Pe E te Faaalu se Taimi ma Lou Aiga?

“E ALOFAGIA Tamā Iapani—E Ui Lava e Pisi i Galuega ma e Lē Taaalo ma a Latou Fanau.” I ni nai tausaga ua mavae, na aliai mai ai lenei ulutala i le nusipepa Iapani o le Mainichi Shimbun. Na faapea mai le mataupu, e 87.8 pasene o tamaiti Iapani o loo auai i se suesuega faalemalo na faaalia le faanaunauga e latou te tausia o latou tamā i le lumanai. Ae peitai, i le lomiga faa-Peretania o lea nusipepa, na aliai mai le mataupu lava lea i lalo o se isi ulutala. E faapea ona faitauina, “Tamā ma Atalii: O se Tulaga Tuulafoaiina.” E lē pei o le nusipepa Iapani, na faamatilatila mai ai e le nusipepa se isi vala o le suesuega lava lea: O aso faigaluega taitasi, sa faaalu ai e tamā Iapani le na o le 36 minute ma a latou fanau. I le faatusatusa atu i ai, sa faaalu ai e tamā i Siamani i Sisifo le 44 minute ma a latou fanau i se aso o le vaiaso, ma i le Iunaite Setete, o le aofaiga, e 56 minute.

 E lē na o tamā e aofia ai i le itiiti o se taimi e faaaluina ma a latou fanau. Ua faatoateleina foi tinā o ē faigaluega i fafo atu o le aiga. Mo se faaaoaoga, e toatele tinā nofo toatasi e tatau ona faigaluega totogi auā le tausiga o le aiga. Ua iu ai ina faapena ona faaitiitia le aofaiga o le taimi ua faaalu e mātua—tamā ma tinā—ma a latou fanau.

O se suesuega na faia i le 1997 o le sili atu i le 12,000 tamaiti ua taʻi sefulu ma ona tupu tausaga i Amerika, na iloa ai e faapea, o tamaiti talavou o ē sa māfana la latou faiā ma o latou mātua e foliga mai o le a faaitiitia le aafia i mafatiaga o faalogona ootia, le manatu e pule i le ola, ma le auai i faiga sauā, po o le faaaogā o vailaau faasaina e faapologaina ai. Ma na faapea mai se tasi o tagata suesue atamai na aafia ai i le suesuega tele: “E lē mafai ona e maua se lagona o le fesootai māfana atu i tamaiti seʻi vaganā ua e faaalu se taimi tele faatasi ma i latou.” O le faaalu o le taimi ma lau fanau ma talanoa ma i latou e tāua tele.

Le Leai o ni Fesootaiga

E sili ona lamatia fesootaiga i aiga ia e nofo ese ai se matua mai le aiga ona o le mamao o le mea e faigaluega ai. O le mea moni, e lē na o aiga e nofo ese se matua i se mea mamao o loo maua ai le leai o ni fesootaiga. O nisi mātua, e ui lava e nonofo i le aiga, ae e ō atu e faigaluega a o lei feala a latou fanau ma e toe foi mai i le aiga ua momoe tamaiti. Ina ia faafetaui le leai o ni faatasiga, ua faaalu ai e nisi mātua le taimi ma o latou aiga i faaiuga o vaiaso ma aso mālōlō. Ua latou talanoa e uiga i le faaaluina o le taimi “aogā” ma a latou fanau.

