Ia Fiafia ia Ieova ma ia Olioli

O LE faamaeʻaina ma le manuia o so o se galuega aogā e masani lava ona avea ma taimi o le fiafia. O le faauuga na faia ia Mati 13, 1999, i le Nofoaga Tutotonu o Aʻoaʻoga a le Olomatamata i Patterson, i Niu Ioka, sa mautinoa le avea o se faatasiga faapena mo le toʻa 48 o le au aʻoʻoga o le vasega lona 106 a le Aʻoga Faale-Tusi Paia a le Olomatamata o Kiliata.

O saunoaga amata a Theodore Jaracz, o ia o se tasi o le Vaega Pule, o sē na faauu mai le vasega lona fitu a Kiliata, ma o le taʻitaʻifono o le polokalame o le faauuga, sa faamatilatila ai upu o le Salamo 32:11: “Ina fiafia ia ia Ieova, ma olioli o outou o e amiotonu.” I le faamatalaina o le mafuaaga sa talafeagai ai mo tagata uma ona fiafia i lenei faatasiga, na ia faapea mai: “Ona o mea ua faataulauina e Ieova ia i latou o ē saʻo o latou loto, e aofia ai la tatou au aʻoʻoga a Kiliata, ua māfua ai ona tatou fiafia i faatasiga e pei o lenei.” E ui sa faia e le au aʻoʻoga ni a latou fuafuaga e ō mai i le Aʻoga o Kiliata ma sa latou finafinau foi ma le naunautai ia agavaa mo le auaunaga faamisionare, peitai o Ieova lē na mafai ai ona faia mea uma ina ia oo mai i se taunuuga manuia. (Faataoto 21:5; 27:1) O le mafuaaga lena sa faamamafa e le uso o Jaracz, mo le ‘fiafia ia Ieova.’

Sa iai faatasi i le aofia i le maota o faatasiga i Patterson tauaiga ma mālō a le au aʻoʻoga o ē na faimalaga mai atunuu e 12 ina ia molimauina lenei faatasiga olioli. A o tatalia ma le naunautai le polokalame e le toʻa 5,198 na auai—e aofia ai tagata o le aiga Peteli i Brooklyn, Patterson, ma Wallkill, sa fesootai faatasi i leitio ma vitiō—sa manino le iai o le agaga olioli.

Sa Timaia Ina ia Tausisia se Agaga Olioli

A o faaiu e le uso o Jaracz ana saunoaga amata, ona ia faasilasila mai lea o le uluai failauga mai le toalima o failauga, na sauniunia ni apoapoaiga faalaeiau mai le Tusi Paia e lē gata mo le au faauu a Kiliata ae mo i latou uma na aofia ai.

O lē na muamua lauga o William Malenfant, o sē na faauu mai le vasega lona 34 a Kiliata, ma o loo auauna nei o se fesoasoani i le Komiti Tauaʻoaʻoga a le Vaega Pule. I le fesootai atu ma lana matua “E Lē o ‘Mea Uma’ e Faatauvaa!” e faavae aʻe i le Failauga 1:2, na ia lāgā ai le fesili: “Pe na uiga moni le manatu o Solomona faapea o mea uma lava e tusa ai ma le uiga o le upu, e faatauvaa?” O le tali: “E leai. Sa ia faasino mai faapea, o mea o loo faia e tagata e lē amanaia ai le finagalo tauatua, o sailiiliga e ese mai le finagalo tauatua—o mea uma na e faatauvaa.” Ae i se faaeseesega, o le tapuaiga i le Atua moni, o Ieova, e lē faatauvaa; e lē faatauvaa foi le suesueina o le Afioga a le Atua, le Tusi Paia, ma le aʻoaʻoina atu i isi. E lē faagaloina e le Atua na taumafaiga a ana auauna. (Eperu 6:10) O le mea moni, e tusa lava pe oo mai mala ia i latou o ē ua maua le finagalo malie o le Atua, ae o le a ‘fusifusia [lava i latou] i le taʻui o le ola e Ieova.’ (1 Samuelu 25:29) Maeu se manatu faamafanafanaloto! O le manatuaina o nei manatu e mafai ona fesoasoani i tagata tapuai uma a Ieova ina ia tausisia se uiga olioli.

