“Ia Oofu Outou Uma Lava i le Loto Maulalo”
“Ia Oofu Outou Uma Lava i le Loto Maulalo”
“E tetee atu le Atua i e faamaualuluga, a e foaiina mai le alofa tunoa i e faamaulalo.”—1 PETERU 5:5.
1, 2. O ā uiga e lua faalemafaufau e tuufaafeagai ia e iai so la aafiaga loloto i amioga faaletagata?
E AOFIA i uiga faalemafaufau ua tataʻi atu i ai o tatou manatu e le Afioga a le Atua ni uiga tuufaafeagai se lua. O na uiga uma e lua e aumaia ai ni aafiaga loloto i amioga faaletagata. O se tasi o na uiga ua faamatalaina o le “loto maulalo.” (1 Peteru 5:5) Ua faamatalaina e se lomifefiloi le “maulalo” o le “agamalu i le amio ma le agaga: e sao mai le faamaualuga fia matamuamua.” O le loto maulalo e uiga tutusa ma le agamalu, ma i le silafaga a le Atua, o se uiga e manaomia tele.
2 O lona tuufaafeagai o le faamaualuga. Ua faamatalaina lenei uiga i le “faatāuaina naua e se tasi o ia lava,” e “vaai maulalo i isi.” E manatu faapito, ma e saili i mea faitino, mo na o ia lava, ma ona lava lelei e tusa lava po o ā aafiaga leaga e oo ai i isi. Ua taʻua e le Tusi Paia se tasi o ona taunuuga: “E pule ai le tasi tagata i le tasi, e leaga ai o ia lava.” O loo tautala e faatatau i le “tauiviga i le va o le tasi tagata i le isi” e pei o le “ʻai a le matagi” auā pe a oo mai le oti “e le ave foi e ia se mea.” O lena ituaiga o faamaualuga e matuā lē manaomia i le silafaga a le Atua.—Failauga 4:4, NW; 5:15; 8:9.
Le Agaga o Loo Taatele i le Lalolagi
3. O le ā le agaga o loo taatele i le lalolagi?
3 O lē fea o na uiga faalemafaufau e lua o loo mataulia ai le lalolagi i aso nei? O le ā le agaga o loo taatele i le lalolagi? Ua matauina e le World Military and Social Expenditures 1996 e faapea: “E leai lava se isi senituri i le talafaasolopito e tutusa ma le senituri lona 20 i le tulaga matautia ua iai . . . faiga sauā.” O tauvaga mo le pule faapolotiki ma tau tamaoaiga—e faapena foi i feteenaiga i le va o malo, o lotu, ituaiga, ma lanu—ua fasiotia ai le silia i le 100 miliona tagata i lenei senituri. Ua faateleina foi le manatu faapito o le tagata ia te ia lava. Ua faapea mai le Chicago Tribune: “O faamaʻi ua aafia ai tagata lautele e aofia ai faiga sauā lē mafaufau, le faaleagaina o tamaiti, talagā faaipoipoga, onā, AIDS, o talavou ua pule i o latou ola, fualaau faasāina, o kegi leaga, le toso teine, o tamaiti toifale, le faapaʻūtama, o ata ma faamatalaga o faiga lē mamā, . . . o le pepelo, taufaaʻoleʻole, o faiga faapolotiki faapiopio . . . O le saʻo ma le sese e fai ma taiala tau amio ua lafoaia.” O lea, na lapatai mai ai le UN Chronicle: “Ua faasolo lava ina leaga tagata lautele.”
4, 5. Ua faapefea ona faamatalaina ma le saʻo e valoaga a le Tusi Paia mo o tatou aso le agaga o le lalolagi?
4 O nei tulaga ua aafia ai le lalolagi atoa. Ua talafeagai lelei ma le mea na valoia mai e le Tusi Paia mo o tatou taimi: “O ona aso e gata ai e oo mai ai aso faigata. Auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei, o e faalata, o e soona fai, o e ua faafefeteina.”—2 Timoteo 3:1-4, LF.
5 O se faamatalaga saʻo lea o le agaga o loo taatele i lenei lalolagi. O se uiga fia matamuamua manatu faapito. O feteenaiga i le va o atunuu ua faaāta mai i feteenaiga i le va o tagata taitoatasi. Mo se faataitaiga, i taaloga tauva, e taumafai ai lava le toatele o tagata taaalo ina ia avea ma lē numera tasi e tusa lava po o ā tiga o faalogona po o le tino foi e oo ai i isi ina ia ausia ai lea tulaga. O lenei agaga manatu faapito ua faatupu aʻe i tamaiti ma o loo faaauau i le tele o vala o le olaga o tagata matutua. E iu ai i le “feitagai, o le femisai, o le losilosi vale, o le lotoa, o le finau vale, o le fevaevaeaiga.”—Kalatia 5:19-21.
