Ia Ola Faatuatua i Folafolaga a le Atua

“O aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia.”—ISAIA 46:9, 10.

1, 2. O ā nisi o taofi eseese e uiga i le vaegafai a le Atua i mataupufai a le lalolagi?

O LE ā le tele o se vaegafai a le Atua i mataupufai a le lalolagi? E eseese lava taofi. O se tasi taofi e faapea, e matuā lē o aafia lava o ia i se mea. Fai mai, ina ua uma ona foafoaina e le Atua tagata, ua lē o toe naunau mai loa pe toe mafai foi ona faia se gaoioiga lelei mo i tatou. E tusa o lenei taofi, ua pei ai le Atua o se tamā o lē na te faatietie lona atalii i luga o se uila vilivae fou, faatulaga lelei, ona tulei lea ina ia amata alu atu ai loa lona atalii i le aualatele. Ina ua uma, ona savali ese loa lea o le tamā. Ua tietie atu na o le tamaitiiti; atonu e paʻū, pe lē paʻū foi. Po o le ā lava le mea e tupu, ae ua lē toe āno i ai le tamā.

² O se isi taofi e faapea o loo faatonutonuina moni e le Atua vala taitasi o o tatou olaga ma ua aafia tuusaʻo o ia i mea uma o loo tutupu i ana foafoaga. Peitai, afai e saʻo lenei taofi, e ono manatu la nisi faapea o le Atua na te faapogaia e lē gata o mea lelei e tutupu ae faapea foi i soligatulafono ma mala matautia o loo aafia ai tagata. O le iloaina o le mea moni e uiga i feutagaiga a le Atua o le a fesoasoani lena ia i tatou e iloa ai po o ā mea e tatau ona faatalitalia mai ia te ia. O le a faamalosia ai foi lo tatou faatuatua i faataunuuga mautinoa o ana folafolaga.—Eperu 11:1.

3. (a) Tatou te iloa faapefea o Ieova, o le Atua e fai fuafuaga? (e) Aisea ua taʻua ai faapea o loo “saunia,” pe faatulaga, e Ieova lana fuafuaga?

³ O loo faaautū i le mataupu o le aafia o le Atua i mataupufai a tagata le mea moni faapea, o Ieova, o le Atua e fai fuafuaga. E matuā manino lena manatu i lona lava suafa. O “Ieova” o lona uiga “O Ia Lava ua Māfua ai Ona Iai.” E ala i ana gaoioiga faasolosolo ua faapogaia ai e Ieova o ia lava ina ia avea ma Lē Faataunuuina ana folafolaga uma. O lea la, ua taʻua ai faapea o loo ‘saunia,’ po o loo faatulagaina e Ieova ana fuafuaga e tusa ai o mea po o gaoioiga o le a tutupu i le lumanai. (2 Tupu 19:25; Isaia 46:11) O nei faaupuga e mai le upu Eperu ya·tsarʹ, lea e fesootai i le upu o loo faauiga i le “fai ipu omea.” (Ieremia 18:4) E pei lava ona mafai e se fai ipu omea poto ona faaaogā se palugā ele ia avea o se ipu tuuteu matagofie, e faapena foi ona mafai e Ieova ona ia faaaogā, pe faagaoioia mea ina ia faataunuu ai lona finagalo.—Efeso 1:11.

4. Na faapefea ona sauniunia e le Atua le lalolagi ina ia nonofo ai tagata?

⁴ Mo se faaaoaoga, na fuafuaina e le Atua le lalolagi ina ia avea ma nofoaga matuā matagofie e nonofo ai tagata lelei atoatoa, ma usiusitai. (Isaia 45:18) A o lei tāitai ona ia foafoaina le uluai tamaloa ma le uluai fafine, sa faia ai e Ieova ni sauniuniga alofa mo i laua. O mataupu amata o le tusi o Kenese o loo faamatala ai pe na faapefea ona faatulaga e Ieova le ao ma le po, le laueleele ma le sami. Ona sosoo lea ma lona foafoaina o laau ma manu. O lenei sauniuniga o le lalolagi mo le aināina e tagata sa alu ai le faitauafe o tausaga. Na faamaeʻaina ma le manuia le galuega. Na amata e le uluai tamaloa ma le uluai fafine lo la olaga i Etena, o se parataiso manaia sa iai mea uma ina ia mafai ai ona la ola fiafia. (Kenese 1:31) Sa aafia tuusaʻo la Ieova i  mataupufai a le lalolagi, i lona faasolosolo ona faatinoina o ana galuega e tusa ai ma lana fuafuaga tāua. Pe na avea ea le faatoateleina o le aiga faaletagata ma itu na suia ai lana fuafuaga?