Peitai, pe faamata o le laitiiti o le taimi lea e mafuta ma fanau e mafai ona faapaleni i le taimi aogā lea ua faaaluina? Ua tali mai le tagata poto faapitoa o Laurence Steinberg e faapea: “I le tulaga lautele, o tamaiti o ē faaalu le tele o le taimi ma o latou mātua e sili atu ona lelei na i lo o tamaiti e laitiiti le taimi e faaalu ma o latou mātua. E foliga mai e matuā faigata lava ona faapaleni lena lē lava o le taimi. E foliga mai ua soona faamamafa naua le manatu o taimi aogā.” O le lagona moni lava lena o se tasi fafine mai Burma. O lana tane—o se tasi e pei o isi tamaloloa uma i Iapani—e sau i le fale mai le galuega i le ta o le tasi, po o le lua i vaveao uma. E ui lava e na te faaaluina le taimi ma lona aiga i faaiuga o vaiaso, ae ua faapea mai lona toalua: “O le iai i le fale i Aso Toonai ma Aso Sa e lē mafai ona faapaleni ai le avanoa lea e lē o iai faatasi ma le aiga i le vaiaso atoa. . . . Faamata e mafai ona e misia taumafataga uma i aso o le vaiaso ae faatoʻā taumafa ʻaiga uma mo le vaiaso i Aso Toonai ma Aso Sa?”

 E Manaomia se Taumafaiga Mataalia

O le tausia o ni fesootaiga lelei i totonu o le aiga, e faigofie lava ona tautala ai na i lo o le faatinoina. O le manaomia o mea e ola ai ma le saunia o mea mo le aiga, ua lē faigofie ai mo se tamā po o se tinā faigaluega ona faaalu le taimi faatasi ma le aiga. O le toatele o i latou o ē e tusa ma o latou tulaga e manaomia ai ona ō ese mai le aiga, e fesootai lava e lē aunoa i le telefoni po o le tusi atu foi o ni tusi. Ae e tusa lava pe o iai faatasi i le aiga pe leai, e manaomia lava ni taumafaiga mataalia ina ia tausia ai pea ni fesootaiga lelei faaleaiga.

O mātua o ē e lē fesootai ma o latou aiga o le a tauia lava ona o lo latou faatamala. O se tamā o lē sa laitiiti se taimi na faaalu ma lona aiga, e lē aai faatasi ma i latou, na fesagai ma ni iuga matuiā. Sa oo ina avea lona atalii o se tagata sauā, ma na maua lona afafine o gaoi i se faleoloa. A o sauni le tamā e alu i le malae tapolo i le taeao o se tasi Aso Sa, na faaalia e le atalii ni uiga faalii, ma eē atu: “Pe na o le tinā ea se matua i lenei aiga? O Tinā lava e faia faaiuga o mea uma i le aiga. Tamā, e lē tāitai lava ona e . . . ,” o le tagi talatala mai lea a le tama.

O na upu na amata ai ona mafaufau le tamā. Na iu ai ina ia filifili e faapea, i le amataga, e tatau ona latou aai faatasi ma le aiga i le taumafataga o le taeao. I le taimi muamua, sa na o ia ma lana avā na aai. Sa faasolosolo mālie lava ona aufaatasi atu tamaiti, ma na avea le laulau o le taumafataga i le taeao ma siomaga o talanoaga. O lenei mea na iu atu ai ina aai faatasi i le taumafataga o le po. I lea, na faia ai e le tamaloa se taumafaiga na faasaoina ai lona aiga mai le matuā taapeape.

Fesoasoani Mai le Afioga a le Atua

Ua faalaeiauina e le Tusi Paia mātua ina ia faaalu se taimi e talanoa ai ma a latou fanau. Na faatonuina le nuu o Isaraelu e ala i le perofeta o Mose e faapea: “Isaraelu e, faalogologo mai ia, o Ieova lo tatou Atua, o Ieova e toatasi lava ia. Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa. Ia i ai foi i lou loto o upu nei ou te fai atu ai ia te oe i le aso nei. Ia e matuā aʻoaʻo soo ai i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi.” (Teuteronome 6:4-7) Ioe, o i tatou ua avea ma  mātua e manaomia ona tausolomua i le faaaluina o le taimi ma o tatou aiga pe afai tatou te mananao e tāmau afioga a le Atua i mafaufau ma loto o le fanau.

