E Mafai Ona Aveesea le Faaleaga Fua o Mea

“O LE faaleaga fua o mea o loo faia e talavou ua masani ona manatu i ai o se faailoga lea o le lē faaaloalo ma le ʻinoʻino i tagata matutua ma a latou tapulaa,” e pei ona faamatala ai e tusitala o Jane Norman ma Myron W. Harris. E ui ina talitonu le toatele o talavou faapea e leai se mea e mafai ona faia e suia ai le tulaga ua iai, ae “e toatasi mai le toʻa 3 e manatu faapea o le faaleaga fua e talavou o mea e mafai ona faaitiitia pe afai e uaʻi totoʻa atu mātua i a latou fanau, ma pe afai e lē iai se lagona fiu i talavou,” e pei ona lipotia mai e tusitala. E tusa lava pe ono faaitiitia le faaleaga fua o mea e ala i le faapisi o olaga o talavou ma tuuina atu ia i latou le vaavaaiga lelei faamātua, ae po ua na o le pau ea lena o le mea e mafai ona fai ina ia foia ai pogai autū o le faafitauli?

Pe a tuua taitoatasi, o le toatele o talavou e lē o nisi e faatupuina se vevesi, ae a tuufaatasi loa o se vaega pe taʻi toalua, ona latou taumafai loa lea e faauaʻi mai tagata, i le faia o mea valea ma mea leaga. E faapena le tulaga na oo ia Nelesoni, o lē a pulea loa e fualaau faasāina po o le ava malosi ona faaali atu loa lea o lona ita ma lona lē fiafia i  ni gaoioiga e faaleaga ai fua mea. Na faagaeetia Iose i lauga na faia i le Lotu Katoliko e faatatau i le toe faafoisia o eleele ma aiā tatau a le tagata faigaluega, na ia manatu ai e tatau ona fai sana vaega i solo tetee ma faamaopoopoina sana vaega faaleaga mea e faailoa atu ai lona tetee. Ae peitai, na maua e Nelesoni ma Iose se mea e sili atu ona lelei na i lo le faaalia o le tetee po o le faaleaga fua o mea.

Nisi o Mafuaaga Loloto o le Faaleaga Fua o Mea

Seʻi o tatou iloiloina ma le totoʻa le mafuaaga ua auai ai nisi talavou i le faaleaga fua o mea. E toatele tagata matutua ua lē mautonu ma ua latou “faamatalaina le lalolagi o se nofoaga fenuminumiai, o se nofoaga leaga, ua faatumulia i tagata e leaga ulu.” E ui i lea, ma e ese mai foi i le mea o loo talitonu i ai nisi, na faapea mai se tasi lipoti: “E popole talavou e faatatau i le itulagi o le a agaʻi i ai o latou olaga. E sili atu ona latou popole i le tulaga o le lalolagi na i lo le mea o loo manatu i ai tagata matutua e faatatau ia i latou.” Pe e lei fuafuaina pe na fuafuaina foi, ae o se talavou e aafia i le faaleaga fua o mea atonu ua ia faaalia atu i lea auala lona matuā lē fiafia, o faafitauli ua lē mafoiaina, po o manaoga ua lē taulau. E tusa ai ma le suesuega na taʻua i le amataga, “e leai se tasi o i latou na fesiligia na ioe i ai pe na taʻutonuina faiga o le faaleaga fua o mea, e oo foi ia i latou o ē [na] faia.”

Atonu e seāseā lava faalogoina e se talavou se faaupuga o le talisapaia po o se faalaeiauga. Talu ai le faateleina o le tāua o aʻoaʻoga ma o le tele o galuega e manaomia ai le maoae o le poto faapitoa po o le tomai tau tekinisi, atonu e loto vaivai ai nisi talavou. E lē gata i lena, atonu e tele ina faitio ma tagisā mātua, o faiaʻoga, po o uo, i le tuu lea o le faatāua i mea e ausia e le talavou na i lo le faatāua o lona tulaga o se tagata. E toatele ua fouvale ma faaleaga fua mea ona o le lē fiafia ia i latou lava. Pe o le a lē avea ea le alofa ma le uaʻi atu o mātua e matuā faaitiitia ai na lagona mafatia?

Atonu ua e iloaina faapea a o foliga mai ua fiu nisi pulega faalemalo i le tau puleaina o le tusitusia o nofoaga faitele ma isi ituaiga o solitulafono a talavou lē pulea, ae o loo faatalitalia pea e tagata manatu mamafa ia faiaʻoga ma ē o pule aʻoga ina ia faaitiitia ai le faaleaga fua o mea. E tusa ai o le faamalosia o le tulafono, ua faapea mai ai le World Book Encyclopedia: “E faasalaina lē e faaleaga fua mea i se sala tupe po o le faafalepuipuiina. O nisi o malo ua iai a latou tulafono e molia ai mātua ona o le faaleaga fua o mea ua faia e a latou fanau. Ae o le tele lava o gaoioiga o le faaleaga fua o mea e lē o faasalaina. E faigata tele ona faamalosia le tulafono i tulaga faapena, ma o le taui o le tele o faiga tai toatasi o mea ua faaleagaina fua e lē tāitai lava lona tau e talafeagai ai ona faia i ai se gaoioiga fetaui faaletulafono.” Na faaalia i se tasi lipoti faapea e na o le 3 pasene o tagata solitulafono na mauaina.

