Pe Faapogaia e le Tiapolo o Tatou Maʻi?

SA LĒ TATAU LAVA ONA IAI NI MAʻI. Na faia i tatou e le Atua ina ia ola e faavavau i le soifua maloloina lelei atoatoa. O se foafoaga ola agaga, o Satani, na faapogaia maʻi, tiga, ma le oti ina ia mafatia ai le aiga faaletagata, ina ua ia taʻitaʻiina o tatou uluai mātua, o Atamu ma Eva, e faia le agasala.—KENESE 3:1-5, 17-19; ROMA 5:12.

PO O le uiga o lenei mea o maʻi uma lava o se iuga tuusaʻo lea o aafiaga mai le nofoaga o agaga? E pei ona matauina i le mataupu muamua, e toatele tagata i aso nei ua manatu faapena. Sa faapena le manatu o le tinā o le tamā o si teine laitiiti o Owmadji. Ae po o le manava tatā o Owmadji—lea e maliliu ai i nisi taimi tamaiti laiti i atunuu o le teropika—na faapogaia moni e agaga lē vaaia?

Le Vaega a Satani

Ua taliina ma le matuā manino e le Tusi Paia lenei fesili. Muamua lava, ua faaalia mai e le Tusi Paia e faapea e lē mafai e agaga o o tatou tuaa ua maliliu ona toe aumaia ni taaʻiga i ē o ola. Pe a maliliu tagata, “latou te le iloa se mea.” E lē o iai ni o latou agaga o ola pea pe a maliliu. O loo momoe i latou i le tuugamau, o iina “e leai se galuega, po o se mafaufau, po o se iloa, po o se poto.” (Failauga 9:5, 10) E leai lava se mea e mafai ona faia e tagata oti e faapogaia ai ona mamaʻi ē o ola!

Ae peitai, ua faailoa mai e le Tusi Paia e faapea o loo iai agaga leaga. O le uluai fouvale lava i le vateatea aoao o le foafoaga agaga lea ua lauiloa nei o Satani. Sa aufaatasi atu i ai isi foafoaga agaga ma ua taʻua o temoni. Pe mafai e Satani ma temoni ona faapogaia maʻi? Ua tupu lena mea. O nisi o faamalologa faavavega a Iesu na aofia ai ma le tutulieseina o temoni. (Luka 9:37-43; 13:10-16) Ae peitai, o le tele o faamalologa na faia e Iesu, sa lē o ni maʻi na faapogaia tuusaʻo e temoni. (Mataio 12:15; 14:14; 19:2) E faapena foi i aso nei, e masani ona tutupu maʻi ona o tulaga faalenatura, ae lē faapogaia e ni malosiaga e ese mai i lo le tagata.

Ae faapefea faiga faataulaitu? Ua faamautinoa mai e le Faataoto 18:10 ia i tatou e faapea: “O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.” Ua faapea mai foi le Iakopo 4:7: “Ia outou tetee atu i le tiapolo, ona sola ese ai lea o ia ia te outou.” Ioe, e mafai e le Atua ona puipuia ana auauna faamaoni mai faiga faataulaitu ma so o se isi lava malosiaga e ese mai i lo le tagata. O le tasi lena faatatauga o fetalaiga nei a Iesu: “E tuu saʻoloto foi outou e le upu moni.”—Ioane 8:32.

Atonu o le a fesili mai nisi, ‘Ae faapefea Iopu? Pe e lē o se agaga leaga lea na faapogaia lona maʻi?’ Ioe, ua faapea mai le Tusi Paia, o le maʻi o Iopu na faapogaia e Satani. Ae peitai sa ese le tulaga o Iopu. Ua loa ona maua e Iopu le puipuiga tauatua mai osofaiga tuusaʻo faatemoni. Ona luʻia lea e Satani Ieova ina ia taia Iopu, ma talu ai sa aafia ai ni finauga silisili, na aveesea ai e Ieova se vaega o lana puipuiga mai lana auauna tapuai i lenei mea e tasi na tupu.

Ae peitai, sa iai tapulaa na faataatitia e le Atua.  Ina ua ia faatagaina Satani e faaoo puapuaga ia Iopu, sa mafai ai e Satani ona faapogaia maʻi o Iopu mo sina taimi, ae na te lei mafai ona fasiotia o ia. (Iopu 2:5, 6) Mulimuli ane, na faaiuina ai mafatiaga o Iopu, ma na matuā tele sona taui mai ia Ieova ona o lona faamaoni. (Iopu 42:10-17) O mataupu silisili na faamaonia ai le faamaoni o Iopu ua leva ona faamauina i le Tusi Paia ma ua iloa e tagata uma. E lē toe manaomia se isi tofotofoga mea faapena e tupu mai.

