Olioli i “le Ola Moni”

UA TUUINA e Ieova le Atua le manatu o le faavavau i tagata. (Failauga 3:11, NW) O le mafuaaga lena e lagona ai e tagata le lē mafaia o se mea pe a fesagai ma le oti ae, i le taimi lava e tasi, e mapuna aʻe ai ia i latou se faanaunauga malosi e fia ola.

Ua aumaia e le Tusi Paia, le Afioga faagaeeina a le Atua, se faamoemoe matagofie ia i tatou. (2 Timoteo 3:16) O Ieova, o lē e puna mai ai le alofa, na te lei ono faia fua le tagata ma le tomai e malamalama ai i le manatu o le faavavau i lona mafaufau ona toe faasalaina lea o ia ina ia ola mo ni nai tausaga. O le foafoaina o i tatou ina ia faapuapuagatia i tulaga o tatou iai e matuā feteenai lava ma uiga o le Atua. E lei foafoaina i tatou ina ia pei “o mea ola e tutupu ma le le o i ai se mafaufau, na faia ina ia puea ma fasimatea.”—2 Peteru 2:12.

I le foafoaina o Atamu ma Eva faatasi ai ma le uiga tuufaasolo mai o le faavavau, na faia ai e Ieova se mea e “matuā lelei lava”; na ia faia i laua ina ia mafai ona ola e faavavau. (Kenese 1:31) Ae faanoanoa ai, na faaaogā sese e le uluai ulugalii lo la saolotoga, i le lē usiusitai i se faasāsāga manino mai Lē na Foafoaina Mea ma leiloa ai lo la lelei atoatoa sa iai i le amataga. O le iuga, na la maliliu, ma tuufaasolo atu ai le lē lelei atoatoa ma le oti i ē na tupuga mai ia i laua.—Kenese 2:17; 3:1-24; Roma 5:12.

E lē o iai i le Tusi Paia se mealilo e faatatau i le fuafuaga o le olaga ma le uiga o le oti. O loo fai mai a oo mai le oti “e leai se galuega, po o se mafaufau, po o se iloa, po o se poto” ma o ē ua oti “latou te le iloa se mea.” (Failauga 9:5, 10) I se isi faaupuga, o ē ua oti ua oti. O le aʻoaʻoga i le lē mafai ona oti o le solu e lē faale-Tusi Paia, o lea e leai la se mealilo faavae e ao ona faamatalaina e faatatau i le tulaga o ē ua oti.—Kenese  3:19; Salamo 146:4; Failauga 3:19, 20; Esekielu 18:4. *

Sa iai le fuafuaga a le Atua; na te lei “faia fua” le lalolagi. Na ia faia “ina ia āina” e tagata lelei atoatoa i ni tulaga parataiso, ma e lei suia lava e le Atua lana fuafuaga. (Isaia 45:18; Malaki 3:6) Ina ia faataunuuina, na ia auina mai ai lona Alo i le lalolagi. E ala i le tumau i le faamaoni seia oo i le oti, na saunia ai e Iesu Keriso le ala e togiola ai le fanau a tagata mai le agasala ma le oti. O le mea moni, na fetalai Iesu: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—Ioane 3:16.

I tuā lava, na folafola mai ai e le Atua faapea o le a ia faia le “lagi fou ma le lalolagi fou.” (Isaia 65:17; 2 Peteru 3:13) E aofia ai i lena lona filifilia o se vaega faatapulaa o Kerisiano faamaoni mo le olaga i le lagi. Faatasi ai ma Iesu Keriso, ua latou fai aʻe ai se pulega faalemalo. Ua faasino i ai e le Tusi Paia o le “malo o le lagi,” po o le “malo o le Atua,” lea o le a na pulea “mea o i le lalolagi.” (Mataio 4:17; 12:28; Efeso 1:10; Faaaliga 5:9, 10; 14:1, 3) Pe a maeʻa ona faaumatia le lē amioatua mai lo tatou kelope ma faamamāina, ona aumai lea e le Atua se sosaiete o tagata amiotonu, po o le “lalolagi fou.” E aofia ai ia i latou ia tagata o ē e puipuia e le Atua mai le faaumatiaga o loo fotuai mai o lenei faiga amioleaga o mea. (Mataio 24:3, 7-14, 21; Faaaliga 7:9, 13, 14) O le a latou aufaatasi ma i latou ua toe faafoisia mai i le ola e ala mai i le toetu ua uma ona folafolaina mai.—Ioane 5:28, 29; Galuega 24:15.

