Faia ia Taulau Manuia Lou Olaga!
Faia ia Taulau Manuia Lou Olaga!
“Amuia le tagata e le savali i le filifiliga a ē amio leaga . . . E manuia foi mea uma na te faia.”—SALAMO 1:1, 3.
1. (a) O faapefea ona manatu le toatele o talavou o le lalolagi i le taulau manuia? (e) O faapefea ona faamatalaina i le Tusi Paia se tagata e taulau manuia?
TAULAU MANUIA—o le ā le uiga o lea faaupuga ia te oe? “O loʻu sini e sili ona tāua o le taulau manuia lea i le pisinisi,” o le faamatalaga lea a se tama talavou. Na faapea mai se tamaitai talavou: “O loʻu sini e sili ona ou faanaunau i ai, o le mauaina lea o se aiga e fiafia.” Peitai ua faapea mai se isi tamaitai talavou: “O loʻu faanaunauga o le tau lava ina ia maua soʻu fale manaia, se taavale manaia . . . Ou te naunau lava aʻu ia te au.” O le faafitauli e lē faapea o tupe, po o le aiga, po o le lelei o se galuega e fua i ai le taulau manuia. I le Salamo 1:1-3, tatou te faitau ai e faapea: “Amuia le tagata e le savali i le filifiliga a e amio leaga . . . e naunau o ia i le tulafono a Ieova . . . e manuia foi mea uma na te faia.”
2. O fea e maua ai le taulau manuia moni, ma o le ā le auala e tasi e mafai ona mauaina ai?
2 O loo folafola mai iinei e le Tusi Paia se mea e lē mafai e se tagata ona ofoina mai—le taulau manuia moni! Peitai e lē o talanoa e faatatau i le mauaina o tupe. Ua lapatai mai le Tusi Paia lava ia: “Auā o le manao i tupe, o le pogai lea o mea leaga uma lava.” (1 Timoteo 6:10) O le taulau manuia moni e maua i le faafiafiaina o le Atua—e aofia ai le mulimuli i le tulafono a Ieova. E na o lea le auala e mafai ona aumaia ai le faamalieina ma le fiafiaga moni! Atonu o le manatu o le iai i lalo o le tulafono a Ieova ma le faatonu atu o le mea e fai, e lē tupu ai se fiafia. Peitai, na fetalai Iesu: “E fiafia i latou e mataala i o latou manaoga faaleagaga.” (Mataio 5:3, NW) Pe e te iloaina pe leai, ae na foafoaina oe ma manaoga faaleagaga—e aofia ai se manaoga loloto ia iloa le Atua ma ia malamalama i ana fuafuaga. O lea la, e na o le pau le auala e mafai ona e mauaina ai le fiafia moni pe afai e te faamalieina na manaoga ma mulimuli i “le tulafono a Ieova.”
Le Mafuaaga Tatou te Manaomia ai Tulafono a le Atua
3. Aisea e ao ai ona tatou fiafia e tuu atu ia Ieova e ‘taʻitaʻia o tatou ala’?
3 Na tusi le perofeta o Ieremia: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) Ua moni lenei manatu i tagata uma lava, o ē talavou ma ē matutua. E lē gata ina lē o ia i tatou le atamai, iloa, ma le poto e faatonutonu ai o tatou lava ala; ae leai foi sa tatou aiā e faia ai faapea. I le Faaaliga 4:11, ua faapea mai le Tusi Paia: “Lo matou Alii e, ma lo matou Atua, e tatau lava oe ina ia tuuina atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.” Ona o ia o Lē na Foafoaina i tatou, ua avea ai Ieova ma “puna o le ola.” (Salamo 36:9) Ona o lena tulaga, e sili atu la lona silafia na i lo se isi lava, i le auala e faaaogā ai o tatou olaga. O lea na ia faia ai tulafono, e lē ina ia aveesea mai ia i tatou le olioli, ae ia fesoasoani ina ia tatou lelei ai. (Isaia 48:17) A teena le tulafono a le Atua, e na o le malaia lava lou taunuuga.
