O se Asiasiga Iloga Faatalafaasolopito ua Olioli ai se Motu

O Cuba, o se motu matagofie i le atu Karipiane na tofo talu ai nei i se vaitaimi e lē mafaatusalia o se faafouina faaleagaga. O le taufaaiuiuga o le 1998 na aumaia ai se faamanuiaga ua leva ona faatalitalia mo Molimau a Ieova o loo nonofo i lenei atunuu o atu motu o i le itu i mātū o le Sami Karipiane. O le taimi muamua lea i le silia ma le 30 tausaga, ua asiasi atu i ai sui o le Vaega Pule o Molimau a Ieova, ma sa aufaatasi atu i ai ma le toasefululima o isi sui usufono. O sui asiasi atu o tagatānuu o Ausetalia, Italia, Oseteria, Niu Sila, Peleseuma, Peretania Tele, ma Puerto Rico.

O SE mea mataina lenei na tupu mo le 82,258 o tagata talaʻi o le Malo iina ma le 87,890 o ē na aufaatasi ma i latou i le faamanatuina o le Talisuaga Afiafi a le Alii i le tau e totogo ai mea i le 1998.

Mai ia Tesema 1 seia oo i le 7, i le 1998, na asiasi atu ai Lloyd Barry, John Barr, ma Gerrit Lösch i le Aiga Peteli i Havana ma auai i nisi o Tauaofiaga Itumalo na faia i Cuba o “Le Ala a le Atua i le Ola.” Sa latou fiafia ona ua mafai ona feiloai atu i toeaina femalagaai ma oo ina masani lelei ai ma tagata mautofiga o le malo i Cuba.

Na faapea mai John Barr: “O le mea sili lea ona matilatila faatiokarate i loʻu olaga ma laʻu avā. E matuā faatumulia o tatou uso ma tuafāfine pele i Cuba i le maelega mo le upu moni! Na ou alu ese mai ma lagona e faapea o lo tatou auuso i le lalolagi aoao e matuā faapelepeleina moni lava!” “O lenei vaiaso mataina ua  fesoasoani ia te au e iloa lelei ai le tulaga o loo iai o tatou uso iina,” o le faaopoopo mai lea a Lloyd Barry.

A o faagasolo tausaga e lima ua tuanai, na tuuina atu ai i Molimau a Ieova le saolotoga ua faateleina tau tapuaiga i Cuba, ma o faamatalaga na faia e tagata mautofiga o Cuba e taʻitaʻia ai se tasi e talitonu faapea e latou te talotalo ia faaauau pea i lenei auala.

Ia Setema 1994, na amatalia ai le lomiaina o tusi i le Aiga Peteli i Havana. Na toe mafai ai ona saoloto Molimau a Ieova e faatasitasi ma molimau atu mai lea fale i lea fale. Mulimuli ane, i le 1998, na faatagaina ai e alii ofisa o le malo lenei asiasiga a sui usufono faava-o-atunuu e toʻa 18 o Molimau a Ieova, e aofia ai ma sui e toatolu o le Vaega Pule.

Toe Aufaatasiga Fiafia

Ina ua taunuu sui usufono i le malae vaalele i José Martí i Havana, sa faafeiloaia ma le māfana e se vaega o tagata mautofiga o le atunuu ma se vaega mai i le Aiga Peteli, sa faatasi ai ma i latou se uso na ia manatuaina le asiasiga mulimuli i Cuba a se sui o le Vaega Pule—o Milton Henschel—i le 1961. Sa na o le 12 tausaga o le uso i lena taimi; ae i le taimi nei ua avea nei o ia ma ovasia femalagaai.

Ina ua taunuu atu sui usufono i le Aiga Peteli, sa faafeiloaia i teu o gladiolus, rosa, jasmine, ma daisies lanu samasama ma mūmū, na totōina faapitoa e se uso mo lenei asiasiga. Na maligi ifo loimata a o faafeiloaia e le aiga Peteli ia sui usufono. Mulimuli ane, na latou taumamafa ai i fasipuaa sa taoina i le auala a Cuba lava latou, o araisa ma pī, salati, yucca ma mojo (o se sosi e faia i le aniani saina ma le suauu olive), ma fualaau aina fou faatoʻā tau mai. Ina ua maeʻa le taumafataga ona faia lea e tagata taitoatasi o le Vaega Pule se lauga faalaeiau i le tāua o le auaunaga i Peteli. Sa faapitoa ona faagaeetia i faamatalaga a le uso o Lösch, a o ia tautala atu i uso i le gagana Sepania. Ua faia aʻe le aiga Peteli i tagata tauofo e galulue tumau e toʻa 48 ma le au galulue tauofo faavaitaimi e toʻa 18.

E ui o tusi ma Tusi Paia o loo lolomiina i Italia mo uso i Cuba, ae o lomiga e lē lanu o mekasini o Le Olomatamata ma le Ala Mai! e faia i le atunuu lava ia, i masini lomitusi e lua. O le galulue i itula uumi ma le faaaogā o le malosi faaletagata e faia ai galuega i fale pumoomoo e manaomia tele ina ia saunia ai mekasini uma o  loo manaomia. E faatāuaina e tagata tauofo le tautele o le auaunaga ia Ieova i se auala faapitoa.—2 Korinito 4:7.