“Le Ola Moni” o i Luma

I le faamautinoaina o le faamatalaga faagaeetia e faatatau i le olaga i le lalolagi Parataiso i le lumanai, na fetalai le Atua: “Faauta, ou te faia ia fou mea uma lava.” (Faaaliga 21:5) E faafaigata mo le mafaufau o le tagata ona malamalama atoatoa i galuega ofoofogia o le a faia e le Atua mo tagata. O le a faia e le Atua se parataiso i le lalolagi aoao, e pei lava o Etena. (Luka 23:43) E pei o Etena, o le matagofie ma le matalasi o lanu, o leo, ma le tofo o le a fau ma soloi. O le mativa ma le lē lava o taumafa o le a lē toe iai, auā e tusa ai ma lena taimi ua faapea mai le Tusi Paia: “Auā ua mavae atu mea muamua.” (Faaaliga 21:4; Salamo 72:16) O le a lē toe faapea mai foi se tasi, “Ou te mai,” auā o le a aveesea e faavavau faamaʻi. (Isaia 33:24) Ioe, o mafuaaga uma o le tiga o le a mou atu, e aofia ai ma le fili tupito o le tagata, o le oti. (1 Korinito 15:26) I se vaaiga mataina o le “lalolagi fou,” le sosaiete fou o tagata i lalo o le pule a Keriso, na lagona ai e le aposetolo o Ioane se leo o loo faapea mai: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.” O le ā se isi mea na te aumaia le faamafanafanaga ma le olioli e sili atu i lo le faataunuuga o lenei folafolaga tauatua?

I le faamatalaina o le olaga i le lumanai, o loo faamamafa patino ai lava e le Tusi Paia tulaga o le a faamalieina ai faanaunauga tau amio ma le faaleagaga o tagata. O fuafuaga amiotonu uma o loo faapea ona finafinau tagata ina ia maua i le taimi nei ae lē o taulau o le a faataunuuina atoatoa. (Mataio 6:10) E aofia ai i nei mea le faanaunauga mo le faamasinotonu, lea o loo tumau pea lava e lei faataunuuina talu ai o loo masani ona pagatia tagata ona o ē tetee faasauā mai ma puleaina ē vaivai. (Failauga 8:9) Na tusi faavaloaga le faisalamo e uiga i tulaga o le a iai i le pule a Keriso: “I ona aso o le a faafualoaina ai le amiotonu, ma tumu i le filemu.”—Salamo 72:7, The New Jerusalem Bible.

O aiā tutusa o se tasi lea o faanaunauga ua tele ina faia ai e nisi ni faataulagaina. I le “toefuataiga,” o le a tineia ai e le Atua le faailogatagata. (Mataio 19:28) O le a maua e tagata uma le mamalu e tasi. E lē o ni aiā tutusa e faamalosia mai e ni malo pule sauā. Ae i sona faaeseesega, o le a aveesea le pogai o le faailogatagata, e aofia ai ma le matapeapea ma le faamaualuga lea e uunaia ai tagata e saili ina ia pulea isi po o le faaputuina foi o se vaega tele o le tamaoaiga mo i latou lava. Na valoia e Isaia e faapea:  “Latou te faia fale, ma latou mau ai; latou te totō tovine, ma latou aai i o latou fua. Latou te le fai fale ina ia mau ai nisi; latou te le totō ina ia ʻai ai nisi.”—Isaia 65:21, 22.

Pagā le puapuagatia o tagata i le faamasaatoto i fetauaiga i le va o tagata taitoatasi ma fetauaiga tetele! Ua faaauauina mai lenei mea talu mai lava le fasiotia o Apelu seia oo mai i taua i le taimi nei. Pagā le umi o faamoemoe ma faatalitali tagata, ae e lei taulau lava, mo le faavaeina o le filemu! I le Parataiso toe faafoisia, o le a filemu ma agamalu tagata uma; o le a latou “faafiafia foi ia te i latou ona o le manuia e tele.”—Salamo 37:11.

Ua faapea mai le Isaia 11:9: “E tumu le lalolagi i le malamalama o Ieova, e pei ona ufitia o le iliti tai i le suāsami.” Ona o le tuufaasolo mai o le lē lelei atoatoa, faatasi ai ma isi mea, e lē faigofie ai mo i tatou ona malamalama atoatoa i le uiga o nei upu. O le auala o le a avea ai le atamai lelei atoatoa o le Atua ma mea e autasia ai i tatou ma ia ma le auala o le a iu i ai i le olioli atoatoa, atonu o le a tatou aʻoaʻoina i se taimi o i luma. Ae talu ai o loo faailoa mai e le Tusi Paia ia i tatou faapea o Ieova le Atua e ofoofogia lona malosi, lona atamai, lona faamasinotonu, ma lona alofa, e mafai la ona tatou mautinoa o le a ia faafofoga mai i tatalo uma o loo faaleoina atu e i latou e aināina le “lalolagi fou.”

“Le Ola Moni” o se Mea Mautinoa —Ia Taofi Mau Atu i Ai!

I le toatele, o le ola e faavavau i se lalolagi sili ona lelei ua na o se miti po o ni mafaufauga faivavale. Peitai, mo i latou e iai moni lo latou faatuatua i le folafolaga a le Tusi Paia, o lenei faamoemoe o se mea mautinoa. E tai pei o se taula mo o latou olaga. (Eperu 6:19) E pei lava ona taofia e se taula le vaa ma alofia ai le see ese atu, ua faapena foi i le faamoemoe o le ola e faavavau ona faatoafilemuina ma faamautuina ai tagata ma ua latou mafai ai ona faafesagaia faafitauli i le olaga ma oo lava ina manumalo ai.

