Mātua e, o ā Mea o Aʻoaʻo Atu e a Outou Faaaoaoga?

“Ia faaaʻoaʻo outou i le Atua, faapei o le fanau pele; ma ia savavali i le alofa.”—EFESO 5:1, 2.

1. O ā ituaiga o taiala na saunia e Ieova mo le uluai ulugalii faaletagata?

O IEOVA o Lē na Amataina le faatulagaga o le aiga. E nofo aitalafu aiga uma ia te ia mo lo latou iai, auā o ia na faavaeina le uluai aiga ma tuuina atu i le uluai ulugalii faaletagata se malosi e mafai ai ona la fanauina mai ni fanau. (Efeso 3:14, 15) Na ia saunia mo Atamu ma Eva ni faatonuga autū e tusa ai o o la tiute tauave ma avatu foi ia i laua se avanoa tele e faaaogā ai o laua lava tomai e tausolomua ai i le faatinoina o nei tiute tauave. (Kenese 1:28-30; 2:15-22) Ina ua agasala Atamu ma Eva, na atili ai loa ona lavelave tulaga ia sa tatau i aiga ona latou faafetaiaia. Peitai, sa saunia mai pea ma le alofa e Ieova taiala o le a fesoasoani i ana auauna i le faatautaiina o na tulaga.

2. (a) O ai ua faaaogā e Ieova e faamalosia atili ai ana fautuaga tusitusia e ala i faatonuga tuugutu? (e) O le ā le fesili o loo manaomia ona fesiligia ai e mātua i latou lava?

² Ona o ia o lo tatou Aʻoaʻo Sili, ua faia ai e Ieova nisi mea e tele atu na i lo le saunia mai o taiala tusitusia i mea e tatau ona tatou fai ma mea e tatau ona tatou alofia. I taimi anamua sa ia aumaia faatasi ai faatonuga tusitusia ma faatonuga tuugutu e ala mai i ositaulaga ma perofeta ma ala mai foi i ulu o aiga. O ai o loo ia faaaogā mo le saunia mai o na aʻoaʻoga tuugutu i o tatou aso? O toeaina Kerisiano ma mātua. Afai o oe o se matua, po o e faia ea lau vaega o le faatonuina o lou aiga i ala o Ieova?—Faataoto 6:20-23.

3. O le ā e mafai e ulu o aiga ona aʻoaʻoina mai ia Ieova e tusa ai o aʻoaʻoga e uigā?

³ E tatau faapefea ona faaoo atu na faatonuga i totonu o le aiga? Ua faataatia e Ieova le faaaoaoga. Ua ia taʻua manino mai le mea e lelei ma le mea e leaga, ma ua faifai pea ona ia toe taʻua mai na mea. (Esoto 20:4, 5; Teuteronome 4:23, 24; 5:8, 9; 6:14, 15; Iosua 24:19, 20) Na te faaaogā fesili faatupu manatu. (Iopu 38:4, 8, 31) E ala i tala faatusa ma faaaoaoga o mea moni na tutupu i tagata, na te faagaee ai o tatou lagona ma ati ae o tatou loto. (Kenese 15:5; Tanielu 3:1-29) Mātua e, pe a tou aʻoaʻoina a outou fanau, po o tou taumafai ea e faataitai i lena faaaoaoga?

4. O le ā tatou te aʻoaʻoina mai ia Ieova e tusa ai o le tuuina atu o aoaiga, ma aisea e tāua ai aoaiga?

⁴ E maumauai Ieova mo le mea saʻo, ae malamalama o ia i aafiaga o le lē lelei atoatoa. A o ia lei faia la se faasalaga, e na te aʻoaʻo ma aumai pea lava pea lapataiga ma faamanatuga i tagata lē lelei atoatoa. (Kenese 19:15, 16; Ieremia 7:23-26) Pe a faia lana aoaiga, e na te faia i se tele ua talafeagai, ae lē o le soona fai ma le lē fuafua tatau. (Salamo 103:10, 11; Isaia 28:26-29) Pe afai o le auala lena o loo tatou faia ai a tatou fanau, o le a faamaonia ai la o loo tatou iloa Ieova, ma o le a faigofie ai foi mo i latou ona latou iloa o ia.—Ieremia 22:16; 1 Ioane 4:8.

