Ua Taula e le Faamoemoe, ua Uunaia e le Alofa

“O tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.”—1 KORINITO 13:13.

1. O le ā le lapataiga ua tuuina mai e le aposetolo o Paulo ia i tatou?

UA LAPATAIA i tatou e le aposetolo o Paulo e faapea, e mafai ona faavaatuia lo tatou faatuatua e pei o se vaa. Ua ia tautala i le ‘iai o se faatuatua ma se loto fuatiaifo lelei, lea ua lafoai e nisi ma faavaatuʻia ai lo latou faatuatua.’ (1 Timoteo 1:19) I le uluai senituri T.A., na fausia ai vaa folau i ni laupapa. O le lelei ma le saogalemu o na vaa i le sami sa faalagolago i le ituaiga o laupapa na faaaogā ma le tomai o le fausaga na fau ai.

2. Aisea e tatau ai ona lelei le fauina o le vaa o lo tatou faatuatua, ma o le ā e manaomia e lenei mea mai ia i tatou?

² O le mea ua taʻua o le vaa o lo tatou faatuatua e tatau ona opeopea pea e ui i le sami fesouaiina o tagata. (Isaia 57:20; Faaaliga 17:15) E tatau la ona lelei lona fauina, ma e faalagolago lea ia i tatou. Ina ua matuā sousou mo uluai Kerisiano le “sami” o le faiga o mea faa-Iutaia ma Roma, ona tusi mai lea o Iuta: “Le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai; ia outou faatumau ia te outou i le alofa o le Atua, ma faatalitali atu i le alofa mutimutivale o lo tatou Alii o Iesu Keriso, e oo atu i le ola faavavau.” (Iuta 20, 21) Talu ai sa taʻua foi e Iuta le tauina o se taua mo “le faatuatua na tuuina mai faatasi i le au paia,” o le faaupuga la “faatuatua e silisili ona paia” e ono faasino atu i se vaega atoa o aʻoaʻoga faa-Kerisiano, e aofia ai le tala lelei o le faaolataga. (Iuta 3) O Keriso o le faavae o lena faatuatua. Tatou te manaomia  se faatuatua malosi pe afai tatou te fia pipiimau atu i le faatuatua moni faa-Kerisiano.

Faafetaiaia o le Afā o “Faamataʻuga a Lotu Mavae”

3. O loo faapefea ona faaaogaina e nisi le “faamataʻuga a lotu mavae”?

³ I ni tausaga talu ai nei, e tele ni tulaga sili ona matautia o le anoanoai o tagata e pule i o latou ola, o fasiotiga tagata, ma osofaiga a tagata faatupu faalavelave o loo aafia ai vaega laiti o lotu mavae (sect). E mautinoa lava, e toatele tagata, e aofia ai taʻitaʻi faapolotiki loto faamaoni, ua faaalia lo latou manatu mamafa i le puipuia o tagata lē sala, ae maise lava talavou laiti, mai na lotu mavae matautia. E lē masalomia, o “le atua o le lalolagi nei,” o loo ia uunaia nei solitulafono matautia, ma ua ia faapogaia ai se mea ua taʻua e nisi faapea o faamataʻuga a lotu mavae (sect scare) ma ua faaaogā e tetee atu ai i tagata o Ieova. (2 Korinito 4:4; Faaaliga 12:12) O nisi tagata ua latou faaaogā lenei tulaga e faatupu aʻe ai teteega i la tatou galuega. I nisi atunuu, ua latou faia aʻe ai se tauiviga e fuafua e peiseai o loo puipuia ai tagata mai “lotu matautia” peitai o loo taʻua ma le sese ai ma Molimau a Ieova i na lotu mavae ma tuuaʻia ai i tatou i ni faamatalaga lē moni. O lenei tulaga ua faafaigata ai le molimau atu i lea fale ma lea fale i nisi atunuu Europa ma ua māfua ai foi ona taofia e nisi tagata lo latou toe suesueina o le Tusi Paia ma i tatou. O le iuga, na oo ai ina iai ni āuga lē lelei i nisi o o tatou uso.

