—Tito 1:2.

[Faaopoopoga i lalo]

E te Manatua?

□ O le ā e manaomia mo se Kerisiano ina ia savali ai i le ala a Ieova?

□ Aisea tatou te manaomia ai ona ati ae le faatuatua ia Ieova ma le alofa faamaoni atu ia te ia?

□ O ā fesoasoani o loo maua a o tatou savavali i le ala a Ieova?

□ Taʻu mai nisi o vaega matilatila o le iugafono lea na taliaina i Tauaofiaga o “Le Ala a le Atua i le Ola.”

[Fesili mo le Suʻesuʻega]

[Ata i le itulau 18]

Na talia se iugafono tāua i Tauaofiaga Itumalo ma Tauaofiaga Faava-o-atunuu o “Le Ala a le Atua i le Ola”