O John Barr, o se sui o le Vaega Pule, sa ia faalaeiauina le vasega faauu i lana lauga “Ia Outou Fiafia i o Outou Tofiga Faamisionare.” Sa ia faaalia faapea o le auaunaga faamisionare  o se mea e matuā pele lava i le finagalo o Ieova le Atua. “O se mea e avea o se vaega o le faailoaga mai o le alofa o Ieova mo le lalolagi. Na ia auina mai lona Alo pele e toatasi i lenei lalolagi. O Iesu le misionare silisili, o ia lava le uluai misionare.” A o mafai e le au faauu ona mafaufau loloto i suiga sa faia e Iesu ina ia taulau manuia ai i lona tofiga i luga i le lalolagi, ae o aogā o le auaunaga faamisionare a Iesu o loo avanoa atu pea mo i latou uma o ē o le a faaaogaina. O le mafuaaga, e pei ona taʻua e le uso o Barr, talu ai sa fiafia Iesu i le faia o le galuega a le Atua, ma sa alofa foi o ia i le fanau a tagata. (Faataoto 8:30, 31) Na faalaeiauina e le uso o Barr le au faauu ina ia tumau i o latou tofiga, ia lē tau ina fai e faaalia ai lo latou onosai, ae ia fai ona o loo latou fiafia i le faia faapea. Sa ia aioi atu i le vasega: “Ia faalagolago ia Ieova; o le a ia lē tuulafoaia outou.”—Salamo 55:22.

“Ia Savavali i le Suafa o Ieova e Faavavau” o le matua lena na filifilia e le failauga na sosoo  ai, le uso o Lloyd Barry, o se tasi foi o le Vaega Pule. I lana auaunaga faamisionare mo le silia i le 25 tausaga i Iapani ina ua maeʻa le vasega lona 11 a Kiliata sa iai, na faamatala ai e le uso o Barry nisi o mea na tutupu i uluai misionare ma faamatala foi luʻi sa latou fesagaia. O ā ni fautuaga aogā na ia aumaia mo le vasega faauu? “O le mea silisili lava, ia tausisia lo outou malosi faaleagaga. E lē gata i lea, ia tou aʻoaʻoina le gagana ma tū ma agaifanua a le atunuu. Ia tumau o outou uiga mālie. Ma ia tumau i le galuega; aua neʻi faavaivai pe faapalapala.” Na taʻu atu e le uso o Barry i le au faauu e faapea, i o latou tofiga i atunuu ese, o le a latou feiloai ai ma le tele o tagata o ē tapuai i igoa o atua eseese, ma sa ia faamanatu ai ia i latou upu a Mika: “O nuu uma e taitasi ma savali i le igoa o latou atua, o i tatou foi, tatou te savavali i le suafa o Ieova lo tatou Atua e faavavau faavavau lava.” (Mika 4:5) O le faaaoaoga a uluai misionare e mautinoa le avea ma uunaiga malosi mo auauna uma a le Atua ina ia savavali pea i le suafa o Ieova ma auauna atu ma le faamaoni ia te ia.