6. O ai o loo ia uunaia le uiga manatu faapito, ma o le ā le finagalo o Ieova e faatatau i lenei ituaiga o mafaufauga?
6 Ua faailoa mai e le Tusi Paia faapea o le agaga manatu faapito o lenei lalolagi ua atagia mai ai lē “ua igoa i le tiapolo, i le ma Satani, o lē faasese i le lalolagi uma.” E tusa ai o taaʻiga a Satani i tagata o loo ola i lenei vaitaimi faigata o aso e gata ai, ua valoia e le Tusi Paia: “Oi talofa ia te outou o e nonofo i le fanua . . . auā ua alu ifo ia te outou le tiapolo ua lotoa tele, auā ua na iloa ua saasaa ona po.” (Faaaliga 12:9-12) O lea o ia ma ana aumea o temoni ua faateleina a latou taumafaiga ina ia uunaia atili le manatu faapito i le aiga faaletagata. Ma o le ā le finagalo o Ieova e faatatau i lea ituaiga o uiga? Ua faapea mai lana Afioga: “E inosia e Ieova atoa uma e ua loto faamaualuga.”—Faataoto 16:5.
E Faatasi Ieova ma Ē Loto Maulalo
7. E faapefea ona manatu mai Ieova i ē loto maulalo, ma o le ā na te aʻoaʻoina ai i latou?
7 I le isi itu, e faamanuia Ieova i ē loto maulalo. I le pese ia Ieova, na faapea atu ai le tupu o Tavita: “E te faaolaina le nuu ua tigaina [“loto maulalo,” NW]; a o loo e silasila ifo i e faamaualuga, ina ia e faamaulaloina i latou.” (2 Samuelu 22:1, 28) O lea, ua fautua mai ai le Afioga a le Atua: “Ia outou saili ia Ieova, outou uma ua agamalu i le nuu, . . . ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.” (Sefanaia 2:3) O i latou e saili ma le loto maulalo ia Ieova ua ia aʻoaʻoina ina ia atiina ae se agaga e matuā ese lava mai le agaga o lenei lalolagi. “Na te aʻoaʻo mai foi i e agamalu i lona ala.” (Salamo 25:9; Isaia 54:13) O lena ala o le ala o le alofa. E faavae aʻe i le faia o le mea ua tonu e tusa o tapulaa a Ieova. E tusa ai o le Tusi Paia, o lenei alofa e faavae i mataupu silisili “e le mitamita vale . . ., e le faafefeteina, . . . e le sailia e ia ana lava mea.” (1 Korinito 13:1-8) E aliali mai foi lea alofa i le loto maulalo.
8, 9. (a) O le ā le amataga mai o le alofa e faavae i mataupu silisili? (e) O le ā le tāua o le faataitai i le alofa ma le loto maulalo na faaalia e Iesu?
8 Na aʻoaʻoina e Paulo ma isi Kerisiano o le uluai senituri lenei ituaiga o alofa mai aʻoaʻoga a Iesu. Ma na aʻoaʻoina e Iesu mai lona Tamā, o Ieova, o lē na faapea mai le Tusi Paia e uiga ia te ia: “O le Atua, o le alofa lava ia.” (1 Ioane 4:8) Na silafia e Iesu o le finagalo o le Atua mo ia ina ia ola aʻe e tusa o le tulafono o le alofa, ma na ia faia faapea. (Ioane 6:38) O le mafuaaga lena sa ia alofa mutimutivale ai i ē mafatia, ē matitiva, ma ē agasala. (Mataio 9:36) Na ia fetalai atu ia i latou: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo.”—Mataio 11:28, 29.
9 Na faailoa atu e Iesu i ona soo le tāua o le faaaʻoaʻo i lona alofa ma le loto maulalo ina ua ia faapea atu ia i latou: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le a tu matilatila i latou e vavae ese mai lenei lalolagi manatu faapito. O le mafuaaga lena na mafai ai ona faapea mai Iesu e uiga i ona soo: “E le ni o le lalolagi i latou.” (Ioane 17:14) Leai, latou te lē faataitai i le agaga faamaualuga, ma le manatu faapito o le lalolagi a Satani. Na i lo lea, latou te faataitai i le agaga o le alofa ma le loto maulalo lea na faaalia e Iesu.