4. Aisea e lē tatau ai ona faalotovaivaia i tatou e teteega?

⁴ Peitai ane, na i lo le faalotovaivaia ai o i tatou, e tatau ona avea teteega ma faamalosiauga i lo tatou talitonuga maumauai e faapea, o loo tatou faatinoina le Faa-Kerisiano moni. (Mataio 5:11, 12) Sa tuuaʻia uluai Kerisiano faapea o i latou o se lotu mavae e fouvale, ma sa “talaeseina” i latou i nuu uma lava. (Galuega 24:5; 28:22) Peitai na faalaeiauina e le aposetolo o Peteru ona uso talitonu, i le tusi atu e faapea: “Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou; a e faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu.” (1 Peteru 4:12, 13) Sa faapena foi ona tusi mai se sui o le vaega pule o le uluai senituri e faapea: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai. Ia atoatoa foi le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.” (Iakopo 1:2-4) E pei lava ona tofotofo e matagi malolosi le lelei ma le saogalemu o se vaa i luga o le sami, o le a faapena foi i afā o teteega ona faaalia mai ai so o se vaivaiga i lo tatou vaa o le faatuatua.

 O Puapuaga e Iu ai i le Onosai

5. E mafai faapefea ona tatou mautinoa e mautū lo tatou faatuatua i lalo o puapuaga?

⁵ E faatoʻā mafai lava ona mautinoa e Kerisiano lo latou onosai ma le mautu o lo latou faatuatua pe a uma ona sao mai afā o puapuaga. O le a faatoʻā “atoatoa foi le galuega” a lo tatou onosai i sami sousou pe a tatou ‘atoatoa ma sao ona lelei, ia leai se mea e tasi e mativa ai,’ e aofia ai ma se faatuatua malosi. Na tusi mai Paulo: “O mea uma lava ua faailoa ai i matou, o auauna a le Atua i matou, i le onosai tele, i puapuaga, i malaia, i atuatuvale.”—2 Korinito 6:4.

6. Aisea e tatau ai ona tatou ‘fiafia a o fesagai ma puapuaga,’ ma e faapefea i lenei mea ona faamalosia ai lo tatou faamoemoe?

⁶ O matagi malolosi o puapuaga na tatou te ono tofo i ai i nisi taimi e tatau ona manatu i ai o ni avanoa na e faamaonia atu ai o loo lelei ma mautū le vaa o lo tatou faatuatua. Na tusi atu Paulo i Kerisiano i Roma: “Ua tatou mitamita foi i puapuaga, ina ua tatou iloa o le puapuaga e tupu ai le onosai, o le onosai e tupu ai le mautinoa, o le mautinoa e tupu ai le faamoemoe; o le faamoemoe foi e le mā ai.” (Roma 5:3-5) O le tutumau mausalī i lalo o puapuaga tatou te maua ai le finagalo malie o Ieova. O le iuga, e faamalosia ai e lenei mea lo tatou faamoemoe.

Le Pogai ua Faavaatuʻia ai Nisi

7. (a) E pei ona faaalia i upu a Paulo, na faapefea ona faavaatuʻia faaleagaga nisi tagata? (e) Ua faapefea ona ō ese nisi mai le upu moni i aso nei?

⁷ Ina ua lapatai atu Paulo i le ono “faavaatuʻia,” sa ia manatuaina nisi o ē na “lafoaiina” lo latou loto fuatiaifo lelei ma mou atu lo latou faatuatua. (1 Timoteo 1:19) O nisi o i latou na, o Umenaio ma Alesana o ē na oo ina faaaposetasi, e ala i le liliu ese mai le upu moni ma tautala i upu faifai. (1 Timoteo 1:20, faaopoopoga i lalo, NW; 2 Timoteo 2:17, 18) I aso nei, o aposetate o ē ō ese mai le upu moni, ua latou sasaina i faamatalaga “le auauna faamaoni ma le mafaufau,” ua peiseai ua latou ūina le lima sa fafagaina faaleagaga i latou. Ua faaatagia mai e nisi le “auauna leaga,” lea o loo faapea ifo ma lona mautinoa: “E faatuai mai loʻu alii.” (Mataio 24:44-49; 2 Timoteo 4:14, 15) Ua latou faafitia le latalata mai o le iuga o lenei faiga amioleaga o mea, ma faitioina le mataalia faaleagaga o le vasega o le auauna i lo latou tausisia o se uiga faanatinati i tagata o Ieova. (Isaia 1:3) Ua taulau manuia na aposetate i le ‘faaliliuina ese o nisi tagata i le faatuatua,’ ma oo ai lava ina faavaatuʻia faaleagaga.—2 Timoteo 2:18.

