Fesili Mai le Au Faitau

Talu ai o lea ua iai se faamatalaga faapea o taotoga e taofia ai le fanautama ua mafai ona suia ina ia mafai ai ona toe fanau pe a faatalosagaina, pe e ono manatu la i ai se Kerisiano o se isi lena o togafitiga e mafai ona faaaogaina e pulea ai le fanautama?

O le faia o taotoga e taofia ai le fanautama ua avea o se faiga ua sili ona taatele le faaaogaina mo aiga fuafuaina. I le toatele o tagata, o le taliaina o se taotoga e foliga e fuafua lea i le tulaga tau le soifuaga lautele ma le siomaga tau aʻoaʻoga, e aofia ai foi ma manatu faaletapuaiga. O le itu i le talitonuga faaletapuaiga e faatāua lea e Molimau a Ieova, o ē e iai ia i latou le naunautaiga o le faisalamo e faapea: “Ieova e, ia e aʻoaʻo mai ia te au i lou ala, ma taʻitaʻi ia te au i le ala laulelei [“saʻo,” NW].” (Salamo 27:11) O le ā o loo aofia ai i faiga o taotoga e taofia ai le fanautama?

O le taotoga o le tane e taofia ai le fanautama e taʻua o le vasectomy. E tipi ni tamai ālā sua ola se lua, po o faagaau, o i le tagafua ona poloka loa lea. E mafai ona faia i ni faiga eseese faafomai, ae o le fuafuaga ina ia matuā taofia ai le tafe atu o sua ola mai fuatane. O le taotoga e taofia ai le fanautama o se tamaitai e taʻua o le tubal ligation. E masani ona faia e ala i le tipiina ma nonoa (po o le, susunu) ia punitia avefelope (Fallopian tubes), ia e faaooina atu fuā sela mai fua fafine i toala fanau.

Ua leva ona manatu i ai o nei taotoga e mo le olaga atoa—e matuā lē mafai ai lava ona toe fanau. Peitai o nisi tagata, talu ai ua toe salamō i o latou taotoga sa fai ia po o ni tulaga fou foi ua tulai mai, ua latou sailia ai se fesoasoani faafomai ina ia toe faaleleia faagaau o alafua po o le toe tatala pe faaleleia avefelope. Ona o le tulai mai o meafaigaluega faapitoa ma faiga tau taotoga i totoga laiti, ua tele ina taulau manuia ai taumafaiga e suia taotoga ia sa faia muamua ina ia mafai ai ona toe fanau. Ua masani ona faitau i tala i tagata patino ua filifilia mai e mafai ona 50 i le 70 pasene e taulau manuia ai le toe suia o le taotoga sa faia muamua i se tane ina ia mafai ona toe fanau e ala i le toe sosoo o pito o faagaau laiti ia na tatipi. Ua faapea mai foi ni faamatalaga e tusa ma le 60 i le 80 pasene le taulau manuia o le toe faaleleia o avefelope o tamaitai. O nisi ua latou iloaina lenei mataupu ua iai ni lagona faapea o taotoga e taofia ai le fanautama e lē tatau ona toe manatu i ai o se faiga e tumau ona matuā lē toe fanau ai i le olaga atoa. E ono mafai ona latou talitonu o le taotoga o se tane e poloka ai ālā sua ola ma le taotoga o se fafine e punitia ai avefelope e taofia ai le fanautama e mafai ona manatu i ai e tutusa lea ma isi mea ia e faaaogā e puipui ai mai le maʻi afuafua e pei o fualaau, o paʻu faiusuga, ma mea e tuu i totonu o le toala fanau o le fafine (diaphragms)—o faiga e mafai ona taofia le faaaogaina pe a manao loa e maito. Peitai, e iai nisi vala matuia e lē tatau ona faatalale i ai.