E Faatapulaa e Ieova Ana Feutagaiga ma Tagata

5, 6. Aisea e faatapulaa ai e le Atua ana feutagaiga ma tagata?

⁵ E ui e ia te ia le mana e faia ai faapea, ae lē o faatonutonuina ma pulea e Ieova auiliiliga uma o gaoioiga a tagata. E iai mafuaaga mo lenei mea. O se tasi o mafuaaga talu ai na foafoaina tagata i le faatusa o le Atua, ua iai le filifiliga saoloto, ua avea o ē saoloto i a latou meafai uma. E lē faamalosia i tatou e Ieova e faia mea o ia faafinagaloina; e lē o i tatou foi o nisi e gaoioi e faatino na o mea lava ua uma ona faapolokalame i tatou e fai. (Teuteronome 30:19, 20; Iosua 24:15) E ui e na te faamasinoina i tatou e tusa o a tatou gaoioiga, ae ua faataga mai ma le alofa e le Atua mo i tatou se saolotoga tele ina ia tatou filifili ai pe faapefea ona puleaina o tatou olaga.—Roma 14:12; Eperu 4:13.

⁶ O se tasi mafuaaga e lē faatonutonuina ai e le Atua mea uma o loo tutupu e fesootai atu lea i le luʻi na lāgā e Satani i Etena. Na luʻia e Satani le pule silisili ese a le Atua. Na ia ofoina atu ia Eva se mea e foliga o se avanoa e tutoatasi ai—o se ofo na talia e ia ma faapea foi mulimuli ane talia e lana tane o Atamu. (Kenese 3:1-6) I le tali atu i ai, na faataga ai e le Atua tagata ina ia latou pulea i latou lava mo se vaitaimi ina ia faamaonia ai pe moni le luʻi a Satani. Ona o lenei mafuaaga, ua lē mafai ai ona tuuaia le Atua ona o mea sese o loo faia e tagata i aso nei. Na tusi Mose e faatatau i tagata fouvale: “Ua leaga i latou, e le o lana fanau [fanau a le Atua], a o lo latou ila.”—Teuteronome 32:5.

7. O le ā le fuafuaga a Ieova mo le lalolagi ma le fanau a tagata?

⁷ Peitai ane, a o faataga e Ieova le faia o filifiliga saoloto ma faatinoina pulega tutoatasi, ae na te lē tuulafoaia ai e aunoa ma le faalaa mai i mataupufai a le lalolagi, lea semanū o le a itiiti ai lava so tatou faamoemoe faapea o le a ia faataunuuina ana folafolaga. E ui sa fouvale Atamu ma Eva i le pule silisili ese a le Atua, ae sa lei suia ai e Ieova lana fuafuaga alofa mo le lalolagi ma le fanau a tagata. E mautinoa o le a ia faaliliuina le lalolagi e avea ma parataiso e aināina e tagata e lelei atoatoa, e usiusitai, ma fiafia. (Luka 23:42, 43) O faamaumauga a le Tusi Paia mai le Kenese e oo i le Faaaliga o loo faamatala ai le auala ua faasolosolo ona galueaiina ai e Ieova lena faamoemoe.

