Saulo—Le Ipu ua Filifilia i le Alii

O SAULO o Taso sa avea ma fili tetee fia fasioti i soo o Keriso. Peitai sa iai i le Alii se lumanai ese ua faataatia mo ia. O le a avea Saulo ma sui iloga o le mea lava lea na ia matuā faasagatau i ai. Na fetalai faapea Iesu: “O le ipu lava o ia [Saulo,] ua filifilia maʻu e momoli loʻu igoa i luma o nuu ese, ma tupu, ma le fanauga a Isaraelu.”—Galuega 9:15.

O le olaga o Saulo o ‘se tagata faatāutala’ na matuā suia ina ua alofagia o ia ma avea ai ma ‘ipu ua filifilia’ a le Alii o Iesu Keriso. (1 Timoteo 1:12, 13) O le malosi na uunaia ai le lagolago atu i le fetogia i maa o Setefano ma isi osofaiga i soo o Iesu, sa matuā liua lava i se fuafuaga ese ina ua avea Saulo ma aposetolo Kerisiano o Paulo. E foliga mai na silafia e Iesu ni uiga lelei ia Saulo. O ā uiga? O ai Saulo? Na faapefea i lona talaaga ona mafai ona fetaui lelei ai o ia e faaaogā i le faaauilumaina o le tapuaiga moni? Pe e iai se mea e mafai ona tatou aʻoaʻoina mai i le mea na oo ia te ia?

Le Talaaga o le Aiga o Saulo

I le taimi o le fasiotia o Setefano ina ua faatoʻā mavae lava le Penetekoso 33 T.A., sa avea Saulo o se “taulealea” i lena taimi. I le taimi na tusi atu ai ia Filemoni pe ā o le 60 i le 61 T.A., ua “toeaina” o ia. (Galuega 7:58; Filemoni 9) Ua faapea mai tagata atamamai faapitoa, e tusa ai i le faatusatusaga anamua o tausaga, o le “taulealea” e foliga mai e i le va o le tausaga 24 ma le 40, a o le “toeaina” e mai le 50 i le 56 tausaga le matua. Atonu la na fanau Saulo i ni nai tausaga a o faatoʻā mavae lava le fanau mai o Iesu.

O le vaitaimi lena na ola ai tagata Iutaia i le tele o vaega o le lalolagi. O le faatoilaloina e isi malo, le ave faapologaina, tuli ese mai le isi atunuu, o fefaatauaiga faapisinisi, ma le faimalaga ese atu e aumau i se isi atunuu, sa avea ma nisi o mafuaaga o lo latou salalau ese atu mai Iutaia. E ui na iai lona aiga i nisi o Iutaia na salalau ese atu, ae sa faamamafa e Saulo lo latou pipiimau atu i le Tulafono, i le taʻua e faapea o ia “na peritomeina i le po valu, o le aiga o Isaraelu, o le itu aiga o Peniamina, o le Eperu o sa Eperū, o la le tulafono o le faresaio.” Sa faaigoa Saulo i le igoa Eperu lava lea o se faailoaga o se sui o lona ituaiga e tupuga mai ai—le uluai tupu o Isaraelu. O le avea ma tagata Roma i lona fanau ai iina, sa faaigoa ai foi Saulo o Taso i le igoa Latina, o Paulo.—Filipi 3:5; Galuega 13:21; 22:25-29.

O le fanau mai o Saulo o se tagata Roma o lona uiga, o se tasi o ona tuaa, o se tane, na mauaina lea faaeaga o le avea ma tagatanuu Roma. E faapefea? E iai ni avanoa e mafai ai ona faia faapea. E ese mai le avea ma tagatanuu moni i le fanau mai, sa ono avatu foi lea tulaga i tagata taitoatasi po o vaega o tagata a lē mo ni taui faapitoa, mo le tau ina umia ni tofi faapolotiki, ia po o le avea o se taui mo nisi o auaunaga maualuga i le Malo. O se pologa e mafai ona faatau mai lona saolotoga mai se tagata Roma, po o se tasi na tuufaasaolotoina e se tagata Roma, e mafai ona avea lava ia ma tagata Roma. E  faapena foi i se fitafita tuai o autau pe a maeʻa lana tautua i fitafita tau a Roma. O tagata o le atunuu o loo nonofo i nisi fanua o Roma e iai foi le taimi e mafai ona avea ai ma tagatānuu. Na taʻua foi faapea i nisi o vaitaimi patino sa faatau ai le avea ma tagatānuu mo ni tupe se tele. O le ala la na avea ai le aiga o Saulo ma tagatānuu Roma, e lē o iloa lava.