4. Aisea ua toatele ai talavou ua faaleagaina o latou olaga?
4 Mo se faataitaiga, po o e tau mānatu ea pe aisea ua tele ai talavou ua faaleagaina o latou ola e ala i fualaau faasāina, lē taofiofia le feusuai solo, ma isi amioga lē mamā? Ua faamatalaina i le Salamo 36:1, 2 e faapea: “O le upu a le solitulafono ua i le tagata amio leaga, o loo i totonu o loʻu loto lea; e leai lava sona mataʻu i le Atua. Auā o loo faaoleole o ia ia te ia lava, ina ia iloa ana agasala ia inosia ai.” Ona ua leai se “mataʻu [lelei] i le Atua,” ua faaseseina ai e le toatele o talavou i latou lava i le talitonu faapea e leai ni iuga leaga i amioga lamatia. O lea, o le a iu lava ina latou fesagaia lenei mataupu silisili e lē masuia: “Auā o le mea e luluina e le tagata, o le mea lava lea e seleseleina mai ai e ia. O sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.”—Kalatia 6:7, 8.
‘Faitauina o Aso’
5, 6. (a) Aisea e ao ai i talavou ona ‘faitauina o latou aso,’ ma o le ā le uiga o le faia faapea? (e) O le ā le uiga o le ‘manatua o Lē na Faia i tatou’?
5 E faapefea ona e faia lou olaga ina ia taulau manuia ma “seleseleina mai ai le ola e faavavau”? Na tusia e Mose faapea: “O tausaga o matou olaga e fitugafulu ia tausaga; a e afai e valugafulu tausaga ona o le malosi . . . e vave ona mavae atu ia, ma matou lele ese.” (Salamo 90:10) Atonu e seāseā lava, ona e mafaufau i le oti. O le mea moni, o le toatele o talavou ua latou faia ni amioga i se auala e peiseai e lē mafai ona oti i latou. Ae ua faatepa i tatou e Mose i le mea moni e faanoanoa ai faapea e puupuu lava le olaga. E lē o iai foi se faamaoniga faapea e tatou te ola e oo i le 70 po o le 80 tausaga. “O le tausaga ma le mea e tupu ai,” e mafai ona faaumatia ai e oo lava ia i latou e talavou ma ola maloloina. (Failauga 9:11) O lea la, o le a faapefea ona e faaaogaina le ola tāua lea o loo e olioli ai? Na tatalo Mose: “Ia faapea ona e aʻoaʻo mai ia i matou e faitauina o matou aso, ina ia maua ai le poto i o matou loto.”—Salamo 90:12.
6 O le ā le uiga o le faitauina o ou aso? E lē uiga faapea e tatau ona matuā faaaluina lou taimi e mafaufau ai po o le ā le umi e te ono ola ai. Na tatalo Mose ina ia aʻoaʻoina e Ieova Ona tagata e faaaogaina o latou aso o totoe i se auala e avatu ai le viiga ia te Ia. Po o e faitauina ea aso o lou olaga—vaai i aso taitasi o se oa tāua e faaaogā e avatu ai le viiga i le Atua? Ua aumaia e le Tusi Paia le faalaeiauga lenei i tagata talavou: “Ina faatea ese atu ia le tiga i lou loto, ma tuu ese atu le leaga i lou tino; auā o le tama itiiti ma le taulealea e faatauvaa ia. O lenei, ia e manatua le na faia oe i ona po o lou taulealea.” (Failauga 11:10–12:1) O le manatuaina o Lē na foafoaina i tatou e sili atu na i lo le tau lava ina lē faagaloina o loo soifua o ia. Ina ua augani atu le pagota ia Iesu, “Ia e manatua mai aʻu pe a e afio mai i lou malo,” na ia manao e faia e Iesu se mea e sili atu na i lo le tau ina manatuaina lona igoa. Na ia manao e gaoioi Iesu, e toe faatū o ia! (Luka 23:42, NW; faatusatusa i le Kenese 40:14, 23; Iopu 14:13.) I se auala tali tutusa, o le manatuaina o Ieova e aofia ai gaoioiga, faia o le mea e fiafia i ai o ia. Pe mafai ea ona faapea atu o loo e manatuaina Ieova?