Ua Gaoioi le Atua e Faataunuu Lona Finagalo

8. O le ā na aofia ai i le aumaia o le fanauga a Isaraelu i le Nuu Folafolaina?

⁸ I feutagaiga a le Atua ma le nuu o Isaraelu na ia faataitaia ai e faapea, o le a ia faataunuuina lana fuafuaga. Mo se faaaoaoga, na faamautinoa mai e Ieova ia Mose e faapea, o le a Ia laveaiina le fanauga a Isaraelu mai Aikupito ma avatuina i latou i le Nuu Folafolaina, le nuu o loo tafe ai le suāsusu ma le meli. (Esoto 3:8) O se faalauiloaga uigaese ma le faamafanafanaloto lenei. O le a aofia ai le faasaolotoina mai o na tagata Isaraelu—o lo latou faitau aofai faatasi ma a latou aumea pe tusa ma le tolu miliona—mai se nuu malosi sa sili ona tetee i lo latou ō ese. (Esoto 3:19) O le laueleele foi lea o le a avatu i ai i latou o loo nofoia e ni malo malolosi o le a latou matuā teena mai lava lo latou taunuu atu. (Teuteronome 7:1) Ae i le va o na nuu tetee sa iai le vao na manaomia ai e le fanauga a Isaraelu ni meaʻai ma vai. O lenei tulaga na mafai ai ona faaalia le mana silisili ma le tulaga tauatua o Ieova.—Levitiko 25:38.

9, 10. (a) Aisea na mafai ai e Iosua ona molimau i le maufaatuatuaina o folafolaga a le Atua? (e) O le ā le tāua o lo tatou mautinoa i le tomai o le Atua e tauia ai ana auauna faamaoni?

⁹ Na taʻitaʻi ese e le Atua le fanauga a Isaraelu mai Aikupito e ala i se faasologa o ni gaoioiga mamana. Muamua, na ia aumaia mala matautia e sefulu i le nuu o Aikupito. Na sosoo ai ma lona vaeluaina o le Sami Ulaula, ma mafai ai e le fanauga a Isaraelu ona sosola ese atu a o faaumatia le autau a Aikupito lea na tuliloa maia i latou. (Salamo 78:12, 13, 43-51) Ina ua  mavae lena, ona ia tausia lea o le fanauga a Isaraelu mo tausaga e 40 o la latou savaliga i le vao, i le fafagaina o i latou i le manai, saunia vai mo i latou, ma sa ia faamautinoa foi o le a lē pala o latou ofu, ma ia lē fulafula o latou vae. (Teuteronome 8:3, 4) Ina ua ulu atu le fanauga a Isaraelu i le Nuu Folafolaina, ona taʻitaʻia lea e Ieova i latou e manumalo i o latou fili. O Iosua, o lē na ia faaalia se faatuatua malosi i folafolaga a Ieova, sa vaaitino lava o ia i nei mea uma. O lea, sa mafai ai ona ia faapea atu ma le mautinoa i toeaina o ona aso: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou.”—Iosua 23:14.

¹⁰ I le pei o Iosua o aso anamua, ua faapea foi i Kerisiano i aso nei ona latou mautinoa atoatoa o loo finagalo le Atua ma e mafai ona ia gaoioi mo i latou o ē auauna ia te ia. O lenei talitonuga mautinoa o se vaega tāua o lo tatou faatuatua. Na tusi mai le aposetolo o Paulo: “A leai foi se faatuatua e le mafai ona fiafia mai o ia; auā e tatau i lē alu atu i le Atua ona talitonu . . . o ia foi na te tauia mai o e matuā saili ia te ia.”—Eperu 11:6.