10. O le ā o loo faia e Ieova i ē loto maulalo i o tatou aso?
10 Na valoia e le Afioga a le Atua faapea i aso nei e gata ai, o le a aoaoina faatasi ai ē agamalu i se sosaiete i le lalolagi aoao e faavae aʻe i le alofa ma le loto maulalo. O lea, i le lotolotoi o se lalolagi o loo faateleina pea lo latou manatu faamaualuga, o loo faaalia ai e tagata o Ieova se uiga tuufaafeagai—le loto maulalo. Ua faapea mai i latou na: “Tatou o ae ia i le mauga o Ieova [lana tapuaiga moni ua faamaualugaina], . . . e aʻoaʻo mai foi o ia ia te i tatou i ona ala, ona tatou savavali ai lea i ona ala.” (Isaia 2:2, 3) Ua faia aʻe e Molimau a Ieova lenei sosaiete i le lalolagi aoao o loo savavali i ala o le Atua. O loo aofia ai ia i latou se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi” o loo faatuputupulaia pea. (Faaaliga 7:9) O lenei motu o tagata e toatele ua faia aʻe i le faitau miliona o tagata. O faapefea ona toleniina i latou e Ieova ina ia loto maulalo?
Aʻoaʻoina Ina ia Loto Maulalo
11, 12. E faapefea ona faaalia e auauna a le Atua le loto maulalo?
11 O le galue o le agaga o le Atua i ona tagata loto naunau ua mafai ai ona latou iloa faatoilalo le agaga leaga o lenei lalolagi ma ia faaalia fua o le agaga o le Atua. Ua faaali atu ia fua e ala i le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le amio mamā.” (Kalatia 5:22, 23, LF) Ina ia fesoasoani ia i latou e atiina ae na uiga, ua fautuaina auauna a le Atua ina ia aua neʻi “mitamita vale, aua neʻi feluiai, aua neʻi felosiai.” (Kalatia 5:26) I se tulaga talitutusa, na faapea mai le aposetolo o Paulo: “Ou te fai atu ai ia te outou uma, aua le faasili le manatu o se tasi i le mea ua tatau ona manatu ai, a ia māmā le manatu.”—Roma 12:3.
12 Ua taʻu mai e le Afioga a le Atua i Kerisiano moni ina ia “aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi [o auauna a le Atua] ia te ia. Aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:3, 4) “Aua le saili se tasi i lona lava lelei, a ia taitasi ma saili i le lelei o le isi.” (1 Korinito 10:24) Ioe, “e ati ae e le alofa” isi i upu ma gaoioiga e lē manatu faapito. (1 Korinito 8:1) Na te faaauilumaina le felagolagomai, ae lē o le faatautavā. O le agaga fia matamuamua e lē tatau ona iai i auauna a Ieova.
13. Aisea e tatau ai ona aʻoaʻoina le loto maulalo, ma e faapefea ona aʻoaʻoina e se tasi?
13 Peitai, ona o le tuufaasolo mai o le lē lelei atoatoa, tatou te lei fananau mai ai ma le loto maulalo. (Salamo 51:5) E manaomia ona aʻoaʻoina lenei uiga. Ma atonu e faigata lenei mea mo i latou na lei aʻoaʻoina i ala o Ieova talu mai o laiti ae ua faatoʻā taliaina mulimuli ane i le olaga. Ua muamua ona latou ati ae uiga faaletagata e faavae aʻe i uiga o lenei lalolagi. O lea e manaomia ai ona latou aʻoaʻoina ina ia “to ese le tagata tuai o loo ua leaga, e tusa ma [a latou] amioga faaanamua,” ma ia “oofu [i latou] i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:22, 24) Faatasi ai ma le fesoasoani a le Atua e mafai ai e ē loto faamaoni ona latou faia le mea ua ia faatonuina mai latou te faia: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai.”—Kolose 3:12.
