Filosofia Faa-Eleni—Pe na Faaleleia ai ea le Faa-Kerisiano?

“E ui ina tetee le Faa-Kerisiano i agaifanua faapaupau a Eleni ma Roma, ae o le mea mautinoa e tele ni filosofia a na atunuu o loo ia faaaogaina.”—The Encyclopedia Americana.

O SE tasi o ē na iai ni a latou taaʻiga maumauai i manatu “faa-Kerisiano,” o “Sagato” Aokusitino, o lē o loo umia se tulaga mautū. E tusa ai o se faamatalaga a le New Encyclopædia Britannica, “o mafaufauga o Aokusitino na māfua ai ona matuā fenumiai faatasi le lotu o le Feagaiga Fou ma tū masani faa-Palato o filosofia faa-Eleni; ma o lona mafaufau foi sa avea ma auala na faasosolo atu ai āuga o lenei fenumiaiga i lotu a Kerisinetoma o le Katoliko Roma anamua ma le faa-Porotesano i senituri ua mavae.”

E mautinoa ua matuā umi lava ona olaola pea taaʻiga na tuua e Aokusitino. I le taʻuaina o le tele na taaʻina ai Kerisinetoma e filosofia faa-Eleni, na faapea mai Douglas T. Holden: “Ua oo ina matuā tuufaatasia aʻoaʻoga faalotu a Kerisiano ma filosofia faa-Eleni, ma ua oo ina tutupu aʻe ai ni tagata o ē ua tuufaatasia i o latou mafaufau le 90 pasene o mafaufauga faa-Eleni ma se 10 pasene o mafaufauga faa-Kerisiano.”

 O nisi tagata atamamai faapitoa ua talitonu faapea o na taaʻiga faafilosofia na faaleleia ai le Faa-Kerisiano mai lava i lona amatamataga, na matuā faamalosia ai ana aʻoaʻoga, ma ua atili ai ona faigofie ona talitonuina. Po o le tulaga ea lenei na iai? Na faapefea ma o anafea na amata ai taaʻiga a filosofia faa-Eleni? Pe na faaleleia ai ea pe na faaleagaina ai le Faa-Kerisiano?

E maua se malamalamaga pe a saili atu i ni mea na tutupu mai le senituri lona tolu T.L.M. e oo mai i le lona lima senituri T.A. e ala i le iloiloina o ni taʻu mataina se fa: (1) “Le Faa-Iutaia ua Fefiloi ma le Faa-Eleni,” (2) “Le Faa-Eleni ua Fefiloi ma le Faa-Kerisiano,” (3) “Le Faa-Kerisiano ua Fefiloi ma le Faa-Eleni,” ma le (4) “filosofia faa-Kerisiano.”

“Le Faa-Iutaia ua Fefiloi ma le Faa-Eleni”

O le uluai “Faa-Iutaia ua Fefiloi ma le Faa-Eleni,” o se mea e matuā lē talafeagai lava. O le uluai lotu a le au sa Eperū, lea na faavaeina e le Atua moni, o Ieova, sa lē tatau ona pisipisia i manatu faalotu sese. (Teuteronome 12:32; Faataoto 30:5, 6) Peitai, mai lava i le amataga, na ono faaleagaina le tulaga mamā o le tapuaiga ona o mea leaga na faapogaia e gaoioiga ma mafaufauga faalotu sese na sa siomia ai—e pei o le aafiaga mai tagata Aikupito, o tagata Kanana, ma tagata Papelonia. E faanoanoa e faapea atu, sa faataga e Isaraelu lana tapuaiga mamā e matuā faaleagaina ai.—Faamasino 2:11-13.

