Lipoti a Ē Faalauiloa le Malo

Ua Ō Atu i le Lautele Molimau i Falani

E AMATA mai lava i le taeao o le Aso Faraile, Ianuari 29, 1999, ma faasolo atu ai i le faaiuga o le vaiaso, na tufatufa atu ai ma le tiotio e Molimau a Ieova i Falani i magaala ma mulimuli ane i lea fale ma lea fale, kopi e 12 miliona o se sāvali na faaulutalaina People of France, You Are Being Deceived! (Tagata Falani e, ua Faaseseina Outou!) Aisea na faia ai lena tauiviga?

I se feiloaiga ma tagata faasalalau na faia i Pale i le taeao o lena Aso Faraile, na taʻua ai le mafuaaga o le tauiviga. Na faamatala atu e se uso na fai ma fofoga o Molimau e faapea: “O le mea matou te mananao e faia i le asō, o le faalauiloa atu lea o ituaiga o tagata e iai i matou ma ia taofia faamatalaga taufaaleaga o loo faasalalau solo e faatatau ia i matou. Ua matou loto malilie e talia faitioga, ae matou te lē toe faalogo atu lava i ni pepelo ma ni faamatalaga o loo faaleaga ai lo matou talaaga.”

E ui o Molimau a Ieova o le lotu Kerisiano lea e lona tolu lona tulaga toatele i Falani, ae anoanoai fanau Molimau ua faalumaina ma faia i ai faiga leaga i aʻoga. O tagata matutua ua tutuli ese mai a latou galuega ma faamataʻuina ona o la latou lotu. O le mea e ofo ai, ona e oo lava i meaalofa tauofo faalelotu latou te mauaina, ua tāpā ai se lafoga e 60 pasene. Na faapefea ona fesagaia e le tauiviga nei faiga lē tonu?

O loo faalauiloa atu e le sāvali e faapea: “O Molimau a Ieova uma e toʻa 250,000 ma a latou aumea o loo nonofo i Falani e TETEE atu i le auala lē saʻo ua faavasega faatasi ai le latou lotu Kerisiano na iai i Falani mai le 1900, ma isi lotu mavae matautia talu mai le 1995. . . . TETEE i faiga leaga faifai pea o loo faia ia i latou.” Sa faaalialia uma tuuaʻiga taufaaleaga na faia tuusaʻo i Molimau i Falani ma auala leaga o loo saili le au taufaaleaga e faatupu ai faamatalaga sese faalauaitele. Ua faaiu upu a le sāvali i le faapea mai: “I aso nei, e silia i le lua miliona Molimau a Ieova ma a latou aumea o loo nonofo i totonu o Europa. Latou te faaaloalo i tulafono a faiga malo o loo avea ai i latou ma tagatānuu e ala i lo latou lagolagoina o mea o loo faatāuaina i Evagelia. Tagata Falani e, o mea moni nei. O lo matou tiute le faailoa atu o nei mea moni!”

Se Tali Lelei, na Vave Ona Maua

E faitau miliona sāvali na tufaina atu i le aso muamua. I Pale lava ia, e oo ane i le 12:00 i le aoauli ua silia ma le 7,000 Molimau na latou tuuina atu le silia ma le 1.3 miliona sāvali i tagata. O le vaaia o le toatele naunau o Molimau o loo tufa atu sāvali i magāala e mautinoa lava o se taimi muamua lea ua vaaia ai o faia faapea e tagata. Sa talia lelei e le au faasalalau, e aofia ai nusipepa a le atunuu aoao ma nusipepa a lena lava vaipanoa faapea foi le televise, faamatalaga na faaoo atu. Na tusia e le nusipepa, Le Progrès de Lyon e faapea: “O lenei taumafaiga . . . ua aumaia ai i lumāmea se fenumiaiga sa iai e faatatau i le uiga o se upu. I tausaga e sefulu ua tuanai atu, sa faaaogā ai lava le upu ‘lotu mavae’ . . . i se faauigaina e sese, e matautia, ma leaga ai. . . . O Molimau a Ieova e leai ni o latou uiga matautia, faapea e ono malepe ai se tulaga mautū o le olaga masani.”

O tagata e masani ma Molimau a Ieova, latou te talisapaia o latou uiga filemu ma le faaaloalo loloto mo aiaiga faalevafealoai ua faavaeina. O lea, e toatele tagata i luga o magāala na faailoa mai lo latou talisapaia ma le lagolagosua i le faitau fiasefulu afe o Molimau na auai i le tauiviga. E lei umi lava, ae mauaina le tele o telefoni, o feau mai telefoni, ma tusi mai tagata e faailoa mai ai a latou faafetai mo le sāvali. Ae o le sili o na mea uma, na maua ai e tagata naunau faamaoni le avanoa e faalogo ai i mea moni e uiga i Molimau, e tetee atu ai i faamatalaga sese ma le lē mafaufau, ma o i latou na faaleagaina o latou talitonuga, na mafai ona faailoa atu o latou lagona i mea o loo latou faapelepele i ai.