Na Latou Faia le Finagalo o Ieova

Ua Filifilia e Maria “le Mea Lelei”

I ASO o Iesu, na saisaitia fafine Iutaia i le tele o faasāsāga i tu faarapi. O lea, na taofiofia ai fafine mai le suesueina o le Tulafono. O le mea moni, o se tasi o manatu na sii mai i le Mishnah na faapea mai: “Afai e aʻoaʻo e se tamā sona afafine e faatatau ia poto i le Tulafono, ua tai pei lava ua ia aʻoaʻoina o ia i faiga soonafai faaleituaiga.”—Sotah 3:4.

O le iuga, o le toatele o fafine Iutaia i le uluai senituri sa lei aʻoaʻoina lelei i latou. Ua faaalia faapea e le tusi The Anchor Bible Dictionary: “E lē o iai ni faamaoniga a o lumanai le auaunaga a Iesu faapea sa iai ni fafine Iutaia sa faatagaina e avea ma soo o se aʻoaʻo sili, ma e mautinoa e lē faatagaina i latou e faimalaga faatasi ma lena aʻoaʻo, po o le aʻoaʻoina o se tasi e ese mai i lana fanau.” O le taʻufaatauvaaina atili o fafine, na oo ai lava ina faatuina e nisi o taʻitaʻi lotu se tulafono e faasā ai le tautala o se tamaloa i se fafine i nofoaga faitele!

Sa teena e Iesu na uiga e lē faaleatua. Sa ia aʻoaʻoina fafine faapena foi ma tane, ma sa iai tane ma fafine na avea ma ona soo. (Luka 8:1-3) I se tasi taimi, sa valaaulia ai Iesu o se malo a Maria ma Mareta. (Luka 10:38) O nei fafine e toalua o tuafāfine o Lasalo, ma o i latou e toatolu sa avea ma soo ma o ni uō lelei a Iesu. (Ioane 11:5) Atonu o lenei aiga sa aloaia, pe a manatunatu atu i le toatele o tagata ia na iai e faamafanafana ia Mareta ma Maria ina ua oti Lasalo. Po o le ā lava le tulaga, ae o le mea lea na tupu i lo latou aiga a o avea Iesu ma malo iina ua aumaia ai se lesona e lē gata mo i latou ae faapea foi ma i tatou.

Aʻoaʻoina Mai ia Iesu

E lē masalomia, na naunau Mareta ma Maria e saunia mo Iesu se ʻaiga tele, ma atonu sa fetaui lelei ma mea na latou maua. (Faatusatusa i le Ioane 12:1-3.) Peitai, ina ua taunuu le la malo, ona alu ane lea o Maria ma “nofo . . . i lalo i tafatafa o vae o Iesu, ma faalogo i lana fetalaiga.” (Luka 10:39) E leai se aganuu faaletagata e mafai ona taofia Iesu mai le aʻoaʻoina o se fafine loto faamaoni sa naunau e aʻoaʻoina! E mafai ona tatou vaai faalemafaufau ia Maria o loo nofo i luma o Iesu, o loo pei o ia o se tagata aʻoga ua matuā uaʻi atu e faalogologo i aʻoaʻoga a lona Matai.—Faatusatusa i le Teuteronome 33:3; Galuega 22:3.

I le lē pei o Maria, ‘sa pupū le loto o Mareta i mea e tele.’ I le sauniunia o se taumafataga tele, sa pisi tele ai o ia i ana galuega e tatau ona fai. E lei umi, ae tiga lagona o Mareta ona ua tuua na o ia e faia uma galuega ae o loo nofo lona uso i tafatafa o aao o Iesu! O lea na faasalavei atu Mareta a o fetalai Iesu ia Maria, atonu na faafuasei ona fai atu: “Le Alii e, e te le manatu mai ea, ina ua tuu mai e loʻu uso ia te au e sauni toatasi? ia e fetalai ane ia te ia, ia fesoasoani mai ia te au.”—Luka 10:40.

I le faatulagaga lava ia, sa leai se mea e sese ai le talosaga a Mareta. Aua foi, o le sauniunia o se taumafataga mo ni tagata o se galuega mamafa, ma o le tiute tauave e lē tatau ona paʻū atu i se tagata e toatasi. Peitai, na silafia e Iesu mai le faamatalaga a Mareta e iai se avanoa e aʻoaʻoina ai o ia i se lesona tāua. Na ia fetalai atu: “Mareta e, Mareta e, ua e popole, ma ua pūpū lou loto i mea e tele; a o le mea lava e tasi e ao ina ia maua; ua filifilia foi e Maria lea mea lelei, e le aveeseina ia te ia.”—Luka 10:41, 42.

Sa lei fetalai atu Iesu faapea sa leai se fiafia o Mareta i mea faaleagaga. I le isi itu, na ia silafia o Mareta o se fafine e loloto lona tuutoina atu faaleatua. * E lē masalomia o le mafuaaga lena na uunaia ai o ia e valaaulia Iesu i lona aiga i le amataga. Peitai, i lona faasaʻo filemu atu, sa faasino atu ai e Iesu ia Mareta, ua pupū tele o ia i le sauniunia o mea taumafa, ua  avea ma mea ua ia misia ai le avanoa lē laumaua e aʻoaʻoina totino ai o ia mai le Alo o le Atua.

E tusa ai ma tu i lena vaitaimi, atonu na lagolagoina ai le manatu faapea o le aogā o se fafine, sa iloagofie i lona agavaa e faia galuega i le aiga. Ae ua faaalia i fetalaiga a Iesu e faapea, sa mafai e fafine faapena foi ma tane ona nonofo i tafatafa o aao o le Alo o le Atua ma mauaina upu o le ola! (Ioane 4:7-15; Galuega 5:14) E tusa ai o lenei mea, sa sili ai ona lelei pe ana saunia e Mareta na o ni nai ituaiga o taumafa eseese—pe na o le tasi foi le ituaiga o taumafa—pe afai o le a ia mauaina ai le avanoa e nofo ai i tafatafa o aao o le Matai ma aʻoaʻoina mai ia te ia.—Faatusatusa i le Mataio 6:25.

Le Lesona mo i Tatou

I aso nei, ua aufaatasi ai tane ma fafine ia i latou ua tali atu i le valaau a Iesu ia “ave fua ia le vai o le ola.” (Faaaliga 22:17) E ala i le uunaia i le alofa, o nisi—ua pei lava o Mareta—ua latou faia le mea e sili latou te mafaia e auauna atu ai i manaoga o o latou uso talitonu. E agavaa tele i latou ma vave ona gaoioi, ma ua folafola mai e Ieova e tauia a latou galuega alofa. (Eperu 6:10; 13:16) O isi atonu e tai pei o Maria. E lē gaoiā i latou ma mafaufau loloto i mea faaleagaga. O lo latou naunau e mafaufau loloto i le Afioga a le Atua ua fesoasoani ia i latou e tausia ai le malosi o lo latou mauaa i le faatuatua.—Efeso 3:17-19.

O ituaiga uma na e lua o tagata e faataulauina se manaoga tāua i totonu o le faapotopotoga Kerisiano. Peitai, o le taunuuga, e ao i tagata uma ona ‘filifilia le mea lelei’ e ala i le faatāuaina muamua o mea faaleagaga. E ala i le faamautinoaina o mea e sili atu ona tāua, o le a tatou mauaina ai le finagalo malie o Ieova ma faamanuiaga.—Filipi 1:9-11.

[Faaopoopoga i lalo]