Pulea o le Ita Mai le Faatausuaiina o Oe

“IA FAATOʻATOʻA!” “Faifailemu!” “Taofiofi!” Pe masani ona e faalogo i nei faamatalaga? Atonu e te faia e oe lava na upu e faatoafilemu ai se faalogona ita. O nisi tagata, e ō e savalivali ona o le taumafai e taofia le faapasae atu o le ita. O auala faigofie nei e pulea ai le ita ma faatumauina ai se faiā lelei ma isi tagata.

Ae peitai, i tausaga talu ai nei, o fautuaga feteenai na faaalia mai e tagata faufautua atamamai i le pe tatau ona pulea pe taofiofi le ita ua oo ina fenuminumiai ai le toatele o tagata. Mo se faaaoaoga, ua lagolagoina e nisi fomai o le mafaufau le manatu e faapea, “afai e faaleleia ai ou faalogona,” ia faasasao atu lou ita. Ua lapatai mai isi e faapea, o le faapasae atu e lē aunoa o le ita “o se faaaliga malosi lea o lou maliu a o lei tāitai lou soifuaga na i lo o isi vala matautia e pei o le ulaula, toto maualuga, ma le maualuga o le fua o le gaʻo e poloka ai alatoto.” Ua taʻu manino mai e le Afioga a le Atua e faapea: “Ina soia e te ita, ma ia tuu lou tiga; aua e te faameo, neʻi e faia se mea leaga.” (Salamo 37:8) Aisea ua aumaia ai i le Tusi Paia lena fautuaga maʻoti?

O le lē pulea o faalogona e iu ai i le faia o ni gaoioiga lē pulea. Na iloa tino lenei mea i tuā i le amataga lava o le talafaasolopito o le tagata. Ua tatou faitau ai e faapea: “Ona ita tele ai lea o Kaino, ua faaūū lava ona mata.” O fea na taʻitaʻiina atu i ai o ia e lenei mea? Na taofimau o ia e lona ita ma ua pule foi lona ita ia te ia, o lona matuā ita tele na faamaaa ai lona loto i le apoapoaiga a Ieova ina ia liliu atu e faia le mea lelei. O le lē pulea o le ita o Kaino na iu ai i lona faia o se agasala matuia—le fasiotia o lona lava uso.—Kenese 4:3-8.

Sa faapena foi le lē pulea o le ita o Saulo le tupu muamua o Isaraelu, ina ua faalogo sa sili ona viiviia Tavita. “Ua lagi fetaliaʻi fafine i a latou siva, ua fai ane, Ua fasia e Saulo ana toaafe, a o Tavita ana sefulu o afe. Ua ita tele ai Saulo, ua leaga ia te ia ia upu.” Na faapea ona pulea ai e le ita mafaufauga o Saulo, o lea na faalua ona uunaia ai o ia e taumafai e tagatavaleina Tavita. E ui lava sa tausolomua Tavita i le taumafai e faia se faauoga, ae sa lē manao Saulo e sailia se filemu ma se faaleleiga. O le taunuuga, na lafoaiina atoatoa ai o ia mai le mauaina o le finagalo malie o Ieova.—1 Samuelu 18:6-11; 19:9, 10; 24:1-21; Faataoto 6:34, 35.

Ma le lē maalofia lava, pe a lē pulea e se tasi lona ita, o le a ia fai atu ni upu pe faia foi ni gaoioiga o le a faatiga ai i tagata uma o loo aafia ai. (Faataoto 29:22) Na oo ina feita Kaino ma Saulo auā na tofu lava le tagata ia ma le mea na loto leaga ma matauʻa ai. Peitai, e eseese mafuaaga e mafai ona faaalia atu ai le ita. O se faitioga lē tonu, se faalumaina, se lē femalamalamaai, po o se faiga lē tonu e ono avea ma aloiafi e faasasao aʻe ai le ita.

O faaaoaoga ia Kaino ma Saulo ua faaalia ai se vaivaiga matuia sa iai ia i laua uma. O le taulaga a Kaino, e aliali mai atonu sa lei uunaia e le faatuatua. (Eperu 11:4) O le lē taulau ona usitaia e Saulo o poloaiga na fetalai mai ai Ieova ma ana taumafaiga mulimuli e taʻutonuina o ia, na iu ai i lona lē mauaina o le finagalo malie ma le agaga o le Atua. Ma le manino lava, na motusia e na uma tamaloloa a laua faiā ma Ieova.