E Muai Silafia e le Atua le Lumanai

11. O ā vala ua mafai ai e le Atua ona faataunuu ana folafolaga?

¹¹ E oo mai i le taimi nei, ua tatou vaaia e ui ina faatagaina e le Atua filifiliga saoloto ma pulega tutoatasi a tagata, ae ua ia te ia pea le pule ma le finagalo malie e gaoioi ai e faataunuu lana fuafuaga. Peitai, e iai se isi vala e māfua ai ona mautinoa le faataunuuina o folafolaga a le Atua. E mafai e Ieova ona muai silafia le lumanai. (Isaia 42:9) Na fetalai le Atua e ala mai i lana perofeta: “Ia outou manatunatu i mea muamua talu mai le vavau; auā o aʻu o le Atua, e leai lava se tasi; o le Atua, e leai se ma te tutusa; o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu laʻu pule, ou te faia foi mea uma ou te loto i ai.” (Isaia 46:9, 10) E iloa e se faifaatoaga ua iai le poto masani le taimi ma le nofoaga e totō ai se fatu, ae atonu o le a iai pea sina lē mautinoa pe o le a faapeī le tulaga o mea. Peitai, ua iai i “le Tupu o le vavau” le atamai atoatoa na te muai silafia lelei ai le taimi ma le nofoaga e tatau ona ia gaoioi ina ia faataunuu ai lana fuafuaga.—1 Timoteo 1:17.

12. I le ā le itu na faaalia ai e Ieova lona muai silafia o mea i aso o Noa?

¹² Seʻi manatu i le auala na faaalia ai e le Atua lona muai silafia o mea i aso o Noa. Ona o le taatele o le leaga lea na faatumulia ai le lalolagi, na maumauai ai le Atua e aumaia le iuga i tagata lē usiusitai. Na ia faatulaga se taimi o le a ia faia ai lenei mea, a o lumanai le 120 tausaga. (Kenese 6:3) I le faatulagaina o lena vaitaimi patino, na manatunatu ai Ieova i se mea e sili atu na i lo le faaumatiaga o ē amioleaga, o se mea e mafai lava ona ia faia i so o se taimi. O le taimi faatulagaina a Ieova na saunia ai foi se faasaoina mo ē amiotonu. (Faatusatusa i le Kenese 5:29.) Ona o lona atamai, na muai silafia ai e le Atua le taimi e tofia ai le galuega lea o le a taʻitaʻia atu i lena fuafuaga. Sa ia tuuina atu ni faamatalaga auiliili lava saunia ia Noa. Sa tatau ia Noa ona ia fau se vaa ina ia ‘faasaoina ai lona auaiga,’ ma o le a faaumatia ē amioleaga i se lolo tele.—Eperu 11:7; Kenese 6:13, 14, 18, 19.

Se Galuega Tau Fausaga e Matuā Telē

13, 14. Aisea na avea ai o se luʻi le tofiga o le fauina o le vaa?

¹³ Seʻi vaai i lenei tofiga e tusa ai o le manatu o Noa. Talu ai o Noa o se tagata e faatuatua i le Atua, sa ia iloa e mafai e Ieova ona faaumatia tagata faalēmataʻu. Peitai, a o lei tupu lena mea, sa iai se galuega na tatau ona fai—se galuega e manaomia ai le faatuatua. O le fauina o le vaa o le a avea o se galuega matuā telē. Sa faamaʻoti atu e le Atua ona fua eseese. O le a umī atu le vaa na i lo ni malae taalo faaonaponei, ma e maualuga e pei o se fale fogafalelima. (Kenese 6:15) O ē fauina e leai so latou tomai ma e toalaiti foi. O le a leai ni a latou meafaigaluega lelei e pei ona maua i aso nei. E lē gata i lea, talu ai sa lei ia Noa le tomai lea na ia Ieova e muai silafia ai mea i le lumanai, o lona uiga, sa ia matuā lē iloa la po o ā tulaga o le a aliae mai i le faagasologa o tausaga, atonu pe fesoasoani i le galuega,  pe fai foi ma faalavelave i le galuega. E mautinoa e tele ni fesili sa mafaufau loloto i ai Noa. O le a faapefea ona faaputuputu mai laau e fau ai le vaa? O le a faapefea ona ia aoaoina mai manu? O ā meaʻai o le a manaomia ae o le ā foi le tele? O afea tonu le taimi, o le a oo mai ai le Lolo lea na valoia?