Alofia le Matauʻa i Ē Amioleaga
7. Aisea ua filifili ai nisi talavou e faagaloina Lē na Foafoaina i latou? Aumai se faataitaiga.
7 E toatele talavou ua filifili e faagalo Ieova ona ua latou manatu o le avea ma Molimau ua faasāsā naʻuā. E manatuaina e se uso i Sepania ona lagona na iai a o talavou. “Na ou tosina atu i le lalolagi ona sa foliga mai e faigata ma faasāsā naʻuā le upu moni. O lona uiga o le saofai, suesue, alu i sauniga, fai le fusiua, e lē o mea na ou te fiafia e fai.” Po o e lagona ea i nisi taimi faapea ua e lē taulau talu ai o loo e auauna i le Atua? Atonu o le a faateʻia oe e iloaina faapea o lagona uma lava na sa iai i se tasi o tusitala o le Tusi Paia. Faamolemole tatala lau Tusi Paia ma faitau le Salamo 73.
8. Aisea na ‘matauʻa ai Asafo i ē vālea’?
8 Seʻi o tatou iloiloina lenei salamo i nisi o ona vaega auiliili. Ua faapea mai le fuaiupu e 2 ma le 3: “A o aʻu nei, e toe ina papeva oʻu vae; e toetoe lava ina see oʻu vae; auā na ou mataua i e vālea; na ou vaai i le manuia o e ua amio leaga.” E tusa ai ma upu faatomua, sa tusia lenei salamo e Asafo. O ia o se faimusika sā Levī ma o sē na soifua faatasi ma le tupu o Tavita. (1 Nofoaiga a Tupu 25:1, 2; 2 Nofoaiga a Tupu 29:30) E ui lava na iai sona faaeaga matagofie e auauna ai i le malumalu o le Atua, ae na oo ina ‘matauʻa o ia’ i tagata na mitamitavale i a latou amioga leaga. Sa foliga ane o loo sologa lelei mea mo i latou; na foliga o loo latou olioli i le filemu ma le saogalemu. O le mea moni, o le manuia e foliga mai o loo latou mauaina ‘na silisili atu i manatu o o latou loto.’ (Fuaiupu 5, 7) Latou te talanoa e uiga i mea ua latou faia i le “tautala faamaualuga,” o lona uiga, i se uiga mimita. (Fuaiupu 8) “Ua upu vale o latou gutu i lagi; ua feoai foi o latou laulaufaiva i le lalolagi,” ua lē faaalia so latou faaaloalo i se tasi—po o le lagi pe i le lalolagi.—Fuaiupu 9.
9. E ono faapefea i nisi o talavou Kerisiano i aso nei ona oo i ai lagona e pei ona sa lagonaina e Asafo?
9 Atonu o le mea lava foi lea e tasi o loo tupu i ē tou te tupulaga i le aʻoga. E te ono faalogo atu ia i latou o gugutu mai e aunoa ma se maasiasi i a latou faiga lē mamā faaleituaiga, i a latou patī lē pulea, ma le lē faatapulaa o lo latou faaaogaina o le ava malosi ma fualaau faasāina. Pe a e faatusatusaina le eseesega o lo latou olaga lea o loo faapea e fiafia ma le auala vaapiapi lea e tatau ona e savali ai o se Kerisiano, e te ono lagonaina i nisi taimi le “mataua i e vālea.” (Mataio 7:13, 14) Na oo Asafo i le tulaga lea na ia faapea mai ai ma le leotele: “E moni lava, ua ou faamamāfuaina loʻu loto, ma aʻu fafano oʻu lima ina ua ou le sala, a e fai fua lava. Ua taia lava aʻu i aso fai soo.” (Fuaiupu 13, 14) Ioe, ua amata ona ia fesiligia le aogā o le auauna i le Atua ma ola i se olaga amio saʻo.
