Lē Tutusa O Aiā—Pe na Fuafuaina e le Atua?

E tasi lava le upu e tali ai o le leai. Seʻi o tatou tilofaia pe aisea.

NA FUAFUAINA e le Atua ina ia maua e tagata uma avanoa tutusa e ola ai ma ia fiafia. Ua tatou faitau e uiga i le foafoaina o le tagata, e faapea: “Ona fetalai ane lea o le Atua, Ina tatou faia ia o le tagata i lo tatou faatusa, ia foliga ia i tatou; ia pule foi i latou i iʻa i le sami, ma manu felelei, ma manu vaefa, ma le laueleele uma, atoa ma mea fetolofi uma e fetolofi i le eleele.” Ina ua maeʻa le foafoaga faalelalolagi, “ua silasila atu le Atua i mea uma ua na faia, faauta foi, ua matuā lelei lava.”—Kenese 1:26, 31.

Pe mafai ea e le Atua ona ia faasilasila mai faapea “ua matuā lelei lava” le tulaga faanoanoa o le lē tutusa o aiā ua iai i aso nei? E matuā leai lava, auā “o le Atua, o le alofa lava ia.” (1 Ioane 4:8) Ua taʻua e faatatau ia te ia e faapea na te “le faailogaina tagata” ma e “sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 10:17; 32:4; faatusatusa i le Iopu 34:19.) Ma na faaiu mai upu a le aposetolo o Peteru e faapea: “E moni, ua ou iloa e le  faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.”—Galuega 10:34, 35.

Talu ai o le Atua e alofa, e lē faailogatagata, e faamasinotonu, e tonu, ma amiotonu, e faapefea la ona ia foafoaina tagata ma tuufaasolo mai i ai se tulaga lē tutusa e tusa ai o a latou aiā tatau e fiafia ai? O le faatagaina o faiga faaituʻau i tagata ma le tuua o i latou i se faiga e lē tutusa ai aiā o le a matuā feteenai lava ma ona uiga totino. Sa ia fuafua mo tagata uma ina ia “fananau mai e saoloto ma tutusa i le mamalu ma aiā tatau.” Peitai, i aso nei, ua manino mai lava le lē o iai o mea i lena tulaga. Aisea ua leai ai?

Le Amataga o le Lē Tutusa o Aiā

O le foafoaina e le Atua o tagata ina ia tutusa e lē faapea ai sa ia fuafuaina mo i latou uma ina ia tutusa i vala uma. E mafai ona latou eseese i a latou taleni, o mea e fiafia ai, ma o latou uiga totino. E mafai foi ona eseese o latou tulaga po o le tele o se pule latou te maua. Mo se faaaoaoga, e lē tutusa le tamaloa ma le fafine i vala uma lava, peitai na foafoaina e le Atua le fafine ina ia avea ma “fesoasoani e tatau” mo le tamaloa. (Kenese 2:18) E manino lava e eseese mātua ma le fanau i le tulaga pule. Peitai, e ui i nei eseesega, ae o tagata uma—tamaloloa, fafine, ma tamaiti—sa tatau ona olioli i le tutusa o aiā ua tuuina mai e le Atua mo le faamalieina o manaoga autū mo le fiafia. Sa tatau ona tutusa i latou uma i lo latou mamalu ma o latou tulaga i le silafaga a le Atua.

E faapena foi ona tuuina atu i atalii agaga o le Atua, o ē na muamua foafoaina na i lo tagata, ni tofiga ma tiute tauave eseese latou te faia. (Kenese 3:24; 16:7-11; Isaia 6:6; Iuta 9) E ui i lea, i totonu o tapulaa o mea ua tuuina atu ia i latou, sa mafai ai e i latou uma ona olioli i sauniuniga tauatua mo le ola ma le fiafia i se tele e tutusa uma ai. Ua faapea ai ona latou faaatagia mai le uiga lē faailogatagata o le Atua i se auala matagofie.