14. Na faapefea ona fetalai Iesu e tetee i le manao o se tasi e faasilisiliina o ia lava?
14 Sa ao i soo o Iesu ona aʻoaʻoina lena mea. I le taimi na fai ai i latou ma ona soo, ua avea i latou o ni tagata matutua ma sa ia i latou le agaga faatautavā o le lalolagi. Ina ua saili atu le tinā o le toalua o i latou mo se tulaga maualuga mo lana fanau, na fetalai atu i ai Iesu: “O alii o nuu ese ua aliitai [i tagata], o e ua sili foi ua pule ia te i latou; a e le faapea outou; a o sē fia sili ia te outou, ia fai o ia ma a outou auauna; o sē fia muamua foi ia te outou, ia fai o ia ma a outou tautua. E pei o le Atalii o le tagata [Iesu] e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:20-28) Ina ua faatonu atu e Iesu ona soo ina ia aua neʻi o latou faaaogaina ni taʻu e faasilisilia ai i latou, na ia faaopoopo atu: “O outou uma o le au uso outou.”—Mataio 23:8.
15. O le ā le uiga e ao ona iai ia i latou o loo mananao e avea ma ovasia?
15 O se soo moni o Iesu o se auauna, ioe, o se auauna i ona uso Kerisiano. (Kalatia 5:13) E sili atu ona tāua lenei mo i latou e mananao e agavaa mo le tausiaina o le faapotopotoga. E lē tatau lava ona latou tauva mo le fia maualuga po o le fia pule; e lē tatau ona latou ‘pule sauā i ē ua tofia i ai i latou e le Atua, ae ia fai ma faaaʻoaʻo ia i latou.’ (1 Peteru 5:3) O le mea moni, o se agaga e saili ona lava lelei o se faailoaga lea o le lē talafeagai o se tane mo le tausia o isi. O se tagata faapena o le a faamanualia ai le faapotopotoga. E moni, e talafeagai ona ‘aapa atu ina ia fai ma ovasia,’ ae e tatau ona sau mai se faanaunauga ina ia auauna i isi Kerisiano. O lenei tofiga e lē o se tulaga o le maualuga po o le pule, auā o i latou o loo galulue o ni ovasia e tatau ona avea ma ē aupito sili ona loto maulalo i le faapotopotoga.—1 Timoteo 3:1, 6.
16. Aisea na taʻusalaina ai faalauaitele Tioterifi i le Afioga a le Atua?
16 Ua tataʻi atu o tatou manatu e le aposetolo o Ioane i se tagata na sese lana vaaiga, i le faapea mai: “Na ou tusi atu i le ekalesia, a o Tioterifi, o lē fia sili ia te i latou, e le talia i matou e ia.” Na feutagai lenei tane ma isi i se auala lē faaaloalo i le taumafai e faasilisilia lona tulaga. O lea, na uunaia ai e le agaga o le Atua Ioane ina ia faamauina i le Tusi Paia le taʻusalaina faalauaitele mai o Tioterifi ona o ona uiga fia matamuamua.—3 Ioane 9, 10.
Le Uiga Saʻo
17. Na faapefea ona faaalia e Peteru, Paulo, ma Panapa le loto maulalo?
17 E anoanoai faaaoaoga faale-Tusi Paia o le uiga saʻo, o le loto maulalo. Ina ua ulufale atu Peteru i le fale o Konelio, ona “faapaū [lea o lena tamaloa] i vae [o Peteru], ua ifo ia te ia.” Ae na i lo le talia o le viiga, “ua faatu e Peteru ia te ia, ua faapea atu, ‘Ina tu ia i luga; o aʻu nei lava o le tagata.’” (Galuega 10:25, 26) A o iai Paulo ma Panapa i Lusa, na faamālōlō ai e Paulo se tamaloa na pipili talu lava ona fanau mai. O le iuga, na faapea mai ai tagata o nei aposetolo o ni atua. Peitai, na “saeia [e Paulo ma Panapa] o laua ofu, ma feosofi atu i le motu o tagata, o loo alalaga i laua, ua faapea atu, ‘Alii e, se a le mea ua outou fai ai na mea? O tagata lava i maua nei e tutusa ma outou.’” (Galuega 14:8-15) Sa lei talia e nei Kerisiano loto maualalo le viiga mai tagata.
18. I lona loto maulalo, o le ā na taʻu atu e se agelu malosi ia Ioane?
18 Ina ua tuuina atu i le aposetolo o Ioane “le faaaliga a Iesu Keriso,” sa faaooina atu e se agelu. (Faaaliga 1:1) Ona o le malosi o se agelu, tatou te malamalama ai i le mafuaaga na mataʻu ai Ioane, auā na fasiotia e le agelu e toatasi tagata Asuria e 185,000 i le po e tasi. (2 Tupu 19:35) Ua faamatala mai e Ioane: “Ua ou faalogo ma ou vaai, ona aʻu faapaū lea e ifo atu i vae o le agelu na na faaali mai ia te au ia mea. A ua fai mai o ia ia te au, ‘Ia oe, aua lava! Auā o aʻu o lou uso a auauna ma lo . . . ou uso, . . . ia e ifo i le Atua.’” (Faaaliga 22:8, 9) Maeu le loto maulalo o lenei agelu malosi!
