Taofia le Mala o le Lē Tutusa O Aiā

E lē o toe umi ona aumaia lea e Lē na Foafoaina Mea aiā tutusa lea o loo moomoo i ai tagata. A o lei oo mai lena taimi, e mafai ona tatou uia laasaga e taofia ai le mala o le lē tutusa o aiā lea e aafia ai i tatou ma o tatou aiga. E pei ona taʻua e Nelson Mandela, o lē na avea muamua ma peresitene o Aferika i Saute, “o le eseesega o le tasi tagata mai le isi, e fua i mea e mafai ona tatou faia mai mea ua tatou maua, ae lē fua i mea ua tuuina mai ia i tatou.”

UA FAAMAONIA mai e talafaasolopito le uiga o ana upu. E toatele tane ma fafine e itiiti lava ni mea na tuuina atu i ai ina ua faatoʻā fananau mai, peitai, o le faaaogaina o mea ua latou maua, ua mafai ai ona latou maua manuia na e faaesea ai i latou mai ē latou te tupulaga faatasi atonu e tele ni mea na latou maua. Ae i le isi itu, o tagata ua faamanuiaina i ni manuia e tele talu ona fananau mai, ua latou faamaumau mea na latou maua ma lē taulau ai ona latou faaaogā lelei mea e tele sa ono iai ia i latou.

 Ia Faaaogā i se Tulaga Sili Ona Lelei Mea ua ia te Oe!

E naunau tele Molimau a Ieova e fesoasoani atu i tagata ina ia latou maua le poto e uiga i fuafuaga a le Atua e ala i le suesueina o le Tusi Paia. Peitai, ua latou iloa lelei, ina ia maua aogā atoatoa mai faamatalaga a le Tusi Paia, e tatau ona iloa e tagata faitau ma tusitusi. O lea, ua aʻoaʻo ai e Molimau a Ieova le faitau fiasefulu afe o tagata ina ia faitau ma tusitusi, e aofia ai le toʻa 23,000 o tagata (i le taulotoaiga o vaitausaga mai le 1990) i se atunuu e tasi i Aferika i Sisifo. I le faasino atu i le auaunaga mataina mo le lelei lautele o loo saunia e Molimau a Ieova, na taʻua ai e le San Francisco Examiner e faapea: “Tou te ono manatu ia i latou o ni tagatānuu ua fai ma faataitaiga lelei. Latou te naunau e totogi lafoga, tausia ē mamaʻi, ma faaleleia le faitau ma le tusitusi.”

E lē gata i lea, e ala i se aʻoaʻoga auiluma mo le tautala atu i le lautele, ua toleni ai e Molimau a Ieova le faitau fiaselau afe o tagata ina ia avea ma failauga agavaa, e mafai ona latou faailoa atu i luma o tagata o latou manatu i se tulaga sologa lelei. E aofia i lenei faitauafe nisi o ē sa iai ni o latou faafitauli matuia i le tautala. Seʻi fai ma faaaoaoga se tamaloa mai Aferika i Saute o lē ua tusi mai: “Sa matuā lalamu lava laʻu tautala, ma iu ai ina avea aʻu ma sē e faalētautala, e faalagolago lava i isi tagata latou te tautatala mo aʻu. . . . Ina ua ou auai i le Aʻoga o le Faiva Faatiokarate ma tatau ona ou faia le faitau Tusi Paia i luma o se aofia toalaiti . . . , sa matuā lalamu lava laʻu tautala ma lē mafai ai ona faauma laʻu faitau tusi i le taimi faatulagaina. Ina ua uma le sauniga, na aumai e le [faiaʻoga] i se auala agalelei ni fautuaga aogā ia te au. Sa ia fautua mai e lelei pe a ou faamasani e faitau leotele ia te au lava ia. Na ou faia lena mea, i le faaaluina o se taimi i aso uma e faitau leotele ai laʻu Tusi Paia ma se mekasini o Le Olomatamata.” Na matuā lelei le agaigai i luma o lenei tamaloa, ma i le taimi nei ua ia faia ni lauga lautele i luma o ni aofia e oo atu le aofai i le faitau selau, pe faitauafe foi.

Olioli i Aiā Tutusa, Faatasi ma Uso

O aʻoaʻoga, le soifua maloloina, ma tulaga tau le tamaoaiga ma le vafealoai, e matuā eseese uma ai lava tulaga o Molimau a Ieova. O nei eseesega ua na ona atagia mai ai o tulaga lē lelei atoatoa o le lalolagi o loo latou ola ai. Peitai, i se faaeseesega ma isi vaega faalotu, ua toetoe lava aveesea uma mai ia i latou, faiga faaituʻau i le va o lanu, o le vafealoai, ma le tamaoaiga.

