O Ē na Galulue Faatasi ma Paulo—O Ai i Latou?

I TOTONU o le tusi o Galuega i le Tusi Paia ma tusi a Paulo, o loo taʻua ai pe tusa ma le selau o tagata eseese, o sui o le faapotopotoga Kerisiano o le uluai senituri o ē na auaufaatasi totino ma le “aposetolo o nuu ese.” (Roma 11:13) E tele ni mea ua iloaina e faatatau i le toatele o i latou. Atonu e te masani lelei i galuega a Apolo, Panapa, ma Sila. I le isi itu, atonu e faigata ona faamatalaina ni mea se tele e faatatau ia Akeripa, Kalaotia, Tamari, Lino, Peseti, Paute, ma Sosepatero.

I vaitaimi eseese ma tulaga eseese, e toatele tagata na faia ma le tiotio se sao i le lagolagoina o le faiva a Paulo. O i latou e pei o Aritako, Luka, ma Timoteo na auauna faatasi ma le aposetolo mo le tele o tausaga. O nisi sa iai faatasi ma ia a o iai i le falepuipui po o faigamalaga, a lē o ni aumea femalagaai po o le avea o ni tane ma fafine talimalo. E faanoanoa, ona o isi, e pei o Alesana, Tema, Emokene, ma Fogelu, sa lei tumau i le faatuatua faa-Kerisiano.

Pe a oo mai i nai isi uo a Paulo, e pei o Asugerito, Heremea, Iulia, po o Filoloko e taʻua na o ni nai tagata, e itiiti so matou iloa ia i latou seʻi vaganā ai o latou igoa. O le tulaga i le tuafafine o Nereu, po o le tinā o Rufo po o i latou o le auaiga o Keloe, e leai so tatou iloa tele i ai e oo lava i o latou igoa. (Roma 16:13-15; 1 Korinito 1:11) E ui i lea, o le iloiloina o faamatalaga itiiti o loo ia i tatou e faatatau i le pe ā ma le selau po o le sili atu i nei tagata ua aumaia ai se malamalamaga i le auala na galue ai le aposetolo o Paulo. Ua tatou aʻoaʻoina mai ai foi se mea e faatatau i aogā o le iai i le siomaga o se vaega toatele o aumea talitonu, ma galulue soosoo tauʻau ma i latou.

Aumea Femalagaai, o Tane ma Fafine Talimalo

O le faiva a le aposetolo o Paulo na aofia ai ni faigamalaga se tele. Na fuaina e se tasi o tusitala le mamao na laasia e Paulo i le laueleele ma le sami e pei ona faamauina i le tusi o Galuega lava latou, e oo atu i le pe tusa o le 10,000 maila [16,000 kilomita]. O le femalagaai i na vaitaimi sa lē gata ina vāivai ai ae lamatia ai foi. O nisi o lamatiaga eseese na ia fesagaia o folauga i le vasa, lamatiaga i vaitafe ma tagata fao mea, lamatiaga i le vao, ma lamatiaga i le sami. (2 Korinito 11:25, 26) Ua fetaui lelei lava la, le seāseā ona toatasi Paulo i ana faigamalaga mai i lea nofoaga i le isi nofoaga.

O i latou na auaufaatasi ma Paulo na avea ma puna o ni faauoga, faalaeiauga, ma fesoasoani aogā i le faiva. I nisi o taimi, na tuu ai e Paulo i latou ina ia latou vaaia manaoga faaleagaga  o tagata talitonu fou. (Galuega 17:14; Tito 1:5) Ae o le iai o aumea, sa ono manaomia mo le saogalemu ma le lagolagosua i le feagai ai ma tulaga ogaoga o le faigamalaga. O lea o na tagata e pei o Sosepatero, Sekuno, Kaio ma Tofimo, o ē tatou te iloa o aumea na femalagaai faatasi ma Paulo, atonu na latou faataunuuina se tiute tāua i le taulau manuia o lana auaunaga.—Galuega 20:4.

