“Loʻu Agaga e, ia e Faamanū Atu ia Ieova”

“I MASINA na seʻi mavae atu nei e foliga mai ua tauāu ina lē uigā laʻu faiva ma ua leai foi se olioli e maua mai ai,” ua faapea mai ai Nancy. * Ua pe ā ma le sefulu tausaga talu ona auauna o se paeonia, o sē faalauiloa le tala lelei faataimi atoa. Peitai ua ia faaopoopo mai: “Ou te lē fiafia i le mea o loo tupu ia te au. E foliga mai ua na ona ou faalauiloa le feau o le Malo i se auala e aunoa ma se aasa ma ua lē sau mai le loto. O le ā e tatau ona ou faia?”

Seʻi iloilo foi le tulaga o Keith, o se toeaina i se faapotopotoga o Molimau a Ieova. Pagā se faateia o lana faalogo i le faapea atu o lana avā: “Atonu o iai se mea o loo alu i ai lou mafaufau. I le tatalo lea faatoʻā maeʻa ona fai, ua e faafetai ai mo meaʻai, e ui lava e lē o le taimi lenei o se meaʻai!” Ua tautino ane e Keith faapea: “Ua ou iloa o aʻu tatalo ua pei lava ua tau ina fai.”

E mautinoa, e te lē manao e aunoa au faaupuga e vivii atu ai ia Ieova ma ni faalogona māfana ma leai se uiga. I sona faaeseesega, e te manao i au faaupuga o viiga e sau mai le loto, ia puna mai se lagona loto faafetai. Peitai, o lagona e lē o se mea e mafai ona faaaogā ma toe toese e pei o se ofu. E tatau ona sau mai totonu o le tagata. E faapefea e se tasi ona lagona se loto faafetai? Ua saunia mai e le Salamo 103 le malamalamaga mo i tatou e faatatau i lenei mea.

Na tusia e le tupu o Tavita o Isaraelu anamuā le Salamo 103. Na ia faatomua mai i upu e faapea: “Loʻu agaga e, ia e faamanū atu ia Ieova, o mea uma foi o i totonu ia te au ia faamanū i lona suafa paia.” (Salamo 103:1) Ua faapea mai se tasi lomiga, “O le upu faamanū, e pei ona faasino atu i le Atua, o lona uiga ia vivii atu, e faailoa mai ai i taimi uma se lagona malosi o le alofa mo ia faapea foi ma se uiga o le loto faafetai.” O le naunau e vivii ia Ieova ma se loto e tumu i le alofa ma le talisapaia, na uunaia ai e Tavita lona lava tagata—ia lava—ina ia “faamanū atu ia Ieova.” Ae o le ā na faatupuina lenei faalogona māfana i le loto o Tavita agaʻi i le Atua o loo ia tapuaia?

Ua faaauau mai Tavita faapea: “Aua foi neʻi galo se mea e tasi o ana mea alofa [mea alofa a Ieova].” (Salamo 103:2) O le lagona o le loto faafetai ia Ieova e mautinoa e fesootai atu ma le mafaufau loloto ma le talisapaia o “ana mea alofa.” O ā tonu mea alofa a Ieova o loo mafaufau i ai Tavita? I le tagai atu i le foafoaga a Ieova le Atua, e pei o le lagi ua lilofia i fetu i se po maninoa, e mautinoa le faatumulia ai o le loto i le faafetai mo Lē na Foafoaina Mea. Na matuā faagaeetia Tavita i le faatumulia o le lagi i fetu. (Salamo 8:3, 4; 19:1) E ui i lea, i le Salamo 103, ua manatua ai e Tavita se isi ituaiga o gaoioiga a Ieova.

E “Faamagaloina Au Amio Leaga Uma Lava” e Ieova

I lenei salamo, na faamatala ai e Tavita gaoioiga o le alofa agalelei o le Atua. E faasino atu i le gaoioiga sili i nei gaoioiga, ua ia pese ai faapea: ‘E faamagaloina au amio leaga uma lava e Ieova.’ (Salamo 103:3) Na mautinoa le iloa e Tavita o lona lava tulaga agasala. Ina ua maeʻa ona feagai o ia ma le perofeta o Natano e faatatau i lana faiā mulilua ma Patisepa, na tautino atu e Tavita e faapea: “Ua ou agasala atu ia te oe [Ieova], na o oe lava; ua ou faia foi lenei mea leaga i ou luma.” (Salamo 51:4) Faatasi ai ma se loto ua nutimomoia, na ia faia ai se aioiga e faapea: “Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea oʻu solitulafono. Ia e matuā fufulu mai ia te au i laʻu amio leaga, ma ia e faamamā mai ia te au i laʻu  agasala.” (Salamo 51:1, 2) Maeu se loto faafetai o Tavita sa iai ona ua faamagaloina! I le avea ma se tagata lē lelei atoatoa, na ia faia ai isi agasala i lona olaga, ae sa ia faaalia pea le salamō, talia aoaiga, ma faasaʻoina ona ala. O le mafaufau i gaoioiga ofoofogia o le agalelei o le Atua ia te ia na uunaia ai Tavita e faamanū atu ia Ieova.