5. O le ā e mafai e mātua ona aʻoaʻoina mai ia Ieova e tusa ai o le faalogologo?

 ⁵ O se mea ofoofogia, o loo faafofoga mai Ieova i lona avea ai ma Tamā alofa i le lagi. E na te lē tau ina faaoo mai faatonuga. Na te faalaeiauina i tatou ina ia sasaa atu o tatou loto ia te ia. (Salamo 62:8) Ma afai e lē saʻo atoatoa faaupuga o loo tatou faaleo atu, e na te lē leoleoā ma otegia i tatou mai le lagi. E aʻoaʻo ma le onosai mai o ia ia i tatou. Maeu la le talafeagai, o le fautuaga a le aposetolo o Paulo: “Ia faaaʻoaʻo outou i le Atua, faapei o le fanau pele”! (Efeso 4:31–5:1) Maeu se faaaoaoga lelei ua faataatia e Ieova mo mātua a o latou saili e faatonu a latou fanau! O se faaaoaoga e pāʻia ai o tatou loto ma tatou mananao ai e savavali i ona ala o le olaga.

O Aafiaga e Faamalosia Atili e Faaaoaoga

6. E faapefea i uiga ma faaaoaoga a mātua ona aafia ai a latou fanau?

⁶ E lē gata i faatonuga e faaleo atu, ae ua iai foi se aafiaga aogā a faaaoaoga i talavou. Pe fiafia i ai mātua pe leai, ae o le a faataitai atu lava a latou fanau ia i latou. Atonu e faafiafiaina ai mātua—o nisi foi taimi e faateʻia ai i latou—pe a faalogo atu o tautatala mai a latou fanau i mea na latou tautatala ai foi. Pe afai e atagia uma mai i amioga ma uiga o mātua se talisapaia loloto mo mataupu faaleagaga, o le a faaoo atu ai e lenei mea se aafiaga lelei i fanau.—Faataoto 20:7.

7. O ā ituaiga o faaaoaoga a mātua na faataatia e Iefata mo lona afafine, faatasi ai ma le ā le iuga?

⁷ O āuga o faaaoaoga a mātua ua faataitaia lelei mai i le Tusi Paia. O Iefata, o lē na faaaogā e Ieova e taʻitaʻia le manumalo o Isaraelu i le fanauga a Amoni, sa fai foi o ia ma tamā tausi aiga. O le tala i lana tali atu i le tupu o Amoni e faaalia ai atonu sa masani ona faitau e Iefata le talafaasolopito o feutagaiga a Ieova ma Isaraelu. Sa mafai ona ia toe taʻua ma le mautinoa lena talafaasolopito, ma na ia faaalia se faatuatua malosi ia Ieova. E leai se faaletonu, na fesoasoani lana faaaoaoga i lona afafine e ati ae ai se faatuatua ma se agaga faataulagaina totino, lea na ia faaalia a o faatinoina lana auaunaga mo lona olaga atoa o le avea o se teine nofofua na tuutoina atu lona ola ia Ieova.—Faamasino 11:14-27, 34-40; faatusatusa i le Iosua 1:8.

8. (a) O le ā le uiga lelei na faaalia e mātua o Samuelu? (e) Na faapefea ona aogā lena mea ia Samuelu?

⁸ O Samuelu na avea ma faaaoaoga lelei o se tamaitiiti ma sa faatuatua o ia i le Atua a o avea ma perofeta i lona olaga atoa. Pe tou te mananao ia tutupu aʻe a outou fanau e pei o Samuelu? Seʻi iloilo lelei le faaaoaoga na faataatia e mātua o Samuelu, o Elekana ma Hana. E ui sa faalēlelei le tulaga na iai lo latou aiga, ae sa ō atu e lē aunoa i latou i Sailo mo le tapuaiga, i le nofoaga sa iai le falefetafai paia. (1 Samuelu 1:3-8, 21) Seʻi mātau faalogona loloto o Hana sa ia faaalia a o tatalo. (1 Samuelu 1:9-13) Seʻi mātau pe na faapeī lagona o i laua uma i le tāua o le faataunuuina o so o se folafolaga ua uma ona faia i le Atua. (1 Samuelu 1:22-28) O le la faaaoaoga lelei e mautinoa na fesoasoani ia Samuelu e ati ae ai uiga ia sa mafai ai ona ia uia se ala saʻo—e ui lava sa faaalia e tagata na latou nonofo faatasi o ē na tatau ona auauna atu ia Ieova, le lē faaaloalo i ala o le Atua. Mulimuli ane, ona foai atu lea e Ieova ia Samuelu le tiute tauave e avea ai ma Ana perofeta.—1 Samuelu 2:11, 12; 3:1-21.