10, 11. (a) O le ā na faapogaia le suia o le loto o Asafo? (e) E faapefea ona iai tagata amioleaga i “mea maseesee”? Aumai se faataitaiga.
10 O le mea e lelei ai, sa lei umi ona iai pea Asafo i lenei tulaga lē mautonu. Na vave lava ona ia iloaina faapea o le foliga manuia o lē amioleaga e lē aogā ae o se vaaiga taufaasese—ma o se filemu e lē tumau! Na ia faapea mai: “E moni lava, na e tuuina atu i latou i mea maseesee; na e faapaūina atu i latou i mea faatafunaina. Aue! ua faafuasei ona faatafunaina o i latou; ua fano i latou, ua faaumatia lava ona o mea matautia.” (Fuaiupu 18, 19) O le toatele o au tupulaga ua pei foi o loo i “mea maseesee.” Pe vave pe tuai, o a latou amioga lē faaleatua o le a mauaina i latou, atonu e iu ai i ni maʻitō e lē manaomia, faamaʻi pipisi ona o faiga faaleituaiga, pe oo ai foi ina faafalepuipuiina po o le oti! Ae sili atu ona leaga, latou te pagatia ai i le vavae ese mai le Atua.—Iakopo 4:4.
11 Na oo se teine talavou Molimau mai Sepania i se tulaga na ia matauina ai le moni o lenei mea. A o talavou, na ola o ia i se olaga uigalua, na matuā aafia tele i se vaega o talavou e lē matataʻu i le Atua. E lei umi, ae ulu lona alofa i se tasi o i latou—o se tama e pulea e fualaau faasāina. E ui sa ia taumamao mai le faaaogaina o fualaau faasāina, ae na ia faatauina mai fualaau faasāina mo le tama. Sa ia tautino mai “na oo lava ina ou fesoasoani atu ia te ia i le tuiina o le nila.” O le mea e lelei ai, na oo ina toe sagatonu le mafaufau o lenei tuafafine ma toe faafoisia lona malosi faaleagaga. Ae pagā le faateʻia na iai o ia i le iloaina i se taimi mulimuli ane, o lana uo tama lea na faaaogaina fualaau faasāina ua oti i le AIDS. Ioe, e pei lava o le faamatalaga a le faisalamo, o tagata e lē matataʻu i le Atua o loo i “mea maseesee.” Atonu e faafuasei ona feoti nisi e māfua i olaga lē pulea. Ae o isi, pe a lē suia o latou ala, i le lumanai lata mai o le a latou fesagaia ai le “faaalia [mai o] le Alii o Iesu mai le lagi, faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso.”—2 Tesalonia 1:7, 8.
12. Na faapefea e se talavou i Iapani ona iu ina ia iloaina le sese o le matauʻa i ē amioleaga?
12 Pagā la le valea o le matauʻa i “e ua le iloa le Atua”! O le mea moni, o i latou e iloa Ieova ma o loo iai le faamoemoe i le ola e faavavau e ao ona matauʻa i ai. Na oo ina iloa lelei e se uso talavou i Iapani lena mea. A o talavou na ia “manao e faateleina lona saolotoga.” Ua ia faamatala mai faapea: “Na ou manatu e iai se mea o loo oʻu misia. Ona ou toe iloa lea le mea o le a oo i ai loʻu olaga pe a aunoa ma le upu moni. Na mafai ona ou iloa atu loʻu ola ai mo na o le 70 po o le 80 tausaga ona oti lea. Peitai ua tuuina mai e Ieova le faamoemoe o le ola e faavavau! O le iloaina o lenei mea ua fesoasoani ia te au e talisapaia le mea moni lea e ia te au.” E ui i lea, o le tausia o le faamaoni pe a iai faatasi ma tagata o ē lē mulimuli i tulafono a le Atua e lē faigofie. O ā nisi o mea e mafai ona e faia e teena ai na omiga?
