Le Sailia o Valoaga Maufaatuatuaina

E LEI umi lava talu ona afio le tupu Maketonia lea sa lauiloa o Alesana le Sili i le nofoalii i le 336 T.L.M., ae ia asiasi atu loa i le nofoaga na talitonuina e maua mai ai ni faaaliga tauatua i Delphi, i Eleni tutotonu. O lona faanaunauga mo le lumanai sa uaʻi atu i le faatoilaloina ma pulea se vaega tele o le lalolagi i lena vaitaimi. Peitai sa ia manaomia se faamautinoaga tauatua pe o le a taulau lana gaoioiga tele o loo faanaunau i ai. E tusa ai o le talatuu e faapea, i le aso na ia asiasi atu ai i Delphi, o le aso lena sa lei faatagaina ai se tasi e talanoa atu i le fafine na talitonuina e ala mai ai ni faaaliga tauatua. Ona o lona manao ia aua neʻi foi fua e aunoa ma se tali, sa maumauai ai pea Alesana, ma faamalosia le fafine ina ia fai atu se valoaga. Na alaga le fafine ma le lē toʻa: “Aue, le taulealea e, e lē mafaatoilaloina oe!” Sa manatu le tupu talavou o se faaaliga logolelei lea mo ia—o se tasi ua folafola mai i ai se manumalo i lana tauiviga faavaegaau.

Peitai, sa ono mafai ona sili atu ona lelei se malamalamaga e maua e Alesana e faatatau i le iuga o lana tauiviga pe ana ia iloiloina valoaga o loo maua i le tusi o Tanielu i le Tusi Paia. Faatasi ai ma le ofoofogia o le saʻo atoatoa, ua valoia mai ai e na valoaga le televave o lona manumalo. E tusa ai o talatuu, na iu ina maua e Alesana se avanoa e vaai ai i mea sa tusia e Tanielu e faatatau ia te ia. E tusa ai o le faamatalaga a le tusitala Iutaia o talafaasolopito o Josephus, ina ua oo atu le tupu Maketonia i Ierusalema, sa faaali atu ia te ia le valoaga a Tanielu—e foliga mai o le mataupu e 8 o lena tusi. (Tanielu 8:5-8, 20, 21) E tusa ai ma lipoti, talu ai lena mea, na faasaoina le aai e le vaegaau fai faatamaiga a Alesana.

 O se Manaoga Faaletagata Tuufaasolo Mai

Pe tupu pe tagata lautele, anamua po o aso nei—ua lagona e tagata uma le manaomia o ni valoaga maufaatuatuaina e faatatau i le lumanai. I le avea o ni foafoaga atamamai, ua suesueina e le tagata mea ua tuanai, ua iloa e le tagata mea o loo tutupu i le taimi nei, ma o loo faapitoa lava ona naunau atu le tagata i mea o le a tutupu i le lumanai. Ua talafeagai le faapea mai o se alagaupu faa-Saina: “O le tagata e mafai ona ia muai iloa mea o le a tutupu a o toe tolu aso faataunuu, o le a mauoa o ia mo le faitau afe o tausaga.”

I le faasolo mai o tausaga, e faitau miliona sa taumafai ina ia iloa le lumanai e ala i lo latou saili atu i mea e manatu i ai e iai ni mana tauatua. Seʻi fai ma faataitaiga tagata Eleni anamua. Sa iai le tele o faatusa paia i nofoaga nei, i Delphi, i Delos, ma i Dodona, latou te ō atu i ai ina ia fesili atu i o latou atua e tusa i a latou fuafuaga faapolotiki ma faavaegaau e oo lava i mataupu totino a le tagata lava ia e pei o le faimalaga, faaipoipo, ma fanau. E lē na o tupu ma taʻitaʻi o vaegaau ae o ituaiga uma o tagata ma aai o setete latou te sailia le taʻitaʻiga mai le nofoaga o agaga e ala mai i tali e tuuina mai e nei faatusa.

E tusa ai o le faamatalaga a se tasi polofesa, ua iai nei se “tupu aʻe faafuasei o le faateleina o faalapotopotoga ua tuutoina atu i le suesueina o le lumanai.” Peitai, e toatele ua sili atu ia i latou le lē amanaiaina o le puna e tasi o valoaga saʻo—le Tusi Paia. Ua maumauai lo latou teena o so o se manatu e faapea, o loo iai i valoaga o le Tusi Paia faamatalaga ia o loo latou sailia. O nisi tagata atamamai faapitoa ua oo lava ina latou faatutusaina valoaga a le Tusi Paia ma valoaga na tuuina mai e tagata e faapea na tuuina atu i ai ni faaaliga tauatua. Ma o le au masalosalo i ona po nei e masani ona faaituau lo latou tetee atu i valoaga a le Tusi Paia.

Matou te valaaulia oe ina ia e iloiloina e oe lava ia faamaumauga. O le ā ua faaalia i le faatusatusaina ma le faaeteete o valoaga a le Tusi Paia ma valoaga a tagata? Pe mafai ona e talitonuina valoaga o le Tusi Paia na i lo valoaga a tagata anamua? Ma pe e mafai ona e ati ae ma le maufaatuatuaina lou olaga i valoaga o le Tusi Paia?

[Ata i le itulau 3]

Sa valoia e le Tusi Paia le televave o le manumalo o Alesana

[Ē Ana le Ata]

Cortesía del Museo del Prado, Madrid, Spain

[Ata i le itulau 4]

Alesana le Sili

[Ē Ana le Ata]

Musei Capitolini, Roma

 [Ē Ana le Ata i le itulau 2]

FAAVAA: Taʻitaʻiau o Tito ma Alesana le Sili: Musei Capitolini, Roma