9. (a) O ā taaʻiga i le aiga sa iai ni ona aafiaga lelei ia Timoteo? (e) O le ā le ituaiga o tagata sa iai Timoteo?

⁹ Pe e te manao ea e avea lau tama po o lou atalii ia pei o Timoteo, o lē na avea ma aumea a o tama talavou, a le aposetolo o Paulo? Sa lē o se tagata talitonu le tamā o Timoteo, peitai na faataatia e lona tinā ma le tinā o lona tinā se faaaoaoga lelei o le talisapaia o mea faaleagaga. E lē taumatea sa fesoasoani lenei itu e faataatia ai se faavae lelei mo le olaga o Timoteo o se Kerisiano. Ua taʻu mai ia i tatou faapea o lona tinā, o Eunike, ma Loi le tinā o lona tinā, sa la “faatuatua faamaoni.” O o la olaga o ni Kerisiano sa lei faatagafai; na la ola moni lava e ogatusa ma mea na la taʻutino o loo la talitonu i ai, ma na la aʻoaʻoina ai foi le talavou o Timoteo ina ia fai na lava mea. Na faamaonia mai e Timoteo lona maufaatuatuaina ma sa manatu mamafa moni  o ia mo le lelei o isi.—2 Timoteo 1:5; Filipi 2:20-22.

10. (a) O ā faaaoaoga i fafo atu o le aiga e ono aafia ai a tatou fanau? (e) E tatau faapefea ona tatou tali atu pe a aliaʻe nei aafiaga i gagana po o uiga o a tatou fanau?

¹⁰ O faaaoaoga e aafia ai a tatou fanau e lē na o le aiga e maua uma i ai. O loo iai tamaiti o loo latou aʻoʻoga faatasi, o faiaʻoga o loo fai ma a latou galuega le atiina ae o mafaufau o tamaiti, o tagata e malolosi o latou lagona faapea, e tatau i tagata taitoatasi ona usitaia tū masani ua matuā mauaa ona faavaeina a se ituaiga o tagata po o se nuu, o tagata taʻutaʻua i taaloga ua matuā viiviia mea ua latou ausia, ma tagata maualuluga a le malo o loo faamatilatila mai a latou amioga i tala fou. E faitau miliona tamaiti ua latou vaaitino foi i faiga sauā o loo faia i taua. Pe tatau ai ea la ona faateʻia i tatou pe a teʻi ua aliaʻe mai nei aafiaga i gagana po o uiga a a tatou fanau? E faapeī la tatou tali atu i ai pe a latou faia na mea? Pe foia ea le faafitauli i ni faamatalaga tutui o le ita po o se otegia malosi? Na i lo le tali vave atu i a tatou fanau, pe lē sili atu ea ona lelei pe a tatou fesili ifo ia i tatou lava, ‘Pe iai ea se mea i le ala a Ieova lea o loo ia feutagai ai ma i tatou, e ono aogā i le iloaina o le auala e taulima ai lenei faafitauli?’—Faatusatusa i le Roma 2:4.

11. Pe a faia e mātua ni mea sese, e faapefea i lenei mea ona aafia ai uiga o a latou fanau?

¹¹ O le mea moni, e lē o taimi uma o le a faafetaiaia ai e mātua lē lelei atoatoa tulaga i se auala e sili ona lelei. O le a latou faia foi ni mea sese. Pe a oo ina iloa e le fanau lena mea, po o le a mou ese atu ai ea lo latou faaaloalo i o latou mātua? Atonu e tupu, ae maise pe afai e taumafai mātua e taʻumāmāina o latou sese e ala i le soona inainā e faaali la latou pule. Peitai e ono matuā ese lava le iuga pe afai e loto maulalo mātua ma taʻutino mai o latou sese. O lenei tulaga, e mafai ai ona latou faataatia se faaaoaoga tāua mo a latou fanau, o ē e tatau ona iloa le auala e faia ai lena lava mea.—Iakopo 4:6.