I senituri mulimuli ane, ina ua avea Palesitina anamua ma vaega o le Emepaea a Eleni i le taʻitaʻiga a Alesana le Sili i le senituri lona fa T.L.M., na oo atu ai lenei faaleagaina i se tulaga ua matuā matautia lona leaga, ma tuua ai se taaʻiga leaga ma tumau. Na avatu e Alesana tagata Iutaia e faaatoa ai lana vaegaau. O fesootaiga i le va o tagata Iutaia ma lo latou taʻitaʻiʻau fou sa matuā taaʻina ai lava mafaufauga faalotu o tagata Iutaia. O aʻoaʻoga faa-Iutaia na faaofi uma atu i ai mafaufauga faa-Eleni. Ua faapea mai le tala, sa faavaeina se aʻoga faa-Eleni i Ierusalema i le 175 T.L.M. e le Ositaulaga Sili o Iasona, ina ia faaauilumaina ai suesuega a le tusitala taʻutaʻua o Homer.

O le mea malie, sa iai se tagata Samaria sa faia ni ana tusitusiga i le ʻafa lona lua o le senituri lona lua T.L.M., na ia taumafai e faamatalaina le talafaasolopito lea o loo maua i le Tusi Paia e peiseai o se talafaasolopito faa-Eleni. O tusi faaapokalifa a Iutaia, e pei o le Iutita ma le Topita, o loo tau agaigai atu i tala fatu tau faatosinaga faaleituaiga a Eleni. Sa aliai mai ni faifilosofia Iutaia o ē na taumafai e aumai mafaufauga faa-Eleni e tuufaatasi ma le lotu Iutaia ma le Tusi Paia.

O le tagata na sili ona viiviia i nei mea o Filo, o se tagata Iutaia o le uluai senituri T.A. Sa ia faaaogā e aunoa ma sana aiā tatau, aʻoaʻoga a Palato (o le senituri lona fa T.L.M.), o aʻoaʻoga a ē na mulimuli atu ia Pythagoras, ma aʻoaʻoga a le au Setoiko. E telē lava se taaʻiga ai o tagata Iutaia i manatu o Filo. I se aotelega o lenei faaofiina o mafaufauga atamai faa-Eleni i agaifanua faa-Iutaia, ua faapea mai ai se tusitala Iutaia, o Max Dimont: “Talu ai ua matuā faatumulia o latou ulu i mafaufauga a Palato, o le poto a Aristotle, ma le malamalamaga faasaienisi a Euclid, na iu ai ina faaaogā e tagata atamamai Iutaia le Tora e ala i ni auala fou. . . . Sa amata ona latou faaopoopo atu mafaufauga faa-Eleni i tusitusiga faa-Iutaia.”

Mulimuli ane, ona pulea lea e tagata Roma le Emepaea a Eleni, ma pulea atu ai ma Ierusalema. O iina na avea ma amataga o nisi suiga e sili atu ona mataina. E oo ane i le senituri lona tolu T.A., ua matuā mausalī aʻoaʻoga faafilosofia ma aʻoaʻoga faalotu a le au faitofā o ē na taumafai e fafau aʻe ma tuufaatasia manatu o Palato, ma o loo iloaina lena tuufaatasiga i aso nei i le taʻu o Filosofia Fou Faa-Palato (Neoplatonism). O lenei tuufaatasiga o mafaufauga na iai sona taaʻiga tele i le Faa-Kerisiano aposetate.

“Le Faa-Eleni ua Fefiloi ma le Faa-Kerisiano”

A o faagasolo uluai senituri e lima o o tatou aso taatele, sa iai ni tagata atamamai na latou taumafai e faatino se faiā i le va o filosofia faa-Eleni  ma le upu moni o loo faaalia mai i le Tusi Paia. Ua taʻu mai e le tusi A History of Christianity e faapea: “O Kerisiano o ē na aʻoaʻoina filosofia o tulaga faavae faalenatura, sa latou faamatalaina tagata Eleni i tuā i le faitau sefulu o tausaga a o lei oo i taimi o Keriso faapea, sa latou maumauai e tauivi ma le lē tapasā i le fia maua o le poto e uiga i le Atua, o lona uiga, sa taumafai e faaāta mai Iesu i o latou mafaufauga lē faavaea, ma faavae aʻe le Faa-Kerisiano i o latou mafaufauga lē aogā.”

