O Fesootaiga e Ati ae ai—Le Ki i se Faaipoipoga Manuia

I le 1778, na gaosia ai e Robert Barron se loka e lua ni faamau, lea ua tumau pea ona avea ma faavae o fausaga o loka e tatala i le ki i aso nei. O lana fausaga, e manaomia ona faaaogā ai se ki e tasi e mafai ona sisiina faatasi i luga ia faamau e lua o le loka.

I SE uiga tutusa, o se faaipoipoga e taulau manuia, e faalagolago lea i le galulue faatasi ma le autasi o se tane ma se avā. Ina ia matala mai ma tofo i mea tāua e olioli ai i se faaipoipoga manuia, o le tasi o mea e sili ona tāua, o fesootaiga e ati ae ai.

Mea e Aofia i Fesootaiga e Ati ae Ai

O ā mea e aofia ai i fesootaiga e ati ae ai? Ua faamatalaina e se tasi lomifefiloi fesootaiga e faapea, “o le fetufaai po o le fefaaaliai o mafaufauga, manatu, po o faamatalaga e ala i le talanoa, tusitusi, po o ni tāga.” O le mea lea, o fesootaiga e aofia ai le fefaaaliai o faalogona ma manatu. Ma o fesootaiga e ati ae ai, e aofia ai mea lelei e faalaeiauina ai, e faafouina ai, e mamā, e taʻuleleia, ma faamafanafana ai.—Efeso 4:29-32; Filipi 4:8.

E mafai la ona maua fesootaiga e ati ae ai pe afai e iai le mautinoa, le talitonu, ma le femalamalamaai. E maua uiga nei pe a vaai i le faaipoipoga o se faiā mo le olaga atoa ma o loo iai le naunautaiga faamaoni ina ia galueaiina ina ia taulau. I le faia o se faamatalaga e uiga i sea faiā, na tusia ai e se tusitala o le senituri lona 18 e suafa ia Joseph Addison e faapea: “O ni tagata se toalua o ē ua filifilia e le tasi le isi mai isi tagata uma lava ma le fuafuaga ina ia fefaamafanafanaai ma ia fiafia le tasi i le isi, ma i lena gaoioiga, ua fusia ai i laua lava i le fiafia, feagaleleiai, faamaoni, fefaamagaloai, onosai, ma le olioli, e tusa ai ma o la vaivaiga ma uiga lelei, e oo lava i le iuga o o la ola.” Maeu le fiafia o sea ituaiga o faatasiga! Ma o nei uiga tautele e pei o se maa tāua, e mafai ona faamatagofie ai lau faaipoipoga, auā e mafai ona avea ma ou uiga tumau e ala i fesootaiga e ati ae ai.

Toatuga i Fesootaiga e Ati ae Ai

O le toatele o ulugalii e ulu atu i le faaipoipoga ma se faamoemoega mautinoa ma le matuā loto fiafia. Ae peitai, i le toatele, o lena fiafia ma faamoemoega mautinoa, e vave lava ona mou atu. Atonu ua suia le uiga mautinoa i le faalogona tiga fenuminumiai, le ita, le feainaʻi, ma oo lava ina matuā musu. Ona oo ai lea ina avea le faaipoipoga ua na o se mea e ao ona onosaia “seia oo ina tuueseeseina i taʻua e le oti.” Ina ia faaleleia pe faatumauina fesootaiga e ati ae ai lea e moomia mo se faaipoipoga lelei, e tatau ai la ona foia nisi o toatuga.

 O se toatuga moni lava i fesootaiga e ati ae ai, e mafai ona avea o le fefe i ni uiga e ono faaali mai e le paaga faaipoipo i nisi o faamatalaga po o le faailoa atu foi o ni mea o faanaunau i ai. Mo se faataitaiga, atonu o le a oso aʻe le fefe ina neʻi teʻi ua musu le paaga pe a ia iloa se tulaga matuia o le lē atoatoa o le tino ua aliai mai. E faapefea ona faamatala atu e se tasi i lana paaga faaipoipo e faapea, o se togafitiga o le a faia o le a vave ona suia ai foliga po o le malosi o se tasi e gaoioi ai? I tulaga faapena, o le taimi lava lea e matuā manaomia ai na i lo o se isi lava taimi, ni fesootaiga faamaoni ma le fuafua lelei mo le lumanai. O le faamautinoa atu i upu e faapea o le a faaauau pea le alofa, faatasi ma le faaalia pea o le agalelei, o le a faailoa atu ai le naunau totino lea o le a fesoasoani i le mauaina o se faaipoipoga e faamalieina moni ai. I le faaipoipoga, e matuā talafeagai lelei i ai upu o lenei faataoto e faapea: “E alofa le uo moni i aso uma lava; ma ua avea o se uso ua fanau mai pe a oo i aso vale.”—Faataoto 17:17, NW.