Vaai Au Aumea!
13, 14. Aisea e tāua ai le filifili lelei pe a oo mai i aumea?
13 Seʻi o tatou toe vaai atu i le faamatalaina o le tagata taulau manuia, na faamauina i le Salamo 1:1-3: “Amuia le tagata e le savali i le filifiliga a e amio leaga, e le tu foi o ia i le ala o e agasala, e le nofo foi i le nofoa o e tauemu; a e naunau o ia i le tulafono a Ieova; e mafaufau foi o ia i lana tulafono i le ao atoa ma le po. O ia foi e faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.”
14 Mātau muamua lava e tele se vaega e faia e au aumea. Ua faapea mai le Faataoto 13:20: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.” E lē o lona uiga faapea ia lē mafana, lē faaleuo, pe lē mafaufau foi agaʻi i talavou e lē o ni Molimau a Ieova. Ua uunaia i tatou e le Tusi Paia ia alolofa i o tatou tuaoi ma ia “nofo lelei ma tagata uma.” (Roma 12:18; Mataio 22:39) Peitai, e te ono iloa ane ua e ‘savali i le filifiliga’ a i latou e lē mulimuli atu i tapulaa a le Tusi Paia pe a e soona mafuta vavalalata atu ia i latou.
Aogā o le Faitauina o le Tusi Paia
15. E mafai faapefea e talavou ona ati ae se naunau mo le faitauina o le Tusi Paia?
15 Na matauina foi e le faisalamo faapea o le tagata e taulau manuia e fiafia e faitauina tulafono a le Atua “[“i se leo lemū,” NW] i le ao atoa ma le po.” (Salamo 1:1, 2) E moni, o le Tusi Paia e lē faigofie ona malamalama i ai pe a faitauina, ma i totonu o loo iai “nisi upu faamatalagatā.” (2 Peteru 3:16) Ae o le faitauina o le Tusi Paia e lē tatau ona fiu ai. E mafai ona ‘ati ae se naunau . . . i le suāsusu e le suia o le upu’ a le Atua. (1 Peteru 2:2) Taumafai e faitau na o sina vaega itiiti i aso taitasi. Afai e iai ni manatu e te lē malamalama ai, fai ni nai sailiiliga faaopoopo. Pe a uma, mafaufau i mea sa e faitauina. (Salamo 77:11, 12) Afai e faigata ona e uaʻi atu i ai, taumafai e faitau atu ma se leo, “i se leo lemū.” I se taimi, o le a mautinoa le tupu aʻe o lou fiafia e faitau le Tusi Paia. Ua manatua e se tuafafine talavou i Pasili e faapea: “E masani ona foliga e mamao tele Ieova mai ia te au. Ae mo ni nai masina talu ai nei, ua faaleleia laʻu suesue totino ma le faitauina o le Tusi Paia. I le taimi nei ua ou lagona le faamalosia atili o laʻu faiā ma Ieova. Ua sili atu ona moni o ia ia te au.”
16. E mafai faapefea ona tatou aʻoaʻoina mea e tele mai sauniga a le faapotopotoga?
16 O le auai i sauniga a le faapotopotoga e tāua tele foi i lou tuputupu aʻe faaleagaga. Afai e te ‘uaʻi atu . . . pe faapefea lau faalogo,’ o le a mafai la ona e mauaina le tele o faalaeiauga. (Luka 8:18) Pe e te lagona i nisi taimi faapea e lē o manaia sauniga i le faalogologo? O lea la, fesili ifo ia te oe, ‘O le ā se mea ou te faia ina ia manaia ai sauniga i le faalogologo? Po o oʻu uaʻi atu i ai? Pe ou te sauniuni? Po o oʻu faia ni tali?’ Auā foi, ua taʻu mai e le Tusi Paia ia i tatou ia “manatunatu foi le tasi i le tasi, ina ia taufaatupu ai le alofa ma galuega lelei; . . . ia fefaamafanafanai.” (Eperu 10:24, 25) Ina ia mafai ona faia faapea e ao lava ona fai sou sao! O le mea moni, ina ia faia sou sao, e tatau lava ona e suesue muamua. Ua tautino mai e se tuafafine talavou: “E mautinoa lava le sili atu ona faigofie le faia o se sao i sauniga pe a e sauniuni.”