Na sosoo ai i lauga o le polokalame le faiaʻoga a Kiliata, o Lawrence Bowen. O le matua o lana lauga na lāgā ai le fesili, “O le a Faapeī Oe?” Sa ia faaalia faapea, o le taulau manuia i le auaunaga a le Atua e faalagolago i le faatuatua ma le faamoemoe atu ia Ieova. O le faalagolago atoatoa ia Ieova na maua ai e le tupu o Asa se manumalo taʻutaʻua i le vaegaau a le fili e tasi le miliona. Peitai sa faamanatu atu ia te ia e le perofeta o Asaraia le manaomia ona faalagolago atu pea i le Atua: “E ia te outou Ieova, pe a outou i ai ia te ia.” (2 Nofoaiga a Tupu 14:9-12; 15:1, 2) Talu ai o le suafa o le Atua, o Ieova, e faaoo mai ai le manatu faapea e avea o ia ma so o se mea e manaomia ona faataunuu ai lana fuafuaga—tusa lava pe uiga i le avea o ia ma Lē Saunia Mea, o Lē Puipuia, po o Lē Faaoosala—o misionare la e faalagolago ia Ieova ma galulue e ogatusa ma lana fuafuaga o le a faamaonia foi lo latou taulau manuia i o latou tofiga. (Esoto 3:14) “Aua lava neʻi galo,” o upu faaiu ia a le uso o Bowen, “pe afai e tou te avea fuafuaga a Ieova e fai ma a outou fuafuaga, o le a faapena foi ona ia faapogaia outou e avea ma so o se mea e manaomia ina ia faataunuu ai o outou tofiga.”

O le failauga faaiu o lenei vaega o le polokalame o le uso o Wallace Liverance, o lē sa avea muamua ma misionare ae o loo galue nei o se lesitala a le aʻoga. O lana lauga, sa faamatuaina “Ia Olaola Pea le Afioga a le Atua ma ia Galue ia te Outou,” sa tataʻi atu ai manatu i le feau po o le folafolaga mautinoa a le Atua lea o loo agaʻi pea i lona faataunuuga. (Eperu 4:12) Ua taaʻina ai ola o i latou o loo latou faataga ina ia faia faapea. (1 Tesalonia 2:13) E mafai faapefea ona olaola pea lena upu ma ia galue i o tatou olaga? E ala i le suesue ma le filigā i le Tusi Paia. Na faamanatu mai e le uso o Liverance i le au faauu auala e suesueina ai le Tusi Paia lea sa latou aʻoaʻoina i Kiliata, e aofia ai le faitau ma le faamatalaina atili o le uiga ma le faatatauga o le Afioga a le Atua. Sa ia sii mai upu a Albert Schroeder, o se tasi o le Vaega Pule o lē sa auauna o se taʻitaʻifono o le komiti na faavaeina le Aʻoga o Kiliata i le silia ma le 50 tausaga ua mavae, e faapea: “O le faaaogaina o le manatu autū o le mataupu atoa, e mafai ai e se tasi ona maua le uiga atoatoa, le uiga saʻo, ma le uiga faaleagaga lea na tuuina mai e le Atua i lana Afioga.” O lenei auala mo le suesueina o le Tusi Paia e mafai ai ona olaola pea le Afioga a le Atua ma aogā.

 O Tala Mananaia o Mea na Tutupu ma Faatalanoaga

Ina ua uma lauga, ona faafiafiaina lea o le aofia i ni tala mananaia a le au aʻoʻoga i ni mea na tutupu. O Mark Noumair, o lē sa avea muamua ma misionare ma o loo avea ma faiaʻoga o Kiliata, sa ia taʻitaʻia se vaega o le au aʻoʻoga na latou faamatala maia ma faataitai mai auala sa latou taumafai e avatu ai se molimau i ni tulaga eseese. O nisi sa mafai ona latou faia ni suesuega faale-Tusi Paia ma tagata i le oganuu e ala i le matauina o tulaga ma faamatalaga a tagata, ma i le faaali i ai o le naunau totino. E iloa ai sa faaalia e le au aʻoʻoga lo latou ‘uaʻi atu ia i latou lava faapea i la latou aʻoaʻo atu’ ma sa matuā naunau lava i le fesoasoani atu i isi ina ia maua le faaolataga.—1 Timoteo 4:16.