Ua tatou iloa o Saulo e sau mai Taso, le aai autū ma o le taulaga o le itumalo lea sa i le vaaiga a Roma o Kilikia (o loo i Take i saute i le taimi nei). E ui ina toatele tagata Iutaia na mau ai i le aai, ae o le olaga iina na matuā masani atu ai Saulo i aganuu a Nuu Ese. O Taso o se aai telē toe tamaoaiga na matauina faapea o le ogatotonu o aʻoaʻoga o le faa-Helenisi, po o le faa-Eleni. O faatusatusaga ua faapea ai o lona faitau aofai i le uluai senituri e i le va o le 300,000 ma le 500,000 tagata. Sa avea ma ogatotonu o fefaatauaiga i le alatele autū o loo i le va o Asia Itiiti, Suria, ma Mesopotamia. E maua mai e Taso lona tamaoaiga i faiga o fefaatauaiga o ana oloa ma le fuatele o ona fanua laugatasi o siomia ai, lea e tele ina maua mai ai saito, o uaina ma ie vavae. Mai ana pisinisi olaola gaosi ie, na maua mai ai ie mai fulufulu ʻoti ia sa fai ai faleie.

Aʻoaʻoga a Saulo

Sa saunia ma le faamaoni e Saulo, po o Paulo mea mo ia lava ma lagolago lana galuega faamisionare i le faia o faleie. (Galuega 18:2, 3; 20:34) O le tomai o le fai faleie sa masani ona faia e tagata o lona nuu, o Taso. E foliga mai atonu sa aʻoaʻoina mai e Saulo le galuega o le fai faleie mai lona tamā i lona laitiiti.

O le poto o Saulo i gagana—ae maise lava lona poto maoae i le faa-Eleni, le gagana sa faaaogaina e le toatele i le Emepaea o Roma—na faamaonia foi le aogā tele i lana galuega faamisionare. (Galuega 21:37–22:2) O ē e iloiloina ana tusitusiga ua faapea mai e matuā lelei tele lana faa-Eleni. O ana faaupuga e lē maotua pe tau ina aʻo mai tusi ae na i lo lena, e faaatagia mai ai le Septuagint, le faaliliuga faa-Eleni o Tusi Paia Eperu lea na ia siiina soo mai pe toe faaupuina. I lenei la faamaoniga, ua faapea mai ai ni tagata atamamai faapitoa eseese na maua e Saulo se aʻoaʻoga lelei lava i le faa-Eleni, atonu i se aʻoga faa-Iutaia. Ua fai mai se tagata aʻoga e igoa ia Martin Hengel: “I aso anamua o se aʻoaʻoga sili ona lelei —ae maise lava se aʻoaʻoga faa-Eleni—sa lē faia fua; e masani lava, e taʻua mai ai se lagolagoina tautupe.” O aʻoaʻoga a Saulo, ua oso ai se manatu faapea e sau o ia mai se aiga taualoa.

E foliga mai, a o lei sili atu ma le 13 ona tausaga, sa faaauauina aʻoaʻoga a Saulo i Ierusalema, pe ā ma le 520 maila [840 kilomita] mai lona aiga. Sa aʻoaʻoina o ia e Kamalielu, o se faiaʻoga lauiloa ma faaaloalogia i faiga uputuu faa-Faresaio. (Galuega 22:3; 23:6) O na suesuega, e mafai ona faatusatusa atu i se aʻoaʻoga faaiunivesite i aso nei, sa tatala ai le avanoa mo le mauaina o se tulaga aloaia i le lotu Iutaia. *

O Tomai ua Faaaogā Tatau

O le fanau mai i se aiga Iutaia i se aai o talitonuga faa-Eleni o Roma, sa maua ai e Paulo ni tomai eseese se tolu. E mautinoa o se talaaga o le tele o ona piitaga faaleatunuu e tautala i le tele o gagana, na fesoasoani ia te ia e avea ai “ma mea uma mo tagata uma.” (1 Korinito 9:19-23) O lona avea ma tagatānuu Roma na ia mafai mulimuli ane ai ona puipuia faaletulafono lana faiva ma momoli atu ai le tala lelei i luma o pulega silisili ona maualuga i le Emepaea o Roma. (Galuega 16:37-40; 25:11, 12) O le mea moni, o le talaaga o Saulo, o lona tulaga tau aʻoaʻoga ma lona ituaiga tagata, sa silafia lelei e Iesu ua toe faatuina lea na fetalai atu ia Anania faapea: “Ina alu ia; auā o le ipu lava o ia ua filifilia maʻu e momoli loʻu igoa i luma o nuu ese, ma tupu, ma le fanauga a Isaraelu. Auā ou te faailoa atu ia te ia mea e tele e tusa ona tiga ai o ia ona o loʻu igoa.” (Galuega 9:13-16) Ina ua faaaogā i le auala tatau, na aogā le maelega o Saulo e faasalalauina ai le feau o le Malo i oganuu mamao.