E Faapefea Ona Gaoioi Satani?

I le toetoe lava o tulaga uma, e na o le pau lava le fesootaiga o Satani ma maʻi o le fanau a tagata, ona o le mea moni e faapea, na tofotofoina e Satani le uluai ulugalii faaletagata, ma la pauu ai i le agasala. E lē o Satani la ma ana temoni le pogai tuusaʻo o maʻi o tagata taitoatasi ma maʻi uma lava. Ae peitai, e taumafai Satani e taaʻina i tatou e faia filifiliga lē atamai ma faagutugutulua ai i lo tatou faatuatua, lea e ono iu ai i le faaleagaina o lo tatou soifua maloloina. E na te lei faalauatauina, fasiotia, pe taia Atamu ma Eva i ni maʻi. Sa ia faatauanauina Eva ina ia lē usiusitai i le Atua, ma na mulimuli atu ai Atamu i lona ala lē usiusitai. Ua avea ai maʻi ma le oti o se vaega o āuga o le lē usiusitai.—Roma 5:19.

O se perofeta lē faamaoni o Palaamo na iai se taimi na totogi tupe ai e le tupu o Moapi e fetuuina le nuu o Isaraelu, lea na avea ma faamataʻu a o latou tolauapi i tuaoi o Moapi. Sa taumafai Palaamo e fetuu Isaraelu, ae sa lē taulau o ia talu ai sa puipuia e Ieova le nuu. Ona ō atu ai lea o tagata Moapi e faatogafiti ia Isaraelu ina ia faia le ifo i tupua ma amioga lē mamā faaleituaiga. Na taulau lenei togafiti ma na aveesea ai le puipuiga a Ieova mai ia Isaraelu.—Numera 22:5, 6, 12, 35; 24:10; 25:1-9; Faaaliga 2:14.

E mafai ona tatou aʻoaʻoina se lesona tāua mai lena mea na tupu anamua. E avatu e le fesoasoani tauatua i tagata tapuai faamaoni o le Atua le puipuiga mai osofaiga tuusaʻo a agaga leaga. Ae peitai, e ono taumafai Satani e taaʻina tagata taitoatasi ina ia faalotolotolua i lo latou faatuatua. E ono taumafai o ia e maileia i latou ina ia faia amioga lē mamā. Pe i le pei o se leona tagi, atonu e taumafai ai o ia e faafefe i latou i le faia o ni gaoioiga i se auala e latou te lē maua ai le puipuiga a le Atua. (1 Peteru 5:8) O le mafuaaga lena ua taʻua ai e le aposetolo o Paulo ia Satani “o le ua i ai le malo e oti ai.”—Eperu 2:14.

Sa taumafai le tinā o le tamā o Owmadji e faatauanau Hawa e faaaogā tapui ma faiga faataulaitu e puipuia ai mai maʻi. O le ā se mea semanū e tupu pe ana lolo i ai Hawa? Semanū na te lē faaalia lona faatuatua atoatoa ia Ieova le Atua, ma lē toe mafai ai ona ia mautinoa pe na te toe mauaina le puipuiga a Ieova.—Esoto 20:5; Mataio 4:10; 1 Korinito 10:21.

Sa taumafai foi Satani e faatauanau Iopu. Sa lē lava ia Satani le aveesea o le aiga o Iopu, o ana ʻoa, ma lona soifua maloloina. Sa maua foi e Iopu ni fautuaga matuā leaga mai lana avā i lona faapea atu: “Ina faifai ia e oe o le Atua ma e oti ai!” (Iopu 2:9) Ona asiasi atu lea ia te ia o ana “uo” e toatolu o ē na faia se taumafaiga aufaatasi e faatalitonu Iopu e faapea, o ia lava e tuuaʻia ona o lona maʻi. (Iopu 19:1-3) I lenei auala na faaaogā ai e Satani le tulaga vāivai ua oo i ai Iopu e taumafai ai e faalotovaivaia o ia ma faaluafesasi ai lona mautinoa i le amiotonu a Ieova. Peitai, sa faaauau pea ona faalagolago atu Iopu ia Ieova ua na o ia lava lona faamoemoe.—Faatusatusa i le Salamo 55:22.