O le Mulimuli i le Ala a le Atua e Taʻitaʻia ai i le Taulau Manuia
17. E faapefea e se tagata e filigā i le faitauina o le Tusi Paia ona “faapei o le laau ua totō i tafatafa ane o vaitafe”?
17 Ua faamatalaina atili e le faisalamo le tagata e taulau manuia e pei “o le laau ua totō i tafatafa ane o vaitafe.” O vaitafe atonu sa faatatau atu i alavai sa faaaogā mo le faasūsūina o laau i togalaau ʻaina. (Isaia 44:4) O le faitauina i aso uma o le Tusi Paia e pei o loo pipii atu i se puna faapena e lē motusia e fafagaina ma faafouina ai. (Ieremia 17:8) O le a e mauaina i aso taitasi le malosi e te manaomia e onosai ai i lalo o tofotofoga ma faigata. O le aʻoaʻoina o manatu o Ieova, o le a e maua ai le atamai e te manaomia e fai ai filifiliga poto.
18. O le ā e faamautinoaina ai le taulau manuia o se talavou i le auaunaga ia Ieova?
18 E iai taimi, e ono foliga mai ai e faigata le auauna ia Ieova. Peitai aua lava neʻi manatu i ai faapea ua matuā faigata lava. (Teuteronome 30:11) Ua folafola mai e le Tusi Paia ia te oe faapea ‘o mea uma e te faia o le a taulau manuia’ i le taunuuga mulimuli, pe afai o lou sini autū o le faamalieina o Ieova ma faafiafiaina lona finagalo! (Faataoto 27:11) Ma ia manatua, e lē o tuulafoaia na o oe. O loo ia te oe le lagolagosua mai a Ieova ma Iesu Keriso. (Mataio 28:20; Eperu 13:5) Ua la silafia omiga o loo e fesagaia, ma o le a la lē tuulafoaiina oe. (Salamo 55:22) O loo ia te oe foi le lagolagosua a le ‘auuso uma’ ma ou mātua pe afai o i laua o ni ē matataʻu i le Atua. (1 Peteru 2:17) O le iai o sea lagolagosua, faatasi ai ma lou naunautai ma au taumafaiga, e mafai ai ona e olioli i se olaga e taulau manuia e lē gata i le taimi nei ae oo lava i le faavavau!
Fesili mo le Autaluga
□ O le ā le taulau manuia moni?
□ Aisea tatou te manaomia ai Ieova e taʻitaʻia o tatou ala?
□ E mafai faapefea e talavou ona ‘faitauina o latou aso’
□ Aisea e valea ai le matauʻa i ē amioleaga?
□ E mafai faapefea i le faitauina o le Tusi Paia i aso taitasi ma le auai e lē aunoa i sauniga, ona fesoasoani i talavou e olioli i se olaga e taulau manuia?
[Fesili mo le Suʻesuʻega]
[Ata i le itulau 20]
Ona ua lē ia i latou se “mataʻu lelei i le Atua,” e toatele ai talavou ua auai i amioga e faaleagaina ai
[Ata i le itulau 22]
E masani ona galo i talavou o a latou gaoioiga e iai iuga mulimuli e oo i ai
[Ata i le itulau 23]
Ia ati ae se naunau e faitauina le Tusi Paia
[Ata i le itulau 23]
O le a sili atu lou olioli i sauniga pe a fai sou sao