Fonotaga Faaletausaga Oketopa 2, 1999

O LE FONOTAGA FAALETAUSAGA a sui o le Watch Tower Bible and Tract Society of Pennsylvania o le a faia ia Oketopa 2, 1999, i le Maota Fono o Molimau a Ieova, i le 2932 Kennedy Boulevard, Jersey City, New Jersey. O le uluai fono e mo na o sui, o le a tauaofia i le 9:15 i le taeao, ona sosoo mai ai lea ma le fonotaga masani faaletausaga i le 10:00 i le taeao.

E ao i sui o le Sosaiete faaletulafono ona faailoa nei i le Ofisa o le Failautusi so o se suiga o o latou tuatusi o le meli na faia i le tausaga ua teʻa, ina ia oo atu ia Iulai, ua mafai ona latou maua tusi masani o faaaliga ma pepa e faaalia mai ai lo latou auai pe leai foi ma taʻu mai ai la latou palota mo sui faatutū.

O na pepa (proxies) ma faaaliga o le fonotaga faaletausaga lea o le a avatu i sui, e ao ona toe faafoi ane ina ia taunuu i le Ofisa o le Failautusi a le Sosaiete ia lē silia le aso 1 o Aokuso. E ao i sui taitasi ona faatumuina ma toe faafoi vave ane lana pepa, o loo taʻua ai po o le a auai i le fonotaga pe leai. O faamatalaga e aumaia i na pepa taitasi e tatau ona maʻoti mai ai lenei manatu, ona o le a faalagolago i ai le faamautinoaina o ē o le a auai.

Ua iai le faamoemoe o le a maeʻa le polokalame atoa, e aofia ai le fonotaga aloaia o mataupu faapisinisi ma lipoti, i le 1:00 i le aoauli po o le teʻa laitiiti o lena taimi. O le a leai se polokalame o le afiafi. Ona o le itiiti o le avanoa, o le a faatagaina ai na o ē o loo iai pepa ulufale. O le a lē faia ni fuafuaga e faafesootai atu ai le fonotaga faaletausaga i laina telefoni i isi fale fono.