O Plotinus (205-270 T.A.), o lē na amata maia na ituaiga o tagata fai mafaufauga, sa ia faavaeina se faiga na faavae autū aʻe i manatu o Palato. Na faalauiloa mai e Plotinus le talitonuga i se solu e mafai ona nofo ese mai le tino. Na taʻua e le polofesa o E. W. Hopkins se faamatalaga e faatatau ia Plotinus e faapea: “O ana suesuega i mataupu faalotu . . . na iai so latou taaʻiga i taʻitaʻi o mafaufauga faa-Kerisiano.”

“Le Faa-Kerisiano ua Fefiloi ma le Faa-Eleni” ma le “Filosofia Faa-Kerisiano”

I le amata mai i le senituri lona lua T.A., na faia ai e le au “Kerisiano” fai mafaufauga se taumafaiga maumauai e faatosina mai tagata atamamai faapaupau. E ui sa manino le lapataiga a le aposetolo o Paulo ina ia teena “upu lē aoga ua faaleagaina ai le mea ua paia” ma “finauga i mea ua taʻua o le ‘poto’ e lē aogā,” ae sa faaofi atu pea e na aʻoaʻo i a latou aʻoaʻoga, filosofia mai agaifanua a Eleni sa siomia ai i latou. (1 Timoteo 6:20, NW) O le faaaoaoga a Filo na foliga e taʻu atu ai faapea, e ono mafai ona ogatusa le Tusi Paia ma manatu o Palato.—Faatusatusa i le 2 Peteru 1:16.

Ae o le mea tonu lava lea ua sili ona faaleagaina, o upu moni a le Tusi Paia. Na taumafai le au aʻoaʻo “Kerisiano” e faaali mai faapea sa ogatasi le Faa-Kerisiano ma uiga o tagata e tusa ma le faa-Eleni ma le faa-Roma. Na faatuina e Clement o Alesania ma Origen (lona lua ma lona tolu senituri T.A.) Filosofia Fou Faa-Palato e fai ma faavae o le mea na taʻua o le “filosofia faa-Kerisiano.” Sa matuā talitonu Ameperosa (339-397 T.A.), o se epikopo o Milan, i aʻoaʻoga faa-Eleni sa sili ona fou, o aʻoaʻoga e faa-Kerisiano toe faapaupau—ae maise aʻoaʻoga na faavaeina . . . e le tagata faapaupau o Plotinus o lē sa ia lagolagoina Filosofia Fou Faa-Palato.” Sa ia taumafai e aʻoaʻo atu i tagata popoto o Roma se vaega o le Faa-Kerisiano lea e fesootai atu i aʻoaʻoga atamai a Eleni ma Roma anamua. Na mulimuli atu foi i ai ma Aokusitino i lena lava faaaoaoga.

I le senituri mulimuli ane, na taumafai ai Taionusio le Areopako (sa taʻua foi o le fia-Taionusio), atonu foi o ia o se monike Suria, e tuufaatasia Filosofia Fou Faa-Palato, ma aʻoaʻoga faalotu a “Kerisiano.” Fai mai le faamatalaga a se tasi lomifefiloi, o ana “tusitusiga na faavaeina ai se filosofia fou maʻoti faa-Palato i se vaega tele o aʻoaʻoga faa-Kerisiano i senituri ua mavae, ma le tulaga faaleagaga . . . lea ua faamautuina ai vala eseese o aʻoaʻoga faa-Kerisiano ma le tulaga tuutoina atu e oo mai lava i le taimi nei.” Pagā se tetee ma le loto i ai i le lapataiga a le aposetolo o Paulo e faatatau i “le poto le aoga e faasese ai, e tusa ma le uputuu a tagata”!—Kolose 2:8.