Pe a tatou mamaʻi, e ono oo foi ina mafatia o tatou mafaufau. I se tulaga faapena, e vave lava ona taumafai Satani ina ia tatou faia se gaoioiga o le a tatou faagutugutulua ai i lo tatou faatuatua. I lea, pe a oo mai maʻi, e tāua tele le teu i le mafaufau e faapea, o le mafuaaga autū o o tatou mafatiaga e foliga mai o le lē lelei atoatoa tuufaasolo na i lo o ni aafiaga mai malosiaga e sili atu na i lo le tagata. Ia manatua, sa oo ina tauaso le tagata faamaoni o Isaako mo le tele o tausaga a o lei oo i lona maliu. (Kenese 27:1) O le mafuaaga, sa lē o agaga leaga ae ona ua toeaina. Na maliu Rasela a o ia fanauina se pepe, e lē ona o Satani, ae ona o le vāivai o le tino faaletagata. (Kenese 35:17-19) I le iuga, na maliliu uma lava ē faatuatua o  aso anamua—e lē ona o faiga faataulaitu po o le fetuu, ae ona o le lē lelei atoatoa tuufaasolo.

O le manatu e faapea o taaʻiga tuusaʻo mai agaga lē vaaia ia e aafia ai maʻi uma e oo ia i tatou, o se mailei. E ono faatupu ai se fefe valea i agaga. O lea, pe a tatou mamaʻi, atonu o le a tofotofoina i tatou ina ia taumafai e faamalie temoni na i lo o le matuā faamamao ese mai ia i latou. Pe a faafefeina i tatou e Satani e saili atu i faiga faataulaitu, o le a avea lena o se faafitia o le Atua moni o Ieova. (2 Korinito 6:15) E tatau ona taʻitaʻia i tatou e se mataʻu faaaloalo i le Atua, ae lē o se fefe i lona Fili e ala i faiga faataulaitu.—Faaaliga 14:7.

Ua maua e le teineitiiti o Owmadji le puipuiga aupito sili ua mafai ona maua faasaga i agaga leaga. E tusa ai ma le faamatalaga a le aposetolo o Paulo, ua manatu le Atua ia te ia e “paia” auā e talitonu lona tinā, ma e mafai ona tatalo lona tinā i le Atua ina ia faatasi ma lana tama e ala i le agaga paia. (1 Korinito 7:14) I le faamanuiaina i lena poto saʻo, na mafai ai e Hawa ona sailia ni togafitiga faafomaʻi mo Owmadji na i lo o le faalagolago atu i tapui.

Mafuaaga Eseese o Maʻi

O le toatele o tagata e lē talitonu i agaga. Pe a latou mamaʻi, e latou te ō atu i se fomaʻi—pe afai latou te gafatia le totogi. O le mea moni, e mafai e se tagata maʻi ona alu atu i se fomaʻi ae lē maua ai lava se fofō. E lē mafai e fomaʻi ona faia ni vavega. Ae o le toatele o tagata e talitonu i faiga faataulaitu o ē e mafai ona faia i ai ni togafitiga e toe malolosi ai, e faatoʻā ō atu lava e vaai se fomai ina ua ui le maʻi. Ua muamua ona latou taumafai e saili atu i se fofō faataulaitu, ma ina ua lē taulau na togafitiga, ona latou faatoʻā ō atu mulimuli ai lea i se fomaʻi. E toatele ua maliliu ae sa lē tatau lava ona oo i ai lea tulaga.

O nisi, ua vave ona maliliu ona o le lē lava o le iloa. Latou te lē iloa āuga ma lē iloa po o ā laasaga aogā e faia ina ia puipuia ai mai maʻi. O le malamalama e fesoasoani i le puipuia o mafatiaga e lē tatau ona oo i ai. E lelei ona mātau e faapea, o tinā e iloa faitau tusi, e toaitiiti atu a latou tamaiti e feoti ona o maʻi na i lo o tinā e lē iloa faitau. Ioe, o le lē iloa e ono iu ai i le oti.

O le faatamala o le isi lea mafuaaga o maʻi. Mo se faaaoaoga, e toatele ua mamaʻi ona o le lē puipuia lelei o meaʻai mai le fetolofi ai o iniseti a o lei taumafaina, po ona o le lē fafanoina muamua o lima o i latou o saunia meaʻai. O le moe e aunoa ma se tainamu i vaega o atunuu e aafia i le faamaʻi o le malaria e lamatia foi. * I mataupu tau le soifua maloloina, e masani lava ona moni ai le faaupuga e faapea “e sili atu ona aogā sina puipuiga itiiti na i lo o le tele o togafitiga.”