Mea e Mafai Ona Aʻoaʻo Atu e a Tatou Faaaoaoga

12, 13. (a) O le ā e manaomia e le fanau ona iloa e faatatau i le alofa, ma e mafai faapefea ona aʻoaʻoina lenei mea i se tulaga sili ona uigā? (e) Aisea e tāua ai ona aʻoaʻoina le fanau e faatatau i le alofa?

¹² E tele lesona aogā e mafai ona aʻoaʻo atu ma le matuā uigā pe afai e ō faatasi le faaleo atu o faatonuga ma se faaaoaoga lelei. Seʻi manatu i nisi nei o faaaoaoga.

¹³ Le faaalia o le alofa lē manatu faapito: O se tasi o lesona sili ona tāua e mafai ona faamalosia e faaaoaoga, o le uiga o le alofa. “Ua tatou alolofa, auā na . . . muai alofa mai [le Atua]  ia te i tatou.” (1 Ioane 4:19) O ia o le Puna ma le faaaoaoga silisili o le alofa. O lenei alofa e faavae i mataupu silisili, a·gaʹpe, e sili atu i le 100 taimi o loo taʻua ai i le Tusi Paia. O se uiga e mataulia ai Kerisiano moni. (Ioane 13:35) O lena alofa e tatau ona faaali atu i le Atua ma Iesu Keriso e faaalia foi e isi tagata i isi—e oo lava i tagata atonu e leai ni o tatou lagona fiafia i ai. (Mataio 5:44, 45; 1 Ioane 5:3) O lenei alofa e tatau ona iai i o tatou loto ma ia faaalia mai i o tatou olaga a o tatou lei aʻoaʻoina atu ma le uigā i a tatou fanau. E leotele gaoioiga na i lo upu. I totonu o le aiga, e manaomia e le fanau ona latou iloa mai ma lagonaina le alofa ma isi uiga e fesootai atu i ai, e pei o lagona māfana. Pe a aunoa ma nei uiga, o lona uiga o le a faalautagitagi le tuputupu aʻe o lena tamaitiiti i le tino, le mafaufau, ma ona faalogona ootia. E manaomia foi ona vaaia e le fanau le auala o loo faaalia lelei atu ai le alofa ma lagona māfana i isi uso Kerisiano e ese mai tagata o le aiga.—Roma 12:10; 1 Peteru 3:8.

14. (a) E mafai faapefea ona aʻoaʻo le fanau ina ia fai ia lelei galuega e maua ai le faamalieina? (e) E mafai faapefea ona faia lenei mea i le tulaga o lou aiga?

¹⁴ Le aʻoaʻoina o le auala e galue ai: O le galue o se vala autū lea o le olaga. Ina ia iai se lagona i le tagata o le taʻuaogaina o ia lava, e manaomia ona ia faamasani e fai lelei galuega. (Failauga 2:24; 2 Tesalonia 3:10) Afai e tofia se tamaitiiti na te faia ni galuega sa itiiti sona faatonuga na tuuina i ai, ona toe otegia lea pe a lē lelei ona ia faia na galuega, ailoga la o le a ia iloa fai lelei se galuega. Ae pe afai e aʻoaʻoina le fanau e ala i le galulue faatasi ma o latou mātua ma avatu ia i latou se faamālō talafeagai, o le a sili atu foi la ona latou iloa fai ni galuega e maua ai le faamalieina. Pe afai e avatu faatasi faaaoaoga a mātua ma se faamalamalamaga, o le a mafai ai e le fanau ona iloa e lē gata o le auala e fai ai se galuega ae o le auala foi e foia ai faafitauli, le auala e faia ai pea se galuega seia oo ina maeʻa, ma le auala e fefulisai ma faia ai filifiliga. I lena tulaga e mafai ai ona fesoasoani atu ia i latou ia latou iloa o loo galue foi Ieova, e na te faia galuega lelei, ma e faataitai atu Iesu i lona Tamā. (Kenese 1:31; Faataoto 8:27-31; Ioane 5:17) Pe afai e iai se faatoaga a le aiga pe fai sa latou pisinisi, atonu o le a iai nisi o le aiga e galulue faatasi. Pe mafai foi e le tinā ona aʻoaʻo lana tama tama po o lana tama teine i le kukaina o meaʻai pe faamamā ipu pe a uma se taumafataga. O se tamā o lē e faigaluega ese mai le aiga e mafai ona ia fuafua e galulue faatasi ma lana fanau i ni galuega i le fale. Maeu le aogā pe afai e lē tau ina mafaufau mātua i le vave ona faataunuu o ni galuega, ae ia mafaufau foi i le auala e faaauupegaina ai le fanau i o latou olaga atoa!