E matuā ese na uiga ma uiga sa ia Tavita, o lē sa iai se mafuaaga e tatau ai ona ita i le faiga o ia e Saulo. Sa taofiofia e Tavita lona loto. Aisea? Na faapea mai o ia: “Ia faamamao e Ieova ia te au ona ou faia lena mea i loʻu alii, le ua faauuina e Ieova.” Sa manino lelei  i le mafaufau o Tavita lana faiā ma Ieova, ma na aafia ai ana feutagaiga ma Saulo. Sa ia tuu atu ma le loto maulalo mea i aao o Ieova.—1 Samuelu 24:6, 15.

O le mea moni, e matuā matuia aafiaga o le lē pulea o le ita. Na lapatai mai le aposetolo o Paulo: “A outou ita, aua le agasala ai.” (Efeso 4:26) E ui lava e iai taimi e ita ai ina ia faia le mea tonu, ae o loo iai pea le lamatiaga e ono mafai ona avea ai le ita ma mea tatou te tausuai ai. E lētioa lava la ona tatou fesagai ma le luʻi, o le pulea lea o lo tatou ita. E mafai faapefea ona tatou faia o lenei mea?

O le auala autū, o le ati ae lea o se faiā malosi ma Ieova. Ua faalaeiau mai o ia ia te oe ina ia tatala atu lou loto ma lou mafaufau ia te ia. Taʻu atu ia te ia mea e te manao i ai ma mea e te popole ai, ma talosaga atu mo se loto toafilemu ina ia faatoilalo ai le ita. (Faataoto 14:30) Ia mautinoa “o fofoga o le Alii [Ieova] o loo faasaga i e amiotonu, e liliu mai foi ona taliga i a latou faatoga.”—1 Peteru 3:12.

E mafai e le tatalo ona suia ma taʻitaʻia oe. I le ā le auala? E mafai ona oo ai ia te oe se aafiaga loloto i au feutagaiga ma isi. Ia manatua le auala o feutagai ai Ieova ma oe. E pei ona fai mai le Tusi Paia, “e lei faia e ia [Ieova] ia i tatou e tusa ma a tatou agasala.” (Salamo 103:10) E tāua tele le agaga o le loto faamagalo “ina neʻi ʻoleʻolegia i tatou e Satani.” (2 Korinito 2:10, 11) E lē gata i lea, o le tatalo ua avea o se mea e tatala atu ai lou loto i le taʻitaʻiga a le agaga paia lea e mafai ona liliuina uiga ua mauaa o le olaga. E foai mai ma le fiafia e Ieova le ‘filemu e silisili i mea uma e mafaufau i ai,’ lea e mafai ona faasaoloto ai oe mai le pulea e le malosi o le ita.—Filipi 4:7.

Ae peitai, o le tatalo e tatau ona ō faatasi ma le suesueina e lē aunoa o le Tusi Paia ina ia mafai ai e i tatou ona ‘iloa pea le finagalo o Ieova.’ (Efeso 5:17; Iakopo 3:17) Afai e faafaigata ia te oe ona pulea lou ita, taumafai ia maua le finagalo o Ieova e faatatau i le faafitauli. Autalu mau o le Tusi Paia e fesootai patino atu i le puleaina o le ita.

Ua ofo mai e le aposetolo o Paulo lenei faamanatuga tāua: “Ia tatou agalelei, ia faatatau i mea e tutupu i lea aso ma lea aso, ae faasili i le aiga o le faatuatua.” (Kalatia 6:10) Ia taulai atu ou mafaufauga ma gaoioiga i le faia o mea lelei i isi. O galuega lelei faapena e ati ae ai, o le a faamalosia ai faalogona alofa mo isi ma le maufaatuatuaina ma o le a faatoafilemu ai ni lē femalamalamaai ia e faigofie ona iu i ai ona o le ita.

Na faapea mai le faisalamo: “Ia e faamautuina loʻu savali i lau afioga; aua foi neʻi manumalo mai se amio leaga e tasi ia te au. Ua tele le filemu o e naunau i lau tulafono; e leai foi se mea e tausuai ai i latou.” (Salamo 119:133, 165) E mafai foi ona faapena oe.

[Pusa/Ata i le itulau 9]

LAASAGA E PULEA AI LE ITA

□ Tatalo ia Ieova.—Salamo 145:18.

□ Iloilo le Tusi Paia i aso taitasi. —Salamo 119:133, 165.

□ Ia faapisi i le faia o ni galuega aogā.—Kalatia 6:9, 10.