E mafai ona tatou mautinoa o le a faataunuuina e le Atua ana folafolaga. Ua ia saunia mai foi se pine faamau e ala i le tuuina mai o se fetalaiga, o se folafolaga e lē masuia. Na tusi le aposetolo o Paulo: “O le Atua, ina ua finagalo ai o ia e faailoa atili ai i e ua tofia i mea na folafolaina, o lana lava pule e le mafaia ona liua na ia faaopoopo i ai le tauto, ina ia ia i tatou o mea e lua e le mafai ona liua, e le mafai ona pepelo ai le Atua, tatou te maua ai le faamafanafanaga tele, . . . i le faamoemoega ua tuu i o tatou luma.” (Eperu 6:17, 18) O “mea e lua e le mafai ona liua” lea e lē tāitai faaleaogaina e le Atua, o lana folafolaga ma lana tautoga, lea e faavae aʻe ai o tatou faamoemoega.

O le faatuatua i folafolaga a le Atua e aumaia ai le matuā faamafanafanaina ma le malosi faaleagaga. O Iosua, o se taʻitaʻi o le nuu o Isaraelu, na ia te ia se faatuatua faapena. Ina ua tuuina atu e Iosua lana lauga faamavae i le nuu o Isaraelu, ua matua o ia ma na ia iloa ua lata ona maliu. E ui i lea, na ia faailoa atu lona malosi ma le faamaoni lē maluelue, lea e māfua mai le faatuatua atoatoa i folafolaga a le Atua. Ina ua uma lona faapea mai o le a ia alu atu “i le ala o le lalolagi uma,” o le ala e taʻitaʻia atu ai tagata uma lava i le oti, na faapea mai Iosua: “Ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.” Ioe, e faatolu ona taʻua pea e Iosua faapea e tausia pea e le Atua ana folafolaga uma.—Iosua 23:14.

E mafai foi ona ia te oe le faatuatua lava lena e tasi i le folafolaga a le Atua e faatatau i se lalolagi fou lea o le a lē toe umi ae faavaeina. E ala i le suesue ma le maelega o le Tusi Paia, o le a e malamalama ai ia Ieova ma le pogai na te faatalitalia mai ai lou faatuatua atu atoatoa. (Faaaliga 4:11) O Aperaamo, Sara, Isaako, Iakopo ma isi o le au faatuatua anamua sa ia i latou se faatuatua lē maluelue, e faavae aʻe i le loloto o le iloa o le Atua moni, o Ieova. Na latou tutumau mausalī i le faamoemoe, e ui i le mea moni faapea latou te “lei maua mea na folafolaina” a o latou feola. Peitai, ‘ua iloa e i latou a e mamao, na mautinoa foi, ma latou talia ma le fiafia.’—Eperu 11:13.

 O le malamalama i valoaga a le Tusi Paia, ua tatou iloa ai i le taimi nei le lalata mai o le “aso tele o le Atua e ona le malosi uma lava,” lea o le a faamamāina ai foi le lalolagi mai le amioleaga uma lava. (Faaaliga 16:14, 16) E pei o tane faamaoni anamua, e ao ona tatou tumau i le faatalitali ma le mautinoa i mea tutupu i le lumanai, e uunaia e le faatuatua faapea ma le alofa mo le Atua ma le “ola moni.” O le lalata mai o le lalolagi fou ua saunia ai se uunaiga malosi mo i latou o ē o loo faaalia le faatuatua ia Ieova ma alolofa ia te ia. O lena faatuatua ma le alofa e ao ona ati ae ina ia maua ai le finagalo malie o le Atua ma lana puipuiga a o faagasolo lona aso tele, lea ua lata mai.—Sefanaia 2:3; 2 Tesalonia 1:3; Eperu 10:37-39.

O lea, pe e te fiafia ea i le olaga? Ma pe e sili ea ona e faanaunau atu i le “ola moni”—le ola e avea o se auauna faamaonia a le Atua, ma se faamoemoega o se lumanai fiafia, ioe, faatasi ma se vaaiga i le ola e faavavau? Afai o le mea lena o loo e sailia, ia utagia le apoapoaiga a le aposetolo o Paulo, o lē na tusi faapea e ao ona ‘tuu atu lo tatou faamoemoe, e lē i oa e mavae, ae i le Atua.’ Na faaauau mai e Paulo: “Ia tamaoaiga i galuega lelei,” lea e faamamaluina ai le Atua, ma ia “fetagofi atu i le ola moni lava.”—1 Timoteo 6:17-19.

E ala i le taliaina o le ofo mo se suesuega faale-Tusi Paia ma Molimau a Ieova, e mafai ona e maua ai le poto lea e “uiga i le ola e faavavau.” (Ioane 17:3, NW) Ma le alofa, ua faamauina ai i le Tusi Paia le valaaulia faatamā lenei mo i tatou uma: “Loʻu atalii e, aua neʻi galo ia te oe laʻu tulafono; a ia tausia aʻu poloaiga i lou loto. Auā e faaopoopoina ai ia te oe o aso e tele, ma tausaga e te ola ai, atoa ma le manuia.”—Faataoto 3:1, 2.

[Faaopoopoga i lalo]