8. O le ā ua faapogaia ai ona faavaatuʻia pe faagotoina e nisi le vaa o lo latou faatuatua?

⁸ O isi Kerisiano tuuina atu ua latou faaleagaina le vaa o lo latou faatuatua e ala i le lafoaiina o o latou loto fuatiaifo ae matuā lolo atu i le matuā sailia o faafiafiaga tuufau a lenei lalolagi ma ana amioga lē mamā faaleituaiga. (2 Peteru 2:20-22) Ae o isi foi ua latou faagoto lo latou vaa o le faatuatua ona ua latou manatu, e foliga e lei latalata mai le mapusaga i le faiga fou o mea.  Talu ai le lē mafai ona latou faitauina ma le saʻo le taimi e faataunuu ai nisi o valoaga, ma tuuesea le “aso o Ieova” mai o latou mafaufau, ua latou lafoaia ai le tapuaiga moni. (2 Peteru 3:10-13; 1 Peteru 1:9) E lei umi ae latou toe foi atu i vai nenefu ma le sousou o lenei faiga o mea. (Isaia 17:12, 13; 57:20) O nisi o ē ua lē toe auaufaatasi ma le faapotopotoga Kerisiano o loo latou talitonu pea o le lotu moni lea. Peitai, e foliga mai ua lē o iai ia i latou le onosai ma se tutumau lea e manaomia ina ia faatalitalia ai le lalolagi fou ua folafola mai e Ieova le Atua. Ua tuai tele le oo mai o le olaga i le Parataiso mo i latou.

9. O ā mea o loo faia e nisi Kerisiano tuuina atu, ma o le ā ua tatau ona tatou iloiloina ona o nei mea moni o loo tutupu?

⁹ O nisi Kerisiano tuuina atu i isi vaega o le lalolagi e foliga mai ua sisi faaʻafa le la o lo latou vaa o le faatuatua. O loo folau pea le vaa, ae na i lo le agaʻi malosi i luma i se faatuatua atoatoa, ua na ona faifai mālie o la latou folauga. Ina ua tosina mai i le faamoemoe o se “Parataiso ua latalata mai,” sa sauniuni ai nisi tagata e matuā faia ma le naunautai taumafaiga uma ina ia maua ai—sa maelega i le galuega talaʻi ma auai e lē aunoa i sauniga, o fonotaga, ma tauaofiaga uma. Nei la, a o mafaufau atu e peiseai o loo mamao ese o latou faamoemoega na i lo le tulaga sa latou faatalitalia, ua amata ai foi ona fai ifo le aasa lea sa latou muai iai. E faamaonia lena mea i le faaitiitia o la latou galuega talaʻi, ua seāseā auai i sauniga, ma ua faigofie foi ona lē auai i vaega o le polokalame o fonotaga po o tauaofiaga. O isi ua sili atu ona tele le taimi latou te tuuina atu i faafiafiaga ma le sailia o se olaga solo lelei faaletino. O nei mea moni o loo tutupu ua tatau ai ona tatou iloiloina po o le ā e tatau ona avea ma malosi e uunaia o tatou olaga ina ia ogatusa ma lo tatou tuuina atu ia Ieova. Pe tatau ea ona faalagolago atu lo tatou maelega i lana auaunaga i le faamoemoe i se “Parataiso ua latalata mai”?

Ua Faatusaina le Faamoemoe i se Taula

10, 11. O le ā ua faatusa i ai e Paulo lo tatou faamoemoe, ma aisea ua talafeagai ai lenei faatusatusaga?