Atonu e te ono ioe faapea o le lelei o le tausiga faamātua atonu o le auala sili lea e taofia ai le pogai autū o le lē pulea o talavou. Peitai afai ua faaleagaina le olaga faaleaiga, e faapea foi ona pagatia ai nuu. Na matauina e le polofesa o Ana Luisa Vieira de Mattos, mai le Iunivesite o São Paulo, i Pasili e faapea, o nisi o mafuaaga o faafitauli i tagata talavou o le “vaivai lea o taʻitaʻiga faamātua, leai ni tulafono, leai ni fesootaiga, tuulafoai, feeseeseaiga po o le lē ano i ai.”

I o tatou taimi ua tatou vaaia moni ai lava le faataunuuina o fetalaiga a Iesu: “E maalili foi le alofa o le toatele o tagata, ona ua tupu tele o le amio leaga.” (Mataio 24:12, LF) Ma o ai o le a ia teena le moni o upu o loo faamauina i le 2 Timoteo 3:1-4 (LF)? Na tusi le aposetolo o Paulo: “A e ia e iloa e oe lenei mea, o ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua.” O le mea moni, o le tau lava ina ola faatasi ma tagata e iai na uiga o le a faateleina ai le lē pulea o talavou. Ae manaomia ona aua neʻi o tatou fiu ai. Ua lē taulau nuu i le tafiesea o faiga o le faaleaga fua o mea, ae e mafai ona tatou maua tagata ua taulau manuia i le suia o o latou lava olaga, ua lē o toe amio valea  ma lē pulea. I o latou tulaga ua taofia le faaleaga fua o mea.

Taiala Aogā mo le Au Talavou

O le ā na fesoasoani i le au faaleaga fua o mea ma isi ina ia suia o latou lava uiga? E ui ina foliga mai e faigata ona talitonuina e nisi faiaʻoga ma mātua, ae ua saunia e le Tusi Paia taiala sili ona lelei ma talafeagai mo o tatou aso. E ala i le mulimuli i ai, ua uunaia ai nisi sa avea muamua ma tagata faaleaga mea e usiusitai i le tulafono faapitoa a le Atua: “Aua e te mulimuli atu i le toatele e fai le amio leaga.” (Esoto 23:2) O le toatele na tosina atu i le upu moni mai le Afioga a le Atua e faatatau i talitonuga ma aʻoaʻoga latou te lei malamalama muamua i ai, ma o mea ua latou aʻoaʻoina ua taaʻina ai i latou i mea e sili ona lelei. Seʻi mafaufau i le mea na tupu ia Iose, o se talavou i São Paulo. Na ola aʻe o ia ma le talitonuga e ao ona faaaogā faatusa i tapuaiga. Ina ua ia aʻoaʻoina e iai se suafa o le Atua, o Ieova, ma e lē taliaina e Ia tapuaiga i faatusa, na faia e Iose ni suiga ina ia faia le mea e fia silasila i ai fofoga o le Atua.—Esoto 20:4, 5; Salamo 83:18; 1 Ioane 5:21; Faaaliga 4:11.

I le tulaga o Nelesoni, na i lo le oo i ai o le mau mea leaga i kegi sauā ma fouvalega, na ia mauaina le faamoemoe moni mo le lumanai, ma ua faapea ona avatu ai ia te ia se mapusaga tele. Na ia faapea mai: “Na i lo le teena o aʻu e loʻu aiga ona o aʻu aumea leaga ma le olaga o se tagata e faaaogaina fualaau faasāina, ua avea aʻu i le taimi nei ma sē e pito i sili ona faaaloalogia i le aiga. E masani lava ona talosaga mai loʻu tamā ina ia ou fautuaina oʻu uso matutua. Talu mai ona ou suesueina le Tusi Paia ma Molimau a Ieova, ua ou iloa le olioli talu ai o lea ua iai soʻu faamoemoe i le olaga.” Ma mo se talavou e nofo i le taulaga e pei o Marco—e masani i le ola i se siomaga sauā—o le iloaina faapea o le a faia e le Malo o le Atua le lalolagi ma parataiso ua avea moni lea ma faamafanafana loto.—Faaaliga 21:3, 4.