E talisapaia foi le fesoasoani na ofoina mai e tane ma fafine talimalo. Pe a taunuu atu Paulo i se aai lea ua ia fuafua e faia ai se tauiviga o se talaʻiga, pe na ona moe ai i se po, o le sini muamua o le sailia lea o se nofoaga e nofo ai. So o se tasi e faimalaga i le tele e pei ona faia e Paulo e ono talafeagai le moe i ni moega eseese se tele. Sa mafai pea ona ia nofo i se faletalimalo, ae e faamatalaina e tagata tusitala o talafaasolopito e “lamatia ma lē lelei ia nofoaga,” o lea, pe afai e talafeagai ai, e lē taumatea sa nofo Paulo i uso talitonu.

Tatou te iloa igoa o nisi o tane ma fafine talimalo a Paulo—Akula ma Pisila, Kaio, Iasona, Litia, Nasona, Filemoni, ma Filipo. (Galuega 16:14, 15; 17:7; 18:2, 3; 21:8, 16; Roma 16:23; Filemoni 1, 22) I Filipi, Tesalonia, ma Korinito, o na āpi na mafai ai e Paulo ona fai ma nofoaga autū e fuafua ai ana gaoioiga faamisionare. I Korinito, na faaavanoaina ai foi le fale o Iuso ina ia maua ai e le aposetolo se nofoaga e mafai ona ia faagasolo ai lana talaʻiga.—Galuega 18:7.

Le Anoanoai o Uo

E pei lava ona ono faatalitalia, e manatuaina aumea a Paulo i auala eseese talu ai le eseese o tulaga na ia feiloai ai ma i latou. O Maria, Peseti, Fipe, Tufaina, ma Tufosa, mo se faataitaiga, o i latou uma o aumea o fafine talitonu o ē na avatu i ai le faamālō mo ā latou galuega mamafa ma le fita. (Roma 16:1, 2, 6, 12) Na papatisoina e Paulo Kiripo, Kaio, ma le auaiga o Setefana. Na talia e Taionusio ma Tamari le feau o le upu moni mai ia te ia i Atenai. (Galuega 17:34; 1 Korinito 1:14, 16) O Aneroniko ma Iunia, “ua logoleleia i laua e aposetolo” sa muamua ona avea i laua ma ē talitonu na i lo Paulo, ua taʻua “sa matou faatasi ma aʻu i le fale puipui.” Atonu sa la i le falepuipui ma ia i se isi o taimi. O le toalua lenei, e pei o Herotiona, Iasona, Lukio ma Sosepatero, sa taʻua foi e Paulo “o oʻu aiga.” (Roma 16:7, 11, 21) A o faaaogaina iinei le upu Eleni e mafai ona uiga i “aumea faaleatunuu,” o lona uiga autū lava o le “aiga i le toto ma e tupulaga faatasi.”

O le toatele o uo a Paulo sa faimalaga ona o le tala lelei. E lē gata i ana aumea o loo iloa lelei, o loo iai foi Akaiko, Fotunato, ma Setefana, na faimalaga mai Korinito i Efeso ina ia talanoa ma Paulo e faatatau i le tulaga faaleagaga o lo latou faapotopotoga. Na sauni Aretima ma Tuiko e faimalaga atu e faatasi atu ia Tito, o lē na auauna i le motu o Kereta, ma sa nofo sauni foi Sena e faimalaga faatasi ma Apolo.—1 Korinito 16:17; Tito 3:12, 13.

O loo iai i latou na tuuina mai e Paulo ni faamatalaga laiti ma le mataina e faatatau i ai. Ua taʻuina mai ia i tatou, mo se faataitaiga, faapea o Epaineto o “le faapolopolo . . . i Akaia,” o Erato “o le teutupe sili o le aai” i Korinito, ma o Luka o se fomaʻi, o Litia o le faatau ie pāuli, ma o Tesio sa faaaogā e Paulo e tusia lana tusi i Roma. (Roma 16:5, 22, 23; Galuega 16:14; Kolose 4:14) Mo so o se tasi e manao e fia iloa atili e faatatau i na tagata taitoatasi, o nei faamatalaga auiliili itiiti e maofa ai i lo latou faapuupuuina.