Ua latou faataulauina lenei itu e ala i le faia o mea e sili ona lelei i le faatinoina o mea ua latou aʻoaʻoina mai le Tusi Paia. Ua latou talia ma le loto atoa mataupu silisili o le Tusi Paia e pei o le: “E le vaai Ieova pei o le vaai o tagata, auā e vaai tagata i le tino, a e vaai Ieova i le loto.” (1 Samuelu 16:7) “E le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:34, 35) “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia ia te outou, ia outou nofo lelei ma tagata uma lava.” —Roma 12:17, 18; tagai foi i le 1 Timoteo 6:17-19; Iakopo 2:5, 9.

O le matuā utagiaina o nei mataupu silisili faale-Tusi Paia lea e uunaia ai le autasi, ua teena ai e Molimau a Ieova le iai pea i lo latou lotolotoi o so o se faatinoga o le lē tutusa o aiā e faavae aʻe i ni eseesega i le va o lanu, le vafealoai, po o le tamaoaiga. Mo se faaaoaoga, e leai se vaega e faia e nei vala i le filifilia po o ai e tatau ona tuuina atu i ai faaeaga o le auaunaga i totonu o le faapotopotoga Kerisiano. O tulaga o tiute tauave, e pei o le aʻoaʻo atu ma le vaavaaiga, ua tuuina atu e faavae patino lava i agavaa faaleagaga.—1 Timoteo 3:1-13; Tito 1:5-9.

Mo tagata taitoatasi o loo mafatia ona o aiā lē tutusa ua faatinoina i se lalolagi faimea faapito, e maeu se faafouina o o latou lagona pe a faia i latou e isi o ni uso ma ni tuafāfine, i se uiga tutusa i luma o Lē na Foafoaina i latou! E mafai e Matina ona faamaonia maia le moni o lenei mea. Ina ua alu ese lona tamā mai lo latou aiga, sa tausi aʻe ai o ia i se aiga mativa, e sona matua e toatasi. Sa masani ona faia o ia e peiseai o se tagata ua lafoaia, sa tau leai ni ona lagona mautinoa ia te ia lava, ma na faafaigata ona ia faifaimea faatasi ma isi. Sa oo ai ia te ia se uiga o le lē popole e fai lelei ni mea. Peitai, na suia le tulaga o mea, ina ua amata ona ia suesueina le Tusi Paia ma avea o se tasi o Molimau a Ieova. Ua ia faapea mai: “E tatau pea ona ou tauivi ma mafaufauga sese, peitai i le taimi nei, ua sili atu ona mafai ona ou manumalo mai le faafitauli. Ua amata ona iai oʻu lagona faaaloalo mo aʻu lava, ma ua ou tautala atu ma le matuā mautinoa. Ua aumaia e le upu moni ia te au se lagona o le maufaatuatuaina i ni tiute tauave. Ua ou iloa nei e alofa Ieova ia te au ma e iai se aogā e ola ai.”

I le avea o Molimau a Ieova o se vaega o Kerisiano faava-o-atunuu, e silia i le 230 atunuu o loo latou olioli ai i le tele o aiā tutusa o loo matuā tuese lava mai le lalolagi i aso nei. Pe mafai ea e se isi lava faalapotopotoga faalotu ona latou faia mai lena lava faamatalaga ma faamaonia mai e ni mea moni?

O le mea moni, e ioeina e Molimau a Ieova le tulaga tonu o loo latou iai. Ua latou taʻutino mai, ona o loo latou ola aʻe i se siomaga lē lelei atoatoa, ua lē mafai ai ona latou tafiesea faiga lē tutusa i aiā faaletagata, e pei foi ona taumafai isi mo le tele o senituri e faia faapea—ae lē mafai lava. Ae ui i lea, ua latou olioli talu ai, i totonu lava o lo latou lotolotoi, e tele mea ua latou faia e taofia ai lenei mala matautia. Ma o lo latou faatuatua malosi i folafolaga a le Atua, ua latou tulimataia ai se lalolagi fou amiotonu, o iina o le a aveesea ai e faavavau faiga lē tutusa i aiā tatau.

Ioe, ua lē o toe mamao ona faafoisia lea o tagata usiusitai uma ina ia tutusa i le “tulaga mamalu ma aiā tatau” lea na fuafuaina mo i latou e Lē na Foafoaina i latou mai lava i le amataga. Maeu se manatu matagofie! Ma i lena taimi, o le a avea o se mea moni lava!

[Ata i le itulau 7]

O loo taumafai Molimau a Ieova e foia le faafitauli o le lē iloa faitau ma tusitusi e ala i le aʻoaʻoina o le faitau fiasefulu afe o tagata ina ia iloa faitau ma tusitusi

[Ata i le itulau 8]

Ua fesoasoani upu moni o le Tusi Paia e liaʻieseina faiga lē tutusa i le va o lanu, le vafealoai, ma le tamaoaiga