O se tasi o ia vala e faapea, o le taulau manuia o le toe suia o le taotoga muamua e mafai ona aafia tele ai i itu e pei o, le tele ua faaleagaina ai ālā sua ola po o avefelope i taimi e faia ai le taotoga e taofia ai le fanautama, le telē o le ālā sua po o le avefelope ua toesea pe ua faamanualia, le aofaiga o tausaga ua tuanai talu ona faia le taotoga e taofia ai le fanautama, ma e faatatau i taotoga o tane, pe faamata ua ati ae e lona tino ni sela e faasagatau i ona sua ola. Ma e lē tatau foi ona faatalale i le mea moni faapea o taotoga i totoga laiti atonu e lē o iai i le tele o vaipanoa, pe o le a lē gafatia foi le totogi o taotoga. O lea o le toatele o ē e matuā mananao ina ia toe faia ni taotoga e sui ai taotoga ia na faia muamua ina ia mafai ai ona toe fananau o le a lē mafai ona latou faia faapea. O i latou e faapea, o le a tumau ai lava i le tulaga ua oo i ai. * O lea, o fua faatatau ia o loo taʻua i luga o le toe suia o taotoga ua uma ona faia ina ia toe fananau ai ua na o ni manatu i mea e mafai ona fai, ae lē o ni fua faatatau e maufaatuatuaina.

O nisi o faamaoniga e fesootai atu i mea moni. O se mataupu na lomia i le Iunaite Setete e faatatau i le toe suia o le taotoga o se tane ina ia mafai ai ona toe fanau na faapea mai, ina ua uma se taotoga e $12,000 le tau, “e na o le 63 pasene tane na mafai ona toe totō o latou taitoalua.” E faaopoopo atu i ai, e na o le “ono pasene o tane na faia o latou taotoga ina ia taofia ai le fanautama na mulimuli ane ō atu e toe suia nei taotoga.” I se suesuega na faia i Siamani e faatatau i Europa tutotonu, e tusa ma le 3 pasene o tane na filifili e faia ni taotoga e taofia ai le fanautama na latou toe saili atu e toe suia ia taotoga. E tusa lava la pe taulau manuia le ʻafa o na taumafaiga, ae o lona uiga o le 98.5 pasene o taotoga e faia i tane o le a oo atu ina lē toe fananau lava i le olaga atoa. Ma o le a maualuga atu le fua  faatatau i atunuu e lē toatele pe leai foi se fomai e faia taotoga i totoga laiti.

O le iuga la, e lē o tusa ai ma mea moni le manatu māmā i taotoga e taofia ai le fanautama i tamaitai faapena ma tane, e peiseaī o se faiga e lē tumau e pulea ai le fanautama. Ae mo le Kerisiano faamaoni, e iai isi vala e manatunatu i ai.

O le manatu autū, o le malosi o le fanautama o se meaalofa lea mai Lē na Foafoaina i tatou. O lana uluai fuafuaga na aofia ai le faia o ni fanau e tagata lelei atoatoa, o ē o le a ‘tumu ai le lalolagi ma faatoilalo i ai.’ (Kenese 1:28) Ina ua uma ona faaitiitia e le Lolo le faitau aofai o le lalolagi i le toavalu, ona toe fetalai mai foi lea o le Atua i na faatonuga faavae. (Kenese 9:1) Sa lei toe fetalai atu le Atua i lena poloaiga i le nuu o Isaraelu, ae na manatu tagata Isaraelu o le fai fanau o se mea na manaomia tele.—1 Samuelu 1:1-11; Salamo 128:3.

O le Tulafono a le Atua ia Isaraelu na iai ni faailoaga o lona finagalo e tusa ai ma le afuafuaina o tagata. Mo se faataitaiga, pe afai e oti se tane faaipoipo a o lei maua sona atalii ina ia faaauauina lona gafa, sa tatau i lona uso ona fanaua mai se atalii e ala i le faaipoipo atu i le avā a lona uso ua maliu. (Teuteronome 25:5) E sili ona fesootai ma le mataupu le tulafono e faatatau i se avā e taumafai e fesoasoani atu i lana tane i o se misa. Pe a oomi e le fafine le totogasa o lē o loo misa ma lana tane, e ao ona tipi ese le lima o le fafine; i se uiga tāua e matauina, na lē finagalo le Atua e faaoo atu i ai le faasalaga o le mata e sui ai le mata i le avā po o le faaleagaina o totoga fanautama o lana tane e taui ai. (Teuteronome 25:11, 12) O lenei tulafono o le a manino e uunaia ai le faaaloalo i totoga fanautama; e lē tatau ona faaleagaina nei totoga i se tulaga lē tatau. *