O le filifilia e Iesu o Saulo mo se tofiga faapitoa o se mea tutasi na tupu i le talafaasolopito faa-Kerisiano. Peitai, o Kerisiano uma i aso nei o loo iai ni tomai ma uiga iloga, e mafai ona faaaogā ma le uigā i le faasalalauina atu o le tala lelei. Ina ua malamalama Saulo i le mea na manao ai Iesu ia te ia, sa lei toe faatali loa o ia. Na ia faia mea uma na ia mafaia i le faaauilumaina o manaoga o le Malo. Pe o le tulaga moni ea lena o iai oe?

[Faaopoopoga i lalo]

[Pusa/Ata i le itulau 30]

Lesitalaina ma le Faamauina o Tagatānuu Roma

O le lesitalaina o fanau e fananau mai i tagatānuu o Roma sa faavaeina e Aokuso faatasi ma ni tulafono e lua ia sa faagaoioia i le 4 ma i le 9 T.A. Sa tatau ona faia le lesitalaina i totonu o le 30 aso talu ona fanau mai. I malo i lalo o le vaaiga a Roma, e ao i se aiga ona faia se faalauiloaga i luma o le faamasino i totonu o se ofisa talafeagai e faia ai faamaumauga o le lautele, e taʻua ai o le tamaitiiti na fanau i le tulafono ma o ona mātua o ni tagatānuu Roma. Sa lesitala foi suafa o mātua, le ituaiga o se tama po o se teine ma lona igoa, ma le aso fanau. E oo lava i le taimi muamua a o lei faailoa atu nei tulafono, o lesitalaga o tagatānuu i pulega faaitumalo uma a Roma, o ona kolone, ma itumalo e iai ona taʻitaʻi, sa taʻi lima tausaga ma toe faafou e ala i se tusigaigoa.

O lea sa mafai ai ona iloa le tulaga o le tagata ona o faasinoga o faamatalaga uma i faamaumauga sa teuina lelei. O kopi faamaonia o na faamatalaga sa mafai ona maua mai upeti fai i laau e faigofie ona feaveai (o papa maa e mafai ona gaugau). I manatu o nisi o tagata atamamai faapitoa, ina ua taʻua e Paulo o ia o le tagatānuu Roma, atonu sa mafai ona ia maua se pepa faamaumau mo faamaoniga. (Galuega 16:37; 22:25-29; 25:11) Talu ai o le umia o le tulaga o le tagatānuu Roma sa vaai i ai toetoe lava o se “uiga paia” ma e faigofie ona maua ai e se tagata le tele o faaeaga, ma o le faia o ni kopi e lē faamaonia o sea pepa o faamaoniga, sa o se matuā solitulafono matuia lava. O le faaseseina o le faia e se tasi o lona tagatānuu sa faasalaina i le oti.

[Ē Ana le Ata]

Historic Costume in Pictures/Dover Publications, Inc., New York

[Pusa/Ata i le itulau 31]

Igoa Roma o Saulo

E so o se tama lava o se tagatānuu Roma sa lē itiiti ma le taitolu vaega o lona igoa. Sa iai lona igoa muamua e faaigoa ai, le igoa o le aiga e faaiu ai (sa fesootai ma le ituaiga e tupuga mai ai, po o le gens), ma se igoa valaau. O se tasi o faataitaiga lauiloa o Kaio Iulio Kaisara. E lē aumaia uma e le Tusi Paia igoa atoa Roma, ae o puna o faamatalaga faalemalo ua taʻu maia ia i tatou faapea o Akeripa, o Marcus Iulio Akeripa lena. O Kaliona o Lucius Junius Gallio. (Galuega 18:12; 25:13) O faataitaiga faale-Tusi Paia o igoa mulimuli e lua o tagata e taʻi tolu igoa o Ponotio Pilato, Sekio Paulo, Kalaotio Lusia, ma Pokio Feso.—Galuega 4:27; 13:7; 23:26; 24:27.

E lē mafai ona faapea atu ma le mautinoa po o le igoa Paulo o le igoa muamua po o lona igoa valaau. Sa fai ma masani le teʻi ua faaopoopo atu se isi igoa lea e ono faaigoa ai se tagata e lona aiga po o ē latou te masani. A lē o lena, o se igoa ese e lē mai Roma pei o le igoa Saulo o le a faaaogā e fai ma sui. Fai mai se tasi tagata atamai faapitoa: “O [Saulo] e lē tāitai ona fetaui le avea o se igoa Roma, ae e fetaui ona avea na o se igoa fai (signum) i se tagatānuu Roma.” I vaipanoa e tele gagana e tautatala ai, e ono fua lava le tulaga o mea po o lē fea igoa o se tagata e na te ono filifili e faaaogā.

[Ē Ana le Ata]

Photograph by Israel Museum, ©Israel Antiquities Authority