¹⁰ Na taʻua e Paulo faapea sa folafola mai e Ieova ni faamanuiaga o le a auala mai ia Aperaamo. Ona faamatala mai lea e le aposetolo: ‘Na faaopoopo i ai e le Atua le tauto, ina ia ia i tatou o mea e lua e le mafai ona liua [lana afioga ma lana tautoga], e le mafai ona pepelo ai le Atua, tatou te maua ai le faamafanafanaga tele, o i tatou o ē ua sosola e tago atu i le faamoemoega ua tuu i o tatou luma. Ua ia i tatou lena faamoemoega pei se taula o le agaga, e lē matosina ma ua mausalī.’ (Eperu 6:17-19; Kenese 22:16-18) O le faamoemoe ua taatia atu mo Kerisiano faauuina o le ola e lē mafai ona oti i le lagi. I aso nei, o le vaega toatele o auauna a Ieova ua ia i latou le faamoemoe matagofie o le ola e faavavau i le parataiso i le lalolagi. (Luka 23:43) Pe a aunoa ma lena faamoemoe, e lē mafai e se tasi ona iai le faatuatua.

 ¹¹ O le taula o se uamea malosi mo le saogalemu, e matuā manaomia lava mo le taofiofia o le vaa ma lē oo ai ina tafea ese. E leai se tagata folau i le vasa e mafai ona ia folau ese atu i se vaa mai le uafu e aunoa ma se taula. Talu ai e iai ni taimi na tuʻia ai vaa ia na malaga ai Paulo, ua ia malamalama lelei la mai mea na oo ia te ia e faapea, o ola o tagata folau i le vasa sa masani ona faalagolago atu i taula o o latou vaa. (Galuega 27:29, 39, 40; 2 Korinito 11:25) I le uluai senituri, sa lei iai se afi o se vaa e mafai ai e le kapeteni ona ia pulea le itu e alu i ai le vaa. E ese ai mai vaatau sa ālo i foe, o vaa folau sa faalagolago tasi atu i le savili mo lona faagaoioia. Pe afai sa lamatia lona vaa i le agaʻi atu i ni papa, na pau lava le mea e mafai ona fai e le kapeteni o le lafo i lalo o le taula ma sao ai mai le afā, ma talotalo ia lē mamulu ese le taula mai le mea o loo lave ai i le ilititai. O lea na faatusatusa ai e Paulo le faamoemoe o se Kerisiano i “se taula o le agaga, e le matosina ma ua mausali.” (Eperu 6:19) Pe a osofaia i tatou i afā o teteega pe oo foi i ai isi tofotofoga, e mafai ona pei lo tatou faamoemoe ofoofogia o se taula e faatumauina ai i tatou o ni solu ola, ina ia lē tafea atu ai lo tatou vaa o le faatuatua i ni faga oneone matautia o masalosaloga pe i ni papa leaga o le faaaposetasi.—Eperu 2:1; Iuta 8-13.

12. E mafai faapefea ona tatou alofia le ō ese mai ia Ieova?

¹² Na lapatai atu Paulo i Kerisiano Eperu: “Le au uso e, ia outou, neʻi ai i so outou le loto leaga ma le le faatuatua, tou te o ese ai i le Atua soifua.” (Eperu 3:12, LF) I le mau i le faa-Eleni, o le “o ese” o lona faauigaina moni o le “tu ese mai,” lona uiga, ia faaaposetate. Peitai e mafai ona tatou alofia lena matuā faavaatuʻia. O le faatuatua ma le faamoemoe o le a mafai ai ona tatou pipii atu ia Ieova e tusa lava po o taimi o afā sili ona loulouā o tofotofoga. (Teuteronome 4:4; 30:19, 20) O le a lē pei ai lo tatou faatuatua o se vaa ua fesouaiina e matagi o aʻoaʻoga faaaposetate. (Efeso 4:13, 14) Ma o le avea o le faamoemoe e fai mo tatou taula, o le a mafai ai ona tatou sao mai afā o le olaga i le avea o ni auauna a Ieova.