Seʻi mafaufau foi i le tulaga o se tasi sa iai i kegi, faamisa i le auala, ma faaleaga fua mea. I le avea ma tamaitiiti matuaoti ma se olaga faanoanoa a o laitiiti, na matuā ofo Vasa i le iloaina faapea i lenei faiga o mea piopio ma le amioleaga, o loo iai tagata o le Atua. O loo latou finafinau ma le faamaoni e faatatauina mataupu silisili o le Tusi Paia i o latou olaga, i le faaalia o le agaalofa, magafagafa, ma le agalelei. Na faamatala e Vasa faapea: “E moni le folafolaga a Iesu, ua iai nei soʻu aiga toatele, ‘o uso ma tuafāfine ma tinā ma tamā.’ E tusa ai o le lumanai, o loo oʻu tulimataia le taimi o le a ola faatasi ai tagata i le fiafia ma le autasi i lalo o le pulega amiotonu a le Atua.”—Mareko 10:29, 30; Salamo 37:10, 11, 29.

Se Mea e Sili Atu i lo le Tetee

E faaopoopo atu i le faaalia o le magafagafa ma le alofa mo o latou uso a tagata, ua aʻoaʻoina e i latou nei sa avea muamua ma tagata faaleaga mea le “ʻinoʻino i mea leaga.” (Salamo 97:10; Mataio 7:12) Ae faapefea oe? E tusa lava foi pe o oe o se tasi o loo mafatia i āuga o faiga o le faaleaga fua o mea ia ua taatele, ae o le suesueina o le Afioga a le Atua o le a fai ai Ieova ma sē e moni ia te oe i le avea o se Tamā faalelagi alofa o lē e fia tausi mai ia te oe. (1 Peteru 5:6, 7) E mafai ona fesoasoani le Atua ia te oe ia e tuputupu aʻe faaleagaga, e tusa lava po o ā vaivaiga totino po o le lē tagolima. O se mea sili lena ona ofoofogia!

E finagalo moni Ieova ma lona Alo, o Iesu Keriso, mo so o se ituaiga o tagata ina ia maua le avanoa e aʻoaʻoina ai le upu moni o le Tusi Paia. E sili atu isi mea e mafai ona faia e le Afioga a le Atua na i lo le tau ina fesoasoani i tagata taitoatasi e taofia le faaleaga fua o mea i le taimi nei. E mafai ona uunaia ai i latou na e faia ni agaigai i luma i le faatatauina o mataupu silisili tauatua. O le iuga, e avea ai i latou ma vaega o le auuso faava-o-atunuu ua lauiloa i le mamā ma le lelei tau amio, le faapotopotoga i le lalolagi aoao o Molimau a Ieova. Ina ia ogatusa ma le Efeso 4:24, o nei Kerisiano faamaoni ua latou “oofu i le tagata fou ua faia e foliga i le Atua, i le amiotonu ma le amio lelei e faamaoni.” E lē o toe umi ae faatumulia le lalolagi i tagata faapena auā e na o i latou lava o le a faasaoina ma ola e faavavau.—Faatusatusa i le Luka 23:43.

E Mafai Ona Iai se Lalolagi Fou e Lē Toe Maua ai le Faaleaga Fua o Mea

Pe e te talitonu e mafai moni lava ona tafiesea le faaleaga fua o mea? Afai o lea, e faapefea ona faaoo mai lena suiga tāua? E lē o toe umi ae liaieseina  e le Malo o le Atua lenei faiga o mea amioleaga. O i latou e aināina le lalolagi o le a fafa i ai so o se solia ma le loto i ai o tulafono amiotonu a le Atua. (Faatusatusa i le Isaia 24:5, 6.) E ui ina “fano faatasi o e solitulafono,” ae o le a laveaia i latou o ē alolofa i le amiotonu. “E fesoasoani foi Ieova ia te i latou, ma laveai ia te i latou; e laveaiina lava i latou e ia ai tagata amio leaga, na te faaolaina foi i latou, auā ua latou faatuatua ia te ia.”—Salamo 37:38-40.

E moni, o le a aveesea atoatoa aa o le faaleaga fua o mea. E faapena foi i solitulafono uma, mafatiaga, puapuaga, ma le amioleaga. O le a avea le filemu, amiotonu moni, lē gaoia, ma le saogalemu ma ituaiga olaga o le a faatumulia ai le lalolagi fou. Ua faamatala mai e le Isaia 32:18 le mea o le a tupu moni i se auala faaletino: “E nonofo foi loʻu nuu i le mea e manuia ai, ma fale e saogalemu ai, ma mapusaga e filemu ai.” Ioe, o se parataiso matagofie, i le lalolagi aoao o le a aināina e tagata o ē faaalia le alofa ma le magafagafa i isi.

Faatasi ai ma le faitau miliona o isi, o ē sa avea muamua ma tagata faaleaga mea ua olioli i se faiā māfana ma Ieova le Atua. Ua lē o toe faia sa latou vaega i gaoioiga o le faaleaga fua o mea. Pe o le a e faatagaina foi le Afioga a le Atua e taʻitaʻia oe i le ola i lana lalolagi fou? Aisea e lē faataitai ai i le faisalamo anamua o lē na faamauina le tautinoga a Ieova e faapea: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.”—Salamo 32:8.

[Ata i le itulau 7]

O le uaʻi atu o mātua ma lo latou alofa e puipuia ai le au talavou