Aisea e Talitonu ai ia Iesu Keriso?

“E OO lava i le toatele o tagata e lē o ni Kerisiano o loo talitonu faapea sa avea o Ia o se faiaʻoga sili ma le atamai. E mautinoa le avea o ia ma lē na aupito sili o tagata uma na soifua mai na taaʻina ai le toatele.” (The World Book Encyclopedia) O ai o “Ia”? O Iesu Keriso, o lē na faavaeina le Faa-Kerisiano.

Peitai, e ui lava i lenei faamatalaga mai lenei tusi, ae i le faitau selau miliona o tagata i atunuu i Sasaʻe ma isi lava vaipanoa, e avea Iesu Keriso o se tagata ese latou te lē iloaina, ua na o se igoa atonu latou te manatua mai tusi aʻoga i aʻoga maualuluga. E oo lava foi i lotu a Kerisinetoma, e iai lava tagata popoto i mataupu faalotu ma faifeau e faapea mai latou te lē o iloa moni lava Iesu ma e lē o mautonu foi i le moni o tala iloga e fa e faatatau i lona soifuaga (i Evagelia) o loo maua i le Tusi Paia.

Pe sa ono mafai e tusitala o Evagelia ona tusia pepelo le tala o le soifuaga o Iesu? E lē tāitai mafai! Na tusi le tusitala lauiloa o talafaasolopito o Will Durant, ina ua maeʻa se iloiloga o faamatalaga a na Evagelia e faapea: “Afai na fatuina e ni nai tagata faatauvaa i se tupulaga e tasi, se tagata e sili ona malosi ma tausaafia ona uiga, e matuā maualuluga ana mataupu silisili ma avea o se vaaiga faagaeeina i le auuso faaletagata, o le a avea lea o se vavega e matuā sili atu ona talitonu gatā na i lo so o se tala ua faamauina e Evagelia. Ina ua mavae le lua senituri o Faitioga Faafiapopoto, o tala i le soifuaga, uiga, ma aʻoaʻoga a Keriso, ua tumau pea le manino, ma avea o se vaega e sili ona tosina ma le fiafia atu i ai le talafaasolopito o tagata i Sisifo.”

E ui i lea, o loo iai i latou o ē faalēaogaina le tulaga o Iesu Keriso faapea e lē tāua ia i latou talu ai mea na faia e ona soo faatagafai. ‘Na latou faapaʻūina se pomu atomika i Nagasaki,’ e ono faapea mai ai nisi i Iapani. ‘Ma e toatele atu Kerisiano i Nagasaki na i lo le tele o isi aai i Iapani.’ Ae faamata e mafai ona e tuuaʻia le fomaʻi ona o le maʻi o se tasi talu ai le lē mulimuli o le tagata maʻi i le faatonuga a le fomaʻi? O le toatele o tagata o loo faapea mai o Kerisiano, ua loa ona latou lē amanaia le faatonuga a Iesu e manumalo ai mai faafitauli o le fanau a tagata. E ui i lea, ua aumai e Iesu le vaifofo mo o tatou faafitauli i aso taitasi faapena foi ma mafatiaga o le fanau a tagata i le lalolagi aoao. O le mafuaaga lena matou te valaauliaina ai oe ina ia faitau i le mataupu o sosoo mai ma silasila ifo lava oe ia i ai pe o le ā le ituaiga tagata sa iai o ia.