Mea e Faaleagaina Ai

Ua matauina faapea, “na tuuina atu e Kerisiano o ē ua filogia o latou mafaufau i le faa-Palato, le faamuamua i valovaloga ma ua latou faatāuaina filosofia a Palato faapea o le meafaigaluega sili ona lelei lea ua maua mo le faamalamalamaina ma le puipuia o aʻoaʻoga a le Tusi Paia ma tū masani a le lotu.”

Sa talitonu Palato lava ia i le manatu faapea e iai se solu e lē mafai ona oti. Ua iloga mai, o se tasi o aʻoaʻoga sese ua sili ona taualoa na sosolo ane i aʻoaʻoga a lotu “Kerisiano” o le aʻoaʻoga lea i le lē mafai ona oti o le solu. O le taliaina o lenei aʻoaʻoga e matuā lē mafai lava ona taʻutonuina i ni faavae faapea, o le faia o lea mea o le a logoleleia atili ai le Faa-Kerisiano i le toatele o tagata. A o talaʻi atu le aposetolo o Paulo i Atenai, le nofoaga autū o agaifanua a Eleni, sa ia lei aʻoaʻo atu ai le aʻoaʻoga faa-Palato e faatatau i le solu. Na i lo lea, sa ia talaʻia le aʻoaʻoga faa-Kerisiano o le toetu, e ui lava sa faigata i le toatele o lana au faalogologo Eleni ona latou talia mea na ia fai atu ai.—Galuega 17:22-32.

I le ese mai filosofia Eleni, ua faaalia manino i le Tusi Paia faapea o le solu e lē o se mea e iai i le tagata ae o le tagata lava ia. (Kenese 2:7) Pe a oo mai le oti, ona lē toe ola foi lea o le solu.  (Esekielu 18:4) Ua taʻu mai e le Failauga 9:5 ia i tatou e faapea: “O e ua ola, ua latou iloa e oti i latou; a o e ua oti, latou te le iloa se mea; ua leai foi se toe totogi ia te i latou; auā ua faagalogaloina i latou.” O le aʻoaʻoga i le lē mafai ona oti o le solu e lē o aʻoaʻoina i le Tusi Paia.

O le isi aʻoaʻoga taufaasese sa faasino atu i le tulaga sa iai Iesu a o lei avea ma tagata, le manatu faapea sa tutusa o ia ma lona Tamā. Ua faamatala mai e le tusi The Church of the First Three Centuries: “O le aʻoaʻoga o le Tasitolu . . . sa iai sona amataga mai se puna e matuā ese lava mai le puna o Tusitusiga Iutaia ma Tusitusiga Kerisiano.” O le ā lena puna? O le aʻoaʻoga “sa tupu aʻe, ma sa faapipii atu i le Faa-Kerisiano, e ala i taumafaiga a Faatamā o aʻoaʻoga faa-Palato.”

O le mea moni lava, a o faagasolo atu taimi, ma amata ona matuā taaʻina Faatamā o le Lotu i Filosofia Fou Faa-Palato, ma atili faatoateleina ai i latou na lagolagoina le Tasitolu. O filosofia fou Faa-Palato i le senituri lona tolu na foliga mai na mafai ai ona latou tuufaatasia se mea sa muai lē mafai ona tuufaatasia—ia faia se Atua e tolu ona tino ma faafoliga mai e peiseai o se Atua e tasi. E ala i mafaufauga faafilosofia na latou faapea mai e mafai e peresona e tolu ona avea ma se Atua e toatasi a o maumaututū pea lo latou tulaga taitoatasi!

Ae peitai, o loo faaalia manino mai e le upu moni o le Tusi Paia e faapea, o Ieova ua na o ia lava le Atua e Ona le Malosi Uma Lava, o Iesu Keriso o lona Alo na ia foafoaina ma e maualalo ifo ia te Ia, ma o le agaga paia, o Lona malosi galue lea. (Teuteronome 6:4; Isaia 45:5; Galuega 2:4; Kolose 1:15; Faaaliga 3:14) O le aʻoaʻoga o le Tasitolu ua avea o se lē faaaloalo i le Atua moni e toatasi, ma ua ia faafenumiaia mafaufau o tagata, ma faaliliu ese i latou mai se Atua e lē o mafai ona latou malamalama i ai.