Mea Mataina o le Tauaofiaga

Na vaevaeina sui usufono e toʻa 18 i vaega e tolu ina ia auai i tauaofiaga itumalo sa faia i nofoaga e tolu—o Havana, Camagüey, ma Holguín. I aso taitasi e tolu, sa valaaulia ai se vaega toatele o uso ma tuafāfine, e aofia ai le tele o toeaina ma paeonia, ina ia auai i ia nofoaga taitasi. Na taʻuina atu i Molimau o lea vaipanoa faapea o le a avea lena mea o se sauniga faapitoa, ae e latou te lei iloa faapea o le a auai iina sui o le Vaega Pule. Seʻi manatu i lo latou faateia i le vaaia o nei uso pele ma a latou avā a o ō ese mai i fafo mai i pasi togipau i le taeao o le Aso Faraile!

Sa faia tauaofiaga i fale taalaelae na faia e uso i le faatagaga a tagata mautofiga o le malo. I le mea na faia ai le tauaofiaga i Havana, na vaneina ai i se tasi o maa i le mea e ulufale atu ai le “Salamo 133:1.” Na faamanatu atu ai i uso upu o loo i lena mau: “Faauta, o le mea e matuā lelei ma le matagofie lava, pe a nonofo faatasi lava o uso.” O le mea moni, a o faagasolo le tauaofiaga, sa lelei ma matagofie le aufaatasiga a Kerisiano i lena nofoaga.

Sa faailoa mai e i latou na asiasi atu, le lelei o le tauaaoina o lauga ma faatalanoaga, ma sa latou maofa i le faiga o le tala, lea na faavae i le tala faale-Tusi Paia o loo i le Tanielu mataupu e 3, sa faatulaga i se vaaiga i Papelonia anamua. Sa faamatalaina e se tuafafine faapea: “Sa matuā lelei uma tagata o le tala, ma sa fetaui lelei leo i le lipine ma tāga a tagata ua e lē iloaina ai sa pueina muamua na leo. . . . O le tagata Papelonia leaga sa matuā foliga leaga moni lava, ma o tagata Eperu e toatolu na tutumau ma maumauai.”

O sui o le Matagaluega o Mataupu Faalelotu ma isi tagata maualuluga o le malo na ō ane e vāai i tauaofiaga, na latou faamālō i uso i lo latou maopoopo ma amioga lelei. Sa faailoa atu e le uso o Barry lona loto faafetai mo faiga sili ona lelei na faasalafa atu i sui usufono e tagata mautofiga o le malo o Cuba. O le tutulai o le aofia ma patipati o latou lima, e masani ona faia mo ni minute le uumi, na faaalia ai e uso lo latou talisapaia o lauga, faapea ai foi ma alii ofisa o le malo mo le faatagaina o tauaofiaga. Na taʻua faapea e se tasi o aiga Kerisiano: “Ua sili atu lenei i le mea na matou faatalitalia—o se tamai tauaofiaga faava-o-atunuu! Ua matuā matagofie tele, auā ua faaalia ai le malosi tele o le mana o Ieova e faataunuuina moni ai ana folafolaga.”

Na aumaia foi e tauaofiaga se avanoa mo isi e iloa atili ai Molimau. Na auai se tasi o avepasi i le tauaofiaga i le Aso Toonai faapea foi ma le Aso Sa. Na ia taʻua faapea sa ia faalogo i le tele o faamatalaga e faatatau i Molimau a Ieova, ae ua ia iloaina nei o i latou o tagata e lelei, ma tausisia le filemu.

“Mea o le a Lē Mafai Ona Matou Faagaloina”

Na faagaeetia sui usufono i tagata Cuba i lo latou māfana ma le faaleuo. O tagata Cuba e toaaga, e gauai i taiala, ma agalelei. Na taʻua e se tasi tagata usufono faapea: “E sili atu i le faatasi, ona ofoina mai ia i matou e tagata e matuā lē masani ai lava ni fesoasoani.”

Na matuā faagaeetia le au usufono i le faamaoni, fiafia, ma le alofa na faaalia e uso Molimau i Cuba. E ui lava i toatuga uigaese, ae sa latou faia lava Ieova ma o latou malu. (Salamo 91:2) Na faapea le faamatalaga a John Barr: “Sa tele mea lelei na faateia ai aʻu i laʻu malaga muamua i Cuba—o le matagofie o le atunuu, le pulea lelei o tagata na ou feiloai i ai, ae sili i na mea uma, o le olioli faatasi o Molimau i Cuba. Ou te lei faalogo muamua lava ua faapea ni pesega mai le loto o a tatou pese o le Malo ma patipati uumi pe a oo ina pāʻia o latou loto i mea faaleagaga! O mea na o le a lē mafai ona matou faagaloina. E matou te talisapaiaina pea na mea.”

Ua taʻua i le Salamo 97:1 e faapea: “Ina olioli ia . . . le vao nuu o tu matafaga.” O le mea moni, o Molimau a Ieova o loo nonofo i le motu o Cuba ua olioli i lo latou saolotoga ua faateleina e tapuai ai i le Atua, ma le asiasiga iloga faatalafaasolopito a nei sui usufono faava-o-atunuu.

[Ata i le itulau 8]

E toatele aiga na auai i Tauaofiaga Itumalo faapitoa o “Le Ala a le Atua i le Ola” i Cuba

[Ata i le itulau 8]

Sa toe tatalaina le Aiga Peteli i Havana i le 1994

[Ata i le itulau 8]

Sui o le Vaega Pule o loo sainia meaalofa o Tusi Paia mo tagata mautofiga o le atunuu