¹⁴ Ae sa iai foi ma tulaga masani o le soifuaga. Sa faateleina le amioleaga. Sa iai le au Nefilimi malolosi—o fanau itulua a agelu amioleaga ma fafine—sa faatumulia ai le lalolagi i faiga sauā. (Kenese 6:1-4, 13) E lē gata i lea, o le fauina o le vaa e lē o se galuega e mafai ona faia faalilolilo. O le a tuu fesilisili tagata po o le ā le mea o loo faia e Noa, ma o le a ia taʻu atu foi ia i latou. (2 Peteru 2:5) Faamata o le a latou fiafia mai? Ailoga! I ni tausaga muamua atu, na folafola atu ai e le tagata faatuatua o Enoka le faaumatiaga o ē amioleaga. Sa matuā lē taliaina lava lana feau o lea na “avea” ai o ia e le Atua, pe faapuupuuina lona soifua, e foliga mai ina ia puipuia ai o ia mai le fasiotia e Ona fili. (Kenese 5:24; Eperu 11:5; Iuta 14, 15) E lē gata la sa tatau ia Noa ona folafola atu se feau e faapena ona lē fiafia i ai tagata, ae sa tatau foi ona ia fauina se vaa. A o fauina lena vaa, sa avea o se faamanatuga malosi o le faatuatua o Noa a o fesagai ma tagata amioleaga sa latou ola faatasi i na taimi!

15. Aisea na mautinoa ai e Noa e mafai ona ia faataunuuina lona tofiga?

¹⁵ Sa iloa e Noa le iai o le lagolagosua ma le faamanuia a le Atua e Ona le Malosi Uma Lava  i le galuega. Pe lē o Ieova lava ia na tofia maia le galuega? Na faamautinoa mai e Ieova ia Noa faapea, o le a ulu atu o ia ma lona aiga i totonu o se vaa ua fauina, ma faasaoolaina ai i latou i le Lolo i le lalolagi aoao. Na faamamafa atili mai e le Atua le mautinoa o lena folafolaga e ala i se feagaiga mamalu. (Kenese 6:18, 19) E foliga na iloa lelei e Noa, e lē gata sa faatalitalia, ae na iloiloina foi e Ieova mea uma sa aofia ai a o lei faaoo mai le tofiga. E lē gata i lea, na iloa e Noa sa iai ia Ieova le mana e faalaa ane ai ma fesoasoani ia te ia i taimi na te manaomia ai se fesoasoani. O le faatuatua la o Noa na uunaia ai o ia e gaoioi. I le pei o lē na tupuga mai ia te ia o Aperaamo, ‘sa mautinoa atoatoa e Noa e mafai e le [Atua] ona faia o le mea na ia folafolaina.’—Roma 4:21.

16. A o faagasolo le fauina o le vaa, na faapefea ona faamalosia atili le faatuatua o Noa?

¹⁶ A o faagasolo tausaga ma ua amata foi ona tino mai le vaa, sa faamalosia atili le faatuatua o Noa. Na foia faafitauli tau i le fausaga ma le felauaiga o mea auā le fauina o le vaa. Sa manumalo mai puapuaga. Sa leai se teteega e mafai ona taofia le galuega. Na lagonaina e le aiga o Noa le lagolagosua ma le puipuiga a Ieova. A o faamalosi pea Noa, ‘sa aogā lona faatuatua ua tofotofoina e faatupuina ai lona onosai.’ (Iakopo 1:2-4) I le iuga, na maeʻa ona fauina le vaa, na oo mai le Lolo, ma faasaoina ai Noa ma lona aiga. Na tofo Noa i le faataunuuga o folafolaga a le Atua, e pei foi ona tofo i ai Iosua i se taimi mulimuli ane. Sa tauia le faatuatua o Noa.

E Lagolagoina e Ieova le Galuega

17. O ā itu e tutusa ai o tatou taimi ma aso o Noa?

¹⁷ Na valoia e Iesu faapea o le a tutusa lava o tatou aso ma aso o Noa. Ua toe filifili le Atua e faaumatia ē amioleaga ma faatulaga ai se taimi mo le faataunuuina o lenei mea. (Mataio 24:36-39) Ua ia faia foi sauniuniga mo le faasaoina o ē amiotonu. Sa tatau ia Noa ona fauina se vaa, peitai o auauna a le Atua i aso nei e tatau ona latou folafola atu fuafuaga a Ieova, aʻoaʻo atu lana Afioga, ma faia ni soo.—Mataio 28:19.