E tele fautuaga aogā na ofoina mai, ma o le olioli i le auaunaga faamisionare sa faamautinoa mai e nisi o uso agavaa o ē sa iai iina mo le aʻoaʻoina i le aʻoga mo sui o komiti o lālā i le Nofoaga Tutotonu o Aʻoaʻoga a le Olomatamata. O le uso o Samuel Herd ma le uso o Robert Johnson mai le ofisa o le lālā sa la faafoeina ni faatalanoaga olaola ma ni sui o ofisa o lālā a le Sosaiete mai Polivia, Zimbabwe, Nicaragua, Central African Republic, Dominican Republic, Papua Niu Kini, ma Cameroon.

Ina ua maeʻa tala o mea na tutupu ma faatalanoaga, ona fofogaina ai lea e Gerrit Lösch, o lē na faauu mai le vasega lona 41 o Kiliata ma o loo avea nei o se sui o le Vaega Pule, le lauga faaiu i se matua faatupu manatu “Po o Oe ea o se ‘Tagata e Manaomia’?” Na muamua faamanatu mai e le uso o Lösch i le au faauu e faapea, o Iesu, le Alo lelei atoatoa o le Atua, sa lei manaomia e tagata, ae sa “inosia ma tuulafoaiina o ia e tagata.” (Isaia 53:3) E lē o se mea la e ofo ai i aso nei i le tele o vaega o le lalolagi, e lē talia ai ma lē fiafia tagata i misionare. Ae i le isi itu, i le taimi o le auaunaga umi a Tanielu i Papelonia, e faatolu ona taʻua ai o ia e Lē na Foafoaina Mea e ala mai i se agelu faapea, o lē e “alofateleina.” (Tanielu 9:23; 10:11, 19) Aisea na faapena ai le tulaga o Tanielu? Auā sa lē tāitai ona ia lafoaia mataupu silisili o le Tusi Paia a o fetuunai atu i tū masani ma agaifanua i Papelonia; sa faamaoni o ia i mea uma lava, sa lē tāitai ona ia faaaogaina lona tulaga e maua ai ni ona lava lelei; ma sa avea o ia o se tagata aʻoga maelega o le Afioga a le Atua. (Tanielu 1:8, 9; 6:4; 9:2) Sa ia tatalo atu foi e lē aunoa ia Ieova ma sa ia nofo sauni e avatu i le Atua i taimi uma le viiga i ni mea sa ia faataulauina. (Tanielu 2:20) I le mulimuli atu i le faaaoaoga a Tanielu, e mafai ai foi e auauna a le Atua ona avea i latou o ni ē e manaomia, e tusa lava pe lē manaomia e le lalolagi, ae e manaomia mai e Ieova le Atua.

Ina ia faaiuina le polokalame faamalosiau faaleagaga, na faitau mai ai e le taʻitaʻifono nisi o feau faauaealesi na auina mai vaega eseese o le lalolagi. Ona sosoo ai lea ma le mauaina e ulugalii uma e 24 o o latou tusipasi, ma faasilasila atu atunuu o le a tofia i ai. Ina ua maeʻa mea uma, ona faitau ai lea e se sui o le vasega se tusi sa faasino atu i le Vaega Pule ma le aiga Peteli, e faaalia ai le agaga talisapaia o le vasega mo toleniga ma sauniuniga sa latou maua i masina e lima ua mavae atu.

A o faaiuina le polokalame, sa lagonaina leo o “le fiafia ma le faafetai” mai le aofia a o amata ona gasolosolo ese atu.—Neemia 12:27.

[Pusa i le itulau 27]

Faamaumauga o le Vasega

Aofai o atunuu o loo iai o latou sui: 10

Aofai o atunuu ua tofia i ai: 19

Aofai o tagata aʻoga: 48

Aofai o ulugalii: 24

Faatatauga o tausaga: 33

Faatatauga o tausaga i le upu moni: 16

Faatatauga o tausaga i le faiva faataimi atoa: 13

[Ata i le itulau 25]

Vasega Faauu Lona 106 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taitasi.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.