Ua tatou iloa e lē o ola Kerisiano i lalo o le Tulafono na tuuina atu ia Isaraelu, o lea o le tulafono o i le Teuteronome 25:11, 12 e lē o saisaitia ai i latou. Sa lei faatonuina pe na faauiga foi se fetalaiga a Iesu faapea e ao i ona soo ona faaipoipo ma faia ia toatele ni fanau i le mea e gata mai ai, ona o lea e toatele ulugalii ua filifili pe faamata e faaaogā nisi o faiga e pulea ai le fanautama. (Mataio 19:10-12) Na faalaeiau atu Paulo ‘i fafine muli ua oti a latou tane ina ia faaipoipo ma fai ni fanau.’ (1 Timoteo 5:11-14) Sa lei taʻua e Paulo le faia o taotoga e taofia ai i le olaga atoa le toe fananau o Kerisiano—filifili i latou lava e faataulagaina avanoa e mafai ona faia ai ni fanau.

E lelei i Kerisiano ona fuafua na faailoaga o le faamamaluina e le Atua o malosi e mafai ona maua mai ai ni fanau. E tatau i ulugalii taitoatasi ona fuafua pe faia ma po o le ā foi le taimi o le a la faaaogaina ai togafitiga talafeagai mo aiga fuafuaina. Ae maise lava, o le a sili ona faatāuaina le la faaiuga pe afai ua faamaonia e faamautinoaga faafomai faapea e matautia ni lamatiaga e fesagai ma le tinā po o le tamaitiiti i le talitonuga faafomai, e ono oo atu ai foi ina maliu, pe a toe tulai mai se isi maitaga i le lumanai. O nisi e oo i ai ia tulaga ua faatalatu ae mulimuli ane lolo atu i se taotoga e taofia ai le fanautama e pei ua uma ona faamatalaina atu ina ia lē faamataʻuina e se maito le soifua o le tinā (o lē atonu ua iai nisi ana fanau) po o se tamaitiiti atonu o le a mulimuli ane fanau mai ma se faafitauli tau le soifua maloloina e lamatia ai lona ola.

Ae o Kerisiano e lē o fesagai ma se lamatiaga faapena e lē masani ona tulai mai ma e tumaʻoti, e mautinoa lava o le a latou mananao e faaaogā le ‘faautauta’ ma faatatau atu o latou manatu ma amio i le faamamaluina e le Atua o le malosi o le fanautama. (1 Timoteo 3:2; Tito 1:8; 2:2, 5-8) E faaatagia e lenei mea le faaeteete taʻumatuaina i mea ua faailoa mai e le Tusi Paia. Peitai, e faapefea pe afai ua iloa e le lautele ua lafoai e se Kerisiano mea ua fuafuaina e le Atua e aunoa ma se manatu mamafa i ai? Pe o le a lē masalomia ai ea o ia e isi pe faamata o ia (o le uso po o le tuafafine) o sē e fai ma faaaoaoga lelei, o sē e iai se talaaga o le faia o faaiuga e ogatusa ma le Tusi Paia? O le mea moni, o se matauleagaina faapena o le talaaga o se tasi e mafai ona afaina ai le avea o se faifeau taʻuagavaaina mo faaeaga faapitoa o le auaunaga, ae atonu e lē o le tulaga lena e tatau ona iai pe afai sa lē malamalama lelei se tasi i le taimi na faia ai lea ituaiga o taotoga.—1 Timoteo 3:7.

[Faaopoopoga i lalo]