Na Latou Faia le Finagalo o Ieova

O se Asiasiaga na Matuā Tauia

SA TATAU ona matuā vāivai le tupu tamaitai i le malaga mai Seepa agaʻi atu i Ierusalema. Sa soifua aʻe o ia i se olaga tamaoaiga. Ae o lea ua malaga atu o ia i se malaga e 1,500 maila [2,400 kilomita] le mamao i le saoasaoa e ō ai kamela, o le tele lava sa ui atu ai i toafa vevela. E tusa ai ma se tasi o faatusatusaga, e pe ā ma le 75 aso faatoʻā taunuu lana malaga, ae e lē o faitaulia ai le toe foi ane! *

Aisea na tuua ai e lenei tupu tamaitai tamaoaiga lona aiga manaia i Seepa ae faimalaga atu i se malaga fitā?

Se Lipoti Ofoofogia

Na malaga ane le tupu tamaitai o Seepa i Ierusalema ina ua ia “faalogo . . . i le tala ia Solomona ona o le suafa o Ieova.” (1 Tupu 10:1) E lē o taʻua mai pe o le ā tonu na faalogo i ai le tupu tamaitai. Peitai, ua tatou iloaina e faapea, na faamanuiaina e Ieova Solomona i le atamai, tamaoaiga, ma le mamalu, e matuā uiga ese. (2 Nofoaiga a Tupu 1:11, 12) Na faapefea ona iloa e le tupu tamaitai lenei mea? Talu ai o Seepa sa avea ma taulaiga o fefaatauaiga, atonu ai sa ia faalogo i le logologoā o Solomona mai le au faatauoa na asiasi ane i lona atunuu. O nisi o i latou nei atonu sa asiasi atu i Ofeira, o se aai sa tele ni feutagaiga faapisinisi a Solomona na iai.—1 Tupu 9:26-28.

Po o le ā lava le tulaga, ae na taunuu le tupu tamaitai i Ierusalema “ma le au malaga e matuā toatele, ma kamela o au mai ai mea manogi, ma auro e matuā tele, ma maa tāua.” (1 Tupu 10:2a) Ua faapea mai nisi o le “au malaga e matuā toatele,” sa aofia ai se au faafeao sa faaauupegaina. E mafai ona ioeina lena manatu, pe a fua atu o le tupu tamaitai o se tagata e maualuga ma mamalu, ma sa malaga atu o ia ma ni oloa e faitau fiasefulu miliona talā lo latou tau. *

Peitai, manatua na faalogo le tupu tamaitai i le logologoā o Solomona “ona o le suafa o Ieova.” O lea sa lē na o se malaga faapisinisi lenei malaga. E mautinoa, o le autū o le malaga atu o le tupu tamaitai ina ia faalogo i le atamai o Solomona—ma atonu foi ina ia aʻoaʻoina mai ai se mea e faatatau i lona Atua, o Ieova. Talu ai e foliga mai sa tupuga mai o ia a lē o Semu o Hamo, o ē sa tapuai ia Ieova, atonu ai sa ia naunau e fia iloa le tapuaiga a ona augatamā.

Fesili Faigata, Tali e Faamalieina Ai

Ina ua feiloai ma Solomona, ona amata lea ona tofotofo e le tupu tamaitai o ia i ni “fesili faigata.” (1 Tupu 10:1, NW) O le upu Eleni na faaaogaina iinei e mafai ona faaliliuina o “tupua.” Peitai e lei uiga lenei mea e faapea sa faia e le tupu tamaitai ma Solomona ni matematega e masani ai. O le mea e mataina ai, i le Salamo 49:4, o le upu Eperu lava foi lea o loo faaaogaina e faamatala ai ni fesili faigata e faatatau i le agasala, oti, ma le togiola. O lea la, e foliga mai sa talanoaina e le tupu tamaitai o Seepa ni mataupu loloto ma Solomona e tofotofoina ai le tele o lona atamai. Ua faapea mai le Tusi Paia na ia “tautalatala ai lea ma ia i mea uma na i ai i lona loto.” O le iuga, na “faamatalaina atu foi e Solomona ia te ia o ana upu uma; ua leai se mea e lilo i le tupu ua ia le taʻu atu ia te ia.”—1 Tupu 10:2e, 3.

Na matuā maofa le tupu tamaitai o Seepa i le atamai o Solomona ma le manuia o lona malo ma na “le toe ai lea o se loto ia te ia.” (1 Tupu 10:4, 5) E faauiga e nisi lenei fuaitau e faapea na tuua le tupu tamaitai i se tulaga ua “lē magagana.” Ua faapea mai foi le isi tagata atamai faapitoa na matapogia o ia! Po o le ā lava le mea na tupu, ae na matuā maofa le tupu tamaitai i mea na ia vaai ma faalogo i ai. Na ia faaamuia atu i auauna a Solomona ona o le mafai ona latou faalogo atu i le atamai o lenei tupu, ma sa ia faamanū atu ia Ieova ona o lona tofia o Solomona i le nofoalii. O lea na ia tuuina atu ai i le tupu ni meaalofa taugata, o auro lava ia e pe ā ma le $40,000,000 Amerika le tau atoa pe a faatusatusa atu i tau faaonaponei. Na tuuina atu foi e Solomona meaalofa, ma avatu i le tupu  tamaitai “mea uma na ia finagalo ma faatoga i ai.” *—1 Tupu 10:6-13.

Lesona mo i Tatou

Na faaaogaina e Iesu le tupu tamaitai o Seepa e fai ma lesona vaaia mo le au tusiupu ma le au Faresaio. Na ia taʻu atu ia te i latou e faapea: “E tutū mai faatasi le tupu fafine o le itu i toga ma le tupulaga nei i le faamasinoga, e faasala i ai; auā na sau o ia mai le gataaga o le lalolagi e faalogologo i le poto o Solomona; faauta foi, o iinei lē sili ia Solomona.” (Mataio 12:42) Ioe, na faaalia e le tupu tamaitai o Seepa le matuā talisapaia mo le atamai na foaiina mai e le Atua. Pe afai na malaga o ia i le 1,500 maila [2,400 kilomita] ina ia faalogologo ia Solomona, e mautinoa la sa tatau ona faalogologo atu ma le naunautai le au tusiupu ma le au Faresaio ia Iesu, o lē sa iai lava iina i o latou luma.

E mafai foi e i tatou i aso nei ona faaalia le talisapaia loloto mo le Solomona Sili, o Iesu Keriso. E faapefea? O se tasi o auala o le mulimuli lea i lana faatonuga ina ia “fai nuu uma lava ma soo.” (Mataio 28:19) O le isi auala o le iloiloina lea ma le totoʻa o le faaaoaoga a Iesu ma lona uiga faalemafaufau ma ia faataitai i nei mea.—Filipi 2:5; Eperu 12:2, 3.

E moni, o le mulimuli atu i le faaaoaoga a le Solomona Sili o le a manaomia ai ni a tatou taumafaiga. Peitai, o le a matuā tauia i tatou. O le mea moni, ua folafola mai e Ieova i ona tagata e faapea pe afai latou te faaalia se agaga faataulagaina totino, o le a ia ‘toina pupuni o le lagi mo i latou, ma sasaa mai le manuia mo i latou, ina seia silisili ona tele.’—Malaki 3:10.

[Faaopoopoga i lalo]