Le Mala i Aso Nei o le Lē Tutusa O Aiā

“Ua matou talitonu i nei upu moni e manino e aunoa ma se tau faamatalaina e faapea, o tagata uma na foafoaina ia tutusa, ua tuuina mai ia i latou e Lē na Foafoaina i latou ni Aiā e lē mafai ona aveeseina e se isi, e aofia ai i nei aiā le Ola, le Saolotoga ma le sailia o le Fiafia.”—Faalauiloaga o le Tutoatasi, na taliaina e le Iunaite Setete i le 1776.

“O tagata uma lava na fananau mai e saoloto ma tutusa i aiā tatau.”—Faalauiloaga o Aiā Tatau a le Tagata ma le Tagatānuu, na taliaina e le Fono Faalemalo a Falani i le 1789.

“O tagata uma lava na fananau mai e saoloto ma tutusa uma i o latou tulaga mamalu ma aiā tatau.”—Faalauiloaga Aoao o Aiā Tatau a Tagata, na taliaina e le Fono Aoao a Malo Aufaatasi i le 1948.

E LEAI se masalosaloga i lena mea. Ua iai i le lalolagi aoao se faanaunauga o tagata uma i le fia maua o ni aiā tutusa. Ae o le mea e faanoanoa ai, o le taʻua pea lava pea o le manatu e faatatau i aiā tutusa o tagata e faamaonia ai e oo mai lava i le taimi nei, ua faafaigata ona maua e le fanau a tagata aiā tutusa.

Pe mafai e se tasi ona finau moni mai faapea i le taimi nei, a o tulata atu i le iuga o le lona 20 o  senituri, ua amata ona faaleleia le tulaga o mea? Po o mafai ea e tagatānuu uma o le Iunaite Setete ma Falani, po o tagata o so o se atunuu mai atunuu e 185 o Malo Aufaatasi, ona latou olioli moni i ni aiā tutusa lea e faapea na latou fananau mai ma i latou?

E ui lava o le manatu i aiā tutusa i manatu o tagata uma lava atonu e ‘manino e lē tau faamatalaina,’ peitai o aiā i le “Ola, le Saolotoga ma le sailia o le Fiafia” e matuā lē o tāitai lava tutusa mo tagata uma. Mo se faaaoaoga, o le ā se tutusa o iai i le aiā i le ola e mafai ona tatou taʻua pe afai o se tamaitiiti i Aferika e togafitia e se fomaʻi, faatasi ai ma le isi toʻa 2,569 tagata, ae o se tamaitiiti i Europa o loo togafitia o ia e se fomaʻi, faatasi ai ma le na o le toʻa 289 isi tagata? O le ā foi se tutusa o iai i aiā i le saolotoga ma le sailia o le fiafia, pe afai e tusa ma le tasi vaetolu o tama ma le lua vaetolu o teine i Initia o le a ola aʻe e lē iloa tusitusi ma faitautusi, ae toeitiiti o tamaiti uma i atunuu e pei o Iapani, Siamani, ma Peretania Tele, o loo mautinoa le mauaina o ni aʻoaʻoga lelei?

Pe tutusa le “tulaga mamalu ma aiā tatau” o le olaga e maua e tagata i atunuu o Amerika Tutotonu ia e na o le $1,380 Amerika se tupe e maua e le tagata e toatasi i le tausaga, ma i latou o loo i Falani, o loo maua le $24,990 Amerika a le tagata e toatasi i le tausaga? O le ā le aiā tutusa e maua e se pepe teine mai Aferika e 56 ni ona tausaga e faatalitalia e ola ai, pe a faatusatusa atu i se pepe teine i Amerika i Mātū e ono 79 tausaga le umi e faatalitalia e ola ai?

E tele vala o le lē tutusa o aiā, o nei vala uma e matuā lē manuia lava. O nisi o na aiā lē tutusa, e aofia ai le tulaga o le soifuaga, ma ni avanoa e maua ai ni tausiga tau le soifua maloloina ma tau aʻoaʻoga. O nisi taimi, e telē lava se aafiaga o loo faia e feteenaiga faapolotiki, feteenaiga i le va o lanu, po o feteenaiga faalotu, i le aveesea mai tagata o lo latou mamalu ma le saolotoga. E ui lava i talanoaga uma na faia e faatatau i aiā tutusa, ae o loo tatou ola pea i se lalolagi o aiā lē tutusa. I le pei o se mala—“le pogai o se puapuaga taatele pe matautia,” e pei ona faamatalaina ai le upu—o le lē tutusa o aiā ua oo atu i vaega uma o le soifuaga masani o le fanau a tagata. E matuā ogaoga tiga ua faapogaia ai, e pei o oge, faamaʻi, o tagata e lē o aʻoʻoga, o tagata e leai ni galuega, ma le faailogatagata.

“Na foafoaina tagata uma ia tutusa.” Maeu se manatu matagofie! Ae pagā se matuā tuufaafeagai ma le tulaga moni o loo iai.

[Ē Ana le Ata i le itulau 3]

UN PHOTO 152113/SHELLEY ROTNER