O isi aumea a Paulo na latou mauaina feau patino, ia ua faamauina nei i le Tusi Paia. I lana tusi i Kolose, mo se faataitaiga, na uunaia e Paulo ia Akeripa: “Ia oe i le faiva na tuuina atu ia te oe i le Alii, ina ia e faataunuuina.” (Kolose 4:17) O Evotia ma Sunetui e manino le iai o ni o la feeseeseaiga totino e ao ona foia. O lea, na apoapoai atu ai Paulo ia i laua e ala i se “fesoasoani faamaoni” i Filipi e lē o taʻua le igoa “ia tasi lo la manatu, i le  Alii.” (Filipi 4:2, 3) E mautinoa, o se fautuaga lelei lenei mo i tatou uma lava.

Lagolago Faamaoni a o Iai i le Falepuipui

E iai ni taimi na tuuina ai Paulo i le falepuipui. (2 Korinito 11:23) I na mea na tutupu, o Kerisiano na iai iina, pe afai na iai nisi, atonu sa latou taumafai e faia mea uma e latou te mafai ina ia gafatia ai e Paulo mea na oo ia te ia. Ina ua uluai faafalepuipuiina Paulo i Roma, sa faatagaina o ia e mautotogi i sona lava fale mo le lua tausaga ma na mafai ona asiasi atu i ai ana uo. (Galuega 28:30) A o faagasolo lena vaitaimi, na ia tusia ai tusi i faapotopotoga i Efeso, Filipi, ma Kolose, faapena foi ia Filemoni. O nei faamatalaga ua taʻuina mai ai ia i tatou ni mea se tele e faatatau ia i latou o ē na vavalalata atu ia Paulo a o faagasolo ona faasalaga.

Mo se faataitaiga, ua tatou iloa faapea o Onesemo, o le auauna a Filemoni na sola ese, sa feiloai ma Paulo i Roma, faapena foi ma Tuiko, o lē na faatasi atu ia Onesemo i lana malaga e toe foi atu i lona matai. (Kolose 4:7-9) Sa iai foi Epaferoti, o lē sa faia se malaga umi mai Filipi ma se meaalofa mai i lana faapotopotoga ma o lē sa oo ina maʻi. (Filipi 2:25; 4:18) O ē sa galulue vavalalata ma Paulo i Roma o Aritako, Mareko, ma Iesu o lē sa taʻua foi o Iuso, lea na taʻua e Paulo e faapea: “Na o i latou lava na galulue faatasi ma aʻu i le malo o le Atua, na fai foi i latou ma faamatalaloto mai ia te au.” (Kolose 4:10, 11, LT) Faatasi ai ma i latou faamaoni uma lava, o loo iloa lelei foi Timoteo ma Luka, faapena foi ma Tema, o lē na mulimuli ane lafoaia Paulo, ona o lona manao i le lalolagi.—Kolose 1:1; 4:14; 2 Timoteo 4:10; Filemoni 24.

E manino, e leai se tasi o i latou e sau mai Roma, peitai sa latou iai iina faatasi ma Paulo. Atonu o nisi na ō atu patino e fesoasoani ia te ia a o faafalepuipuiina. E lē taumatea o nisi sa latou faia ni feau mo ia, o nisi sa aauina atu i ni tofiga mamao, ma o nisi lava foi sa faalau atu i ai e Paulo tusi e tusia. Maeu se faailoaga o ni lagona loloto o le malosi o le alofa ma le faamaoni o loo iai ia i latou uma nei mo Paulo ma le galuega a le Atua!

Mai i faaiuga o nisi o tusi a Paulo, ua tatou iloa ai faapea e lē taumatea sa iai o ia i se siomaga toatele o aumea o uso ma tuafāfine Kerisiano e sili atu le toatele na i lo nai igoa o loo tatou iloaina. I tulaga eseese, na ia tusi ai: “O loo alolofa atu ia te outou le au paia uma” ma, “O i latou uma lava o ia te au o loo alolofa atu i latou ia te oe.”—2 Korinito 13:13; Tito 3:15; Filipi 4:22.