O le ola i ni olaga faivalea ua faapogaia ai ona mamaʻi le faitau miliona o tagata ma maliliu ai a o lei tāitai le soifuaga. O le onā, feusuaiga lē mamā, faaaogaseseina o fualaau faasāina, ma le faaaogaina o le tapaa ua faaleagaina ai le soifua maloloina o le toatele. Pe a soona tagofia e se tagata nei mea ma maʻi ai, po ua māfua ea ona ua fai i ai e se isi se faalauatau, po ua osofaia o ia e se agaga? E leai. O ia lava e tuuaʻia i lona maʻi. O le tuuaʻia o agaga, o le teena lea o lana avega tauave talu ai le ola i se olaga faivalea.

O le mea moni, e iai nisi o mea e lē mafai ona tatou pulea. Mo se faaaoaoga, e mafai ona aafia i tatou i se maʻi e māfua ona o siama ninii po o le polusione. O le mea lena na tupu ia Owmadji. Sa lē iloa e lona tinā le mafuaaga na maʻi ai lana tama i le manava tatā. E lē o mamaʻi soo lana fanau e pei o isi tamaiti ona e na te tausia mamā pea lona fale ma le fanua ma e fufulu mamā pea foi ona lima a o lei saunia meaʻai. Ae o tamaiti uma lava, e iai taimi e mamaʻi ai. E 25 isi ituaiga eseese o meaola ninii e mafai ona faapogaia ai le manava tatā. Atonu, e leai se tasi e mafai ona iloaina po o lē fea o na mafuaaga na pogai ai ona maʻi Owmadji.

Le Vaifofo Tumau

E lē tuuaʻia le Atua i maʻi. “E le mafai ona faaosoosoina o le Atua i mea leaga, e le faaosooso atu foi o ia i se tasi.” (Iakopo 1:13) Afai e maʻi se tasi o ona tagata tapuai, e lagolagoina o ia e Ieova i le itu faaleagaga. “E lagolago ane Ieova ia te ia i le taotoga o lona maʻi; e te liua lona moega uma lava i lona maʻi.” (Salamo 41:3) Ioe, e tigaalofa le Atua. E manao o ia e fesoasoani mai ia i tatou, ae lē faatiga ia i tatou.

 O le mea moni, e iai se vaifofo tumau a Ieova mo maʻi—le maliu ma le toe faatuina mai o Iesu. E ala i le taulaga togiola a Iesu, ua laveaiina ai ē saʻo o latou loto mai lo latou tulaga agasala ma o le a iu ai ina maua le ola maloloina lelei atoatoa ma le ola e faavavau i se lalolagi parataiso. (Mataio 5:5; Ioane 3:16) O vavega a Iesu, sa avea o se faataimuaga o le faamalologa moni o le a faia e le Malo o le Atua. O le a aveesea foi e le Atua Satani ma ana temoni. (Roma 16:20) O le mea moni, e iai mea matagofie o loo teuina e Ieova mo i latou e faaalia le faatuatua ia te ia. E manaomia le tau lava ina tatou onosai ma ia tutumau.

I le taimi nei, ua faasalafa atu ai e le Atua le atamai aogā ma le taʻitaʻiga faaleagaga e ala i le Tusi Paia faapea ma le aufaatasiga faaleuso i le lalolagi aoao o tagata tapuai faamaoni. Ua ia faailoa mai ia i tatou le auala e alofia ai masaniga lē lelei ua faapogaia ai faafitauli o le soifua maloloina. Ma ua ia aumaia uo moni mo i tatou o ē o le a fesoasoani pe a tulai mai ni faafitauli.

Seʻi toe mafaufau lava ia Iopu. O le alu atu i se fomaʻi faataulaitu, o se mea e sili atu lea ona leaga e faia e Iopu! O lena mea semanū e aveesea ai le puipuiga a le Atua mai ia te ia, ma leiloa ai faamanuiaga uma sa faatali mai mo ia ina ua mavae ona tofotofoga ogaoga. Sa lei faagaloina e le Atua Iopu, ma o le a ia lē faagaloina foi i tatou. Ua faapea mai le soo o Iakopo: “Ua outou faalogologo i le onosai o Iopu, ma ua outou iloa foi le iuga na tuuina mai e Ieova.” (Iakopo 5:11, NW) Afai tatou te lē faavaivai, o le a tatou maua foi faamanuiaga ofoofogia i le taimi atofaina a le Atua.

O le ā na tupu i si teineitiiti o Owmadji? Sa manatua e lona tinā se mataupu i le Ala Mai! le soa o le mekasini o Le Olomatamata e uiga i togafitiga e toe faafoisia ai le vai i le tino. * Sa ia mulimuli i faatonuga ma saunia se paluga e inu ai Owmadji. O lea la ua toe malosi lelei si teineitiiti.

[Faaopoopoga i lalo]

[Ata i le itulau 7]

Ua fuafuaina e Ieova se vaifofo tumau i le faafitauli o maʻi