O le mea ua matauina, o le suesuega lea na taʻua i le amataga faapea na faia i le 1997 i talavou i Amerika e sili atu i le 12,000, ua faaalia ai e faapea “i le toetoe lava 88% . . . o i latou na faapea mai e iai a latou lotu, sa manatu i le tāua o le lotu ma le tatalo e faapea o se puipuiga mo i latou.” Ua iloa e Kerisiano moni e faapea, o le avatua o faatonuga saʻo faalelotu i le aiga, ua puipuia ai talavou mai le aafia i mea e pei o le faaaogaseseina o fualaau faasaina ma le ava malosi, mafatiaga i faalogona, pule i le ola, faiga sauā, ma isi mea faapena.

Ua lagona e nisi mātua e faapea, e faigata tele ona maua se taimi e faaalu faatasi ma o latou aiga. Ae maise lava i tinā nofo toatasi, o ē e fiafia e faaalu le taimi faatasi ma a latou fanau, ae e tatau ona faigaluega. E mafai faapefea ona latou sema mai se taimi tāua ina ia faatasi ai ma o latou aiga? Ua timai mai le Tusi Paia: “Ia e taofi mau i le poto ma le mafaufau.” (Faataoto 3:21) E mafai e mātua ona faaaogā le “mafaufau” ina ia faaavanoa ai se taimi e faaalu faatasi ma o latou aiga. E faapefea?

Afai o oe o se tinā faigaluega ua lagona le vāivai ina ua maeʻa galuega o le aso, ae ā pe a e talosaga atu i lau fanau ina ia outou saunia faatasi le meaʻai? O taimi faapena e faaalu faatasi ma le aiga, o le a maua ai se avanoa e māfana atu ai le tasi i le isi. I le taimi muamua, atonu e tele atu se taimi e alu i le faaaafiaina o lau fanau. Ae o le a lē pine lava ae maua ai lou olioli ma faasao ai foi le taimi.

Atonu o oe o se tamā e matuā tele lava galuega e fai i le faaiuga o le vaiaso. Aisea e lē pulupululima faatasi ai ma lau fanau i le faia o nei feau? E mafai ona e talanoa ma i latou a o tou galulue faatasi, ma i le taimi lava e tasi ua avatu ai se toleniga tāua. O le apoapoaiga a le Tusi Paia ina ia tāmau afioga a le Atua i loto o lau fanau, e faalaeiauina ai foi oe e talanoa atu ia i latou ‘pe a e nofo i lou fale, pe savali foi i le ala’—ioe, i avanoa uma lava. O se faailoga lea o le faaaogā o le “poto,” e talanoa ai ma lau fanau a o tou galulue faatasi.

O le faaalu o le taimi faatasi ma lou aiga e maua ai taui e tumau. Ua faapea mai se faataoto o le Tusi Paia: “O e filifili, e popoto i latou.” (Faataoto 13:10) O le faaalu o le taimi e talanoa ai ma lou aiga, o le a mafai ai ona e avatu ia i latou se taitaiga atamai a o feagai ai ma luʻi o le olaga i aso faisoo. O na taiala ua tuuina atu i le taimi nei e mafai ona faasaoina ai le tele o le taimi ma le loto tiga i le lumanai. E lē gata i lea, e mafai ona saosaolaumea i lou fiafia ma lo latou foi fiafia. O le avatua o na taitaiga, e manaomia ai ona e utufia mai le anoanoai o le atamai lea o loo maua i le Afioga a le Atua, le Tusi Paia. Ia faaaogā le Tusi Paia e aʻoaʻo ai lau fanau ma taʻitaʻia ai laasaga o lou aiga.—Salamo 119:105.

[Ata i le itulau 4]

O talavou o ē e māfana le faiā ma o latou mātua, e foliga mai o le a faaitiitia le aafia i mafatiaga o faalogona ootia

[Ata i le itulau 5]

O le lelei o fesootaiga e iu i le anoanoai o mea lelei e maua ai i le olaga faaleaiga

[Ata i le itulau 6]

A o lua galulue faatasi ma lau tamaitiiti, e mafai ai ona lua talatalanoa ma tuuina atu ni toleniga tāua