A o faagasolo taimi faigata o le faafalepuipuiina faalua o Paulo i Roma a o faaloloi ane le faamaturoina, sa matuā uaʻi atu manatunatuga o Paulo i ana aumea. Sa ia gaoioi pea i le vaavaaia ma le faafesootaia o gaoioiga a nisi o i latou. O Tito ma Tuiko na aauina atu mo ni tofiga, ua alu atu Kerese i Kalatia, o loo nofo Erato i Korinito, ua tuua Tofimo i Meleto ona ua maʻi, ae o Mareko ma Timoteo e ao ona ō atu ia te ia. O lea, o Luka, sa iai faatasi ma Paulo, ma ina ua tusia e le aposetolo lana tusi lona lua ia Timoteo, e iai nisi tagata talitonu, e aofia ai Eupolo, Paute, Lino, ma Kalaotia, sa iai iina e auina atu o latou alofaaga. E lē taumatea na latou faia le mea latou te mafaia e fesoasoani ai ia Paulo. I le taimi lava lena e tasi, sa auina atu ai e Paulo lava ia alofaaga ia Piseka ma Akula ma le auaiga o Oneseforo. Peitai ane, e faanoanoa, ona i na taimi pagatia, na tuua ai o ia e Tema, ma sa tele foi mea tiga na faia e Alesana ia te ia.—2 Timoteo 4:9-21.

“O le Aufaigaluega i Matou Faatasi ma le Atua”

Na seāseā lava tuua na o Paulo i lana galuega talaʻi. “O le manatu lea ua mapuna aʻe,” o le faamatalaga lea a le tagata fai tofā e faatatau i le Tusi Paia o E. Earle Ellis, “o le misionare lea e ese le toatele o ana aumea. O le mea moni, e seāseā lava ona mauaina Paulo e aunoa ma ni aumea.” I lalo o le taitaiga a le agaga paia o le Atua, na mafai ai e Paulo ona faagaoioia le tele o tagata ma faatulagaina  tauiviga aogā faamisionare. Sa faatasi pea ma ia soa vavalalata, tagata fesoasoani mo sina taimi, o nisi e malolosi o latou uiga, ma le tele o auauna e lotomaulalo. Peitai, o i latou nei e lē na o ni ē galulue faatasi. Tusa lava po o le ā le tele e latou te galulue ai po o le auaufaatasi ma Paulo, e manino le sootaga o le alofa faa-Kerisiano ma le faauoga totino.

Sa i le aposetolo o Paulo le mea e taʻua o le “talenia mo faauoga.” Sa tele sana gaoioiga na fai e aauina atu ai le tala lelei i atunuu, peitai e na te lei taumafai e faia toatasi. Sa ia fesootai ma isi, ma faaaogā atoatoa le faapotopotoga Kerisiano ua faatulagaina. Sa lei taʻua e Paulo faapea o ia ua maua ai iuga lelei, ae sa ia tautino ma le lotomaulalo faapea o ia o se auauna ma o le viiga uma e ao ona tuuina atu i le Atua mo le faatelega.—1 Korinito 3:5-7; 9:16; Filipi 1:1.

Sa ese aso o Paulo mai ia i tatou, ae ui i lea, e lē tatau i se tasi o le faapotopotoga Kerisiano i aso nei ona manatu faapea e mafai pe e manaomia ona tutoatasi. Na i lo lea, e ao pea ona tatou galulue ma le faalapotopotoga a le Atua, ma la tatou faapotopotoga, ma a tatou aumea talitonu. E tatou te manaomia la latou fesoasoani, lagolagosua, ma faamafanafanaga i taimi e taugalemu ai ma taimi e lē taugalemu ai. Ua ia i tatou se faaeaga tautele o le avea ma vaega o se “au uso o i le lalolagi.” (1 Peteru 5:9) Pe afai tatou te galulue soosoo tauʻau ma le faamaoni ma le alofa ma fesootai atu ia i latou uma, ona pei lea o Paulo, e mafai foi ona tatou faapea atu “o le au faigaluega i matou faatasi ma le Atua”—1 Korinito 3:9.

[Ata i le itulau 31]

APOLO

ARITAKO

PANAPA

LITIA

ONESEFORO

TESIO

TUIKO