Pe tatou te lē o agasala foi? (Roma 5:12) E oo lava i le aposetolo o Paulo na auē mai e faapea: “Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino. Aue o aʻu le tagata malaia! O ai sē laveai ia te au ai le tino o lenei oti?” (Roma 7:22-24) Maeu se loto faafetai e mafai ona ia i tatou ona e lē o faitaulia e Ieova a tatou agasala! E na te soloiesea ma le fiafia na agasala pe afai tatou te salamō ma saili le faamagaloga.

Ua faamanatu e Tavita ia te ia lava e faapea: “O [Ieova] lē faamaloloina ou maʻi atoa uma.” (Salamo 103:3) Talu ai o le faamaloloina o se gaoioiga o le toe faafoisiaga, e aofia ai la mea e sili atu na i lo o le faamagaloina o mea sese. E aofia ai le aveesea o “maʻi”—o āuga leaga o le sese o o tatou ala. I le lalolagi fou o le a ia faia, o le a aveesea moni ai e Ieova āuga faaletino o le agasala, e pei o le maʻi ma le oti. (Isaia 25:8; Faaaliga 21:1-4) Peitai, e oo lava i aso nei, ua faamaloloina ai e le Atua i tatou mai i maʻi faaleagaga. Mo nisi, o loo aofia ai se loto fuatiaifo leaga, ma le leai o se faiā ma ia. “Aua foi neʻi galo” mea ua uma ona faia e Ieova mo i tatou taitoatasi e tusa ai ma lenei mea.

O Ia ua “Faaolaina Mai Lou Ola”

O “[Ieova] ua faaolaina mai lou ola ai le tuugamau,” ua pese ai Tavita. (Salamo 103:4) O “le tuugamau” o le nofoaga lea o loo tanu ai tagata—Seoli, po o Heitisi. E oo lava a o lei avea ma tupu ia Isaraelu, na iloa ai e Tavita lona lamatia i le oti. Mo se faaaoaoga, na tupu aʻe i le tupu o Isaraelu o Saulo se ʻinoʻino ma fia faaoo le oti ia Tavita ma taumafai ai e fasiotia o ia i ni taimi eseese. (1 Samuelu 18:9-29; 19:10; 23:6-29) Na mananao foi Filisitia e fasiotia Tavita. (1 Samuelu 21:10-15) Peitai o taimi uma lava, na laveaiina ai e Ieova o ia mai le “tuugamau.” Maeu se loto faafetai sa oo ia Tavita pe a manatuaina nei mea na faia e Ieova!

Ae faapefea oe? Pe na lagolagoina oe e Ieova i vaitaimi o mafatiaga po o taimi ua toesea ai ni mea po o sē pele ia te oe? Po ua e iloaina ea ni faaaoaoga o lona laveaiina mai o ola o ana Molimau faamaoni mai le tuugamau o Seoli i o tatou taimi? Atonu ua faagaeetia oe i le faitauina o tala e uiga i ana gaoioiga laveai o i itulau o lenei mekasini. Aisea e lē faaaluina ai le taimi e toe tomānatu ai ma le talisapaia o nei mea na faia e le Atua moni? Ma o le mea moni, o i tatou uma ua iai mafuaaga e ao ai ona loto faafetai ia Ieova mo le faamoemoe o le toetu.—Ioane 5:28, 29; Galuega 24:15.

Ua aumaia e Ieova ia i tatou le ola ma mea e mafai ona olioli ma aogā ai le olaga. Ua faalauiloa mai e le faisalamo e faapea o le Atua o “lē faapaleina oe i le alofa ma le alofa mutimuti vale.” (Salamo 103:4) I taimi tatou te moomia ai se fesoasoani, e lē tuulafoaiina e Ieova i tatou ae fesoasoani mai ia i tatou e ala i lana faalapotopotoga vaaia ma toeaina tofia, po o leoleo mamoe i le faapotopotoga. O lena fesoasoani ua mafai ai ona tatou faafetaiaia tulaga faigata e aunoa ma le leiloa ai o lo tatou tulaga faaaloalogia totino ma le mamalu. E matuā manatu alofa leoleo mamoe Kerisiano i mamoe. E latou te faamalosia ē mamaʻi ma mafatia ma faia mea uma latou te mafaia ina ia toe faafoisia mai ai i latou ua pauu. (Isaia 32:1, 2; 1 Peteru 5:2, 3; Iuta 22, 23) Ua uunaia e le agaga o Ieova nei leoleo mamoe ina ia agalelei ma alolofa i le lafu. O lona “alofa ma le alofa mutimuti vale” e mautinoa e pei o se pale e faamatagofieina ai i tatou ma aumaia ai ia i tatou le mamalu! Aua lava neʻi faagaloina mea na ia faia, seʻi o tatou faamanū ia Ieova ma lona suafa paia.