O le teuloto o se lē fiafia, o se tasi lea toatuga i talanoaga e ati ae ai. Ua fetaui lelei ai lava le faapea mai, o se faaipoipoga fiafia o le tuufaatasia lea o ni tagata se toalua e lelei i le loto faamagalo. Ina ia fetaui ma lena faamatalaga, o le a faia ai e se ulugalii faaipoipo taumafaiga uma ina ia mulimuli i le fautuaga aogā a le aposetolo o Paulo e faapea: “Aua neʻi goto le la o ita pea outou.” (Efeso 4:26) O le faatatauina o lenei fautuaga na i lo o le teuloto o le ita po o le lē fiafia, o le mea moni, e manaomia ai se fesootaiga loto maulalo. O paaga i se faaipoipoga lelei, e lē lolo atu pea i le ita, faia ni feupuaiga, ma teuloto se mea e lē malie ai. (Faataoto 30:33) E la te saili ina ia faataitai i le Atua, o lē e lē tumau lona ita. (Ieremia 3:12) O le mea moni, e la te fefaamagaloai mai le loto.—Mataio 18:35.

O se toatuga sili lava i so o se ituaiga o fesootaiga, o le lē fia talanoa. E ono aofia ai i lenei mea le faaupuga popole, soona mapuea, leai se uigā o ana gaoioiga, ma le musu o le isi o le paaga e tautala. O se paaga faaipoipo na te faia na uiga, ua ia faailoaina atu se lē fiafia. Ae o le tautala e faaali atu faalogona totino i se auala tuusaʻo ma agalelei, e tele ai se sao e faia i le faaleleia o se faaipoipoga na i lo o le lē tautala ma faaūū.

O le lē faalogologo lelei po o le matuā lē fia faalogo lava a o talanoa mai se paaga, o se tasi lea o pa pupuni e tatau ona foia ina ia mafai ai ona faaleleia le faaipoipoga. Atonu ona ua tatou vāivai tele po ua pisi naua ua lē mafai ai ona maua le malosi manaomia o le mafaufau ma faalogona e faalogologo lelei ai le tasi i le isi. E ono mapuna aʻe ni taugaupu ona o le lē femalamalamaai i fuafuaga na mafaufau i ai le tasi paaga faapea ai sa manino lelei ona faamatala atu, ae ua faapea mai le isi o le taimi muamua lea faatoʻā ia faalogo i ai. E manino lava, o le lē lelei o fesootaiga ua māfua ai na tulaga faigata.

Le Auala e Faia ai Fesootaiga e Ati Ae Ai

Maeu le tāua o le faaalu o le taimi mo fesootaiga alofa e ati ae ai! E tele naua le taimi ua faaalu e nisi e matamata ai i televise e faatatau i olaga o isi tagata, ae laitiiti ai le taimi e mafaufau ai i o latou lava olaga. O lea, o le tapeina o le televise e masani lava ona avea o se laasaga e manaomia ona fai ina ia faia ai fesootaiga e ati ae ai.

Peitai, e pei lava ona iai le taimi tatau e tautala ai, e faapea foi ona iai le taimi e faalologo ai. Na faapea mai le tagata poto: “O le mea ma lona tausaga i mea uma, . . . o ona po e faalologo ai, ma ona po e tautala ai.” O le mea moni, e iai foi upu talafeagai e tatau ona fai atu ai. Ua matauina e se faataoto e faapea: ‘O le upu e  fai atu i ona aso e tatau i ai, e lelei naua lea!’ (Failauga 3:1, 7; Faataoto 15:23) O lea, ia filifili po o fea le taimi e sili ona lelei e fai atu ai sou manatu pe faailoa atu ai le mea o popole ai lou loto. Fesili ifo ia te oe lava: ‘Po o vāivai laʻu paaga po o toafilemu ma faafouina lona mafaufau? Po o le mataupu lea ou te manao e faailoa atu e ono tupu ai se feeseeseaiga? O le ā na tetee i ai laʻu paaga i upu na ou fai atu ai i le taimi mulimuli na ma talanoaina ai lenei mataupu?’