E faanoanoa e faapea atu, na iai se foafoaga agaga sa lē malie i le faatulagaga lē faaituʻau a le Atua. Sa ia manao i nisi mea e tele atu na i lo mea na foai atu e le Atua ia te ia, i lona moomoo mo se tulaga e sili atu ona maualuga, ma sili atu ona aloaia. O lona faaolaolaina pea o lenei tuinanauga sese, na ia faatavā atu ai ia Ieova, o Lē na Foafoaina Mea, e ia te ia le aiā tatau e umia ai le pule aoao. O lenei atalii agaga, fouvale o le Atua na mulimuli ane ona faaseseina tagata ina ia la tāpā mai le Atua se mea e sili atu na i lo mea na Ia foai atu ia i laua. (Kenese 3:1-6; faatusatusa i le Isaia 14:12-14.) O lea, na oo ai ina matuā lē paleni le sauniuniga a Ieova mo tagata ina ia ola ma fiafia. O lenei foafoaga agaga fouvale, lea e faaigoa i le Faaaliga 20:2 o “le tiapolo lea ma Satani,” o le faapogai amioleaga lea o le tulaga lē tutusa o aiā a le fanau a tagata.

Po o le a Suia ea Tulaga o Mea?

E tasi lava le upu e tali ai o le ioe!

Ae o ai e mafai ona ia aumaia suiga manaomia? O taʻitaʻi faaletagata, o nisi e mautinoa le matuā naunau faamaoni, ua au senituri o latou tauivi ina ia faia faapea. E gata mai ni mea latou te mafaia, ma ua oo ai ina manatu le toatele, e lē o se mea talafeagai le faatalitalia faapea o le a mafai ona foia le faafitauli o le lē tutusa o aiā a tagata. Peitai, o loo faamauina i le Isaia 55:10, 11 le silafaga a le Atua: “E pei ona totō ifo o le ua ma le kiona mai le lagi, a e le toe foi atu i ai, a e peitai e faasūsūina ai le laueleele, ma fua mai ai, ma totogo mai ai, e tupu mai ai saito i lē lulu saito ma mea e ʻai i le ua ʻai; e faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”

 Maeu se faamafanafanaloto o le iloa ua folafola mai e Ieova le Atua e faapea, o le a ia faataunuuina lana uluai folafolaga ina ia saunia mo tagata uma ni avanoa tutusa mo le ola ma ia fiafia! Ona o ia o le Atua o le upu moni, ua ia faamautinoa ai na te faataunuuina lava mea ua ia folafolaina mai. O le mea e lelei ai, e lē gata o lona finagalo lea, ae ua ia te ia foi le mana e faia ai. O le a ia faataunuuina faapefea lenei mea?

O le tali e faalagolago atu i le Malo lea na aʻoaʻo e Iesu Keriso ona soo e tatalo ai: “Lo matou Tamā e, o i le lagi, . . . Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:9, 10) Ioe, o le Malo o le Atua o le ala lea o le a faaaogā e Ieova ina ia “tuʻimomomoina ma faaumatia [ai] ia malo uma lava [o loo tulai mai nei], a o ia e tumau lava e faavavau.”—Tanielu 2:44.

I le pulega a le Malo faalelagi, o le a aliai mai ai se sosaiete fou faaletagata. O le mea lena, na tusi ai le aposetolo o Ioane i le tusi mulimuli o le Tusi Paia, le Faaaliga, e faapea: “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi.” (Faaaliga 21:1) O le a soloiesea uiga matagā uma o le tulaga o le lē tutusa o aiā—le mativa, o maʻi, le lē amanaia, le faaituʻau, ma isi faiga leaga uma faaletagata. *

Ua silia nei ma le senituri o tataʻi atu e Molimau a Ieova manatu o tagata i lena Malo. (Mataio 24:14) E ala i lomiga ma la latou fesoasoani totino, ua latou faamalolosi ai e fesoasoani atu i tagata ina ia maua le poto e uiga i fuafuaga a le Atua e pei ona faamauina i le Tusi Paia. Peitai, o la latou galuega tau aʻoaʻoga i le lalolagi aoao, e lē gata ina avatu ai i tagata le faamoemoe o le ola i se tulaga o aiā tutusa ma le fiafiaga i le lumanai, ae ua aumaia ai foi aogā i le taimi nei i le taofia o le mala o le lē tutusa o aiā. Seʻi o tatou tilofaia pe faapefea.

[Faaopoopoga i lalo]

[Faamatalaga faaopoopo i le itulau 5]

Sa fuafua e le Atua ina ia maua e tagata uma avanoa tutusa mo le ola ma ia fiafia