A o faaauau le timaia o ia lava, ua pese mai le faisalamo o Tavita e faapea: “O [Ieova] e malie ai lou manao i mea lelei; o le faafouina lou taulealea faapei o le aeto.” (Salamo 103:5) O le ola e aumaia e Ieova o se ola e faamalieina  ma olioli ai. Ioe, o le poto i le upu moni lava ia o se oa e lē mafaatusalia ma o se puna o le olioli sili! Ma seʻi manatu i le tele o le faamalieina e maua i le galuega ua aumaia e Ieova ia i tatou, le galuega talaʻi ma le faia o soo. Maeu se fiafiaga e iai i le mauaina o se tasi e fiafia e aʻoaʻoina e uiga i le Atua moni ma fesoasoani i lea tagata ina ia iloaina Ieova ma faamanū ia te ia! Peitai, tusa lava pe faalogo pe lē faalogo se tasi o lou vaipanoa, o se faaeaga sili le faia o se sao i se galuega e fesootai ma le faapaiaina o le suafa o Ieova ma le faasilisilia o lana pule silisili ese.

A o faia pea le galuega o le faalauiloa o le Malo o le Atua, o ai sē o le a lē vaivai ma oo ina mou atu le malosi. Peitai o Ieova na te faafouina pea le malosi o ana auauna, ma faia i latou e “pei o aeto,” e iai o latou apaau malolosi e felelei maualuluga atu ai i le vanimonimo. Maeu se loto faafetai e mafai ona ia i tatou ona o le saunia e lo tatou Tama alofa faalelagi o lena “malosi” ina ia mafai ai ona tatou tauaveina pea la tatou faiva ma le faamaoni i lea aso ma lea aso!—Isaia 40:29-31.

Seʻi fai ma faataitaiga: E iai se galuega totogi faataimi atoa a Kalala ma e faaaluina foi pe ā ma le 50 itula i masina taitasi i le faiva i le fanua. Ua ia faapea mai: “I nisi taimi ou te lagona ai le vaivai, ae ou te faamalosia loʻu alu i le faiva i le fanua ona ua uma ona faia ni fuafuaga e galulue faatasi ma se isi. Ae o le taimi lava ou te alu ai, ou te lagonaina pea le malosi faafouina.” Atonu foi ua e tofo i le malosi e maua mai ona o le lagolagoina tauatua o le faiva faa-Kerisiano. Talosia ia uunaia oe e faapea atu, e pei ona faia e Tavita i upu amata o lana salamo: “Loʻu agaga e, ia e faamanū atu ia Ieova, o mea uma foi o i totonu ia te au ia faamanū i lona suafa paia.”

E Laveaiina e Ieova Ona Tagata

Ua pese foi faapea le faisalamo: “E faia e Ieova mea tonu, ma faamasinoga mo e ua sauaina uma lava. Na ia faailoa ona ala ia Mose, o ana galuega i le fanauga a Isaraelu.” (Salamo 103:6, 7) Atonu, na mafaufau Tavita i le “sauaina” o tagata Isaraelu e tagata faasaua Aikupito i aso o Mose. O le mafaufau loloto i le auala na faalauiloa ai e Ieova ia Mose ona ala e laveaiina ai na tatau ona faatupuina ai se lagona o le loto faafetai ia Tavita.

E mafai ona uunaia i tatou ia iai lena loto faafetai e ala i le tomānatu i feutagaiga a le Atua ma tagata Isaraelu. Ae e lē tatau foi ona  tatou tuulafoaia le manatunatu i mea na tutupu i auauna a Ieova i aso nei, e pei o i latou ia o loo taʻua i le mataupu 29 ma le 30 o le tusi Jehovah’s Witnesses—Proclaimers of God’s Kingdom. O tala o loo faamatalaina ai i lenei tusi ma isi foi lomiga a le Sosaiete o le Olo Matamata ua fesoasoani ia i tatou e iloaina le auala ua fesoasoani ai Ieova i ona tagata i aso nei e onosaia le faafalepuipuiina, sauaga mai vaega tetee, faasāsāga, nofoaga o faasalaga, ma nofoaga e faapologaina ai. Na iai foi tofotofoga i atunuu o loo gāpā ai taua, e pei o Burundi, Laiperia, Rwanda, ma le atunuu sa taʻua muamua o Yugoslavia. I so o se taimi e tulai mai ai sauaga e fesoasoani pea le aao o Ieova i ana auauna faamaoni. I le tomānatu i nei mea na faia e lo tatou Atua sili, o Ieova, e mafai ai foi ona ia i tatou lagona ia na ia Tavita ona o lona mafaufau loloto i le tala o le laveaiina mai Aikupito.