Ua Uunaia e le Alofa ma le Agaga Paia

13, 14. (a) Aisea e lē lava ai le tau ina iai o le taula o lo tatou faamoemoe? (e) O le ā e tatau ona avea ma malosi e uunaia lo tatou tuuina atu o le auaunaga paia ia Ieova, ma aisea?

¹³ O le a lē agaigai i luma se Kerisiano mo le mauaina o le faiga fou pe afai e na o le pau le uunaiga e auauna ai ia Ieova, o le faamoemoe i le ola e faavavau i se lalolagi parataiso. A o tausia pea lana taula o le faamoemoe e fai ma vala e faamautuina ai lona olaga, e manaomia foi ona faaopoopo atu i lona faamoemoe ma lona faatuatua le alofa e fai ma malosi e uunaia ai. Na faamautinoa mai e Paulo lenei mea moni ina ua ia tusi: “O tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.”—1 Korinito 13:13.

¹⁴ E tatau ona avea ma malosi e uunaia lo tatou tuuina atu o le auaunaga paia, le alofa mai le loto mo Ieova, e tali atu ai i lona alofa lē mafuatia mo i tatou. Na tusi mai le aposetolo o Ioane: “O se le alofa ua le iloa e ia le Atua; auā o le Atua, o le alofa lava ia. O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia. O i tatou, ua tatou alolofa, auā na ia muai alofa mai ia te i tatou.” (1 Ioane 4:8, 9, 19) I le agaga faafetai ia Ieova, e tatau ai ona tatou muai manatu mamafa, e lē ina ia maua so tatou lava faaolataga, ae ia molimau atu le faapaiaina o lona suafa paia ma le faasilisilia o lana pule silisili ese amiotonu.

15. Ua faapefea ona fesootai atu lo tatou alofa mo Ieova i le mataupu o lana pule silisili ese?

¹⁵ E finagalo Ieova ia tatou auauna atu ia te ia talu ai tatou te alolofa ia te ia, ae lē na o le manao i le Parataiso. Ua taʻua e le lomifefiloi o le Tusi Paia le Insight on the Scriptures * e faapea: “E faafiafiaina Ieova i le mea moni faapea, o lana pule silisili ese ma le lagolago atu i ai a ana foafoaga e faavae autū aʻe i le alofa. E naunau o ia mo na o i latou o ē alolofa i lana pule silisili ese ona o ona uiga lelei, ma talu ai e amiotonu, o ē sili atu ia i latou lana pule silisili  ese na i lo se isi lava mea. (1Ko 2:9) Ua latou filifili e auauna i lana pule silisili ese na i lo le taumafai e fia tutoatasi—ua māfua lenei ona o mea ua latou iloa e uiga ia te ia ma lona alofa, lona faamasinotonu, ma lona atamai, lea ua latou iloa lelei e silisili atu na i lo i latou. (Sala 84:10, 11)”—Tusi 2, itulau 275.

16. Ua faapefea ona avea le alofa mo Iesu o se malosi e uunaia o tatou olaga?

¹⁶ I le avea o i tatou ma Kerisiano, tatou te faaalia ai foi le alofa mo Iesu e tusa ai o lona alofa mai ia i tatou. Na faamatala mai e Paulo: “Ua pulunaunauina i matou i le alofa o Keriso; o loo manatu faapea i matou, na maliu le toatasi mo tagata uma, o lea ua oti ai tagata uma; na maliu foi o ia ona o tagata uma, ina ia le usiusitai pea o e ola ia te i latou lava, a o ia o le na maliu ma toe tu mai mo i latou.” (2 Korinito 5:14, 15) O Keriso o le faavae moni lea o loo fafau aʻe ai o tatou olaga faaleagaga, lo tatou faatuatua, ma lo tatou faamoemoe. O lo tatou alofa mo Keriso Iesu e faamalosia ai lo tatou faamoemoe ma faamautuina ai lo tatou faatuatua, ae maise i taimi o tofotofoga pei ni afā.—1 Korinito 3:11; Kolose 1:23; 2:6, 7.

17. O le ā le malosi silisili atu ua saunia e Ieova mo i tatou, ma ua faapefea ona faaalia mai lona tāua i le Galuega 1:8 ma le Efeso 3:16?