18, 19. E mafai faapefea ona tatou iloa o loo lagolagoina e Ieova le talaʻiga o le tala lelei?

¹⁸ Pe ana leai le lagolago atu o Ieova ia Noa ma tausia o ia, semanū e lē mafai ona fauina le vaa. (Faatusatusa i le Salamo 127:1.) I se tulaga faapena, pe ana lē seanoa le lagolago mai a Ieova, semanū e lē faasaoina mai le Faa-Kerisiano moni, ma mautinoa lava le lē olaola manuia. Sa iloatino lenei mea i le uluai senituri e Kamalielu, o se Faresaio faaaloalogia, ma o se aʻoaʻo o le Tulafono. Ina ua mananao le au Saniterini e fasiotia le au aposetolo, na ia lapataia lena au faamasino: “Faamamao ia ma nei tagata, ma ia tuu pea ia te i latou; auā afai ua tupu mai tagata lena sauniga ma lena galuega, e faaumatia ia; a e afai ua tupu mai le Atua, tou te le mafai ona faaumatia.”—Galuega 5:38, 39.

¹⁹ O le taulau manuia o le galuega talaʻi, i le uluai senituri ma aso nei, ua faamaonia ai o lenei galuega e lē mai tagata, ae mai le Atua. O le mataupu o loo sosoo mai o le a talanoaina ai nisi o tulaga ma mea tutupu mataina, ua fesoasoani i le taulau manuia o lenei galuega i se tulaga tele.

Aua Lava Neʻi Faamaamulu!

20. O ai e lagolagoina i tatou a o tatou talaʻia le tala lelei?

²⁰ E ui ua tatou ola i “aso faigata,” ae mafai ona tatou mautinoa o loo pule atoatoa mai Ieova. O loo ia lagolagoina ma tausia ona tagata a o latou galulue e faamaeʻa le talaʻia o le  tala lelei a o lei oo mai le taimi atofaina a le Atua e faamuta ai lenei faiga amioleaga o mea. (2 Timoteo 3:1; Mataio 24:14) Ua valaaulia i tatou e Ieova ina ia avea ma “au faigaluega” faatasi ma ia. (1 Korinito 3:9) Ua tatou mautinoa foi, o loo faatasi mai Keriso Iesu ma i tatou i lenei galuega ma e mafai ona tatou faalagolago atu i le lagolagosua ma le taʻitaʻiga faaagelu.—Mataio 28:20; Faaaliga 14:6.

21. O le ā le talitonuga maumauai e lē tatau lava ona tatou faamaamulu ese ai?

²¹ Talu ai sa faaalia e Noa ma lona aiga le faatuatua i folafolaga a Ieova, sa faasaoina ai i latou i le lolo. O i latou o loo faaalia lea lava faatuatua i aso nei o le a faasaoina mai le “puapuaga tele” o loo sau. (Faaaliga 7:14) O loo tatou ola i taimi sili ona faagaeeina ai. O loo fotuai mai mea tāua o le a tutupu! Ua lē o toe mamao, ona gaoioi lea o le Atua e faaoo mai le lagi fou faamamaluina ma le lalolagi fou matagofie, o le a mau ai ē amiotonu. (2 Peteru 3:13) Aua, aua lava neʻi e faamaamulu ese mai lou talitonuga maumauai, po o ā lava mea e fetalai i ai le Atua, e na te mafaia lava ona fai.—Roma 4:21.

Manatu Autū ia Manatua

□ Aisea e lē pulea ai e Ieova auiliiliga uma o gaoioiga a tagata?

□ Na faapefea i feutagaiga a Ieova ma Isaraelu ona manino mai ai lona tomai e faataunuu ai ana fuafuaga?

□ Na faataitaia mai faapefea i aso o Noa le tomai o Ieova na te silafia ai mea o i le lumanai?

□ O le ā le mautinoa e tatau ona ia i tatou e faatatau i folafolaga a le Atua?

[Fesili mo le Suʻesuʻega]