19, 20. Faaeseese mai le faamaualuga o taʻitaʻiau manumalo o Roma ma le loto maulalo o Iesu.
19 O Iesu o le faaaoaoga sili o se tasi na faaalia le loto maulalo. O ia o le Alo e toatasi o le Atua, o le Tupu i le lumanai o le Malo faalelagi o le Atua. Ina ua ia faailoaina atu i tagata lona tulaga lena, na te lei faia e pei ona sa faia ai e taʻitaʻiau manumalo i taimi o Roma. Latou te faia ni savaliga uumi lava—ni solo— ma e tietie i kariota e teuteuina i auro ma nifo elefane, o loo tosoina e ni solofanua papae, po o ni elefane, ni leona, po o ni taika. I le solo e iai tagata faimusika o loo usuina pese o le manumalo, faatasi ai ma taavale toso o loo faatumulia i le vete ma mea o loo faailoa atu ai vaaiga o le taua. E iai foi tupu ua ave faatagataotaua, o perenise ma taʻitaʻiau, faatasi ma o latou aiga, e masani ona talai uma ese o latou lavalava ina ia faalumaina ai i latou. O na mea o se matuā faailoga lea o le faamaualuga ma le mimita.
20 E matuā eseese lena ma le auala na faailoa atu ai e Iesu ia lava. Na naunau o ia e gauai ma le loto maulalo e faataunuuina le valoaga e faatatau ia te ia, lea na valoia: “Faauta, o le a alu atu lou Tupu ia te oe; o ia o le amiotonu ma le faaola; e agamalu o ia, o loo tietie i le asini.” Na loto maulalo o ia ma tietie atu i se meaola e ave avega, ae lē o se kariota o loo tosoina e se solo tele o manu. (Sakaria 9:9; Mataio 21:4, 5) Maeu le fiafia o tagata agamalu ona o le a avea Iesu ma Tupu tofia a Ieova i le lalolagi atoa i le lalolagi fou, o lē e loto maulalo moni, e agamalu, e alofa, e alofa mutimuti vale, ma agalelei!—Isaia 9:6, 7; Filipi 2:5-8.
21. O le ā e lē o faaalia mai e le loto maulalo?
21 O le mea moni faapea o Iesu, Peteru, Paulo, ma isi tane ma fafine faatuatua i le Tusi Paia sa faaalia le loto maulalo ua aveesea ai le manatu faapea o le loto maulalo o se vaivaiga. Na i lo lea, ua faaalia ai le malosi o se tasi, auā o i latou nei sa loto tetele ma maelega. Faatasi ai ma le tele o le malosi tau le mafaufau ma tau amio, na latou tumau ai i tofotofoga matuia. (Eperu, mataupu 11) Ma i aso nei, pe a faaalia e auauna a Ieova le loto maulalo, ua ia i latou la le malosi lava lena e tasi auā e lagolagoina e le Atua ē loto maulalo i lona agaga paia e sili ona malosi. O lea, ua uunaia ai i tatou: “Ia oofu outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo. O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona po e tatau ai.”—1 Peteru 5:5, 6; 2 Korinito 4:7.
22. O le ā o le a talanoaina i le mataupu o sosoo mai?
22 E iai se isi vala tāua o le loto maulalo e ao i auauna a le Atua ona faatino. O lenei vala e lagolago atu i le atiina ae o le agaga o le alofa ma le felagolagomai i totonu o faapotopotoga. O le mea moni, o se vala manaomia tele e faaopoopo atu i le loto maulalo. O le mea lena o le a talanoaina i le mataupu o sosoo mai.
Ina ia Autalu
□ Faamatala mai le agaga o loo taatele i lenei lalolagi.
□ E faapefea ona fiafia mai Ieova ia i latou e loto maulalo?
□ Aisea e tatau ai ona aʻoaʻoina le loto maulalo?
□ O ā nisi o faaaoaoga faale-Tusi Paia o i latou na faaalia le loto maulalo?
[Fesili mo le Suʻesuʻega]
[Ata i le itulau 15]
Na taʻu atu e le agelu ia Ioane: “Ia oe, aua lava! Auā o aʻu o lou uso a auauna”