15. O ā auala e mafai ona aʻoaʻo atu ai lesona e uiga i le faatuatua? Ia faataitai mai.

¹⁵ Le tausisia o le faatuatua a o feagai ai ma tulaga faigata: O le faatuatua foi o se vala tāua tele i o tatou olaga. Pe a talanoaina le faatuatua i le suesuega a le aiga, e mafai ona aʻoaʻo le fanau ina ia latou faamatalaina. E mafai foi ona latou iloa faamaoniga e faapogaia ai le faatuatua ina ia amata ona tupu aʻe i o latou loto. Ae pe a latou vaai atu o loo faaalia e o latou mātua se faatuatua lē maluelue a o fesagai ma tofotofoga matuitui, e mafai e aafiaga e maua mai ai ona tumau i le olaga atoa. O se tagata na suesueina le Tusi Paia i Panamā sa faamataʻuina e lana tane o le a tuliesea mai lo latou aiga pe a lē taofia lona auauna atu ia Ieova. Peitai, sa lē aunoa ona savavali pea o ia ma lana fanau laiti e toafā i maila e 10 (16 kilomita) ma toe ō i se pasi mo le isi 20 maila (30 kilomita) ina ia oo atu i le Maota o le Malo sa latalata ane. I le faalaeiauina i lena faaaoaoga, ua talia ai e ni tagata se toʻa 20 o lona aiga le ala o le upu moni.

Le Faataatiaina o se Faaaoaoga i le Faitauina o le Tusi Paia i Aso Taitasi

16. Aisea ua fautuaina ai le faitauga Tusi Paia a le aiga i aso taitasi?

¹⁶ O se tasi o tū masani e sili ona tāua e mafai e so o se aiga ona faavaeina—o se tū masani o le a aogā i mātua ma e avea o se faaaoaoga mo le fanau e faataitai i ai—o le faitauina e lē aunoa o le Tusi Paia. Pe afai e mafai, ia fai ni faitauga Tusi Paia i aso taitasi. E lē o le tele o mea e faitau e sili atu ona tāua. E sili atu ona tāua le  faifai pea ma le uigā o loo faia ai. Mo le fanau, e mafai ona fesuisuiai le faitauina o le Tusi Paia e ala i le faalogologo atu i kaseti o Laʻu Tusi o Tala o Le Tusi Paia pe afai o maua i la outou gagana. O le faitau i le Afioga a le Atua i aso taitasi e fesoasoani ia i tatou e faamuamua ai pea manatu o le Atua. Ma pe afai e faia lena faitauga Tusi Paia e lē gata o le tagata lava ia ae faapea foi i aiga, e mafai ona fesoasoani lenei mea i le auaiga uma ina ia savavali ai i ala o Ieova. O le faiga lenei sa faalaeiauina i Tauaofiaga talu ai nei o “Le Ala a le Atua i le Ola” i le tala “Aiga e—Ia Avea le Faitauina o le Tusi Paia i Aso Uma o se Vaega o lo Outou Soifuaga!—Salamo 1:1-3.

17. E faapefea i le faitauga Tusi Paia a le aiga ma le taulotoina o mau autū ona fesoasoani i le faatatauina o le fautuaga i le Efeso 6:4?