O se tasi o mea ua aafia i taaʻiga a Filosofia Fou Faa-Palato o mafaufauga ia faa-Kerisiano e tusa ai o le faamoemoe faale-Tusi Paia mo le meleniuma. (Faaaliga 20:4-6) Sa mataulia le taʻusalaina e Origen o ē na lagolagoina le faamoemoe o le meleniuma. Aisea na ia tetee tele ai i lenei aʻoaʻoga sa faavae lelei aʻe i le Tusi Paia e faatatau i le pulega a Keriso mo le afe tausaga? Ua tali mai le Catholic Encyclopedia: “Pe a fua atu i Filosofia Fou Faa-Palato lea e faavae aʻe ai ana aʻoaʻoga . . . , sa lē mafai e [Origen] ona ʻau atu i ē o loo lagolagoina le faamoemoe i le meleniuma.”

Le Upu Moni

E aunoa ma se tasi o na aʻoaʻoga na muai taʻua e fesootai mai i le upu moni. O le upu moni o le tuufaatasiga atoa o aʻoaʻoga faa-Kerisiano e pei ona maua ai i le Tusi Paia. (2 Korinito 4:2; Tito 1:1, 14; 2 Ioane 1-4) O le Tusi Paia e na o le pau lava lea o le puna e tasi o le upu moni.—Ioane 17:17; 2 Timoteo 3:16.

Peitai ane, o le fili o Ieova, le fili o le upu moni, le fili o tagata, ma le fili o le ola e faavavau—o Satani le Tiapolo lea, o le “fasioti tagata” ma o le “tamā o le pepelo”—ua ia faaaogaina auala eseese taufaaʻoleʻole e faaleagaina ai lena upu moni. (Ioane 8:44; faatusatusa i le 2 Korinito 11:3.) O se tasi o auupega sili ona malosi ua ia faaaogā o aʻoaʻoga ia a le au faifilosofia faapaupau Eleni—o le mea moni o se faaataga mai o ona lava mafaufauga—i se taumafaiga ina ia suia le autū ma le uiga moni o aʻoaʻoga Kerisiano.

O lenei palu faatasia e lē masani ai o le aʻoaʻoga faa-Kerisiano ma filosofia faa-Eleni o se taumafaiga ina ia faavaivaia upu moni o le Tusi Paia, ia faaitiitia lona malosi ma lona moomia e tagata agamalu, faamaoni, ma o ē o loo saili ina ia aʻoaʻoina le upu moni. (1 Korinito 3:1, 2, 19, 20) Ua mātele foi i le taumafai e faaleaga le tulaga lē ponā o aʻoaʻoga mamā a le Tusi Paia, ma lē mafai ai ona manino mai le eseesega o le upu moni ma mea sese.

I aso nei, e ala i le taʻitaʻiga a le Ulu o le faapotopotoga, o Iesu Keriso, ua toe faafoisia mai ai aʻoaʻoga moni faa-Kerisiano. E lē gata i lea, ua matuā faigofie i ē o loo saili ma le faamaoni i le upu moni ona latou mataulia le faapotopotoga Kerisiano moni e ala i mea o loo latou fuaina mai. (Mataio 7:16, 20) O loo loto malilie ma naunautai Molimau a Ieova e fesoasoani ia i latou na ina ia latou maua vai manino e lē suia o le upu moni ma fesoasoani atu ia i latou e uu mau i le tofi o le ola e faavavau ua ofoina mai e lo tatou Tamā, o Ieova.—Ioane 4:14; 1 Timoteo 6:19.

[Ata i le itulau 11]

Aokusitino

[Ē Ana le Ata i le itulau 10]

Tusitusiga faa-Eleni: From the book Ancient Greek Writers: Plato’s Phaedo, 1957, Ioannis N. Zacharopoulos, Athens; Palato: Musei Capitolini, Roma