Seʻi mafaufau foi i le auala na laveaiina ai ma le agaalofa e Ieova i tatou mai le avega mamafa ona o le agasala. Na ia saunia le “toto o Keriso” e ‘faamamāina o tatou loto fuatiaifo ai galuega e oti ai.’ (Eperu 9:14) Pe a tatou salamō mai i a tatou agasala ma saili le faamagaloga e faavae i le toto masaa o Keriso, e faamamao ese ai e le Atua o tatou sese mai ia i tatou—“e pei ona vava mamao o sasae ma sisifo”—ma toe talileleia mai ai i tatou e ia. Ma seʻi mafaufau i sauniuniga a Ieova e auala i sauniga faa-Kerisiano, faatasitasiga e atiina ae ai, leoleo mamoe i le faapotopotoga, ma lomiga e faavae mai le Tusi Paia ua tatou maua e ala mai le “auauna faamaoni ma le mafaufau.” (Mataio 24:45) Pe ua lē fesoasoani ea nei mea ua faia e Ieova ia i tatou e faamalosia ai la tatou faiā ma ia? Ua folafola mai e Tavita: “E alofa mutimuti vale ma alofa fua mai Ieova; e tele gese lona toasa, a e tele lona alofa. . . . E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga.” (Salamo 103:8-14) O le mafaufau loloto i le tausiga alofa a Ieova e mautinoa e mafai ona uunaia ai i tatou e vivii ia te ia ma faamamaluina lona suafa paia.

“Faamanū Atu ia ia Ieova o Mea Uma na Ia Faia”

Pe a faatusatusa atu i le soifua pea o Ieova, o le “Atua o le Faavavau,” e matuā puupuu ai lava “aso” o le “tagata”—“e pei o le mutia.” Peitai ua manatua ma le talisapaia e Tavita e faapea: “A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau, i e tausi i lana feagaiga, o e manatua foi ana poloaiga e fai ai.” (Kenese 21:33, le faaopoopoga i le pito i lalo, NW; Salamo 103:15-18) E lē faagaloina e Ieova i latou o ē matatau ia te ia. I le taimi atofaina, o le a tuuina atu ai e Ieova le ola e faavavau ia te i latou.—Ioane 3:16; 17:3.

I le faailoaina mai o lona talisapaia mo le tulaga tautupu o Ieova, ua faapea mai Tavita: “Ua faatumauina e Ieova o lona nofoālii i le lagi; ua pule aoao foi lona malo.” (Salamo 103:19) E ui sa vaaia le faailoaina mai o le tulaga tau tupu o Ieova mo se taimi e ala i le malo o Isaraelu, ae o lona nofoalii o loo iai moni i le lagi. Ona o ia o le Fai Foafoaga, ua avea ai Ieova ma Pule Silisili Ese o le vateatea ma ua faatinoina ai lona finagalo tauatua i le lagi ma le lalolagi e tusa ai ma ana fuafuaga.

Na augani atu foi Tavita i agelu faalelagi. Ua ia pese e faapea: “Faamanū atu ia ia Ieova outou ana agelu o e malolosi tele, o e faia lana afioga, o loo faalogo i lona siufofoga. Faamanū atu ia ia Ieova outou ana ʻau uma lava, o outou ana auauna, o e faia lona finagalo. Faamanū atu ia ia Ieova o mea uma na ia faia i mea uma lava ua pule i ai o ia. Loʻu agaga e, ia e faamanū atu ia Ieova.” (Salamo 103:20-22) Pe lē avea ea lo tatou tomānatu i gaoioiga o le alofa agalelei o Ieova mo i tatou e uunaia ai foi i tatou e faamanūina o ia? O lea lava! Ma e mafai ona tatou mautinoa e faapea o o tatou leo i le viiaina totino o le Atua o le a iai faatasi i le aufaipese tele o ē tapuai e aofia ai agelu amiotonu. Tau ina ia tatou vivii atu ma le loto atoa i lo tatou Tamā faalelagi, ia lē aunoa ona viiviia o ia. Ma le mautinoa lava, seʻi o tatou teulotoina upu a Tavita, “Loʻu agaga e, ia e faamanū atu ia Ieova.”

[Faaopoopoga i lalo]

[Ata i le itulau 23]

Sa mafaufau loloto Tavita i gaoioiga o le alofa agalelei o Ieova. Pe e te faia foi faapefea?