¹⁷ O le faitauina o le Tusi Paia e se aiga e ogatusa lea ma le mea na tusi mai ai le aposetolo o Paulo i lana tusi faagaeeina i Kerisiano i Efeso e faapea: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga [“aʻoaʻoga faalemafaufau,” NW] a le Alii.” (Efeso 6:4) O le ā le uiga o lena mea? O “aʻoaʻoga faalemafaufau” o lona uiga moni o le “tuuina o manatu i totonu”; o lea la ua uunaia ai tamā Kerisiano ina ia tuu manatu o Ieova le Atua i totonu o mafaufau o a latou fanau—ia fesoasoani i le fanau ia latou iloa mafaufauga o le Atua. O le faalaeiauina o fanau e tauloto mau autū e mafai ona fesoasoani e ausia ai lenei mea. O le sini ia aumai manatu o Ieova e taʻitaʻia ai mafaufauga o le fanau ina ia faasolosolo ai ona faaalia mai e o latou faanaunauga ma amio tapulaa faale-Atua e tusa lava pe o iai faatasi mātua ma le fanau pe leai foi. O le Tusi Paia le faavae o na mafaufauga.—Teuteronome 6:6, 7.

18. Pe a faitauina le Tusi Paia, o le ā e ono manaomia ina ia (a) malamalama lelei i ai? (e) maua ai aogā mai fautuaga o loo iai? (i) tali atu ai i mea o loo faaalia mai e uiga i fuafuaga a Ieova? (o) maua ai aogā mai mea o loo fai mai ai e uiga i amioga ma gaoioiga a tagata?

¹⁸ O le mea moni, afai o le a faaaafia e le Tusi Paia o tatou olaga, e manaomia la ona tatou malamalama i le mea o fai mai ai. Mo le toatele o tagata, e ono manaomia ai i lenei mea le faitauina soo o vaega e sili atu i le faatasi. Ina ia maua le malamalamaga manino o nisi faamatalaga, tatou te ono manaomia ona sailia upu i se lomifefiloi po o le Insight on the Scriptures. Afai o iai i le mau se fautuaga po o se poloaiga, ia faaalu se taimi e talanoa ai i tulaga i o tatou aso ua faapea ona talafeagai atu i ai. Atonu la e te fesili atu, ‘E mafai faapefea e le faatatauina o lenei fautuaga ona aogā ia i tatou?’ (Isaia 48:17, 18) Afai o taʻu mai e le mau nisi o vala o le fuafuaga a Ieova, ia fesili atu, ‘Ua faapefea ona aafia ai o tatou ola i lenei mea?’ Atonu o loo e faitau i se tala o loo taʻu mai ai uiga ma gaoioiga a tagata. O ā omiga i le olaga na oo ia i latou? Na faapefea ona latou fesagaia nei omiga? E mafai faapefea ona aogā ia i tatou a latou faaaoaoga? Ia faaavanoa pea taimi e talanoa ai mea o loo uiga i ai le tala i o tatou olaga i aso nei.—Roma 15:4; 1 Korinito 10:11.

19. I le avea o ē faaaʻoaʻo i le Atua, o le ā o le a tatou saunia mo a tatou fanau?

¹⁹ Maeu se auala lelei e faamausalīina ai manatu o le Atua i o tatou mafaufau ma loto! Ona tatou maua moni ai lea o se fesoasoani ina ia avea ai o ē ‘faaaʻoaʻo i le Atua, faapei o le fanau pele.’ (Efeso 5:1) Ma o le a tatou saunia ai se faaaoaoga ua onomea moni lava ona faataitai i ai a tatou fanau.

E te Manatua?

□ E mafai faapefea e mātua ona maua aogā mai le faaaoaoga a Ieova?

□ Aisea e tatau ai i faatonuga tuugutu ona avatu faatasi ma faaaoaoga lelei a mātua?

□ O ā nisi o lesona e sili atu ona lelei le aʻoaʻoina e ala i faaaoaoga a mātua?

□ E mafai faapefea ona tatou maua aogā atoatoa i le faitauga Tusi Paia a le aiga?

[Fesili mo le Suʻesuʻega]

[Ata i le itulau 10]

E toatele o loo fiafia i le faitauina o le Tusi Paia i aso taitasi o se aiga