E lelei ona manatua e faapea, e sili ona tali lelei mai tagata pe afai e mafai ona latou iloa atu ni aogā e latou te maua pe afai e felagolagomai pe usiusitai atu i se talosaga. Pe afai ua mapuna aʻe ni faigata i le va o paaga, atonu o le a uunaia se tasi o i laua e faapea atu, “E iai le mea lea ou te lē fiafia ai, ma ua tatau loa ona ta faasaʻoina i le taimi nei lava!” O le mea moni, o upu tuusaʻo e faalagolago i tulaga, ae atonu e sili ona lelei le fai atu faapea, “Pele ea, ua leva ona ou mafaufau e uiga i le mataupu lea na ta talanoa muamua i ai ma le auala e ono faaleleia ai.” O lē fea faaupuga e foliga mai o le a sili atu ona talisapaia e lau paaga?

Ioe, e tāua tele le auala e faaupu atu ai se mea. Na tusi mai le aposetolo o Paulo e faapea: “Ia le aunoa a outou upu ma le alofa, ia faamāi i le masima.” (Kolose 4:6) Taumafai ia iai le alofa i le uiga o lou leo ma upu e te fai atu ai. Ia manatua, “o upu matagofie, o le meli ua sisina ifo ia; e suamalie i le loto, ma le mea e malolo ai ivi.”—Faataoto 16:24.

I nisi ulugalii, o le galulue faatasi i ni fuafuaga faataatia i le aiga e mafai ona maua ai se siomaga lelei mo fesootaiga. O le felagolagomai faapena e mafai ona oo ai se lagona o le fetufaai ma maua ai foi se taimi mo talanoaga e ati ae ai. O nisi paaga faaipoipo, o le faaalu faatasi o se taimi toafilemu na o i laua e aunoa ma le taumafai e faia ni galuega, e sili atu ona lelei ma sili atu ona talafeagai mo fesootaiga e ati ae ai.

E masani lava ona tele mea e mafai ona aʻoaʻoina e ala i le mātauina o le auala o loo fesootai atu ai paaga faaipoipo e tutusa uiga i le tasi i le isi. O le ā ua mafai ai ona latou faia faapena? O le tele lava e foliga mai, o lo latou autasi ma le faigofie ona latou fesootai, ua mafaia ona o taumafaiga totino, le onosai, ma le manatunatu alofa o le tasi i le isi. Atonu e tele ni mea na aʻoaʻoina e i latou lava, auā e lē otometi ona maua se faaipoipoga lelei. Maeu la le tāua o le manatunatu i manatu o lau paaga, ia talisapaia ona manaoga, ma faaitiitia ai ni tulaga mafatia e ono tulai mai i le lumanai i se upu e fai atu ma le faautauta. (Faataoto 16:23) Afai ua e faaipoipo, ia galue la ina ia avea oe o sē e faigofie ona mafuta atu i ai ma faigofie foi ona faatoese atu i ai. O le a fesoasoani moni lava lena mea i le taulau manuia o lau faaipoipoga.

E finagalo Ieova le Atua ina ia olioli tagata i ni faaipoipoga e fiafia ma tumau. (Kenese 2:18, 21) Ae o le ki e faalagolago lea ia i latou ua tuufaatasia i noataga o le faaipoipoga. E manaomia ni tagata alolofa se toalua o ē e galulue moni faatasi e tatala ai le faitotoa i se faaipoipoga e taulau manuia e ala i le aʻoaʻoina ma le tomai o ni fesootaiga e ati ae ai.

[Ata i le itulau 22]

O le tapeina o le televise e maua ai se taimi tele mo fesootaiga

[Ata i le itulau 23]

O fesootaiga e ati ae ai ua fesoasoani i le fusia faatasi o loto i le alofa e tumau