¹⁷ A o avea lo tatou alofa mo le Atua ma lona Alo o le malosi autū e uunaia o tatou olaga o ni Kerisiano, ae ua saunia foi e Ieova se isi mea e uunaia ai i tatou, e faamalosia ai i tatou, ma aumaia ai ia i tatou le malosi e agaigai ai i luma i lana auaunaga. O lona malosi galue, po o le agaga paia. O upu i le faa-Eperu ma le faa-Eleni ua faaliliuina i ai le “agaga” e faasino patino atu i le gaoioiga malosi a le ea, e pei o le matagi. O vaa folau e pei o vaa na sa faimalaga ai Paulo, sa faalagolago atu i le malosi lē vaaia o le matagi ina ia oo atu i nofoaga sa faamomoe e faataunuu i ai. E faapena foi ona tatou manaomia le alofa ma le gaoioiga a le malosi galue lē vaaia o le Atua, pe afai tatou te mananao ia agaʻi i luma lo tatou vaa o le faatuatua i le auaunaga a Ieova.—Galuega 1:8; Efeso 3:16.

Ia Agaʻi i Luma i le Taunuuga o Tatou Faamoemoe i Ai!

18. O le ā le mea o le a mafai ai ona tatou onosaia so o se tofotofoina o lo tatou faatuatua i le lumanai?

¹⁸ E ono matuā tofotofoina lo tatou faatuatua ma le alofa a o tatou lei taunuu atu i le faiga fou o mea. Peitai ua saunia e Ieova mo i tatou se taula “e le matosina ma ua mausali”—o lo tatou faamoemoe matagofie. (Eperu 6:19; Roma 15:4, 13) Pe a osofaia i tatou i teteega po o isi tofotofoga, e mafai ona tatou onosai pe afai e lelei ona taulaina i tatou e lo tatou faamoemoe. Pe a uma atu le isi afā a o lei agi mai foi le isi, seʻi o tatou maumauai e faamausalīina atili lo tatou faamoemoe ma ia faamalosia lo tatou faatuatua.

19. E mafai faapefea ona tatou tausisia pea le folauga a le vaa o lo tatou faatuatua i le ala saʻo ma taunuu atu ai i le mapusaga o le lalolagi fou a le Atua?

¹⁹ A o lei taʻua e Paulo le “taula o le agaga,” na ia faapea mai: “Ua matou mananao tele ina ia outou taitasi ma faaali mai lea lava filigā [ia “faavave,” faaopoopoga i lalo, NW], ina ia mautinoa le faamoemoe e oo i le gataaga; ina ia le paie, a ia faaaʻoaʻo i e ua maua i le faatuatua ma le onosai mea na folafolaina.” (Eperu 6:11, 12) Talu ai ua uunaia i tatou e le alofa mo Ieova ma lona Alo ma ua faamalosia i tatou e le agaga paia, seʻi o tatou tausisia pea le folauga a le vaa o lo tatou faatuatua i le ala saʻo seia oo ina tatou taunuu atu i le mapusaga o le lalolagi fou ua folafola mai e le Atua.

[Faaopoopoga i lalo]

E Ala i se Autaluga

□ O le ā le lapataiga na tuuina mai e Paulo ia i tatou, e tusa ai o lo tatou faatuatua?

□ Ua faapefea ona faavaatuʻia faaleagaga nisi, ma ua faapefea ona faifailemu isi?

□ O le ā le uiga faale-Atua e manaomia ona ō faatasi ma lo tatou faatuatua?

□ O le ā le mea o le a mafai ai ona tatou taunuu atu i le mapusaga o le lalolagi fou ua folafola mai e le Atua?

[Fesili mo le Suʻesuʻega]

[Ata i le itulau 16]

E tatau ona lelei le fauina o le vaa o lo tatou faatuatua ina ia mafai ona tatalia afā o le olaga

[Ata i le itulau 17]

E mafai ona faavaatuʻia lo tatou faatuatua

[Ata i le itulau 18]

O le faamoemoe o se taula mo lo tatou olaga o ni Kerisiano